19
Rewóré ta néi, Pilatusé nané ni tentara Roma né ryó Yesusé se rpun I re wólé ta ni wómo mdalémé né. 2 Pocé ga tentara né rpe ni makota pusó rpake ayé ni séngsóngé myaku ta gémgaméné né se rduo po Yesusé ni baboko lo né. Bóngo rduo I juba ungu isó tadolo kolano né rénpake né. 3 Rewóré ta néi, rférakné si néli po Yesus ni ga rlólo ta rcuba I, se réceg faje, “Neje kyat Yahudi né riri Kolano I, se fsuba I!” Pocé Bóngo réspakél usno né.4 Rewóré ta néi, Pilatusé ncópéné nmulé se nécegé kyat agama Yahudi né faje, “Coba fémnawé, ya re kut Yesus po mew ni, bo mewé bisa funé ta ya kduké nó sélsól gélesó pa.” 5 Waktu ta Yesusé ncópéné né, npake dailok ta ryónémé rpake séngsóngé myaku ta gémgaméné né, re juba ungu isó. Pocé ga Pilatusé nécegé si faje, “Coba fémnawé Kyaté njé.”
6 Waktu agama Yahudi né riri imam ta rpélóyé né, re kyat ta réjaga po Um Sambayang ta npélóyé njé rémnaw Yesusé, bóngo rgélayé, “Fsalibé keé I ro, fsalibé keé I ro!”
Pilatusé ga nécegé si faje, “Iga mewé ta bo fsalibé keé I, wóré fyó I bo mewé ta fsalib I óro. Sababta ya re kutné I, mayta kduké nó sélsól gélesó pa.”
7 Bóngo kyat tut ta rkawasa po agama Yahudi né récegé Pilatus faje, “Amé agama Yahudi né re mam aturané. Se iga bo tdéréré aturan ta néi, Kyat ta njé I, mare tpo I hukuman sogado nmóté, sababta I nécegé cogo Jou Lahatala ni Ntu I.”
8 Pilatusé nlongé ta réceg fajé né, nbóng ta tadélé némtaté. 9 Tabóngo nut Yesus némin po ni kadatongé lo nmulé, se nutné I faje, “Awé nte Aw fawa lima?” Mayta Yesusé ncóngél pa.
10 Pocé, Pilatusé nutné Yesusé nóté, “Awé nte wlem pa bo méiténé mdé ya? Awé muné pa ta ya nte re nik kawasa bo kfabebasé Awé? Bóngo ya ma re nik kawasa ta bo ksalipé keé Awé né?”
11 Bóngo Yesusé nécegé i faje, “Moléné moke, awé re nim kawasa po Ya ni, mayta kawasa ta néi maduga nik Moke Jou Lahatala ta npo awé. Se kyat pai ta npo keé Ya po aw ni né, kyat ta njéi nó sélsólé né nase lebe pélóy po anam sélsólé né.”
12 Pilatusé nlongé ta néi, tabóngo néyówé yéféné bo nfabebasé keé Yesus óro. Mayta kyaté-kyat agama Yahudi né, rgélayé se réceg faje, “Moke, iga awé bo mfébebasé keé Kyat ta njéi, awé nase bisa mféljilé mdé kolano Roma ta npélóyé njé pana. Sababta, kyat pai le ta nécegé cogo i nkolano tadolo Yesusé nécegé né, kyat ta njéi re nkotale keé kolano Roma njé.”
13 Pilatusé nlongé kyat Yahudi né réceg fajé né, tabóngo nané rcópné Yesus po ni kadatongé lo se rut I nétó. Pocé ga Pilatusé ntolno ni karapesa ta iga bo nadili kyaté né mare ntolno karapesa ta njéi. Karapesa ta njéi rpe lima smené se re ndadi lóyé. Ni méitén Ibrani né, réceg Gabata. 14 Po ngénngan ta néi, kyat agama Yahudi né rfasadia si bo rpe riri ngénngan ta pélóy ta réceg Paska né, necé rfatélolmo si ta Jou Lahatala re nfabebasé keé riri délut tatubé lima ta bangsa Mesiré rpeé riri béyak si né. Waktu ta néi, re ngénngané fapéluné, nihalé tok nuén yófésó re nuén luwé, bóngo Pilatusé nécegé agama Yahudi né riri kyat tut ta rpélóyé nesté faje, “Coba fémnawé, neje mewé nimi Kolano I!”
