Yesusé nméitén néya po ni Moke Jou Lahatala ni
17
Yesusé néceg férimé ta néi po ni motemote nesté ni rewóré, tabóngo néngóto néya langété se néceg faje, “Moke, férimé ta mécegé né nte re nwómo ni waktu óro. Se Ya kéror po Aw ni bo mpe po Ya ni óro, bo kyaté né rtail re rhoromat Ya. Iga fajé, Ya ma nase kpe bo si ma rtail re rhoromat Awé nóté. 2 Sababta, Awé re mpo Ya kawasa bo kkawasa férimé kyat ta po dunia nje ni wlólo nte né, bo férimé kyat ta Awé re mpo Ya né, nase kpe bo rhidup re Aw sogado fajé néli le. 3 Necé ni ngale iga thidup re Jou Lahatala sogado fajé néli le né, tadolo faje: Si re rféyal Awé Moke, Awé fatuw-fatuw ta Jou Lahatala óro, reni ta nésé pana. Bóngo si re rféyal ta Ya nte Yesus Kristus ta mané Ya kwóm po dunia nte né. 4 Moke, Ya re kfawóré ndimé, yabé ta mané Ya kpe po dunia nje wlólo nte né. Se sói ta Ya re kpe né, kyaté-kyaté né re rémnawé se rtail re rhoromat Awé. 5 Moke, nete Ya kéroré mpe bo sogado kduk téltail re horomat po usnomé lo, ta dolo Ya re Awe tfadéréré lesu po waktu ta dunia nje ndadi i pafule né.”Yesusé néroré bo Jou Lahatala nfaménawé kyaté-kyat ta rdéréré I né
6 Yesusé nméitén néya po ni Moke Jou Lahatala ni né, néceg faje, “Moke, kyaté-kyat ta re mpo Ya po dunia wlólo nte né Ya re kfébingo si, se re rféyal Awé. Si ta néi Animé kyat ta mpo Ya né, se nte si re rdéréré Anim dodoto né. 7 Nte Ya re kfébingo si, sói ta Ya re kéceg re kpe né, férimé né nwóm yama po nik Moke Jou Lahatala ni. 8 Sababta, férimé ta re mécego Ya né, Ya re kfébingo si, se re rdélé. Si ma fatuw-fatuwé re runé, ta Ya kwóm yama Aw ni, re Awé ta mané Ya.
9 Moke, Ya kéroré bo mfaménawé kyaté kyat ta rdéréré Ya né, mayta bo kyat ta rdéréré Ya pa né, Ya karoro Aw pafule. Keróré mfaménawé kyat ta rdéréré Ya ta Awé re mpo Ya né, sababta nesté Animé kyat si. 10 Se férimé Ya niké kyaté né, necé ma Animé kyat si nóté. Fajé nóté, férimé ta Animé kyat si né, nesté ma Ya niké kyat si nóté. Kyaté-kyat ta néi ta rtail re rhoromat Ya né. 11 Ya re kémnuw pana po dunia nje ni wlólo nte né, sababta Ya bo kfan po Aw ni, mayta si nase bo rtolén po dunia nje ni wlólo nte. Ee Moke Jou Lahatala ta kyaté né rtail re rhoromat Awé, mgali bo mfaménawé si re Anim kawasa ta re mpo Ya né, bo si re riri dél ta iglé né wlori be pusó, tadolo Ya re Awé se wlor be pusó le né. 12 Ta Ya re si lesu né, Ya kfaménawé si re kawasa ta Awé re mpo Ya né. Ya kfaménawé si bo ma rémyangés na. Tatubé lima lesu né re rlefo po Jou ni kitabé wlólo né maduga isó le ta nase bo némyangésé, se nete re ndadi i ro.
13 Moke, nte Ya bo kfan po Aw ni óro. Se Ya kéceg férimé ta néi bo kyaté-kyat ta rdéréré Ya né rlongé, waktu ta Ya I po dunia wlólo lesu né, bo séngséngé ta po Ya ni né, si ma rbósémé nóté. 14 Moke, Ya re kéféténé nim dodoto né po kyaté-kyat ta rdéréré Ya né. Se kyaté-kyat ta po dunia wlólo ta rdélé Aw pa né, riri lé keé kyaté-kyat ta rdéréré Ya né, sababta kyaté-kyat ta rdéréré Ya né, rdéréré dunia nje ni mau né pa, tadolo Ya ma kdéréré dunia nje ni mau né pa. 15 Moke, Ya kéror pa bo malówé keé si po kyaté-kyat ta rdélé Aw pa né. Mayta Ya kéroré bo malówé si po setané né riri kolano njé ni. 16 Si tadolo kyaté-kyat ta rdélé Aw pa né, Ya ma tadolo si pa nóté.
17 Moke, mpake nim dodoto bo mpe kyaté né bo rdadi kyat ta rmétegélé, sababta, Awé nim dodoto né métegélé. 18 Moke, Awé re mané Ya kwóm yama kfafané nim yabé po kyat ta po dunia nje ni wlólo nte, fajé nóté Ya ma re kané niké kyaté né rfafané nik yabé po kyat ta po dunia nje ni wlólo nté né. 19 Se nete Moke, Ya kpo nik hidupé nje po Aw ni. Ya kpe fajé né, bo Ya niké kyat ta rdéréré nim dodoto né ma rpo riri hidupé né po Aw ni nóté.”
Yesusé néroré bo Jou Lahatala nfaménawé férimé kyat ta rdélé I né
20 Yesusé nméiténé ndé Jou Lahatala lesu, néceg faje, “Moke, ta Ya kéroré nte maduga si le pa kyaté-kyat ta re rdélé Ya né, mayta Ya kéroré nte bo mfaménawé kyaté-kyat ta nase rdélé Ya né. Si nase rdélé Ya, sababta re rlongé kyaté-kyat ta rdélé Ya né, rfawómo Ya nik dodoto né po si ni.
21 Moke, Ya kéroré bo férimé kyat ta néi wlori be esó le, tadolo Awé re mdadi esó re Ya né, se Ya ma re kdadi esó re Awé nóté. Se Ya kéroré bo si ma rdadi esó re ité nóté, bo férimé kyat ta po dunia njé ni wlólo nte rdélé ta Awé mané Ya kpe nim yabé né. 22 Moke, Awé re mpo nim kawasa ta pélóyé né po Ya ni, se Ya ma re kpo nim kawasa ta pélóyé né po si ni nóté, bo si ma wlori be esó po isó re isó, tadolo Ya re Awé re tdadi esó nte. 23 Ya wlegé bo si wlori be esó re Ya, re Awé ma mdadi isó re Ya nóté, bo si ta néi fatuw-fatuw ta wlori be esó po isó re isó ni nóté. Iga fajé, kyaté-kyat ta po dunia wlólo né nase runé Awé ta mané Ya kwóm yama, re Awé ma mésié si tadolo Awé mésié Ya né.
24 Moke, ta Ya wlegé né, kyaté-kyat ta re mpo Ya nesté, si re Ya po nik géwgów ta bo ktolno lo né, bo si ma bisa rémnaw Ya nik kawasa ta pélóyé né. Ya nik kawasa ta pélóyé né Awé re mpo Ya, sababta Awé mésié Ya né po waktu ta dunia nje ndadi i pafule né.