Yesusé nfamnóm kyat calén lim re glé
6
Po waktu nuéncó, Yesusé ncapél I po yelé lo se npe néli po talaga Galilea ni féspalé. Talaga Galilea njé ni ngósno ta nésé né, talaga Tiberias. 2 Pocé reni kyaté né tadélé félé ta rdéréré Yesusé né, sababta si re rémnaw mujizat ta Yesusé nfafié kyat ta rpisé né. 3 Se Yesusé négafét I néya po métét isó ni papo lo se I re ni motemote nesté réntolén si pocé. 4 Po waktu ta néi, agama Yahudi né riri ngénngan ta pélóy ta réceg Paskah né re rakéné, ngénngan ta néi, si tfatélolmo ta Jou Lahatala re nfabebasé keé riri délut ta tatubé lima ta bangsa Mesiré rpeé riri béyak si né. 5 Waktu Yesusé nfapangné usno né néya, se némnawé kyat félé ta rwóm po I ni né. Tabóngo nécegé Filipus faje, “Po sói lo ta bisa tgoné mnómé, bo kyat ta félé nte bisa rémnómé?” 6 Yesusé néceg fajé né maduga bo némnawé le, Filipusé njé fatuw ta ndélé Yesus pari tisé. Sababta Yesusé re nuné óro, sói ta I bo npe né.7 Filipusé ga nécegé Yesus faje, “Masike tpe yabé sogado reni sni nóté, nase nbung pa le pipis ta tgono mnómé bo tfamnómé kyat ta féléo i nte né, masike ga rémnómé né cucé le.”
8 Pocé ma reni Yesusé ni motemote isó ngósno Andreasé, i ta njé i, Simon Petrusé ni fténo i. Nécegé Yesus faje, 9 “Pote reni yomya món isó nut roti pélim re in séluwé. Mayta necé nase nbung pa le bo tfamnómé kyat ta félé nte né.”
10 Pocé bóngo Yesusé nécegé ni motemote nesté faje, “Fané kyat ta félé né bo rtoléné.” Po géwgów ta néi, reni gémuné diréncó ta fié, se kyat ta félé né férimé rtolén po gémuné lo né. Kyaté né ni féléo nihalé calén limé, necé rétén be móné né.
11 Pocé Yesusé néyó roti né se néceg tarima kase po Jou Lahatala ni, rewóré ga nané ni motemote nesté rfanténé kyat félé ta rtoléné né. Rewóré ta néi, Yesusé néyó iné né se nané ni motemote nesté rfanténé nóté. Pocé ga férimé si rémnóm sogado rmesé.
12 Rewóré ta néi, Yesusé nécegé ni motemote nesté faje, “Ffajólo su mnómé ni gléo né, bo ma reni ta twóté na.” 13 Pocé si rfajólo mnómé ni gléo né, maduga roti pélimé le, kyat ta féléo i né ró rfarimé pa, sogado ga ni gléo né lalógéy yófésó re paluwé.
14 Waktu kyaté né rémnaw mujizat ta Yesusé npe né, bóngo réceg faje, “Neje óro, Nabi ta Jou Lahatala re néjaji bo nwóm po dunia nte né.” 15 Waktu ta néi, Yesusé re nuné ta kyaté nesté rwómé bo rané I ndadi riri Kolano I né. Mayta Yesusé wlo pa, se nagafét I néya po métété lo se nfaténténgén I pocé.
Yesusé nénfan I po wóé pépo lo
16 Waktu ta rebo dorémé né, Yesusé ni motemote nesté rtebé po talaga lo. 17 Si po talaga lo né sogado ga dorémé, mayta Yesusé nwóm pafule, pocé tabóngo rcapél si po yelé lo, se rpe si néli po kota Kapernaumé. 18 Néga mnuw pa, moré rato njé nufé, sogado talaga njé ma ni méwruwé né tadélé pélóyé. 19 Waktu rapé né sogado ni lóo nihalé kilo pélim pari pawonémé, néga rémnaw Yesusé nénfan I po wóé papo lo se re nérakén si néli. Mayta ta rémnaw I né, dolo bo rféyal I pa, se dolo rémtaté. 20 Mayta Yesusé nécegé si faje, “Ma fémtat na! Nete Ya!” 21 Rlongé ta Yesusé néceg fajé né, tadélé séngséngé bóto si, se rcaplé Yesus néya po riri yelé lo né. Runé pa, télél si né re rwóm si po wólét lapo po géwgów ta si bo rfano lo né.
