Rgó Yesusé
18
Yesusé nméiténé ndé ni Moke Jou Lahatala rewóré, tabóngo I re ni motemote nesté rfan néli po wóé Kidroné ni féspalé. Pocé reni bét isó, se Yesusé I re ni motemote nesté rcung némin po bété njé ni wlólo. 2 Yudas ta bo nwagé Yesusé njé ma nuné géwgów ta néi, sababta Yesusé I re ni motemote nesté re nuén fis néli ro ranfajólo si pocé. 3 Pocé tabóngo Yudasé nut tentara Roma né re kyat Yahudi séfis néli ta réjaga po Um Sambayang ta npélóyé njé ni né. Kyat ta nesté rwómé né, rut lantera, oboré, yété re ay wómo. Sogado si rwóm pocé né, sababta imam ta rpélóyé né, si re guru-guru agama Yahudi né, rané si bo rgó Yesusé. 4 Mayta Yesusé re nuné ndimé sói ta nase bo ndadi po I ni né, se nfan néli tabóngo nécegé si faje, “É, mewé nte bo féyówé pai?”5 Kyaté nesté rcónglo I, “Amé kéyówé Yesus ta I lima Nazareté njé.”
Tabóngo Yesusé nécego si nóté, “Ya nte I ro.”
Pocé fajé Yudas ta bo nwagé keé Yesus po kyat léo njé ma nosél pocé nóté, i re kyat ta félé né. 6 Pocé Yesusé nécegé si faje, “Ya nte I ro,” tabóngo rasué si se ramop nóp bétbété lo. 7 Pocé Yesusé nutné si nóté, “Bo féyówé pai?”
Si rcónglo I, “Yesus, kyat Nazareté njé.”
8 Tabóngo Yesusé nécego si nóté, “Ya re kécego mewé, Ya nte I ro. Se iga mewé féyówé Ya, ffamólé keé nik motemote nesté bo rfan si óro.” 9 Yesusé néceg fajé po si ni, bo sói ta I re néror po ni Moke Jou Lahatala ni né, nte ndadi i ro. Ta I re néroré né, ni glio faje, “Férimé kyat ta Awé re mpo Ya né, kfaménawé si fafié bo masike faisó le ma rémyangés na.”
10 Waktu ta néi, Simon Petrusé nut yété mlóngé isó, bóngo natóbé yété njé ga naswóté keé imamé né riri kapala njé ni nénané njé ni tétango faspal wónéyé né se mwetés i. Kyaté njé ngósno Malkusé.
11 Pocé tabóngo Yesusé nécegé Petrusé, “Mésungé nim yété njé némin po góo lo né. Sababta, nik Moke re nécegé, ta Ya mare kangelangé, necé kfatailo dolo kiném po cawan ta nik Moke nané Ya kiném i njé.”
Rut Yesusé bo nakbono Hanasé
12 Pocé bóngo tentara Roma né, si re riri kepala njé, re kyaté-kyat ta réjaga po Um Sambayang ta npélóyé njé ni né, rgó Yesusé se rpiténé keé I. 13 Bóngo rut Yesus néli po Hanas ni, sababta Hanasé njé Kayafasé ni kmo i. Kayafasé njé imamé né riri kapala i po waktu ta néi. 14 Kayafasé njé ta nuéncó re nécego agama Yahudi né riri kyat tuté nesté faje, “Ta fié né, kyat faisó le ta nmóté bo férimé kyaté né riri féyfié.”
Simon Petrusé nécegé cogo i nféyal Yesus pa
15 Simon Petrusé i re Yesusé ni motemote isó nóté rtéptubo Yesusé. Ni motemote ta njéi, nféyal imamé né riri kapala njé. Se ncungé nfadéréré re Yesus némin po imamé né riri kapala njé ni umé ni kintalé lo né. 16 Mayta Petrusé maduga néftón po tó néliké le, po pagaré ni ngówén lapo lo né. Pocé tabóngo motemote ta nféyal imamé né riri kepala njé, ncópén nétó se nécegé béyak mépin isó ta néjaga ngówén pagaré njé, bo Petrusé ma bisa ncung némin po umé njé ni kintalé lo né. Pocé tabóngo motemote njé nané Petrusé ncung néminé.
17 Pocé bóngo béyak mépin ta néjaga pagaré ni ngówéné njé nécegé Petrus faje, “Aw ta nte i ma Yesusé ni motemote awé nóté to?”
Petrusé ga ncónglo i, “Tisé! Ya pa.”
18 Dorém ta néi, bébóbélé se imam ta npélóyé njé ni kyat yabé, re kyaté-kyat ta réjaga po Um Sambayang ta npélóyé njé ni, si rafói luténé, tabóngo rosél po lutén lapo né se rapolé si. Pocé Petrusé ma nfan néli se napolé i nóté.
Imamé né riri kapala ta ngósno Hanasé njé, nutné Yesusé
19 Po waktu ta néi po miné, se imam ta npélóy ta ngósno Hanasé njé nutné Yesusé, “Anim motemote si fawa lima, bóngo Anim dodoto sói re sói ta mpo si né?”
20 Tabóngo Yesusé ncónglo i, “Ya kfasodoto kyaté né képiné Ya pa, sababta Ya kfasodoto kyaté né po kyat Yahudi né riri um-um sambayangé lo, re po Um Sambayang ta Npélóyé njé ni, po géwgów ta kyat Yahudi né rénfajólo si né. Ya kfasodoto kyaté né po géwgów ta kyaté né rémnaw re runé lo né, se Ya kfasodoto kyaté né po géwgów ta terépiné pa. 21 Néga pe sói se mutné Ya? Mutné be kyaté-kyat ta re rlongé Ya nik dodoto né. Si runé sói ta Ya re kécegé né.”
