16
Yesusé nécego ni motemote nesté nóté, “Ya kéceg férimé ta néi po mew ni, bo wlomi né ma kangelang re ma ftébné na fdélé Ya né. 2 Sababta mewé fdéréré Ya, se nase reni waktu ta agama Yahudi né riri kyaté-kyat ta rpélóyé né nase rfaungé keé mewé bo ma fsambayang po riri um-um sambayangé lo na. Se nase reni waktu nóté, ta kyaté-kyaté né bo rpuné keé mewé, sababta récegé cogo necé ta Jou Lahatala mgo wlo né. 3 Si rpe fajé po mew ni né, sababta si rféyal I pa nik Moke Jou Lahatala njé, bóngo rféyal Ya pa nóté. 4 Nete kfébingo mewé ro férimé ta bo ndadi i né, bo sogado re ndadi i pocé nase ffatélolmo mew ta Ya re kfébingo mewé né. Po faiwóbno né Ya kfébingo mew pafule, sababta Ya kfadéréré re mewé lesu.”Yesusé nfébingé ta ni Rohé njé nase bo n'gali kyaté-kyat ta rdélé I né
5 “Mayta nete, Ya bo kfan po nik Moke Jou Lahatala ta nané Ya kwóm yama njé. Mayta reni isó pa po mew ni ta futné Ya, ‘Bo mfan pua?’ 6 Mayta nete wlomi né tadélé kangelangé, sababta Ya kécegé Ya bo kfané ro. 7 Mayta fatuwé, ta fié né Ya kfané, necé mewé nimi féyfié. Sababta iga kfané, Ya nase kpo Jou ni Rohé njé bo n'gali mewé. Mayta iga Ya kfan pa, Jou ni Rohé njé nase nwóm po mew ni pa.
8 Se iga Jou ni Rohé njé ga re nwómé, I nase npo dodoto abén méitén léo ta fanfaje: ta faywóbno bo kyaté né runé ta róri sélsólé né félé, bo kyaté runé sói ta métegél po Jou Lahatala usno lo né, re bo runé ta Jou Lahatala bo nadili keé kyaté-kyat ta po dunia nje ni wlólo nte né. 9 Se nase Jou ni Rohé njé n'gali si bo runé ta reróri sélsólé, sababta rdélé Ya pa. 10 Ta abén luwé né, Roh ta njéi ma bo n'gali kyaté né bo runé ta Ya nte kmétegél po Jou Lahatala usno lo né, sababta Ya bo kfan po nik Moke njé ni. Po waktu ta Ya kfané né, mewé nase fémnaw Ya pana. 11 Ta méitén léo né, Jou ni Rohé njé npe fajé bo kyaté né runé, ta Jou Lahatala nase bo nhukumé keé kyaté-kyat ta rdélé I pa né, tadolo Jou Lahatala re nhukumé keé setané né riri kolano ta nkawasa po dunia njé ni wlólo nte né.
12 Reni félé lesu ta Ya bo kécego mewé né, mayta nete mewé fafené fsae pafule. 13 Iga dolo Jou ni Rohé njé re nwómé, I nase bo nfaftulo mew sogado funé férimé ta métegélé né. Sababta Roh ta njé nécegé né, necé I ni méiténé né pa, mayta ta I nécegé né nlongé yama Jou Lahatala ni. Roh ta njéi ta nase nfébingo mew sói ta nase bo ndadi i né. 14 Roh ta njéi bo nhoromat Ya, sababta Roh ta njéi bo nfébingo mew sói ta I re nlongé ntubé po Ya ni né. 15 Férimé ta po Ya nik Moke ni né, necé ma Ya niké nóté. Se tamulo ga Ya kécegé, sói le ta Jou ni Rohé njé nfébingo mewé né, necé I nduk lima Ya ni.”
Yesusé ni motemote nesté wlori né bo rkangelangé, mayta ta Yesusé npangéné nmulé né wlori né séngséngé bóto
16 Yesusé nécegé nóté po ni motemote nesté ni, “Re mnuw pana, mewé nase re fémnaw Ya pana. Mayta rewóré ta néi, mewé nase ffakduk re Ya nmulé.”
