Tdéréré be Jou ni dodoto, ma tiwno re kyaté ni dodoto na
15
Nuéncó, reni kyat Yahudi ta rdéréré dodoto Farisi, re guru-guru agama Yahudi ta runé fié Musa ni kitab abén limé né, si dórén fis néli rwóm yama kota Yerusalemé se rfan po Yesus ni bóngo rutné I, 2 “Moke, pe sói se nim motemote nesté rdéréré ité rir gele re gae né riri aturané né pa. Sababta rir délut tatubé lima né rané, iga bo témnómé mare téus faoré né su, mayta nim motemote né réus faori pafule ta rémnómé róri.”3 Bóngo Yesusé ncónglo si, “Mewé ma fdéréré pa Jou Lahatala ni parenta né, se maduga fdéréré be nimi délut tatubé lima nesté riri aturané né. 4 Sababta reni Jou Lahatala ni parenta né tadolo faje, ‘Mewé mare fhoromaté nimi moke re neke nesté,’ bóngo, ‘Pai ta nfakcegé ni moke pari ni neke njé, nase rfasól i sogado nmóté.’a 5 Mayta mewé ga ffasodoto kyat iglé né, iga róri sói néli ta bo rgali riri moke pari neke nesté né ma rpo si na, bo ta fié né rfara keé bo rpeé riri sadéka po Jou Lahatala ni. 6 Mewé nimi dodoto ta néi, tadolo fané si bo ma rgali riri moke pari riri neke nesté na. Iga fpe fajé, necé fdéréré pana Jou Lahatala ni parenta né, se maduga fdéréré be menimi aturané né le. 7 Ee, mewé kyaté-kyat ta fmalólé né! Sói ta tatubé lima Jou Lahatala re néceg po nabi Yesaya ni Buké wlólo né fatuwé ro, ta ni glio né tadolo faje,
8 ‘Kyat ta nte rtail Ya né maduga be po sumori lo,
mayta po wlori wlólo né rdélé Ya pana.b
9 Rtail Ya né reni ngale gélesó pa,
sababta ta si rfasodoto né Ya nik dodoto pa,
mayta kyaté ni dodoto.’ ”
Méitén ta nfalélé it po Jou Lahatala ni
10 Rewóré ta néi, Yesusé nkakémé kyat ta félé né se nécegé si faje, “Flongé fafié ta Ya kécegé nte bo fsae! 11 Sói ta tfasung po sumoré lo né, necé nfalélé it po Jou Lahatala ni pa. Mayta ta tcópné tdélé po sumoré lo né, necé ta nfalélé it po Jou Lahatala ni né.”
12 Rewóré ta néi, Yesusé ni motemote nesté rfano I néli se récegé I faje, “Guru, méitén ta méceg péséwé né, kyaté-kyat ta rdéréré dodoto Farisi nesté ryó ni ngale.”
13 Mayta Yesusé nécegé si faje, “Kyaté-kyat ta néi rfasodoto né, kfatailo dolo téntóném ésó ta nik Moke Jou Lahatala ntóném i pa. Se nuéncó, nase bo népaténé keé i re ni wówo nuéncó le. 14 Se kyat Farisi nesté fajé si ro, sababta runé riri gélesó pa mayta rfasodoto kyaté. Kfatailo si né dolo kyat ta rébyafé se rtuda ta rébyafé nóté se nase férimé si bo rémnap po lopé wlólo.”
15 Pocé bóngo Petrusé nécegé Yesus faje, “Guru, ta méceg péséwé né ni ngale sói? Coba mfébingo amé.”
16 Bóngo Yesusé nécegé si faje, “Alli! Se mewé ma fsae pafule ni ngale né? 17 Mewé nase re funé, sói ta tó re tinémé né, ncung po snoré wlólo se tfané keé nmulé to? Ta néi pa ta nfalélé ité né. 18 Mayta méitén ta lé ta técegé se ncópén yama wloré wlólo né, necé ta nfalélé it po Jou Lahatala ni. 19 Sababta, reni méitén ta ncópén yama wloré wlólo ta nfalélé ité né, tadolo faje: fikiran ta lé, rfapuné, ryó sólé, rdéréré be riri nafsu ta pélóyé né, rfalewésé, rmalólé re réceg be kyaté. 20 Se férimé ta lé tadolo fajé né, necé ta tcól po Jou Lahatala ni. Mayta iga bo témnómé ga téus faor pa, necé nfalélé it po Jou ni pa.”
