Yesusé nfafié kyat isó ta nkafé njé po talaga Betesda
5
Rewóré ta néi, kyat Yahudi né riri ngénngan ta pélóyé né re rakén óro, se Yesusé nfan po kota Yerusalemé. 2 Po Yerusalemé né reni tembok kota, pocé ma reni ngówén ta pélóy isó ta kyaté né rfangósno i Ngówén Domba. Pocé po ngówén lapo lo né, reni talaga isó ta méitén Ibrani né réceg Betesda. Po talaga lapo lo né reni umé myaku ay limé. 3 Po ni mabe-mabe lo né, reni kyat ta rpisé né félé ta ranbóy si pocé: reni ta rébyafé, reni ta sóori re faori né métegél pa, re reni ta riri badané né nmóté. [Kyaté-kyat ta néi raréfton wóé njé naknoké bo rwalmé si nóp wóé njé ni. 4 Sababta reni waktu ta Jou Lahatala ni nénan ta yama soroga né bo rtebé po talaga njé ni bo rfanaknoké wóé njé. Pocé kyat pai le ta ntubé ntebé po talaga njé ni, i nase nfié masike ni péspisé sói le.]5 Pocé, reni kyat isó ta nkafé re taun yófétel re nuén walé. 6 Yesusé némnawé kyaté njé nyénéf pocé né, re nuné óro kyaté njé npisé re mnuwé. Se Yesusé nutné i, “Moke, wlemé bo mfié?”
7 Bóngo kyat ta nkafé njé néceg faje, “Moke, ga isó ta n'gali ntebo ya nóp wóé njé ni pa, waktu ta wóé njé naknoké né. Ya ktofno bo ktebé kkumélé, mayta kyat iglé né re rtubé si.”
8 Bóngo Yesusé nécegé i faje, “Mpangén óro, malilé nim musala njé bo mfané ro.” 9 Po waktu ta néi óro, kyat ta nkafé njé nfié i. Bóngo nélilé ni musala njé se néléy i.
Ta Yesusé nfafié kyat ta nkafé njé né, mgo po ngénngan Sabaté, ngénngan ta kyat Yahudi né bisa rpe yabé pa. 10 Se, agama Yahudi né riri kyat ta rpélóyé né récegé kyat ta tagare nfié njé faje, “Nete ngénngan Sabaté to? Iga bo tdéréré ité rir dodoto né, awé bisa malilé nim musala njé pa, sababta necé re mpe yabé.”
11 Mayta i ncónglo si faje, “Kyat ta nfafié ya njé, I ta nané ya kélilé keé nik musala njé bo kfan ya ro.”
12 Pocé bóngo rutné kyaté njé nmulé, “Ee, pai ta nané awé malilé nim musala njé bo mfané?”
13 Mayta kyat ta tagare nfié njé ma nuné pa, pai ta nfafié i njé, sababta Yesusé re ncung I po kyat ta félé né riri fapéluné.
14 Mayta mnuw pa Yesusé nfapdipén re kyat ta re nfié njé po um sambayang ta npélóyé njé ni kintalé lo, bóngo Yesusé nécegé i faje, “Moke, mfatélolmo awé, sababta nete re mfié. Se ma mpe sélsólé le na, ma sogado mduk ta lebe kangelangé nóté.”
15 Kyaté njé nméitén re Yesusé rewóré, tabóngo nfan néli po agama Yahudi né riri kyat ta rpélóyé né bóngo nfébingo si, “Yesus óro ta nfafié ya né.”
16 Agama Yahudi né riri kyat ta rpélóyé né rlongé ta Yesusé re nfafié kyat po ngénngan Sabaté né, tabóngo réyówé yéféné bo rfakangelangé keé I.
17 Mayta Yesusé nécegé si faje, “Ya nik Moke npe yabé sogado ngénngan pésénte, se Ya ma mare kpe yabé dolo nik Moke nóté.”
