Yesusé nfamnóm kyat calén fóté
8
Waktu ta néi, reni kyat félé nóté ta rfajólo si po Yesus ni né. Sababta re róri mnóm pana, se Yesusé nkakémé ni motemote nesté bóngo nécegé si faje, 2 “Ya kmésié kyat ta félé nte, sababta re ngané telé wlólo nte Ya re si pote. Se nete re róri mnóm pa na. 3 Iga Ya kané si réléyé ga rtélóté, nase résmaput si po yéféné lo, sababta iglé nte rwóm lima géwgów ta lówé.”4 Yesusé ni motemote nesté rlongé ta néceg fajé né, tabóngo récegé I faje, “Guru, géwgów ta ntei nélówé pnuwé, se nase bo tfamnóm si fanfawa?”
5 Bóngo Yesusé nutné si, “Nómi roti ta pocé né reni péfisé?”
Si rcónglo “Reni péfité.”
6 Pocé ga Yesusé nané kyat ta félé né rtoléné. Rewóré ta néi, ga Yesusé nyó roti péfité né, se néceg tarima kase po Jou Lahatala ni rewóré, ga nfakpekté se npo ni motemote nesté bo rfanténo kyat ta félé né. 7 Po si ni ma, reni iné myaku séfis néli nóté. Bóngo Yesusé nyó iné né se néceg tarima kase po Jou Lahatala ni, rewóré ta néi ga nané ni motemote nesté bo rfanténo kyat ta félé né nóté. 8 Pocé ga rémnóm sogado rmesé ndimé. Rewóré ta néi, ga Yesusé ni motemote nesté rfajólo mnómé ni gléo né, ni féléo lalógéy péfité né békbaké ndimé. 9 Kyaté-kyat ta rémnóm waktu ta néi, féléori né nihalé calén fótéa. Rémnómé rewóré, ga Yesusé nané si réléyé ndimé. 10 Yesusé I re ni motemote nesté ga rfalówé rcapél si po yelé lo, bo rpe néli po bótén Dalmanuta.
Kyaté né rané Yesusé npe faféyalé bo runé ta I yama Jou Lahatala ni
11 Kyaté-kyat Yahudi ta rdéréré dodoto Farisi né, rwómé bo réyówé Yesusé nó sélsólé se rané I npe mujizat faesó bo runé ta fatuw-fatuwé, I yama Jou Lahatala ni.
12 Yesusé nlongé ta réceg fajé né, dolo bo ncawané se nécegé si faje, “Pe sói se kyaté-kyat ta isémé nte rané Ya kpe mujizaté bo runé ta Ya I yama Jou Lahatala ni? Ya kécego mewé, Ya nase kfaftulo mew mujizat faesó le ma tisé.”
13 Tabóngo Yesusé nfatoléné keé si. Se I re ni motemote nesté rcapél si nmulé po yelé lo bo rpe néli po talaga ni féspalé.
Fpe mew fafié ma sogado fdéréré keé kyat léo né na
14 Waktu ta néi, Yesusé ni motemote nesté rfatélolmo si pa se rut roti pa. Ta po sini né, maduga roti pusó ta i po riri yelé wlólo njé le. 15 Tabóngo Yesusé nécegé si faje, “Mare fpe mew fafié, sababta kyat Yahudi ta rdéréré dodoto Farisi nesté, si re kolanob Herodesé ni kyaté né, róri ragi né lé.”
16 Mayta Yesusé ni motemote nesté runé ni ngale né pa, se rfatuténé, “Alli, sogado rir Guru njé néceg fajé né, sababta ité tut roti pa né ga.”
17 Mayta Yesusé nuné ta rfalécego né, se nécegé si faje, “Mewé nte facogo ma ta Ya kéceg fajé né kfatésónglé roti né? Fdéréré Ya ta mnuo i nte ga, fdélé pa le né! 18 Mewé nte re mtómi, pe sói se fémnaw pa sói ta Ya re kpe né? Mewé ma re tatangomi, pe sói se flongé pa sói ta Ya re kécegé né? Ffatélolmo mew pana? 19 Mewé mare re fsae óro sói ta Ya kpe né! Sababta funé fié ta kfakpekté roti pélimé se kfamnómé kyat calén limé né. Waktu ta néi, ni gléo lalógéy péfisé ta mewé ffajólo né?”
Si rcónglo I, “Lalógéy yófésó re péluwé.”
20 Bóngo Yesusé nutné si nóté, “Se waktu Ya kfamnómé kyat calén fót re roti péfité né, ni gléo ta ffajolo né lalógéy péfisé?”
Si rcónglo, “Lalógéy péfité.”
