9
Yesusé nécego si nóté, “Flongé fafié ta Ya kécego mewé nte. Férimé ta mew pote né, reni ta nase rmót pafule mare sogado rémnaw Jou Lahatala Nkawasa dolo Kolano re ni kawasa tadélé pélóy po ni kyaté-kyaté né.”Yesusé nménano I ndimé po métét papo lo
2 Ta re télapés ngané wonémé né, Yesusé nut Petrusé, Yakobusé, re Yohanesé se régafét si néya po métét isó ta némógé njé ni. Pocé reni kyat nésé pa, maduga si le. Si néya faje, néga rémnaw Yesusé ni rupa né re nésé I. 3 Ni kabaya mfusé njé ma re n'gagléwé ndimé. Ta po dunia wlólo nte, reni kyat isó pa ta bisa npe kabaya ta ni mfus re gagléw ta dolo fajé né. 4 Néga télél be rémnaw nabi Elia i re nabi Musa, rméiténé rdé Yesusé. 5 Si rémnaw ta néi, tabóngo Petrusé nécegé Yesus faje, “Guru, it pote né i ni birahi! Se ta fié né, kpe umé myaku faay telé. Bo faisó Anim I, isó nabi Musa ni, isó nóté nabi Elia ni.” 6 Sogado Petrusé néceg fajé né, sababta i re nuné pana bo néceg sói nóté, si dórén telé né tadélé re rémtaté, se dolo bo rfakduko wlori pa.
7 Tabóngo, mét esó ntebé yama langété se nfarfura keé si, bóngo reni méitén esó lima mété wlólo né néceg faje, “Neje Ya ntig ta kmésié I njé. Se flongé I ro.”
8 Fajé-fajé, waktu si dórén telé rfaléngóté néli re lima né, télél be Elia i re Musa re tiso si pocé, se rémnaw be Yesusé nkumél I.
Nabi Elia nwómé ntubé ga tagaré Mesiasé njé nwómé
9 Se waktu ta rénduén yama métété lo né, Yesusé nfaftóto si faje, “Ma féfétén néli re lima su na, péséw ta re fémnawé né. Nómésta Kyaté Ntu ta I yama soroga njé nmóté se re npangéné nmulé, ga tagare féféténé.” 10 Bóngo si ma réfétén pa. Nómésta si dórén telé né re rkumél si, ga rfatuténé, “Yesusé ni maksut sói, ta nécegé bo nmóté ga npangéné nmulé né?”
11 Tabóngo rutné Yesus faje, “Pe sói se guru-guru agama ta runé fié Musa ni kitab abén limé né, récegé cogo nabi Elia mare nwómé ntubé, ga tagaré Mesiasé, Kolano ta Jou Lahatala néjaji bo nfasalamat kyaté njé nwómé?”
12 Bóngo Yesusé nécegé si faje, “Fatuwé, nabi Elia njé mare nwómé ntubé, bo nané kyaté né rfasadia si, sababta Jou bo nwómé. Mayta reni ta rlefo po Kitabé ni wlólo to? Kyaté Ntu ta I yama soroga njé nase nduk kangélang félé, re kyat iglé nase wlori ncuka I pa. 13 Mayta flongé fafié ta Ya bo kécegé nte, kyat ta dolo nabi Elia njé re nwómé, se kyaté-kyaté né rfakangélangé keé i, sababta rdéréré si wlori, tadolo re rléfo po Kitabé ni wlólo né.”
Yesusé nfaungé setan ta ncung po yomya món isó njé
14 Waktu ta Yesusé, Petrusé, Yakobusé re Yohanesé rpólén si nmulé po ni motemote ta iglé né, pocé rémnaw kyat félé rfajól po ni motemote nesté ni. Se guru-guru agama Yahudi ta runé fié Musa ni Kitab abén limé né, rfakotale rdé Yesusé ni motemote ta rtoléné nesté. 15 Waktu kyat ta félé rémnaw Yesusé né, rdéngó bóngo rcéreré néli se rcéngé I.