Kyat félé réyówé Yesusé
22 Ni móné faje, kyat félé ta si po talaga ni faspalé lesu né, réyówé Yesusé. Sogado réyówé I né, sababta si runé pepé né yel ta po talaga lapo lo né maduga esó le, se Yesusé ni motemote nesté ta rcaplo yel ta néi, mayta Yesusé ncapél pocé pa. 23 Waktu ta néi, reni kyat iglé ta rwóm lima kota Tiberiasé né rcaplo si riri yelé ro. Se re rérakén po géwgów ta kyat félé rémnóm pepé né, waktu ta Yesusé néceg tarima kase po Jou Lahatala ni rewóré né, 24 pocé kyat félé ta réyówé Yesusé né, rémnaw ta Yesusé I re ni motemote nesté tiso si pocé né, tabóngo rcapél si po kyaté-kyat ta tagare rwómé né riri yelé lo né se rfan po kota Kapernaumé bo réyówé Yesusé.
Yesusé njé tfatailo I dolo mnóm ta bisa nfahidupé kyat sogado fajé néli le
25 Waktu kyat ta félé né rwóm po talaga ni féspal po kota Kapernaumé, se re rfapdipén re Yesusé tabóngo rutné I, “Guru, mwóm pote ngané fisé?”
26 Yesusé ncónglo si, “Flongé fafié ta Ya bo kécegé nte. Mew ta ntei féyówé Ya né, necé bukan ta bo fémnaw mujizaté bo funé ta Ya nte Mesiasé, mayta sogado féyówé Ya né, sababta Ya re kfamnómé mew sogado fmesé né. 27 Se ndél pa bo maduga féyówé be mnóm ta po dunia wlólo nte na, sababta mnóm ta néi mnuw pa re tiso, re nase bo lé i. Mayta mewé mare féyówé ta fatuw-fatuwé mnóm ta yama soroga né bo sogado fduké, sababta mnóm ta néi nase lé pa, se bisa npe sogado fhidup re Jou Lahatala sogado fajé néli le. Mnóm ta néi Kyaté Ntu ta I yama soroga njé bo ndo mewé, sababta Jou Lahatala re npo kawasa ta néi po ni Ntu njé ni.”
28 Pocé bóngo kyat ta félé né rutné Yesusé, “Pana fajé, sói ta mare amé kpe ta Jou Lahatala mgo wlo né?”
29 Yesusé ncónglo kyat ta félé né, “Flongé fafié é! Ta Jou Lahatala nané mewé fpe né, mare fdélé Ya, kyat ta Jou Lahatala nané I nwóm yama njé.”
30 Kyaté né rlongé ta néi, bóngo récegé Yesus faje, “Guru, pana fajé, mfaftulo am mujizat faisó bo amé kémnawé bo bisa kdélé ta Awé nte Aw yama Jou Lahatala ni. Mujizat sói ta Awé bo mpe né? 31 Sababta, amé mam délut Israel tatubé né ró mnóm ta récegé manna né. Waktu ta si ramnuw po géwgów esó ta sésé bóto i, ta nélówé pnuwé njé. Necé nfamgo re ta rlefo po Jou ni Buké wlólo ta ni glio faje, ‘I nfamnóm si re mnóm yama soroga.’ ”
32 Tabóngo Yesusé nécegé si faje, “Flongé fafié ta Ya bo kécego mewé nte. Nabi Musa pa, ta nfamnóm ité rir délut tatubé lima nesté re mnóm yama soroga né, mayta Ya nik Moke ta ndo si mnóm ta néi. Se nete Ya nik Moke nóté, ta ndo mewé mnóm ta fatuw yama soroga né. 33 Sababta mnóm ta Jou Lahatala npo yama soroga né, necé I ro ta ntebé yama se npo kyaté né bo rduk ta fié sogado fajé néli le.”
