Iga Yesusé néléy po ni pnuwé lo né, kyaté né rlongé I pa
6
Rewóré ta néi, tabóngo Yesusé néléy néli po ni pnuw Nazareté. Ni motemote nesté ma rdé I nóté. 2 Pocé po ngénngan Sabaté né, Yesusé nfasodoto kyat po agama Yahudi né riri um sambayangé lo. Pocé kyat félé ta rlongé ni dodoto né rtélélé, se réceg faje, “Beé, ni dodoto né nuné fawa lima é? Pai ta nfasodoto I, ta mulo nuné ndimé né? Bóngo ni kawasa né ma ta délé pélóyé, sogado npe mujizat ta ité nte témnaw pafule! 3 Momongo, I ta njé ni yabé né npe be ayé. I ni neke njé Maria. I ni fténo né Yakobusé, Yosesé, Yudasé, re Simoné. I ni rémó nesté ma it re si pote faje. Ceh, néga nuné fawa lima é?” Pocé bóngo wlori piso I se rlongé I pana.4 Bóngo Yesusé ncónglo si, “Fatuwé ro, iga nabi faisó ga nfan po kyaté ni pnuwé, rlongé i fié. Mayta bo néléy po ni pnuwé lo né, fténo re remó spalé luwé né sogado ga kyat ta po ni umé wlólo né ma, rlongé i pa.”
5 Yesusé npe mujizat po ni pnuwé lo né, maduga cuci le, sababta kyaté né rdélé I pa. Se maduga nétewlé be fao né po kyat séfis néli ta rpisé né se rfié si. 6 Pocé Yesusé télél I, sababta kyat ta pocé né rdélé I pa.
Yesusé nané ni motemote né bo rfafané né ni dodoto
Rewóré ta néi, Yesusé nfané se nfasodoto kyat po pnuw re pnuwé. 7 Pocé bóngo nkakémé ni motemote yófésó re séluwé nesté, bo nané si rféfané ni dodoto né, iga rfané kyat faséluw-séluwé. Ta rfan pafule né, npo si kawasa bo rféungé setan-setané né. 8 Bóngo nfaftóto si faje, “Iga ffané, ma fut fagélesó na, maduga fut be tétoné. Mayta yéléné, ngélngaléné, re pipis po snomi ni pétpiténé lo ma ndél pa bo futé! 9 Fpake nimi sandalé né, mayta ma futé nimi ngélngalén na.” 10 Pocé Yesusé nécegé nóté, “Iga fan po géwgów faisó ga rtarima mew po riri umé lo, ftolén pocé óro, ma flué mew néli re lima le na, sogado fsópén po pnuw ta njéi ni. 11 Mayta iga po géwgów ta njéi ga ruté mew lé pari rlongé mew pa, ffané bo ffatoléné keé si. Bo paplaé ta po sóomi lo né fatété keé pocé, fpe fajé bo runé ta si re rcól po Jou Lahatala ni.”
12 Yesusé nméiténé rewóré, tabóngo ni motemote nesté rfané se rfébingo kyaté-kyaté né rngali si bo rdéréré Jou Lahatala óro. 13 Si ma rfaungé setan félé ta rcung si po kyaté-kyaté né, bóngo résao kyat félé ta rpisé né re yégété se rfié si ndimé.
Rpuné keé Yohanes ta nénbaptisé kyaté njé
14 Kyaté né réfétén Yesus néli re lima, se kyat félé re rlongé, sogado kolano Herodesé ma nlongé. Se reni kyat iglé né réceg faje, “Yesusé njé nihalé Yohanes ta nénbaptisé kyaté se tatubé lima re nmóté mayta nihalé npangéné nmulé, ta mulo ga ni kawasa né pélóyé.”
15 Iglé récegé, “I nabi Elia.”
Iglé nóté récegé, “I dolo nabi isó nóté po tatubé lima nesté, ta rfawómo Jou Lahatala ni faftóté po it ni njé.”
16 Mayta kolano Herodesé nlongé ta réféténé né, bóngo néceg faje, “Alli! Kyat ta njéi, Yohanes ta nénbaptisé kyaté njé ro, ta ya re kéwetésé keé ni béboko njé se nmóté, mayta re npangéné nmulé!”
17 Herodesé néceg fajé né, sababta ngané fis lima né, Herodesé nané rgó Yohanesé se rpitén i re rante, ga rfasungé keé i po bui wlólo. Sógado npe fajé né, ni mdio faje: kolanó Herodesé néfsóo ni fténo Filipusé ni pégelé ta ngósno Herodiasé njé. Mayta Yohanesé wlo pa, sababta Herodiasé njé re néfsóo Herodesé ni fténo Filipusé. 18 Se re nuén fis néli Yohanésé ncawan Herodesé, se nécegé i faje, “Moke, awé nte re msólé, sababta méfsóo keé nim tarino Herodiasé. Iga po ité rir hukum agama né, ndél pa bo téfsóo kyaté ni pégelé!”
