Yesusé nmóté se re npangéné nmulé
20
Mgo po ngénngan minggu ta tamémóné i lesu né, Maria kyat Magdala njé nfan po Yesusé ni kubur legé njé ni. Se re nwóm po kuburé njé ni, néga némnaw lóy ta i po kuburé ni gbono lo njé re némlilés i, se re tiso i po ni góo lo né. 2 Pocé tabóngo ncéreré se nfan po Simon Petrusé, re po Yesusé ni motemote ta nmésié i njé, se re nwóm néli po si ni bóngo nécegé si faje, “Ee, kyaté-kyaté né re réyó keé Yesusé ni mayaté njé, se re tiso I po kuburé lo, mayta ya kuné pa rfapelé keé I po sói lo!”3 Pocé tabóngo Petrusé i re Yesusé ni motemote ta isó njé rfan po kuburé lo nóté. 4 Si dórén luwé rcéreré nétó né rfadéréré, mayta Yesusé ni motemote ta isó njé ntubé po Petrus ni, se nwóm i ntubé po kuburé lo. 5 Néli faje, Yesusé ni motemote ta isó i njé ncung némin po kubur legé njé ni pa, se maduga i po tó se nlengné be néminé le, se némnaw ngalépé mfus ta réyémo Yesusé ni mayaté njé né pocé. 6 Rewóré ta néi, Simon Petrusé ma nwóm pocé nóté. Mayta nwóm néli kuburé njé ni, tabóngo ncung néminé, némin faje i ma némnaw ngalépé mfusé né pocé nóté. 7 Ngalépé mfus wóm ta rbólto po Yesusé ni baboko lo né ma pocé lesu, mayta terétuké se rfara keé néli cuci re ngalépé mfus ta rbólto po Yesusé ni badané lo né. 8 Tabóngo Yesusé ni motemote isó ta nwómé ntubé po kuburé lo njé, i ma ncung néminé nóté. Pocé i ma némnawé ndimé tabóngo ndélé ta Yesusé re rpangéné nmulé né. 9 Sababta, po tatubé lima lesu sogado po waktu ta néi, si rcae pafule ta rlefo po kitabé ni wlólo ta récegé, Yesusé njé bo nmóté mayta nase npangéné nmulé. 10 Se rewóré ta néi, ga Yesusé ni motemote séluwé nesté réléy po riri umé lo.
Yesusé nfaftulo ni diri po Maria kyat Magdala njé ni
11 Mayta Maria kyat Magdala njé nosél po kuburé ni gbono lo se ntangésé. Waktu ta néntangésé lesu né, nlengné némin po kuburé ni wlólo né. 12 Néga némnaw Jou ni nénan séluw ta si yama soroga né, rpake kabaya mfusé. Réntolén si po géwgów ta kyaté né rfépelo Yesusé ni mayaté lo né. Ta isó njé ntolén po Yesusé ni baboko lapo, ta isó njé ga ntolén po Yesusé ni sóo lapo.
13 Pocé bóngo Jou ni nénan séluwé nesté rutné Maria, “Neke, pe sói se mtangésé?”
Bóngo Maria ncónglo si, “Ya ktangésé nte, sababta kyaté né re ryó keé Jou ni mayaté njé, mayta kuné pa, rfépelé keé I pua.”
14 Maria néceg fajé rewóré, négiwé i némin po too lo ga némnawé reni kyat isó nosélé, mayta nuné pa, ta nejé Yesusé.
15 Bóngo Yesusé nutné Maria, “Neke, pe sói se mtangésé? Méyówé pai?”
Mayta Maria nacogo ma Yesusé njé kyat ta réjaga bét po géwgów ta njéi né, se nécegé i faje, “Moke, iga Awé ta méyó Jou ni mayaté njé, mfébingo ya ro, mfapelé keé I pua? Bo ya kfané kéyó I.”
16 Bóngo, Yesusé nkakém Maria, “Maria!”
Pocé Maria néngóto Yesusé bóngo nécegé I faje, “Rabuni!”, po méitén Ibrani ta ni ngale né, ‘Guru’.
17 Pocé, Yesusé nécegé Maria, “Ma métané Ya su na, sababta Ya kéléy po nik Moke ni pafule. Mayta awé mfan po nik dél ta randéréré Ya nesté bo mfébingo si, nete Ya bo kfan po nik Moke ni, mewé ma nimi Moke I nóté. I ta njéi Jou Lahatala ta Ya ksuba I nje, mewé ma fsuba Jou Lahatala ta njéi nóté.”