34 Bóngo kyat ta félé né récegé Yesus faje, “Guru, pana fajé, mdo amé mnóm ta yama soroga né ro, ma mtébné na!”
35 Bóngo Yesusé nécego si nóté, “Ga Ya óro, mnóm ta npe sogado kyaté né rhidup re Jou Lahatala sogado fajé néli né. Se kyat pai le ga nwóm po Ya ni, kyat ta njéi nase ntélót pana, re kyat pai ta ndélé Ya, kyat ta njéi nase gli mang pana. 36 Mayta tadolo Ya re kécego mewé né, masike re fémnaw Ya, mayta fdélé Ya pa. 37 Férimé kyat ta nik Moke npo Ya né, si ta néi ta nase rwómé bo rdéréré Ya né. Re kyat pai le ga rwóm po Ya ni, Ya nase kétóf si pa. 38 Sababta, Ya re kwóm yama soroga né, bukan ta bo kdéréré Ya wlegé njé pa, mayta Ya bo kpe ta nik Moke mgo wlo né, sababta I ta nané Ya kwómé. 39 Ta Ya nik Moke mgo wlo né, iga férimé kyat ta I re npo Ya né, nase faisó le ma tisé ta bo némyangésé, mayta iga dunia nje re nkiamaté, Ya nase kfapangén si nmulé. 40 Sababta, nete ta nik Moke mgo wlo né: i Se iga kyat pai le ta némnawé Ni Ntu njé ga ndélé I, kyat ta njéi ta nase nhidup re Jou Lahatala sogado fajé néli le, re iga dunia njé bo nkiamaté, Ya nase kfapangén si nmulé.”
41 Pocé kyat ta agama Yahudi si né, rtéwtéwno Yesusé, sababta nécegé cogo I ro mnóm ta nwóm yama soroga né. 42 Se réceg faje, “Ee, I ta njé Yesusé tó? Yusufé ni ntu món I. Amé kféyal si fié, ni neke re ni moke nesté. Néga fanfawa se nécegé cogo re nwóm yama soroga?”
43 Mayta Yesusé néngóto si bóngo nécegé si nóté, “Ma ftéwtéwno fajé na. 44 Iga nik Moke ta nané Ya kwóm yama bo n'gali kyaté né, pocé ga nase kyaté né bisa rdéréré Ya. Se iga dunia nje nkiamaté, kyat tadolo fajé né Ya nase bo kfapangén si nmulé. 45 Po Jou Lahatala ni Buké wlólo né, nabi nesté rlefo faje, ‘Jou Lahatala nase nfasodoto si.’ Se kyat pai le ta nlongé nik Moke ni dodoto né ga ndéréré, kyat ta njéi ta nase nwómé bo ndéréré Ya. 46 Mayta masike fajé ma, reni kyat isó pa ta re némnawé nik Moke njé, maduga Ya le ta re kémnaw I né, I óro ta nané Ya kwóm yama né.
47 Se flongé fafié ta Ya kécegé nte, kyat pai le ga ndélé Ya, i ta njéi ta re nduk ta fié sogado fajé néli le.
48 Ya ta nté I óro mnóm ta bisa npe sogado kyaté né rduk ta fié sogado fajé néli le né. 49 Se masike nimi délut tatubé lima nesté re ró mnóm ta réceg manna né po géwgów ta sésé bóto i ta nélówé pnuwé né, mayta nase rmóté le. 50 Mayta pote mew ni nte, reni mnóm ta yama soroga né, se kyat pai le ga nó mnóm ta néi, i nase nmót pa. 51 Sababta Ya óro, mnóm ta rut yama soroga né, ta bisa nfahidupé kyaté né. Se kyat pai le ga nó mnóm ta ntei, kyat ta njéi nase nhidup re Jou Lahatala sogado fajé néli le. Sababta mnóm ta Ya bo kdo mewé né, Ya nik wóngét óro, ta Ya nase kdo férimé kyat ta po dunia wlólo nte bo rhidup sogado fajé néli le.”
52 Pocé, agama Yahudi né riri kyat tuté né rlongé ta Yesusé néceg fajé né, tabóngo rfakotale se réceg faje, “Alli, ga fawa sogado bisa npo ni wóngété né bo tó?”