19 Se Herodiasé nlongé ta Yohanesé néceg fajé né, tabóngo nisno Yohanesé wloné se bo nfamóté keé i. Mayta nduk yéfén pafule, 20 sababta kolano Herodesé némtat Yohanesé, se masike Yohanesé i po bui wlólo, mayta Herodesé néjaga i fafié. Sababta i nuné, Yohanesé njé kyat isó ta nmétegél po Jou Lahatala usno lo. Se Herodesé nénkakém Yohanesé, masike ni méiténé né nfakangelangé wlo njé, mayta Herodesé wlo ncuka nlongé.
21 Nuéncó Herodesé ni pégelé nduké ni yéfén cuci, mgo po kolano Herodesé ni hari jadi lo. Se kolano njé npe rameangé bóngo nkakém pemerentah re tentara ta pélóy-pélóyé né, re kyat iglé tadolo rpélóy cuci ta si po bótén Galilea né. 22 Se rpe rameang faje, néga télél be Herodiasé ni ntu mépiné njé ncung néminé ga ncawélé. Yomya njé ncawélé né fié, sogado kolano Herodesé i re ni délé né mgo wlori. Pocé, kolano Herodesé nkakém yomya njé bóngo nécegé i faje, “Awé msawélé né i ni fié! Se nte bo méror sói le, ya nase kdo awé ndimé.” 23 Bóngo kolano njé ncasi ga néceg faje, “Sói le ta yomya mépiné njé néroré né, sogado haréta féspal po nik bótén ta ya kkawasa lo ma, nase kdo ni ndimé.”
24 Mépiné njé nlongé ta néi, tabóngo ncópéné ga nfano ni neke se nutné i, “Neke, ya nte bo kéror sói po kolano njé ni?”
Bóngo yomya njé ni neke nécegé i faje, “Méror be Yohanes ta nénbaptisé kyaté njé ni béboko njé.”
25 Bóngo yomya mépiné njé nfabable npólén i po kolano Herodes ni, se nécegé i faje, “Ya kéror Yohanes ta nénbaptisé kyaté njé ni béboko njé mpe po baki lo, nete óro.”
26 Waktu kolano Herodesé nlongé sói ta yomya mépiné njé néroré né, ni wlo njé tadélé nkangelangé. Mayta i re ncasi po kyat ta félé usnori lo, se bo npo i pa ma bisa pa. 27 Se po waktu ta néi óro, kolano Herodesé nkakémé ni tentara isó, bóngo nané i nfan néli po bui lo bo néwetésé keé Yohanes ta nénbaptisé kyaté njé ni béboko njé. Pocé bóngo tentara njé nfan néli bui lo, se néwetésé keé Yohanesé ni béboko njé. 28 Rewóré ta néi, npe i po baki lo, bóngo npo yomya mépiné njé. Se yomya njé nyó i ga, npo ni neke. 29 Pocé Yohanesé ni motemote né rlongé ta Yohanesé re nmóté né, tabóngo rwóm néli réyó ni mayaté njé se rput i.
Yesusé nfamnómé kyat calén limé
30 Yesusé ni motemote ta nané si rfafané ni yabé né, re rpolén si se rfajólo si po Yesus ni. Bóngo réfétno I sói ta si re rpe, re ta rfasodoto kyaté né. 31 Mayta po waktu ta néi, kyat ta rfan néli re lima pocé né tadélé félé, sogado Yesusé I re ni motemote nesté bo rémnómé ma bisa pa. Se Yesusé nécegé ni motemote nesté faje, “Mew lima, tfan néli po géwgów ta béklingéné lo né, bo tfatóiné it facuci.” 32 Bóngo rcapél si po yelé lo se rfan si po géwgów ta béklingéné lo né bo rfatóiné si pocé. 33 Mayta kyat ta félé né rémnaw ta re rapé né, rféyal si. Se kyaté-kyat po férimé pnuw ta pocé né rbable rdé po lewé bo rwómé rtubé po géwgów ta Yesusé I re ni motemote nesté bo rfano lo né.
34 Waktu ta Yesusé ntebé nélew po bóténé lo, se némnawé kyat félé ta réftón I pocé né. Bóngo nmésié si, sababta nfatailo si né tadolo domba ta re riri wlón pa, se isó nfaménawé si pa né. Pocé, bóngo Yesusé nfasodoto si félé.