18 Yesusé ni méitén ta néi, ta npe sogado kyat agama Yahudi né riri kyat tut ta rpélóyé né tadélé réyówé yéféné bo rpuné keé I né. Si récegé Yesusé npe yabé po ngénngan Sabaté se ndéréré riri aturan Sabaté né pa, mayta necé le pa, I ma nécegé cogo Jou Lahatala njé I ni Moke I. Necé ni ngale né nfatailo ni diri dolo Jou Lahatala óro.
Yesusé nécegé Jou Lahatala ta npo I kawasa
19 Yesusé nuné ta rcawan I né, sababta I nécegé cogo Jou Lahatala njé I ni Moke I, se néceg faje, “Ffatélolmo mew fafié, sói ta Ya bo kécegé nte. Ya Jou Lahatala Ni Ntu Ya, se iga bo kpe sói néli le, bisa pa bo kdéréré Ya wlegé njé. Ya maduga kpe be sói ta nik Moke npe né, sababta sói lé ta nik Moke njé npe né, necé Ni Ntu Ya ma kpe nóté. 20 Sababta Jou Lahatala nmésié Ni Ntu njé, se I nfaftulo keé Ni Ntu njé ndimé sói ta I npe né. Re nase nfaftulo mujizat ta lebe pélóyé nóté ta Ni Ntu njé nase npe né, bo mewé tadélé fherané. 21 Moke ta njéi ta nfapangéné nmulé kyat ta rmóté né, se npo si hidupé bo rduk ta fié sogado fajé néli le. Fajé nóté re ni Ntu njé, I ma npo hidup po kyat pai le ta mgo wlo né, bo rduk ta fié sogado fajé néli le. 22 Nik Moke Jou Lahatala nadili kyat pa, mayta férimé ni kawasa né re npo Ni Ntu njé, bo nadili kyaté. 23 Jou Lahatala re npo kawasa ta néi po Ni Ntu njé ni, bo férimé kyaté né rhoromaté ni ntu njé, tadolo si rhoromaté nik Moke Jou Lahatala nóté. Kyat pai le ta nhoromaté Ni Ntu njé pa, necé tadolo nhoromaté nik Moke pa nóté, ta nané Ni Ntu nje nwóm yama né.
24 Ffatélolmo mew fafié ta Ya kécegé nte, kyat pai le ga nlongé ta Ya kécegé nte, bóngo ndélé Jou Lahatala ta nané Ya njé, i nase nduk ta fié sogado fajé néli le, se Jou Lahatala nase nhukum I pana, mayta ta i po dérorémé wlólo njé nase ncópéné bo nduk ta fié sogado fajé néli le. 25 Se flongé fafié ta Ya bo kécegé nte, nase reni waktu nóté, mayta nte re nwómo i ro, kyaté-kyat ta re rmóté né nase rlongé Jou Lahatala Ni Ntu njé ni méiténé, se ta rlongé fié se rdélé I né nase rduk ta fié sogado fajé néli le. 26 Sababta, necé tadolo nik Moke njé reni kawasa ta bisa nfahidupé kyaté né, fajé nóté re npo kawasa po Ni Ntu njé ni bo nfahidupé kyaté nóté. 27 Jou Lahatala re npo ni kawasa po Ni Ntu njé ni bo néftul pai ta ndélé I re pai ta ndélé I pa né. Ta néftulé njé Kyaté Ntu ta I yama soroga njé ro. 28 Se mewé ma fheran na sói ta Ya kécegé nte, sababta nase reni waktu nóté, férimé kyat ta re rmóté né masike si po kuburé wlólo ma nase rlongé Kyaté Ntu ta I yama soroga njé ni méiténé né, 29 se ta si po dunia wlólo né lesu ga rpe be ta fié le, bóngo nase rpangéné nmulé se rhidup re Jou Lahatala sogado fajé néli le. Mayta ta si po dunia wlólo né lesu ga rpe be ta lé, si ma nase rpangéné nmulé se rduk hukuman ta météwé, bóngo ralówé keé Jou Lahatala sogado fajé néli le.”
Yesusé óro ta Jou Lahatala nané I nwóm yama né
30 Yesusé nécegé nóté, “Ya bisa pa bo kpe sói néli ga kdéréré Ya wlegé nje né. Ya kadili kyaté ma kdéréré sói ta nik Moke nané Ya né. Bo kadili né kdéréré ta métegélé, sababta Ya kdéréré wlegé nje pa, mayta kdéréré Moke ta nané Ya njé ni wlo.
