Rfamót Yohanes ta nénbaptisé kyaté njé
14
Po waktu ta néi, Herodesé ta ndadi kolano po bótén Galilea, se nlongé ta kyaté né réfétén Yesus néli re lima né. 2 Tabóngo néceg faje, “Alli, Yesusé njé nihalé Yohanes ta nénbaptisé kyaté njé tatubé lima re nmóté se npangéné nmulé é! Ta mulo, ga bisa npe mujizaté né sababta reni kawasa!”3 Kolano Herodesé néceg fajé né, sababta ngané fis lima, i ta nané rgó Yohanesé se rpiténé keé i re rante ga rfasungé keé i po bui wlólo. I npe fajé né, sababta kolano Herodesé nyó Herodiasé se néfsóo nó i, padahal ta Herodiasé njé re néfsóo Filipusé, Herodesé ni fténo tuo i. 4 Se Yohanesé ncawan Herodesé né nécegé i faje, “Moke, awé nte re msólé, sababta méfsóo keé nim tarino Herodiasé né. Iga po rir hukum agama né, ndél pa bo téfsóo kyaté ni pégelé!”
5 Herodesé nlongé ta néi, tabóngo nané ni kyaté né rgó Yohanesé bo rpuné keé i, mayta némtaté kyat ta félé né, sababta kyat ta néi runé Yohanesé njé nabi ta nénfawómo Jou Lahatala ni faftóté njé.
6 Ta Herodesé npe ni hari jadi né, Herodiasé ni ntu mépiné njé ncawél po Herodesé i re kyat ta félé né usnori lo. Ncawél né fié, se Herodesé ta délé mgo wlo. 7 Se néjaji né sogado ncasi, “Bo yomya njé néror sói le nase kpo ndimé.”
8 Pocé bóngo yomya njé ni neke nané i nfan po Herodes ni bo néceg faje, “Ya kéroré bo Yohanes baboko njé mpe i po baki papo lo bo mdo nik i, nete óro po kyat ta félé nte riri usnori lo nte.”
9 Herodesé nlongé ta yomya mépiné njé néceg fajé né, wlo njé ta délé nkangelangé. Mayta, nmóyo ni jaji ta re ncasi po kyat ta félé usnori lo né, se nané ni kyaté né bo rpo le sói ta yomya mépiné njé néroré né. 10 Pocé bóngo ni kyaté né si néli po bui lo, se réwetés keé Yohanesé ni béboko njé. 11 Réwetés i rewóré, bóngo rpe i po baki lo, ga rpo yomya mépiné njé se nut i néli po ni neke ni. 12 Yohanesé ni motemote nesté rlongé ta Yohanesé re nmóté né, tabóngo rwómé ryó ni mayaté njé se rput i. Rewóré ga rfané se rfébingo Yesus ta Yohanesé re nmóté né.
Yesusé nfamnóm kyat calén lim re glé
13 Yesusé nlongé ta Yohanesé re nmóté né, tabóngo ncapél I po yelé lo, se nfan I po géwgów ta béklingéné bóngo nélówé pnuwé né bo nkumél I pocé. Mayta waktu kyat félé ta rtolén po kota ta pocé né rlongé ta néi, tabóngo rcópéné se rfané rfajalé I, bo rfapdipéné rdé I. 14 Waktu ta Yesusé tagare ntebé nélew po bóténé lo né, némnawé kyat ta félé né se nmasié si, tabóngo nfafié keé kyat ta rpisé né.
15 Ta ngénngané njé bo ncep nópé né, Yesusé ni motemote nesté rfano I néli se récegé I faje, “Guru, géwgów ta ntei nélówé pnuwé, se ta fié né mécego kyat ta félé né bo rfan po pnuw re pnuwé bo rgoné róri mnómé.”
