Markus 5

Yesusé nfafié kyat isó ta setané ntolno i njé

Yesusé I re ni motemote nesté rdimé po talaga Galilea ni féspalé, po kyat Gerasa né riri bóténé lo. 2 Pocé reni kyat isó njé setané ntolno i. Se ta Yesusé ntebé néya bóténé lo né, kyaté njé ncópén lima kubur legé lo né, bo nfapdipén re Yesusé. 3 Kyat ta njéi, dorém re ngénngané góo be po kubur legé lo. I tadélé nkuaté, se kyat ta pocé né masike rpitén i re rante ma réfen i pa. 4 Sababta re nuén fis néli óro rpitno fao re sóo né re rante, mayta ta po fao lo né nfawetésé keé, ta po sóo lo né ga nfapekété keé. Se reni kyat isó pa ta bisa néfené négbi i. 5 Dorém re ngénngané n'gélay po kubur legé lo, re po métété lo se n'gagélayé bóngo ntoké ni badané né re lóy sogado nyóbété ndimé.

6 Se waktu ta némnaw Yesus lów i lesu né, tabóngo ncéreré néli se nlik nóp Yesus usno lo né, ga ncuba I. 7-8 Tabóngo Yesusé nécegé i faje, “Ee setan ta awé! Msópén pocé kyaté njé ni!”

Bóngo kyaté njé n'gélayé, “Adu! Yesusé, Jou Lahatala tadélé némógé njé ni Ntu ta Awé! Bo mpe ya fawa nte? Dolo Jou, ma mfakangelang ya na!”

9 Pocé Yesusé nutné setan ta rtolno kyaté njé né, “Awé ngósnom pai?”

Tabóngo i ncónglo, “Ya ngósnog Legion^a, sababta amé nte reni caléné.” 10 Pocé setan-setan ta rtolén po kyaté njé né réror po Yesus ni, bo ma nfaungé si po bótén ta njéi na.

11 Pocé fajé reni bów met esó né, tadélé rfélé, réyówé róri mnóm po métété mdi lo né. 12 Se setan ta rtolno kyaté njé né, réceg faje, “Ta fié né mané amé ksung po bowé nesté ni.”

13 Pocé Yesusé npo si fié. Se setané né rcópén po kyaté njé ni, ga rcung si po bowé nesté ni. Tabóngo bowé nesté rcéreré si néli se rwóm po métét wómo lo né, ta ryóg si nóp talaga wlólo né se rmót si ndimé. Bowé né, féléori né nihalé calén luwé.

14 Pocé kyat ta réjaga bowé né télél si, bóngo rcéreré se rfabémbingé néli re lima po kota re pnuwé-pnuw ta pocé né. Se kyaté né rlongé ta néi, tabóngo rwóm néli bo rémnaw sói ta re ndadi i né. 15 Waktu ta kyaté né rwóm po Yesus ni né, rémnawé kyat ta setané ntolno i njé re nbabow pana, re néngalén i fafié se néntolén i. Pocé rémnaw ta re nfié né, tadélé rémtaté. 16 Bóngo kyaté-kyat ta rémnaw Yesusé nfafié kyaté njé né, réfétno keé kyat ta tagare rwóm pocé né. Si réfétén ta setané né re rcópén po kyaté njé ni, se rcung si po bowé nesté ni. 17 Rlongé ta néi, tabóngo kyat ta rtolén po bótén ta njéi né réroré bo Yesusé nfatoléné keé riri bóténé njé bo nfan I po géwgów nésé óro.

18 Pocé bóngo Yesusé ncapél I nmulé po yelé lo, se kyat ta re nfié njé néroré bo i ma ndé Yesusé nóté.

19 Mayta Yesusé wlo pa, se nécegé i faje, “Ta fié né méléy néli po nim umé lo, bo méfétno kyat ta si po pnuwé wlólo né, ta Jou ni féyfié re pélóy po aw ni né, re méfétno si férimé ta Jou npe po aw ni sogado ga re mfié né.”

20 Bóngo kyaté njé nfané se néfétno kyaté-kyat ta po bótén Dekapolis, ta ni ngale né Pnuw Yófésó. I néfétno kyaté-kyaté né ta féléo ta Jou re npe po i ni né. Kyaté né rlongé ta néi né, férimé télél si.

