1 Tesalonika
Surat ta faiwóbno ta Paulusé
nfanaté po jemaat Tesalonika
Kitabé njé ni méitén
Kyat ta rlefo kitabé njé: Kitabé 1 Tesalonika njé, surat isó ta Paulusé nlefo. Se kyat ta rfabingé Habar ta Fié lima Yesus Kristus ni po kota Tesalonika né, Paulusé, Timotiusé, re Silasé (Kis. 17:1-4). Po suraté njé ni wlólo né, Paulusé nkakém Silasé re ngósno Silwanusé (1 Tes. 1:1). Si dórén telé nesté ta rfawoslé jemaat ta faiwóbno po kota Tesalonika né. Féngóto nóté “Paulusé” ni ngale né po kamusé lo.
Kitab ta njé i po pai ni: Kitabé 1 Tesalonika njé surat ta Paulusé nlefo po jemaat ta po kota Tesalonika né. Tesalonika njé tatubé lima kota ta ni pelabuhané fié po bótén Makedonia né. Tesalonika njé ma kota isó ta npentingé, sababta ni kyaté-kyaté né rfalwagé re rfalgoné pocé, bóngo riri pemerenta Roma ta rkawasa po waktu ta néi né ma rdadi pusó pocé. Kyat ta si po kota ta njéi né rdéréré agama Yahudi, mayta ta félé né kyat ta rdéréré agama Yahudi si pa né, sababta wlori ncuka rcuba keé riri patongé né.
Kitabé njé ni dodoto né ta dolo faje: Paulusé i re ni délé nesté rtolén po kota Tesalonika né mnuw pa, sababta mare rówés si po kota Tesalonika ga rfan po kota Berea, sababta kyaté-kyat Yahudi ta rdélé Jou Yesus pa né, rtelengén Paulusé i re Silasé se réyówé yéféné bo rfakangelangé keé si (Kis. 17:5-10). Mayta masike si rówésé né, Paulusé wlo bo kyaté-kyat ta rdélé Jou po Tesalonika né, runé ta fatuwé si rdélé Jou Yesusé. Se nané Timotiusé npe néli bo nfakwaté wlori né (1Tes. 3:1-2), re nané si bo rdélé Jou Yesusé né ta délé fatuw-fatuwé, sogado wlori né ma nbóng ta rdélé Jou Yesus
Paulusé nlefo suraté njé né, bo nfakwaté ni wlo njé po kyat Tesalonika ta rfakangelangé keé si sababta rdélé Yesus Kristusé né. (1 Tes. 3:3-5) I npo si méitén ta fié bo riri tabeaté né métegél po kyat ta rdélé Jou Yesusé né. (I Tes. 4:1-10).
Jemaat ta néi runé pafule, sói ta ndadi i po kyat ta re rmóté né. Se po surat ta njéi, Paulusé nfaténgténgén be wlori né, bóngo nfébingé sói ta nase ndadi i po waktu ta Yesus Kristusé nwómé nmulé né. Férimé kyat ta rdélé I né, masike re rmóté, mayta nase rpangéné nmulé (1Tes. 4:13-5:17).