18 Rewóré ta néi, Maria kyat Magdala njé nfan po Yesusé ni motemote né se nécegé si faje, “Ya re kémnaw Jou Yesusé!” Bóngo Maria nfébingo si sói ta Yesusé re nécego i né.
Yesusé nané ni motemote nesté rfafané ni yabé né
19 Po ngénngan Minggu ni dorémé né, Yesusé ni motemote nesté rfajólo si po um isó ni. Férimé umé njé ni ngówéné né rakété ndimé, sababta rémtat agama Yahudi né riri kyat ta rpélóyé nesté. Waktu ta néi, Yesusé nwómé se nosél po riri fapéluné né, bóngo néceg faje, “Tabea, kéror po Jou ni bo wlomi né nténténgéné!” 20 Yesusé néceg fajé rewóré, tabóngo nfaftulo fao re katno njé po si ni. Waktu ta ni motemote nesté rémnaw Yesusé né tadélé rcéngé I. 21 Se Yesusé nécego si nóté, “Kéroré Jou Lahatala npe wlomi né nténgéné! Ya nik Moke njé re nané Ya kfafané ni yabé né, se nete Ya bo kané mewé bo ffafané niké yabé né nóté.” 22 Yesusé néceg faje rewóré, tabóngo nufo si, se néceg faje, “Ftarima Jou ni Rohé nje ro. 23 Iga mewé fféyangésé kyat faisó nó sélsólé, Jou Lahatala ma nase nfayangésé keé kyat ta njéi nó sélsólé né, mayta iga fécegé kyaté njé nó sélsólé né myangés pa, Jou Lahatala ma nase nfayangés pa.”
Yesusé nfaftulo ni diri po Tomas ni
24 Tomasé njé, isó po Yesusé ni motemote yófésó re séluwé nesté ni, ta kyaté né rénkakmé i, ‘Fasosora njé.’ Waktu ta Yesusé nfaftulo ni diri po ni motemote ta iglé né, Tomasé tiso i. 25 Se Yesusé ni motemote ta iglé né récegé Tomas faje, “Tomasé, amé re kémnaw Yesusé!”
Mayta Tomasé nécegé si faje, “Iga ya kémnaw paku góo ta po fao lo né pafule, re kfapel kakologé nte po paku góo ta po fao lo né pafule, bongo kfasung faogé nte po ni yóbét góo ta po katno lo né pafule, ya nase kdélé pa.”
26 Ni mnuo minggu nuéncó néli, Yesusé ni motemote nesté rfajólo si nmulé po um ta njéi nóté. Waktu ta néi, Tomasé ma i pocé. Férimé ngówéné né rakété keé ndimé. Bóngo Yesusé nwómé nóté se nosél po riri fapéluné né bóngo nécegé si faje, “Jou Lahatala npe wlomi né nténgéné!” 27 Bóngo Yesusé nécegé Tomas faje, “Tomasé, mfépel kakolomé né pote, bóngo mémnaw faogé nte, rewóré mfésung faomé né po yóbét ta po Nik isé pópo lo nte bo mdélé óro ta Ya re kpangéné né.”
28 Tomasé nécegé Yesus faje, “Moke, Awé nte fatuw ta mkawasa po ya ni, ya nik Jou Lahatala Awé.”
29 Bóngo Yesusé nécegé i faje, “Tomasé, awé nte sogado mdélé Ya né, sababta re mémnaw Ya? Tadélé rcéngé né kyat ta rémnaw Ya pa, mayta rdélé Ya le.”
Yohanesé nlefo ta Yesusé npe né po kitab ta njéi bo kyaté né rdélé Yesusé
30 Reni félé lesu mujizat-mujizat ta Yesusé re npe po ni motemote nesté usnori lo né, mayta férimé né rlefo po kitab ta njéi ni wlólo pa. 31 Mayta ta re rlefo po kitabé njé ni wlólo né, necé rlefo bo mewé fdélé ta Yesusé njé Mesias I, Kolano ta Jou Lahatala néjaji bo nfasalamaté kyaté né, bóngo I ta njé I, Jou Lahatala ni Ntu I. Iga mewé fdélé I, mewé nase fhidup re Jou Lahatala sogado fajé néli le.