Yesusé nfépangén Yairusé ni ntu ta nmóté njé, re nfafié mépin ta ni léló nfané njé

(Mat. 9:18-26; Luk. 8:40-56)

21 Rewóré ta néi, Yesusé I re ni motemote nesté rcapél si po yelé lo se rpólén si néli nmulé po talaga Galilea ni féspalé. Se re rdimé néli, tabóngo kyat ta félé né rwóm po Yesus ni po talaga lapo lo né. 22 Pocé fajé po pnuw ta njéi né, reni kyat isó ngósno Yairusé nwóm pocé nóté. Kyat ta njéi ndadi kyat tut po agama Yahudi né riri um sambayangé lo. Pocé némnaw Yesusé tabóngo nfan néli ntikibuku se ncuba I. 23 Kyaté njé néror ta fatuw-fatuw po Yesus ni, se néceg faje, “Moke, mdé ya néli po nik umé lo su. Bo mgali ntig mépiné njé, re npisé météwé se. Ya kéroré bo métewlé faomé né néya po i ni bo nfié i ro.” 24 Pocé, bóngo Yesusé ndéréré Yairus néli po ni umé lo.

Kyat ta félé né ma rdéréré Yesusé nóté, sogado ga rfasésisén re Yesus po yéféné lo. 25 Pocé fajé ma reni mépin isó, ta ni léló nfané né ni mnuo re taun nuén yófésó re nuén luwé. 26 Re mnuwé nfaurém po sousou né sogado ni pipisé né re tiso, mayta nfié pa le, ni léló né ntébén pa. Se nkahi i pana.

27 Mépin ta njéi nlongé ta Yesusé nénfafié kyaté né. Se masike kyat félé, mayta nfawsówé si bo nétit Yesusé ni juba njé. 28 Sababta nénuta, “Masike kétit be ni juba njé facuci ma, ya nase kfié.” 29 Waktu ta nétit Yesusé ni juba njé né, télél be ni léló né ntébéné, bóngo nuné ta i re nfié. 30 Pocé Yesusé nuné reni kawasa ta ncópén po ni diri wlólo. Bóngo noslé. Se nélolét I némin too lo né, ga nutné si, “Pai ta nétité nik juba nje?”

31 Ni motemote né rcónglo I, “Ayo é, bo tuné pai nte? Kyat ta féléo ta tfasésiséné nte, ga mutné pai ta nétité nim juba njé né?”

32 Tabóngo Yesusé néngóto néli re lima, néyówé kyat ta nétité ni juba njé né. 33 Pocé mépiné njé némtaté se nwéwewé, sababta nuné i ta nétit Yesusé ni juba njé sogado re nfié né. Bóngo, nfarakné i néli po Yesus ni, ntikibuku se ncuba I, bóngo néceg faje, “Ya ta kétité nim juba njé né, se re kfié ya.”

34 Bóngo Yesusé nécegé i faje, “Neke, awé mdélé Ya se re mfié. Se méléyé ro re wlem ta nténténgéné njé, sababta awé nte fatuw-fatuw ta re mfie óro.”

35 Waktu Yesusé nméitén re mépiné njé lesu, télél be reni kyat séfis néli rwóm lima Yairusé ni umé lo, se récegé Yairus faje, “Moke, ma mfakangelang Guru njé le na. Sababta ntimé njé re nmóté.”

36 Pocé, Yesusé nlongé ta rfébingé né mayta nfaténténgén I, maduga nécegé be Yairusé, “Déko, wlemé njé ma nkangelang na! Mdélé le.”

37 Pocé bóngo Yesusé nfan néli po Yairusé ni umé lo, mayta wlo pa bo kyat ta félé né rdé I, se maduga nané be Petrusé, Yakobusé, re ni fténo Yohanesé ta rdé I né. 38 Se ta re rwóm po Yairusé ni umé lo né, Yesusé némnawé kyat ta rtangésé né tadélé rgégliné. 39 Bóngo Yesusé ncung néminé se nutné kyaté-kyat ta pocé né, “Fpe sói se fgégliné re ftangésé? Yomya njé nmót pa, maduga nyénéfé le.” 40 Mayta kyaté né rémlifo keé Yesusé, sababta si runé ta yomya njé re nmóté.

Pocé Yesusé nané kyat ta si pocé né rcópéné ndimé. Rewóré ta néi, Yesusé nut yomya njé ni moke re neke, re ni motemote ta I re si nesté se rcung némin po yomya njé ni kamaré lo. 41 Bóngo Yesusé nétané yomya njé ni fao né, se néceg faje, “Talita kum^b,” ta ni ngale né, ‘Yomya mépin ta awé! Mpangén óro!’

42 Waktu ta néi óro, yomya njé npangén néya, se nfan i néli re lima. Pocé, férimé kyat ta rémnawé né télél si ndimé. (Yomya njé ni umuré né re taun nuén yófésó re nuén luwé).

43 Bóngo Yesusé nécegé si faje, “Ma féfétén na, ta Ya re kfépangén yomya njé né.” Bóngo nané yomya njé ni délut si, bo réfai yomya njé.