53 Bóngo Yesusé nécegé si faje, “Flongé fafié ta Ya bo kécegé nte. Ya Kyaté Ntu ta kwóm yama soroga, se iga fó nik wóngét re finémé nik léló nte pa, mewé nase bisa fhidup re Jou Lahatala pa sogado fajé néli le. 54 Sababta kyat pai le ga nó nik wóngét re ninémé nik léló nte, kyat ta njéi ta nase nhidup re Jou Lahatala sogado fajé néli le. Re iga dunia nje bo nkiamaté, Ya nase nfapangén i nmulé. 55 Sababta, Ya nik wóngété nte mnóm ta fatuwé, re Ya nik léló né wóé ta fatuwé nóté. 56 Se kyat pai le ga nó nik wóngét re ninémé nik léló nte, kyat ta njéi nase i re Ya wlomam be esó, se Ya ma nase wleg be esó re i nóté. 57 Ya nik Moke ta nané Ya kwóm yama kpe ni yabé né, se I ta njéi ta nfahidup férimé ta po dunia nje ni wlólo nte, re I ma nfahidup Ya nóté. Se kyat pai le ta nó nik wóngété nte, i nase nduk ta fié sogado fajé néli le, sababta kyat ta njéi re ndélé Ya. 58 Ya óro, mnóm ta ntebé yama soroga né. Ya nfalcól re manna, ta ité rir délut tatubé lima nesté ró po géwgów ta sésé bóto ta nélówé pnuwé lo né, sababta masike ró mnóm ta néi, nase rmóté le. Mayta kyat pai le ga nó mnóm ta yama soroga nte, i nase nduk ta fié sogado fajé néli le.”
59 Yesusé néceg férimé nte po kota Kapernaumé, waktu ta néi, Yesusé nfasodoto kyat po agama Yahudi né riri um sambayangé lo.
Kyat iglé ta rdéréré Yesusé né rfatoléné keé I
60 Waktu kyaté-kyat ta rfadéréré re Yesusé né, rlongé ta Yesusé nécegé né, tabóngo reni kyat félé ta rfalécego faje, “Ta néfétén wóngét re léló né talalu météwé. Se kyaté né nase wlori pa bo rlongé dodoto ta néi.”
61 Mayta Yesusé nuné kyaté-kyat ta rdéréré I né rtéwtéwno né, bóngo nécegé si faje, “Fpe sói? Wlomi ncuka pa bo flongé nik dodoto nte? 62 Iga wlomi ncuka pa bo flongé Ya nik dodoto ta néi, nase fanfawa nóté bo sogado fémnawé Kyaté Ntu njé terélóngé I néya po soroga, bo néléyé nmulé po ni góo lo né? 63 Iga kyat ité ga tpe be ta fié le bo tduk ta fié sogado fajé néli le, nase ndadi i pa, sababta maduga Jou ni Rohé njé le ta bisa npe sogado rduk ta fié sogado fajé néli le. Sababta férimé nik dodoto ta kécegé né, necé lima Jou ni Rohé njé ni, se dodoto ta néi nóté ta npe sogado thidup re Jou Lahatala sogado fajé néli le. 64 Mayta po mew ni né, reni kyat iglé ta rdélé Ya pa.” (Yesusé néceg fajé né, sababta po tatubé lima lesu, I re nuné pai ta nase ndélé I pa né, re pai ta nase bo nwagé keé I.) 65 Pocé tabóngo Yesusé nécegé nóté, “Po mew ni nte, reni kyat iglé ta rdélé pa, se necé tamulo re kécego mewé né, iga nik Moke Jou Lahatala npo fié bo rdéréré Ya, nase ndadi i, mayta bo tisé, nase ndadi i pa.”
66 Po waktu ta néi óro, kyaté-kyat ta rdéréré Yesusé né félé ta wlori rdéréré Yesus pana, se rfané ffatoléné keé I. 67 Pocé bóngo Yesusé nutné ni motemote yófésó re séluwé nesté, “Mewé ma bo ffatoléné keé Ya nóté?”
68 Mayta Simon Petrusé nécegé Yesus faje, “Moke, amé nase bo kdéréré pai nóté? Sababta maduga Anim dodoto né le ta mfébingo amé bo fanfawa sogado amé bisa khidup re Jou Lahatala sogado fajé néli le. 69 Amé nte re kdélé bóngo re kuné ta fatuwé, Awé ro ta mwóm yama Jou Lahatala ni né.”
70 Bóngo Yesusé nécegé si faje, “Ya re kpili mew dórén yófésó re séluwé nte, mayta reni isó po mew ni ta nase bo ndéréré keé setané né riri kolano njé ni wlo.” 71 Ta Yesusé ni maksud né, Yudasé, Simon Iskarioté ni ntu njé. Yudasé njé isó po Yesusé ni motemote yófésó re séluwé né, mayta i ta njéi ta nase bo nwagé keé Yesusé né.