35 Ta re mérimé né, Yesusé ni motemote nesté rwóm po I ni, bóngo récegé I faje, “Guru, géwgów ta ntei nélówé pnuwé, ga taga rebo dorémé. 36 Se ta fié né mané kyat ta félé nte rfané ro, bo rgoné róri mnóm po pnuwé-pnuw ta rakén pote né.”
37 Mayta Yesusé nécegé si faje, “Mare mewé ta fdo si mnómé né!”
Si rcónglo I, “Alli, kyat ta féléo i nte ga! Mare tpe yabé né reni sni bo re tduk pipis fafélé, ga tagare téfené tgoné róri mnómé!”
38 Pocé Yesusé nutné si nóté, “Nómi roti ta futé né péfisé? Coba féflengén su!”
Réflengéné rewóré, bóngo récegé Yesus faje, “Reni roti pélimé, re in séluwé.”
39 Bóngo Yesusé nané kyaté né rfajólo si néli-néli bo rtolén po gémuné ta fié lo né. 40 Se rtoléné né rpe géwgów esó ni kyaté né reni ta witéncó, reni ta yófé limé. 41 Rewóré ta néi, Yesusé nyó roti pélim re in séluwé né, bóngo nékngól néya langété lo, ga néceg tarima kasi po Jou Lahatala ni. Rewóré, ga nfakpekté roti né, se npo ni motemote nesté bo rfanténo kyat ta félé né. Fajé nóté re in séluwé né. Nyó ga npo ni motemote nesté, bo rfanténo kyaté né nóté. 42 Se férimé kyat ta pocé né rémnóm sogado rmesé. 43 Rémnómé rewóré, Yesusé ni motemote nesté rfajólo in re roti ni gléo né, ni féléo lélógéi yófésó re paluwé né békbaké ndimé. 44 Ngénngan ta néi, kyat ta rémnómé né calén limé, necé rétén be móné né.
Yesusé nénfan I po wóé pépo lo
45 Rewóré ta néi, Yesusé nané ni motemote nesté rcaplo yelé bo rtubé néli po pnuw Betsaida, ta po talaga ni féspalé né, kyat ta félé né ga nané si réléyé. 46 Waktu kyat ta félé né re réléy si, tabóngo Yesusé négafét I néya po métété lo, bo nméiténé ndé Jou Lahatala.
47 Ta re dorémé né, Yesusé ni motemote nesté rapé né tagare rwóm po talaga fapéluno, Yesusé ga nkumél I po bóténé lesu. 48 Se némnaw ta rtomo róri moré njé sogado rapé ma réfen pana, sababta moré njé tadélé nbabubé. Bóngo ta re rakno mélówé né, Yesusé nfano si néli né ndé I po wóé pépo lo. I ni maksuté né bo néliw si néli. 49 Mayta waktu ta rémnaw I nfan po wóé pépo lo né, si récogo ma haiwan wólét I, se rgagélayé 50 sababta rémtaté. Pocé Yesusé nécegé si faje, “Ffaténténgéné mewé, ma fémtat na. Neje Ya óro!”
51 Pocé Yesusé ncapél néya po riri yelé wlólo né, tabóngo moré njé ma ntébéné. Se ni motemote nesté rémnaw ta néi, tabóngo tadélé rdéngó. 52 Si rdéngó né, sababta masike re rémnaw Yesusé nfamnóm kyat calén lim péséwé né, mayta tadélé rcae pafule Yesusé ni kawasa ta pélóyé né. Sababta, waktu ta néi wlori né métué lesu.
Yesusé nfafié kyat félé ta rpisé po Genesareté
53 Waktu ta Yesusé I re ni motemote nesté re rwóm po talaga ni féspal po géwgów isó ta ngósno Genesareté njé, bóngo rtapu keé riri yelé né pocé. 54 Se rtebé néya bóténé lo né, kyat ta félé né rféyal ta nejé Yesusé. 55 Tabóngo férimé kyat ta rtolén po bótén ta njéi né, rcéreré se rfabéngbingé ta Yesusé re nwómé né, bóngo ruté kyat ta rpisé né, rfasibo re riri musala nuéncó le, se rut si néli po géwgów ta runé Yesusé bo nfano lo né. 56 Po géwgów pua le ta Yesusé nfano né, po pnuwé-pnuw pari, po kota-kota pari, kyat ta rpisé né rut si néli, se rfépelé keé si po géwgów ta reni kyat félé ta Yesusé bo ndélo né. Pocé kyaté né réroré bo rétané Yesusé ni juba njé, masike be ni wómo né le. Pocé kyat ta rpisé né rétané ni juba wómo né, tabóngo rfié si ndimé.