17 Si rlongé ta Yesusé néceg fajé né, bóngo ni motemote séfis néli nesté rfatuténé, “I ni maksud sói, se nécegé re mnuw pana ité nase témnaw I pana, mayta rewóré ta néi, bo tfakduk re I nmulé? Pe sói nóté se nécegé bo nfan po ni Moke ni né?” 18 Yesusé ni motemote nesté rfatuténé nóté, “I ni maksud sói é se nécegé re mnuw pana? Ité tcae pa I ni maksuté né.”
19 Yesusé nuné, ta si bo rutné I né. Se, nécegé si faje, “Mewé nte ffatutén sói ta Ya kéceg péséwé né to? Ya kécegé, re mnuw pana mewé re fémnaw Ya pana. Mayta rewóré ta néi, re mnuw pana mewé bo ffakduk re Ya nmulé. 20 Fatélolmo mew fafié, sói ta Ya bo kécegé nte. Waktu ta re fémnaw Ya pa né, mewé nase bo ftangés re fgélayé, mayta kyaté-kyat ta rdélé Ya pa né, rcéngé. Mewé wlomi né bo kangelangé, mayta wlomi ta kangelangé né niwén i re sangséngé bóto. 21 Necé tadolo mépin ta nkangélang po waktu bo nmawyóyé né, mayta iga ntu njé re ntubé, re nfatélolmo ni kangelangé né pana. Sababta, tadélé re ncéngé ta ni ntu njé re ntubé né se. 22 Fajé nóté re mewé. Nete wlomi né kangelangé, mayta ité nase tfakduké nmulé. Pocé, mewé wlomi né nase séngséngé bóto, se nase reni kyat isó pa ta bo néyó nimi séngséngé ta néi.
23 Se waktu ité tfakduké nmulé né, mewé re futné Ya gélesó pana. Ya kécego mewé, waktu ta néi nóté, férimé ta mewé féror po nik Moke ni né, I nase npo mewé, sababta mewé re fdadi Ya niké kyaté mewé. 24 Po tatubé lima lesu, sogado po oras ta nté i né, mewé féror gélesó pafule po Ya nik Moke Jou Lahatala ni fpake Ya ngósnogé. Se nte féroré ro, sói ta mewé bo féroré né, necé nase fduké, bo wlomi né ta délé séngséngé bótó.
25 Férimé ta Ya kécego mewé né, kpake be adeade le. Mayta reni waktu nóté, ta iga bo kméitén re mewé né nase kpake adeade pana, mayta bo kfaftulo mewé nik Moke Jou Lahatala njé bo funé re ffayal I fié. 26 Waktu ta néi nóté, mewé féror po nik Moke ni ro fpake Ya ngósnogé. Sababta Ya re kéror gélesó pana po nik Moke ni bo kpo mewé né. 27 Ya nik Moke njé nmésié mewé, sababta mewé ma fmésié Ya, re fdélé ta Ya nte I ta nané Ya kwómé. 28 Ya kwóm po dunia nte, Ya I yama po nik Moke Jou Lahatala ni. Mayta nte, Ya bo kfatolén dunia njé bo kéléyé nmulé po nik Moke ni.”
29 Yesusé ni motemote nesté récegé I faje, “Aa, Guru, ga mépino am pana nim méiténé né, bóngo re mpake adeade pana. 30 Nete amé re kuné, ta Awé re muné ndimé, se kyaté-kyaté né ma rénutné Awé le na. Sababta nte amé re kdélé, Awé nte Aw yama Jou Lahatala ni.”
31 Bóngo Yesusé nutné si, “Se mewé re fdélé nte? 32 Fatélolmo mewé, nase reni waktu nóté, se re nwómo ni waktu óro nte, ta mew férimé nase bo fówésé bo ffatoléné keé Ya, mewé bo fówésé né isó-isó nase féléy po nimi pnuwé lo, mayta Ya kkumél pa, sababta nik Moke Jou Lahatala ndéréré Ya.
33 Ya kfébingé férimé ta bo ndadi i né po mew ni, bo mew ta re fdélé Ya né bisa fhidup re wlomi ta ténténgéné. Sababta po dunia wlólo nte mewé nase bo fkangelangé, sababta bo rfakangelangé keé mewé. Mayta ffakwaté wlomi né ro, sababta Ya re kfakala keé férimé kawasa ta po dunia njé ni wlólo nte né.”