Yesusé n'gali mépin Kanaan ta ndélé Jou fié njé
21 Rewóré ta néi, Yesusé I re ni motemote nesté rfatoléné keé géwgów ta néi, se rfan néli po bótén ta nérakén kota Tirus re Sidoné né. 22 Pocé reni mépin isó njé kyat Kanaan i, i lima bótén ta néi, se kyat Yahudi i pa. Nwóm po Yesus ni se nécegé né nfakwat i, “Moke, kolano Daudé ni ntu re gbu ta Awéc, mmasié ya nte! Ntig mépiné njé setané ntolno se ta délé nkangelangé!”
23 Mayta Yesusé ncónglo i pa. Bóngo re ni motemote nesté rfano I néli se récegé I faje, “Guru, mané mépiné njé bo néléy su, bo ma ngagélay po tooré lo le na.”
24 Mayta Yesusé nécegé si faje, “Jou Lahatala nané Ya kwómé nte, bo kgali be ité rir kyat Israel ta kfatailo si dolo domba ta rcól yéféné se rdélo riri yéfén nésé né.”
25 Mayta masike Yesusé néceg fajé ma, mépiné njé i néli le, ncuba nóp Yesus sóo lo né, bóngo néceg faje, “Moke, mgali ya su pa!”
26 Pocé bóngo Yesusé nécegé i faje, “Awé nte kyat Israel aw pa, se iga bo kgali awé, necé dolo lé. Ya kfatailo dolo yomya né róri roti ta re rfasadia né se kafao keé yawé né róri.”
27 Mépiné njé ga ncónglo Yesus faje, “Molén Awé Moke, mayta yaw ta si po meja pópo né ma ró róri riri wlóné njé nó mnómé gléo ta mnap nóp po róri meja pópo lo né.”
28 Pocé, Yesusé nlongé ta mépiné njé néceg fajé né, tabóngo nécegé i faje, “Neke, awé fatuw-fatuw ta mdélé Ya, se sói ta méroré né ndadi i ro.” Po waktu ta néi óro, mépiné njé ni ntu njé nfié i.
Yesusé nfafié kyat félé ta rpisé né
29 Rewóré ta néi, Yesusé I re ni motemote nesté rfatoléné keé géwgów ta néi, se rfané rcófe si néli po talaga Galilea lapo lo né. Rewóré ga régafét si néya po métété papo lo se réntolén si pocé. 30 Po waktu ta néi, reni kyat félé rwómé ruté riri dél ta rkafé, ta rlugu, ta rébyafé, ta rmémewé, re kyat iglé nóté ta re riri péspisé sói le, rut si néli po Yesus usno lo né bóngo nfafié keé si ndimé. 31 Se kyat félé ta si pocé né, rherané sababta rémnawé kyat ta rmémewé né re bisa rméiténé, ta rlugu né ma rfié, ta rkafé né ma rfané, ta rébyafé né ma bisa rémnawé. Tabóngo rcuba re rtail Jou Lahatala, Jou ta kyat Israelé né rancuba I njé.
Yesusé nfamnóm kyat calén fót re glé
32 Pocé, tabóngo Yesusé nkakémé ni motemote nesté se nécegé si faje, “Ya kmésié kyat ta félé nte. Re ngané telé ro si re Ya pote né, se re róri mnóm pana. Ya wlegé néfeno pa, bo kané si réléy re snori ta mémowélé né. Kdodato be po yéféné lo ga résmaputé.”
33 Tabóngo ni motemote nesté récegé I faje, “Moke, géwgów ta ntei nélówé pnuwé, ga bo tduké róré mnóm fawa lima bo téfao kyat ta féléo i nte?”
34 Bóngo Yesusé nutné si, “Nómi roti ta futé né péfisé?”
Si rcónglo I, “Péfité, re iné mya séfis néli.”
35 Pocé tabóngo Yesusé nané kyat ta félé né réyówé góori bo rtoléné. 36 Se re rtolén nópé, bóngo néyó roti péfit re in séfis néli nesté, se néceg tarima kase po Jou Lahatala ni. Rewóré ta néi, nfalkelsé roti re nfamkimsé iné né, bóngo npo ni motemote nesté se rfanténo kyat ta félé né. 37 Bóngo férimé si rémnóm sogado rmesé ndimé. Rémnómé rewóré, ga ni motemote nesté rfajólo mnómé gléo né, ni féléo férimé téglas péfité né rbékbaké ndimé. 38 Kyat ta rémnóm po waktu ta néi, ni kyat tut móné le férimé calén fóté. Necé rétén mépin re yomya né pafule. 39 Rewóré ta néi, bóngo Yesusé nané kyat ta félé né réléyé. I re ni motemote nesté ga ncapél si po yel esó se rfan po bótén ésó ngósno Magadan.