16 Pocé, Yesusé nutné si, “Mew re guru-guru agama Yahudi ta runé fié Musa ni kitab abén limé nesté ffakotale sói?”
17 Po kyat ta félé né, reni kyat isó njé néceg faje, “Guru, péséwé ya kuté ntig móné njé po Aw ni, sababta setané ncung i se nmémew i. 18 Se étné be setané njé ncung i né, nébépsé keé i nóp bétbété lo, sogado ni békbuké ma ncópéné ndé po sumo lo, ngango né ma nfakakikté i se ni badané né bisa nméyawén pa. Péséwé ya re kané nim motemote nesté rféungé setané njé, mayta réfen pa.”
19 Bóngo Yesusé nécegé si faje, “Mangmongé mew pa né ga, kyat ta isémé nte, ga fdélé pa né! Bo mnuo fawa ta mare Ya re mewé tfadéréré né? Ya re mewé ffadéréré né re mnuwé ga fdélé Ya pa né? Wóré fut yomya njé lima!”
20 Tabóngo rut yomya njé néli po Yesus ni. Pocé setané njé némnaw Yesusé, tabóngo nfakéyowén yomya njé se terébépsé i nóp bétbété lo né, ga térfalilés i sogado békbuké ncópén po sumo lo.
21 Pocé Yesusé nutné yomya njé ni moke, “Re mnuo fawa ta setané ncung i sogado nfanfaje né?”
Yomya njé ni moke ncónglo I, “Ta némyaku lesu né re mgo i. 22 Ga tagare setané njé ma, iga ncung i, nuén téptipéné sogado nwóté keé i néli luténé wlólo, pari po wóé wlólo bo nfamóté keé i. Se iga méfené, mmésié amé bo mfafié keé i ro.”
23 Mayta Yesusé nécegé i faje, “Ma mécegé, ‘Iga méfen’ na! Ya kéféné kfafié i! Iga mdélé Ya, férimé né bisa ndadi i!”
24 Tabóngo yomya njé ni moke n'gélayé, “Jou, ya kdélé, maduga pélóy pa. Se mgali ya, bo ya ma kdélé ta fatuw-fatuwé.”
25 Yesusé némnawé kyat félé ta rwómé se rfajólo si po I ni né, bóngo nparenta setan ta ncung po yomya njé né, “Ee, setan ta mpe sogado kyaté né rmémew re rpongo. Msópén po yomya njé ni bo ma msung i le na.”
26 Bóngo setané njé ncópéné né n'gélayé se nfakayowén yomya njé. Waktu ta setané njé ncópéné né, yomya njé nméyawén pana, tadolo kyat ta rmóté né. Se kyat félé ta si pocé né réceg faje, “Tabeu, re nmóté!” 27 Mayta Yesusé nétané yomya njé ni fao né, se nfépangén i bóngo yomya njé npangéné se nosélé.
28 Rewóré ta néi, Yesusé I re ni motemote nesté rcung némin po umé lo. Waktu ta Yesusé I re ni motemote nesté rkumél si pocé né, bóngo ni motemote nesté rutné I, “Guru, pe sói se amé kéfen pa, kfaungé setan ta i péséwé njé né?”
29 Yesusé ga ncónglo si, “Iga bo fféungé setan tadolo fajé né, mare fméiténé fdé Jou Lahatala re fpuasa ga bisa ncópéné.”
Yesusé nfébingo si re nuén luwé ro ta I nase nmóté
30 Yesusé I re ni motemote nesté rfatoléné keé bótén ta njéi, ga rfan si po pnuwé-pnuw ta po bótén Galilea né. Mayta Yesusé wlo pa bo kyaté né runé ta si rfan pocé né, 31 sababta I nfasodoto be ni motemote nesté le. Se nécegé si faje, “Ya kyat ta Ya I yama soroga nte. Pote se néli, kyaté né nase bo rpo keé Ya po kyaté bo rfamóté keé Ya. Mayta masike kmóté ma, nik ngané telé le Ya nase kpangéné nmulé.” 32 Ta Yesusé néceg fajé né, ni motemote nesté rcae pa, mayta dolo rémtaté se isó pa ta bo nutné I.
Iga bo tpélóy po Jou Lahatala ni, mare tfamya wloré né
33 Yesusé I re ni motemote nesté rwóm po kota Kapernaumé. Waktu ta re rwóm po umé lo né, Yesusé nutné si, “Péséw ta it po yéfén fapéluno né, mewé fféfétén sói?” 34 Mayta rfaténténgén si ndimé, sababta ta si rfakotale né, pai ta lebe npélóy po férimé si.
