Yesusé nfaftulo ni diri néli po ni motemote nesté ni
21
Rewóré ta néi, Yesusé nfaftulo ni diri néli nóté po ni motemote nesté ni po talaga Tiberiasé ni lapo lo. Ni fénfané né tadolo faje: 2 Nuéncó, po talaga Tiberiasé ni lapo lo né, reni Simon Petrusé, Tomas ta kyaté né rkakmé i Sosora njé, Natanael ta i lima kota Kana ta po bótén Galilea njé, Zebedeusé ni ntu séluwé nesté, re Yesusé ni motemote ta nésé né séluwé nóté, ta rfajólo si pocé né. 3 Se Simon Petrusé nécegé si faje, “Ya bo kfané bo kéyówé iné.”Bóngo si récegé i faje, “Amé ma bo kdé awé,” tabóngo rfan po talaga lapo né se rcaplo yelé bo rfané réyówé iné. Pocé sogado dorém esó wlólo, mayta rduk in faisó le ma tisé.
4 Sogado re bo tamamóné né, Yesusé nosél po talaga lapo lo né, mayta ni motemote nesté runé pa ta nejé Yesusé. 5 Pocé ga Yesusé nécegé si faje, “Ee, nik dél ta mewé! Fduk in pari tisé?”
Si rcónglo I, “Kduk pa.”
6 Bóngo Yesusé nécegé si, “Coba fwóté nimi lóbéné njé po yelé ni féspal wónéyé né, pocé nase fduk iné.”
Tabóngo rpawélé riri lóbéné njé rewóré, ga ratél i néya nmulé né réfen i pa, sababta rémgo iné né tadélé félé.
7 Se Yesusé ni motemote ta nmésié i njé nécegé Petrus faje, “Nejé Jou Yesusé!” Waktu Petrusé nlongé ta nejé Yesusé né, tabóngo npake ni kabaya njé, sababta nkébaya i pa, pocé bóngo npawél i nóp po talaga lo né. 8 Yesusé ni motemote ta iglé né ga, rcó riri yelé né se rap nélew po Yesus ni. Sababta pocé se nélew talaga lapo né, nihalé meter witéncó le. Se waktu ta re rwóm po Yesus ni, tabóngo ratélé riri lóbén ta nbako re iné nje nóté.
9 Waktu ta re rwóm po talaga njé ni lapo lo né, rémnawé reni luténé ni babla, se po babla papo lo né, reni in re roti. 10 Bóngo Yesusé nécegé si faje, “Fut iné né lima, faséfis néli ta tagare fduké né.”
11 Pocé ga Simoné ncapél po yelé lo, se natélé riri lóbén ta némgo in félé njé nélew po talaga lapo lo né. In ta rémgo né pélóyé ndimé. Iné né ni féléo witéncó re wólén lim re sételé, masike ga rémgo iné né félé, mayta lóbéné njé némgawés pa.
12 Bóngo Yesusé nécegé si, “Lima bo témnómé ro.” Mayta Yesusé ni motemote né isó pa ta bo nutné I, “Moke, Awé nte pai?” Sababta si runé, nejé Jou. 13 Pocé Yesusé nérakén si néli, bóngo nyó roti re iné né se nfanténo si. 14 Ta Yesusé nmót sogado npangéné se lima né, re nuén telé ro nfaftulo ni diri po ni motemote nesté ni né.
Yesusé nméitén re Petrusé
15 Waktu ta rémnómé rewóré né, Yesusé nutné Simon Petrusé, “Simon, Yohanesé ni ntu awé, awé nte mmésié Ya né, lebe pélóy po nim délé nesté ni?”
Simoné ncónglo, “Iya Jou, Awé muné, ya kmésié Awé.”
Yesusé nécego i nóté, “Pana faje, mléléyani niké kyaté-kyaté né fafié, tadolo domba né riri wlón ta nléléyané ni domba né fié.”
16 Yesusé nutné Simon nuéncó nóté, “Simon, Yohanesé ni ntu awé, fatuw ta awé mésié Ya?”
Simoné ncónglo, “Iya Jou, Awé muné, ya kmésié Awé.”
Bóngo Yesusé nécegé i, “Mleleyané niké kyaté-kyaté né fafié, tadolo domba né riri wlón ta nleleyané ni domba né fafié.”
17 Yesusé nutné Simoné né re nuén telé ro, “Simon, Yohanesé ni ntu awé, fatuw ta mésié Ya?”
Pocé tabóngo Petrusé ni wlo njé tadélé nkangelangé, sababta Yesusé nutné i né sogado re nuén telé, fatuw ta i nmésié Yesus pari tisé. Se Petrusé nécegé Yesus faje, “Jou, sói le Awé muné ndimé, se Awé nase muné ta ya kmésié Awé né.”
Bóngo Yesusé nécego Petrusé nóté, “Mleleyané nik kyaté-kyaté né fafié, tadolo domba né riri wlón ta nleleyané ni domba né fié né.
18 Se mfatélolmo aw fafié é, ta Ya bo kécegé nte. Waktu ta mlagaé péfulé né, bisa mkabaya awé mkumélé, bóngo nase bisa mfan pua le ta awé wlemé ncuka né. Mayta iga re mlagaé, kyaté né nase rétané faomé se rtuda aw po géwgów ta awé wlemé ncuka pa né.”
19 Sogado Yesusé néceg fajé né, bo nfébingo Petrus ta fanfawa i nase nmóté né, se pocé kyat félé nase rcuba re rtail Jou Lahatala. Yesusé néceg fajé rewóré, tabóngo nécego Petrusé nóté, “Lima bo mdéréré Ya ro.”
Yesusé nméitén po ni motemote ta nmésié i njé
20 Waktu ta néi, Petrusé négiwé i némin po too lo né, néga némnaw Yesusé ni motemote ta nmésié i njé ndéréré si. Yesusé ni motemote ta njéi, ta ntoléné nérakén Yesus po waktu ta Yesusé nmót pafule se rtoléné rémnómé né. Se waktu ta néi, i ta njéi ta nutné, “Jou, pai ta bo nwagé keé Awé né?” 21 Waktu Petrusé némnaw motemote ta Yesusé nmésié i njé bóngo nécegé Yesus faje, “Jou, se iga kyat ta njéi, ni hidupé né nase fanfawa?”
22 Yesusé ncónglo i, “Iga Ya wlegé bo nhidup sogado Ya bo kwómé nmulé né, necé anim urusan pa. Mayta awé, lima bo mdéréré Ya ro.”
23 Yesusé néceg fajé rewóré, habar ta njéi re nwóm sogado po férimé kyaté-kyat ta rdélé Yesusé né, se récegé cogo Yesusé ni motemote ta njéi, nase nmót pa. Momongo Yesusé néceg fajé pa, mayta ta Yesusé nécegé né, iga Ya wlegé bo nhidup sogado Ya bo kwómé nmulé né, necé Petrusé ni urusan pa.
Méitén-méiténé né ni basa
24 Yesusé ni motemote ta nmésié i njé, i ta njéi ro ta nfébingé re nlefo férimé kitabé njé ni wlólo né. It férimé tuné, ta i nfébingé né fatuwé.
25 Se reni félé lesu ta Yesusé re npe né. Iga férimé ta Yesusé npe né ga bo tlefo esó-esó, po dunia njé ni wlólo nte nase nbung pa, bo férimé ta Yesusé re npe né ga tlefo sogado tpe ni buké, nase tadélé félé.