15 Mayta si rgélayé ga réceg faje, “Fémóté keé I ro! Fémóté keé I ro! Fsalipé keé I ro!”
Bóngo Pilatusé nécegé si faje, “Neje mewé nimi Kolano I. Mewé wlomi iga ya kané bo rcalibé keé I né.”
Si ga rcónglo, “Amé re mam kolano nésé pa, amam kolano né maduga kolano Roma ta npélóyé njé le.”
16a Ni wóré nópé né, Pilatusé npo keé Yesus po si ni bo rcalibé keé I.
Rcalibé keé Yesusé
16b Pocé bóngo rut Yesusé bo rcalibé keé I. 17 Waktu ta néi, Yesusé npó ni salibé njé se ncópén lima kota njé ni, bo nfan po géwgów isó ta iga méitén Ibrani né ngósno Golgota, ta ni ngale né, ‘Géwgów Gagegéy.’ 18 Po géwgów ta rcalib Yesusé né, pocé ma reni kyat séluwé nóté ta bo rcalib si pocé né. Se ta isó njé i po Yesusé ni féspal wónéyé, ta isó njé i po faspal balété, se Yesusé I po riri fapéluné. 19 Pocé, bóngo Pilatusé nané si rpaku fófén wóm po salibé ni wómo po ya né, ta rlefo faje, ‘Neje Yesus Kyat Nazaret, kyat Yahudi né riri Kolano I.’ 20 Reni kyat Yahudi félé ta rwaca tulisané né, sababta géwgów ta rcalib Yesusé né nérakén kota Yerusalemé. Méitén-méitén ta néi, rlefo rpake méitén Ibrani, méitén Latiné, re méitén Yunani. 21 Pocé bóngo imam-imam ta rpélóyé nesté récegé Pilatus faje, “Moke, ma mlefo ‘Kyat Yahudi né riri Kolano I na. Ta fié né mlefo be, ‘Kyat ta njé I nécegé cogo kyat Yahudi né riri Kolano I.’ ”
22 Bóngo Pilatusé nécegé si faje, “Sói ta ya re klefo fajé né, fajé óro.”
23 Pocé tentara-tentara né rcalib Yesusé rewóré, tabóngo ryó keé Yesusé ni kabaya njé ga rfanténo si téntén abén fóté. Ni juba njé ma ryó keé i nóté. Mayta ni juba njé, po ya sogado nópé né réring pa, se dolo nacoméné. 24 Bóngo tentara nesté rfalécego faje, “Juba ta njéi, ma tégawés i na bo tfanténo ité, mayta tépatén undi bo pai ta nase nduk juba ta njéi.”
Si rpe Yesusé ni kabaya re juba njé fajé né, necé tadolo tatubé lima ta rlefo po Jou ni Buké wlólo né, nete ta re ndadi i né,
“Nik kabaya njé rfanténo riri i, bóngo répatén undi bo rduké keé nik juba njé nóté.”
Se tentara né sogado rpe fajé né, sói ta tatubé re rlefo po Jou ni Buké wlólo né re ndadi i ro.
25 Yesusé ni neke nosél po Yesusé ni salib lapo lo né, Yesusé ni neke ni fténo né Kleopasé ni pégelé ta ngósno Maria njé, re Maria kyat Magdala njé. 26 Waktu Yesusé némnawé ni neke re ni motemote ta nmésié i njé nosél po Yesusé ni neke lapo lo né, bóngo Yesusé nécegé ni neke faje, “Neke, nik motemote ta njéi, nete óro, myó i né tadolo antim i nóté.”
27 Bóngo Yesusé nécegé ni motemote njé faje, “Nejé, Ya nik neke i, se nete óro awé myó i dolo nim neke i nóté!” Po waktu ta néi óro, Yesusé ni motemote njé nut Yesusé ni neke po ni umé lo bo ntolno i.