35 Pocé, Yesusé ntolén nópé bóngo nkakémé ni motemote yófésó re séluwé nesté, se nécegé si faje, “Iga bo tdadi kyat ta pélóy po Jou Lahatala ni, mare tfamya wloré né, bóngo tén'gali férimé kyaté.”
36 Pocé Yesusé néyó yomya myaku isó lima, se nfawoslé i po kyat ta félé né riri fapéluné, nyépén i lima bóngo néceg si faje, 37 “Bo kyat pai le ndéréré Ya, pocé ga ntarima kyat ta rémya ta dolo yomya myaku njé, necé tadolo re ntarima Ya nóté. Iga npe fajé, necé ta dolo npe ta fié po Ya ni nóté, bóngo ni féyfié né po Ya ni le pa, mayta po Jou Lahatala ta nané Ya kwómé njé nóté.”
Pai ta ni lé it pa, kyat ta njé ité rir dél i
38 Yohanesé nfébingo Yesus faje, “Guru, amé kémnawé reni kyat isó nféungé setané né npake Awé ngósnomé. Se amé ksawané keé i, sababta kyat ta njéi ité rir dél i pa.”
39 Mayta Yesusé nécegé si faje, “Ma fsawan i na! Sababta, kyat pai le ta npake Ya ngósnogé se npe mujizat ta dolo fajé, i nase nfalélé Ya ngósnog né pa. 40 Sababta, kyat pai ta ni lé it pa, nejé ité rir dél i. 41 Bóngo fatélolmo mew fafié: kyat pai le ta n'gali mewé sababta fdéréré Kristusé, masike ndo mew wóé maduga galas pusó le ma, Jou Lahatala nase nfamulé ni féyfié né tadélé pélóyé.”
Ma fpe sogado kyaté né rpe sélsól na
42 Yesusé nécegé si faje, “Iga reni kyat ta npe kyat ta rémya dolo yomya myaku né sogado rdélé Ya pa na, ta fié né rpitno i re lóy ta pélóy fapusó po ni koko lo né, bo rwóté keé i nélaw po wolét fapéluno. 43 Se iga faomi né npe sélsól sogado fdéréré Jou pa na, ta fié né ffawetésé bo fwóté keé óro, bo bisa fduk ta fié sogado fajé néli le. Sababta reni ngale gélesó pa iga faomi abén luwé, mayta rwóté keé mew némin po naraka wlólo ta ni luténé njé nénmót pa njé. 44 [Pocé naraka wlólo né, kékaléyé ma rmót pa, ni luténé njé ma nénmót pa sogado fajé néli le]. 45 Fajé nóté re sóomi, iga faspalé né npe sélsól sogado fdéréré Jou pana, ta fié né fféwetésé keé bo fwóté keé óro, bo bisa fduk ta fié sogado fajé néli lé. Sababta reni ngale gélesó pa iga sóomi abén luwé né, mayta rwóté keé mew némin po naraka wlólo ta ni luténé nje nénmót pa njé. 46 [Pocé kékaléyé ma rmót pa, luténé njé ma nénmót pa, sogado fajé néli le.] 47 Faje nóté re mtómi, iga féspalé né npe sélsól sogado fdéréré Jou pana, ta fié né ffélébété bo fwóté keé óro. Iga fpe fanfaje, nase bisa fsung po géwgów ta Jou Lahatala nkawasa dolo Kolano po ni kyaté-kyaté né. Sababta reni ngale gélesó pa re mtomi abén luwé ga rwóté keé mew némin po naraka wlólo né. 48 Po naraka wlólo né, kékaléyé né ma rmót pa, luténé njé ma nénmót pa, sogado fajé néli le.
49 Iga mewé bo fdéréré Ya, nase fduk kangelang félé. Mayta gélesó pa, sababta necé ta bo n'gali mew po Jou Lahatala usno lo né. Kangélang ta néi kfatailo dolo lutén re gasi. Luténé né nfamétegél guraci sogado ga ndadi fié ndimé, fajé nóté re gasi né, iga tbóngo po mnómé lo, nase mnó.
50 Gasi né ni ngale fié bo tbóngo po mnómé lo né. Mayta iga re nmémisé, reni ngale gélesó pana. Fajé nóté re mewé, mewé ma mare re nimi ngale ta fié po dunia wlólo nte, re ffatut fafié.”