Markus
Habar ta fié
ta Markus nlefo
Buk Markusé ni wlólo né
Habar ta Fié: Kitab Markusé nje, técegé né Habar ta Fié (B. Ind: Injil pari Kabar Baik), ni ngale Jou Lahatala nané Yesus Kristusé nwóm yama po ité rir fapéluné né ndadi Kristus (B Ibrani: Mesias), Kolano ta Jou Lahatala nejaji tatubé lima lesu bo nfasalamaté kyaté. I ta npe ni diri ndadi korban, bo kyat pai le ta ndélé I né, nase Jou Lahatala nfayangésé keé nó sélsólé né, bóngo kyaté njé bisa nfayal Jou Lahatala re nduk ta fié sogado fajé néli le.
Kyat ta nlefo kitabé nje: Kyat ta runé fié Jou ni Méiténé né, félé be récegé Markusé ta nlefo kitabé nje. Markusé njé, Petrusé ni dél i. Markusé nlongé Petrusé néfétén farimé ta Yesusé npe né. Markusé njé ngósno iglé né Yohanesé (Kis. 12:12). Markusé njé ma po faywóbno ta ndéréré Paulusé i re Barnabas n'gali si rfané bo réfétén Habar ta Fié né po bótén ta lówé (Kis. 12:25). Po kitab ta iglé nóté, Paulusé ma nécegé Markusé njé kyat ta n'gali si ta rfafan Jou ni Méiténé né (2Tim. 4:11).
Markusé nlefo kitabé njé po pai ni: Markusé nlefo kitabé njé po kyaté-kyat ta kyat Yahudi si pa né. Kyaté nesté ma rtolén po bótén nésé, po Israelé né pa. Se kyat ta rduk kitabé njé né, félé be rémnaw Yesus pafule, bóngo si ma runé pa ta féléo ta Yesus re npe né. Se Markusé nlefo kitabé njé bo rféyal Yesus sogado rdélé re rdéréré I.
Dodoto-dodoto ta po kitab Markusé: Markusé néfétén Yesusé ni kawasa né, ta dolo faje: I nfafié kyat ta rpisé (Mrk. 1:29-34, 2:1-12), nfépangéné keé kyat ta re rmóté né (Mrk. 5:35-43), nféyangésé keé kyaté róri sélsól ta félé né (Mrk. 2:1-12), reni félé nóté Yesusé ni kawasa nfaftulo si né. Ta i néféténé né, bo kyat ta rémnaw Yesus pafule ma runé re rdélé I ta fatuwé. Si runé ta Yesusé njé, I ro Kolano ta Jou Lahatala néjaji bo nwómé nfasalamaté kyaté njé (Mrk. 1:11, 1:24, 3:11, 8:29, 9:7, 14:61-62, 15:39). Markusé nlefo kitabé nje bo kyat ta rdéréré Yesusé ma rtébné ne, mayta rdéréré I le (Mrk. 8:34-38, 10:29-31).
Kitab Markus ta isémé né, Markusé néfétén ta agama Yahudi né riri kyat tuté nesté réyówé yéféné bo rpuné keé Yesusé né. I néféténé ndimé ta rfanpuné I, rfakangelang I, bóngo rpaku I po salibé lo sogado nmóté (Mrk. 15). Mayta, ngané telé le, I npangéné nmulé. Rewóré ta néi, Yesusé nfaftulo ni diri po kyaté-kyat ta rdéréré I né. I nané ni motemote nesté rfan po bótén wóm sogado ntit ta wómé bo rfawómo Habar ta Fié lima Jou Lahatala ni po férimé kyaté (Mrk. 16).