21 Yesusé nécego si nmulé, “Pana fajé, mewé mare fdélé ta Ya re nik kawasa ta pélóyé né, bo ma fanuta be mnómé le na.”
Yesusé nfafié kyat isó ta nébyaf po Betsaida
22 Waktu ta Yesusé I re ni motemote nesté re rwóm po Betsaida né, reni kyat séfis néli rut món isó ta nébyafé njé po Yesusé ni, bóngo réroré bo Yesusé nétewlé fao né néya po kyaté njé ni bo bisa némnawé nmulé. 23 Tabóngo Yesusé nétané kyat ta nébyafé njé fao né, se ntuda i néli po pnuw lapo lo né, bo rélówé kyat ta félé né. Néli bóngo Yesusé nitfo kyat ta nébyafé njé ni mtó né, ga nétewlé fao né po kyaté njé ni. Rewóré ta néi ga Yesusé nutné i, “Re bisa mémnawé?”
24 Pocé kyaté njé néngóto nétó po ta négbono lo né, ga néceg faje, “Ya re kémnawé kyaté né rénfané, mayta kémnaw si né dolo ay si le.”
25 Pocé, Yesusé nétewlé fao né nmulé po kyaté njé ni mtó lo né, bóngo kyaté njé némnawé né re fié. 26 Rewóré ta néi, Yesusé nécegé kyaté njé faje, “Wóré méléy po nim umé lo, bo ma mpólén aw lima pnuw ta njei le na.”
Petrusé nécegé, Yesusé njé Mesiasé
27 Rewóré ta néi, Yesusé I re ni motemote nesté rfan po pnuwé-pnuw ta nfakrakno re kota Kaisarea Filipi né. Se ta si po yéféné lo né, Yesusé nutné ni motemote nesté faje, “Ta mewé flongé kyaté-kyaté récegé né, Ya nte pai?”
28 Si rcónglo I faje, “Iglé récegé cogo Awé Yohanes ta nénbaptisé kyaté njé, Iglé nóté récegé cogo nabi Elia, pari nabi iglé nóté ta rénfawómo Jou Lahatala ni faftóté né.”
29 Pocé Yesusé nutné si nmulé, “Se iga mewé, Ya nte pai?”
Bóngo Petrusé ncónglo I, “Guru, Awé nte Mesias óro, Kolano ta Jou Lahatala néjaji nwómé bo nfasalamaté kyaté njé.”
30 Tabóngo Yesusé nécego si bo ma réfétno kyat su na, ta I Mesias óro.
Yesusé nfébingé ta I nase bo nduk kangelang, re fanfawa ta bo tdéréré I né
31 Po waktu ta néi óro, Yesusé nfébingo ni motemote nesté faje, “Kyaté Ntu ta I yama soroga njé, pote se néli nase bo nduk kangelang félé. Kyat tut Yahudi né, si re imam ta rpélóyé né, re guru-guru agama Yahudi ta runé fié Musa ni kitab abén limé né. Si ta néi ta nase bo rpuné keé I, mayta ngané telé le re npangéné nmulé.” 32 Yesusé re nfébingo keé si ndimé, se re rcae fié sói ta bo ndadi po I ni né. Mayta Petrusé natél Yesus lima lapo lo né, ga nécegé I faje, “Alli, Guru, ma méceg fajé na, ta bo mkangélang sogado mmóté né.”
33 Tabóngo Yesusé nélolét I néli se néngóto ni motemote nesté ndimé, bóngo ncawan Petrusé se néceg i faje, “Mfaténténgén awé. Anim méiténé né dolo setané né riri méiténé. Sababta ta mécegé né mdéréré be kyaté né wlori, mdéréré Jou Lahatala ni wlo njé pa.”
34 Tabóngo Yesusé nkakémé ni motemote nesté, re kyat ta félé né se nécegé si faje, “Kyat pai ta bo ndéréré Ya, mare ma ndéréré ni wlo njé na. Sababta mare nfasadia i bo nduk kangélang sogado nmóté. Ni mdio maduga ndéréré be Ya le, necé tadolo re npó ni salibé njé bo ndéréré Ya. 35 Sababta kyat pai ta nfatubé be i ni diri né le, i ta njéi nase nmóté né nduk ta fié pa sogado fajé néli le. Mayta kyat pai ta npo ni hidupé bo ndéréré Ya, re nfafan Ya nik yabéc né le, i ta njéi nmóté né nase nduk ta fié sogado fajé néli le. 36 Sababta masike kyat faisó, masike haréta ta po dunia wlólo nte i nó ndimé, mayta reni ngale gélesó pa, sababta nmóté né nase nduk ta fié pa sogado fajé néli le. 37 Se reni pana ta i bo npo néli po Jou ni bo nduk ta fié sogado fajé néli né.
38 Kyaté-kyat ta isémé nte, rdéréré Jou ta fatuw pa. Si wlori ncuka rpe be ta lé. Iga reni kyat ta rdéréré Ya, bóngo re rdéréré Ya nik dodoto né ga rmóé si, Kyaté Ntu ta Ya I yama soroga ma, iga kwómé nmulé re nik Moke Jou Lahatala ni kawasa re ni nénan ta si yama soroga né, pocé Ya ma nase kécegé kmóé Ya bo kféyal si né.”