16 Mayta Yesusé nécegé si faje, “Matiné, ma fané si rfan na. Sababta mare mewé ro ta bo fdo si mnómé.”
17 Ni motemote nesté ga rcónglo I, “Alli, ga mam yéléné nte maduga roti pélim re in séluwé.”
18 Pocé bóngo Yesusé nécegé si faje, “Pana fajé, fut lima óro.”
19 Rut néli, bóngo Yesusé nané kyat ta félé né réyówé góori bo rtoléné nóp po gamuné papo lo né. Pocé bóngo nyó roti pélim re in séluwé né, ga néngóto néya langété lo se néceg tarima kase po Jou Lahatala ni. Rewóré, ga nfalkelsé roti né se npo ni motemote nesté bo rfanténo kyat ta félé né. 20 Pocé bóngo férimé si rémnóm sogado rmesé. Rémnómé rewóré, Yesusé ni motemote nesté rfajólo mnómé gléo né, ni féléo lalógéy yófésó re paluwé. 21 Kyat ta rémnómé né nihalé calén limé, necé tagare móné, rfaétno mépin re yomya né pafule.
Yesusé nénfan I po wóé papo lo
22 Rewóré ta néi, Yesusé nané ni motemote nesté rcaplo yelé bo rtubé néli po talaga njé ni faspalé. Kyat ta félé né ga, nané si réléy su. 23 Waktu ta Yesusé nané kyat ta félé né réléyé, tabóngo négafét I néya po métét papo lo né bo nkumél I, pocé reni kyat nésé pa tabóngo nméiténé ndé Jou Lahatala sogado dorémé. 24 Ni motemote nesté ga re ralów nélaw po talaga njé ni fapéluné né. Pocé moré re méwruwé njé néslo si se bo rlé, rtomo róri moré njé se.
25 Ta re bo malówé né, Yesusé nfano si néli né nénfan I po ya wolét papo lo. 26 Pocé ni motemote nesté rémnaw ta nfano si néli né, ta délé rémtaté se réceg faje, “Alli, njé nihalé haiwan wolet I!” Bóngo tadélé rémtaté se rgagélayé.
27 Yesusé nlongé ta rgélayé né, tabóngo nécegé si faje, “Ffaténgténgéné mewé! Ma fémtat na! Neje Ya!”
28 Bóngo Petrusé ncónglo I néli, “Guru, iga fatuw ta njé Awé, mané ya kfan néli Aw ni, kdé po wóé papo lo.”
29 Yesusé ncónglo, “Iya, aw lima óro.”
Pocé bóngo Petrusé nfateglo i nóp wóé lo se nfan néli Yesus ni. 30 Nfan néli nwómo Yesus pafule, né ga nbósém moré njé nufé né nbabubé se némtaté, tabóngo bo némdiré, se n'gélayé, “Guru, mgali ya!”
31 Tabóngo Yesusé nfabable ncélok Petrus fao né se nélóngé i néya, ga nécegé i faje, “Petrusé, Ya kpe sogado mfan po wóé papo lo, néga pe sói se wlemé njé nfatutén sogado mdélé Ya né maduga cuci le?”
32 Rewóré ta néi, si dórén luwé rcapél néya po yelé lo, télél be moré njé ntébéné se maklóngéné. 33 Bóngo férimé kyat ta po yelé wlólo né rcuba Yesusé, se réceg faje, “Guru, fatuwé Awé Jou Lahatala ni ntu Awé.”
34 Ta re rwóm po talaga njé ni faspalé né, rdime nélew po pnuw Genesareté. 35 Se kyat fapnuw ta pocé né rfayal ta nwómé njé Yesusé, bóngo rfabéngbingé néli re lima po pnuw re pnuwé. Se kyaté né rlongé bóngo rwóm lima, rut férimé kyat ta rpisé né po Yesus ni. 36 Kyat ta rwómé né, réroré bo rétané be Yesusé ni juba wómo né bo rfié, bóngo férimé ta rétané I né rfié si ndimé.