Yesusé nmóté
28 Yesusé nuné, I re nfawóré ndimé sói ta Jou Lahatala nané I npe né. Mayta góli esó lesu, se Yesusé nécegé, “Gligé mangé.” Rewóré ta néi, férimé ta rlefo po Jou Lahatala ni Buké wlólo né, re ndadi i ndimé. 29 Pocé reni anggur ta ménilé né tampayang pusó, se rwalmé barang diréncó ta ncilét wóe fié né po angguré lo ga rétusé po ayé ni séngsóng ta récegé hisopé né, ga rférakné néya po Yesus sumo lo né. 30 Se rfalépo I. Rewóré ta néi ga Yesusé néceg faje, “Nete rewóré ndimé.” Tabóngo Yesusé nlik nópé se nserakané keé ni jiwa njé.
Rétusé Yesusé ni katno njé
31 Waktu ta rcalib Yesusé né, po ngénngan ta néi agama Yahudi né rfasadia si bo riri ngénngan Sabaté, ngénngan ta néi, si bisa rpe yabé pa. Ngénngan Sabat ta néi ma, mgo po riri ngénngan ta pélóy ta réceg Paska né, bo rfatélolmo ta Jou Lahatala re nfabebasé keé riri délut tatubé lima ta bangsa Mesiré rpeé riri béyak si né. Se agama Yahudi né riri kyaté né rwóm po Pilatus ni, se récego i bo nané ni tentara né rfapekété keé Yesusé I re kyat séluw ta rcalib si nesté sóori né, bo famlale rmóté bo rtebo keé riri mayaté né. Sababta, si wlori pa bo po ngénngan Sabaté né ga, reni mayat ta terasókté po salibé lo lesu. 32 Pocé, Pilatusé ma wlo, tabóngo nané ni tentara né rfapekété keé kyat séluw ta rcalib si re Yesus pocé né sóori né. 33 Se re rwóm po Yesus ni ga rémnawé Yesusé re nmóté, tabóngo rfapekét pana sóo né. 34 Mayta reni tentara isó pocé nétusé Yesusé ni katno njé re tubaké se ni laló ta ncópéné né nfépcapu i re wóé.
35 Pocé ma, reni kyat isó ta némnaw férimé ta néi, se nfébingé kyaté né, sababta i nuné, férimé ta nfébingé né fatuwé, se i néceg ta néi bo mewé bisa fdélé. 36 Tentara né rfapekét pa Yesus sóo né, bo férimé ta rlefo po Jou ni Buké wlólo né ndadi i. Ta rlefo po Jou ni Buké wlólo né, ni glio faje, “Yesusé ni momé né nase isó pa ta bisa rfapekété.” 37 Po Jou ni Buké wlólo né, reni nóté ta réceg faje, “Si nase rémnaw ta re ratépés I né.”
Rputé keé Yesus po kubur legé lo
38 Reni kyat isó ngósno Yusufé, kyat Arimatea i. I ma nandéréré Yesusé nóté, mayta dolo népiné i le, sababta némtat agama Yahudi né riri kyat tut ta rpélóyé nesté. Waktu ta Yesusé re nmóté né, Yusufé ta nwóm po Pilatus ni se néroré bo néyó Yesusé ni mayaté njé bo nput I. Bóngo Pilatusé ma wlo, pocé tabóngo Yusufé nfané se ntebo Yesusé ni mayaté njé bo nput I. 39 Nikodemusé ma nwóm pocé nóté. I ta njé ta nuéncó re nwóm po Yesus ni né dorémé. Nikodemusé nut yégét mur ta pépu mnó né, ncapu re yégét gaharu ta pépu mnó bo nélulo Yesusé ni mayaté njé. Yégété né ni matéo né nihalé kilo yófételé. 40 Pocé, ryó Yesusé ni mayaté njé se réyémo I re ngalépé mfus ta nalusé né. Ga ralulo I re yégét ta pépu mnó né, rdéréré ta kyat Yahudi rénpe waktu bo rputé kyat ta rmóté né.
41 Po Géwgów ta rcalib Yesusé né, reni bét isó. Se po bété njé ni wlólo né, reni kubur leg wóbno isó, ta nuéncó pafule bo rputé kyat pocé. 42 Waktu ta néi, kyat Yahudi né rfasadia si sababta riri ngénngan Sabaté né re bo wóré, ngénngan ta néi kyat Yahudi né bisa rpe yabé pa. Se Yusufé i re Nikodemusé rfané ga rfépelé keé Yesusé ni mayaté njé po kubur legé njé ni, sababta kubur leg ta njéi nélów pa.