22 Po waktu ta Yesusé néceg fajé né, pocé ma reni kyat isó ta néjaga po Um Sambayang ta npélóyé njé ni né, télél be nosélé ga néspakél Yesusé, bóngo nécegé I faje, “Beé, ga msóngél fajé po imam ta npélóyé njé ni né!”
23 Pocé Yesusé nécegé i faje, “Iga ta Ya kécegé né sólé, mfaftulo ta sólé né po sói lo. Mayta iga ta Ya kécegé né ga fatuwé, pe sói se maspakél Ya?”
24 Rewóré ta néi, Hanasé nané ni kyaté né rut Yesusé néli po Kayafas ni, imam-imamé né riri kepala njé. Ta rut Yesusé néli po Kayafas ni né, Yesus fao né rpiténé lesu.
Pocé Petrusé nécegé cogo nféyal Yesus pa nóté
25 Waktu ta Yesusé nékbon po imamé né riri kapala ta ngósno Kayafasé njé ni umé lo né, Simon Petrusé nosél po luténé njé ni lapo lesu bo napolé i. Pocé bóngo kyat ta si pocé né rutné i, “Aw ta ntei ma Yesusé ni motemote awé nóté to?”
26 Mayta Petrusé nécegé nféyal Yesus pa se néceg faje, “É, ya pa.”
Pocé ma reni imamé né riri kapala njé ni béyak isó nóté, i nfaftén re kyat ta Petrusé ntipélé ni tatango njé. Kyaté njé npe néli se nutné Petrusé, “Nihalé awé ro, ta kémnawé mfadéréré re I po bété lo né, to?”
27 Pocé Petrusé nécegé nóté, “Ya pa!” Néceg ta néi rewóré, bóngo mané né rékuku.
Rut Yesusé bo négbono Pilatusé
28 Waktu ta tamémóné i lesu né, kyat tut Yahudi né ryó Yesus po imam Kayafasé ni kintalé lo né se rut I néli po gubernur Pilatusé ni kadatongé lo. Mayta po tamémóné ta néi, kyat Yahudi ta rdéréré Yesusé né rcung pa, sababta, gubernuré njé kyat Yahudi i pa, se iga rcungé rdé kyat ta rdéréré agama Yahudi riri aturan pa né, nase rcól po Jou Lahatala ni se bisa rémnóm Paska pa. 29 Se gubernur Pilatusé ncópén nétó, bóngo nutné si, “Kyat ta njéi ncól sói sogado fut I lima né?”
30 Kyat ta pocé né rcónglo i, “Iga Kyat ta njé I npe sélsól pa, amé nase kut I po aw ni pa.”
31 Tabóngo gubernur Pilatusé nécegé si faje, “Fut I bo fadili keé I óro, fdéréré nimi aturan agama Yahudi né.”
Mayta kyat Yahudi nesté récegé Pilatus faje, “Amé kyat Yahudi né, re mam hak pa bo kpuné kyaté né.” 32 Ta si réceg fajé né, necé tadolo Yesusé nécegé ta I bo nmóté né nase bo ndadi i.
33 Rewóré ta néi, gubernur Pilatusé ncungé nmulé po ni kadatongé lo né, se nkakém Yesusé bóngo nutné I, “Fatuwé, ta Awé nte kyat Yahudi né riri Kolano Awé?”
34 Tabóngo Yesusé nécegé i faje, “Ta mutné né, awé ro ta wlemé bo muné, pari kyat iglé ta rfébingé Ya po aw ni?”
35 Pocé tabóngo gubernur Pilatusé nécegé I faje, “Alli, se Awé re muné ya nte kyat Yahudi ya pa, pe sói se mutné Ya faje né? Anim kyaté-kyaté né, si re nimi imam ta rpélóyé nesté ta rut Aw lima bo rfasólé keé Awé. Se wóré mécegé ro, Awé re mpe sélsól sói?”
36 Tabóngo Yesusé nécegé i faje, “Ya kdadi Kolano po dunia nje ni wlólo nte pa, sababta iga bo kdadi Kolano po dunia nje ni wlólo nte, Ya niké kyaté-kyat ta rpe ta Ya kané si rpe né nase re rwómé rfaparangé, bo ma sogado rpo keé Ya po agama Yahudi né riri kyat tuté nesté na. Mayta Ya kdadi kolano né po dunia nje ni wlólo nte pa.”
37 Tabóngo gubernur Pilatusé nutné Yesusé nóté, “Se Awé nte Kolano Awé?”
Tabóngo Yesusé ncónglo, “Awé ta mécegé Ya nte Kolano Ya. Ya ktub re kwóm po dunia nje ni wlólo né, bo kfawómo ta métegélé né. Se kyat pai ta wlo ncuka ta métegélé né, i nase nlongé Ya.”
38 Tabóngo gubernur Pilatusé nutné Yesusé nóté, “Fanfawa bo tuné ta fatuwé né?”
Rpo Yesus hukuman ta météwé
Gubernuré njé nutné Yesusé rewóré, bóngo ncópén nétó po kyat Yahudi ta pocé né, se nécegé si faje, “Ya re kutné I, mayta kduké nó sélsól gélesó pa, masike cuci le ma tisé.” 39 Mayta étné be po ngénngan ta pélóy ta récegé Paska né, gubernuré njé nfasópén kyat ta si po bui wlólo né faisó, bóngo gubernuré njé nécegé si faje, “Mewé wlomi pari tisé bo ya kfabebasé keé nimi Kolano nje né?”
40 Pocé ga kyat félé né rgélayé se réceg faje, “Ma mfabebas I na! Bo mfabebasé keé Barabas óro!”
Barabasé njé kyat léo i, re wlo ncuka bo nngamo keé pemerenta Roma ta rkawasa po bótén Israelé né.