31 Iga Ya óro kfébingé ta Jou Lahatala nané Ya kwóm po dunia nte né, kyaté né nase rdélé pa, sababta reni kyat ta rdadi saksi pa. 32 Mayta Jou Lahatala óro ta ndadi saksi bo nécegé fatuwé I ta nané Ya, se Ya kuné sói ta I néfétén Ya po mew ni né fatuwé, bóngo kyaté né nase rdélé. 33 Nuéncó mewé re fané kyaté né rutné Ya po Yohanes ta nénbaptisé kyaté njé ni, se Yohanesé re nfébingo mew ta fatuwé Ya óro ta Jou Lahatala néjaji bo kwómé kfasalamaté kyaté né. 34 Mayta Ya kngongano isó pa bo ndadi saksi po Ya ni, Ya maduga bo kécego mew be sói ta Yohanesé re néfétén Ya po mew ni né, bo mewé fdélé Ya bo fduk ta fié sogado fajé néli le. 35 Ta Yohanesé néfétén ta Ya Mesiasé njé ro, necé tfatailo Yohanesé njé tadolo logaloga ta nmanano fié né. Mewé flongé ta nécegé né sogado séngséngé bóto mewé né, mayta manano ta njéi namnuw pa re tiso i.
36 Mayta yabé ta re kpe né lebe pélóy po ta Yohanesé npe né. Yohanesé néfétén ta Ya kwóm yama Jou Lahatala ni né, necé fié ta i nécegé né. Mayta Ya nik dodoto re mujizat ta Ya re kpe né lebe pélóy po Yohanes ni, se re funé ta Ya óro ta kwóm yama Jou Lahatala ta nané Ya kpe ni yabé né. 37 Reni nóté, ta nik Moke njé nané Ya kfafané ni yabé né, I ro ta nfébingo kyaté né Ya nte pai. Mayta agama Yahudi né riri kyat tut ta mewé nte, nuéncó pafule bo flongé Jou Lahatala ni gli njé, bóngo nuéncó pafule bo fémnaw I. 38 Mewé ma fdélé pa sói ta Jou Lahatala nécegé né, sogado Ya ma ftarima Ya pa ta Jou Lahatala nané Ya kwóm yama nte. 39 Mewé re funé fié dodoto ta po Jou ni Buké wlólo né, pocé facogo ma bo fduk ta fié sogado fajé néli le. Padahal ta po Jou Lahatala ni Buké wlólo né, re rlefo ta Ya óro Mesias ta bo kwóméa né. 40 Mayta masike fajé ma, mewé wlomi pa bo fwóm po Ya ni, bo fduk ta fié sogado fajé néli le né.
41 Ya wleg pa bo kyaté né rcuba re rtail Ya. 42 Mayta bo mewé, Ya re kuné ta po wlomi wlólo né, mewé fmésié Jou Lahatala pa. 43 Ya kwóm po dunia nte sababta nik Moke ta nané Ya, mayta mewé ftarima Ya pa. Padahal ta iga reni kyat faisó nóté nwóm po mew ni, ta isó nané i pa njé, mewé nase ftarima i fié. 44 Sababta mewé wlomi ncuka bo kyaté né rtailé mewé, mayta wlomi pa bo fpe sói ta Jou Lahatala mgo wlo né bo I ro ta ntailé mewé né. Se nase nuén fisé ga bo fdélé Ya né?
45 Ma facogo ma, Ya ta nase bo kfasólo mew po nik Moke ni usno lo na, mayta nabi Musa ta nimi ngongano i njé, i ta njéi ro ta nase nfasólo mewé né. 46 Bóngo i nóté ta nlefo Ya ta Jou Lahatala néjaji bo kwómé né. Se iga mewé re fdélé aturan ta nabi Musa nlefo né, mewé ma mare fdélé Ya nóté. 47 Mayta iga fdélé pa sói ta nabi Musa nlefo né, nase ta Ya kécegé né ma fdélé pa nóté.”