Yesusé njé dolo ay angguré ni ayo njé, ité ga tadolo ni séngsóngé né
15
Yesusé nécego ni motemote nesté adeade isó ta dolo faje, “Ya nte bisa tfatailo Ya ta dolo ay anggur aysó ta fatuwé né, Ya nik Moke ga tadolo kyat ta nó bét angguré njé né. 2 Se Ya niké kyaté-kyaté né tadolo ay angguré ni séngsóngé né. Se séngsóng ta pyoné né, I néwetés facuci bo berési bo ni pyono né tadélé félé nóté. Séngsóng ta pyono pa né ga, nase néwetésé se nwóté keé.3 Mew ta fdélé Ya né wlomi né re fberési, sababta mewé re fdélé Ya nik méiténé né. 4 Se Ya kéror po mew ni, bo mew re Ya wlor be pusó le, bo Ya ma wleg be pusó re mewé nóté. Sababta, mewé bisa fpe ta fié pa iga fhidup re Ya pa né, necé tadolo angguré ni séngsóng ta ntub po ni ayo lo pa se népyon pa né.
5 Ya nte tadolo angguré ni ayo njé, mewé ga tadolo ni séngsóngé né. Se tadolo ni ayo re ni séngsóngé né ndadi be esó le, fajé nóté re mewé, iga mewé ma wlomi be pusó re Ya, Ya ma nase Ya re mewé se wlor be pusó le, tabóngo mewé nase bisa fpe ta fié, ta bisa fasanang Jou Lahatala ni wlo njé. Sababta iga mewé wlomi be posó re Ya pa, nase féfen pa fpe ta fié bo fasanang Jou Lahatala ni wlo njé né. 6 Kyat pai le ta wlo be pusó re Ya pa, Jou Lahatala nase nwóté keé i tadolo séngsóng ta re pyono pa se re némangé né, bóngo kyaté né rfajolo se rtapéné keé. 7 Mayta iga mewé wlomi be pusó re Ya, bóngo Ya nik méiténé né po wlomi wlólo le, sói le ta féroré né nase fduké. 8 Iga mewé fpe be ta fié le tadolo séngsóng ta pyono félé né, necé fatuw-fatuwé re ffaftulo ta Ya nik motemote mewé, tabóngo kyaté-kyaté né rémnawé nimi féyfié né, se si ma nase rtail re rhoromat Ya nik Moke Jou Lahatala nóté.”
Yesusé nané ité bo tfamésié isó re isó
9 Yesusé nécegé nóté, “Ya kmésié mewé né, tadolo nik Moke nmésia Ya né. Se mewé ma fdéréré Ya bo fbósém Ya nik mésié po mew ni né. 10 Se iga mewé fpe sói ta Ya re kané mewé né, necé ni ngale Ya nik mésié né re po mew ni. Tadolo Ya kpe sói ta nik Moke njé nané Ya né, necé ni ngale né khidup po nik Moke njé ni mésié wlólo.
11 Ya kéceg férimé ta néi po mew ni, bo séngséngé ta po Ya ni nje, mewé ma bisa fbósém sogado séngséngé bóto mewé nóté. 12 Nete Ya ta kané: Mewé mare famésié isó re isó ta dolo Ya re kmésié mewé né. 13 Mésié tadélé pélóyé né tadolo faje: iga reni kyat faisó npo ni diri bo nmóté, ni mdio be ni délé né bo rsalamaté. 14 Iga mewé fénpe be sói ta Ya kané mewé né, necé ni ngale mewé nte Ya nik dél faljilé mewé. 15 Ya nase kécegé niké kyat yabé mew pana, sababta kyat yabé né runé pa sói ta riri tuangé njé npe né. Mayta mewé nte Ya kécegé nik dél faljilé mewé, sababta férimé ta Ya klongé po nik Moke ni né, Ya re kfébingo mewé ndimé. 16 Sababta mewé ta féftul Ya pa, mayta Ya ta kéftulé mewé bo fdadi nik motemote mewé. Ya ma bo kané mewé ffané féyowé kyaté-kyaté né bo rdéréré Ya sogado fajé néli le. Se iga fpe tadolo fajé, sói le ta féror po nik Moke Jou Lahatala ni ga fpake Ya ngósnogé, I nase npo mewé. 17 Se bo kécegé nmulé ta Ya kané mewé né: Mewé mare ffamésié isó re isó.”
Kyaté-kyat ta rdélé Yesus pa né nase riri lé Yesusé I re ni motemote nesté
18 Yesusé nécegé nóté, “Iga kyaté-kyat ta po dunia wlólo nte ga rdélé Ya pa, si nase riri lé mewé. Se mewé mare fatélolmo mew fafié, sababta si ta néi re riri lé Ya ntubé. 19 Se iga mewé nte tadolo si ta rdélé Ya pa né, si nase rmésié mewé né, tadolo mew re si wlomi be pusó le né. Mayta mew re si né re nésé. Ya kkakémé mewé bo mewé ma tadolo si na, necé tamulo sogado riri lé mewé né.
20 Mewé mare ffatélolmo sói ta Ya re kécego mewé né, ‘kyat yabé né bisa pa bo lebe pélóy po riri tuangé njé ni.’ Iga kyaté-kyat né re rfakangelang Ya po dunia nje ni wlólo nte, si ma nase rfakangelangé mewé nóté. Mayta iga kyaté-kyat ta rpe Ya nik dodoto né, si ma nase rpe nóté sói ta mewé ffasodoto si né. 21 Si nase rfakangelangé mew ta fdéréré Ya né, sababta si rféyal I pa Jou Lahatala ta nané Ya njé. 22 Iga Ya kwóm po dunia nte, ga kfabingé Jou Lahatala ni dodoto né po si ni pa, necé nase Jou Lahatala nécegé si re róri sélsól pa, sababta si runé ta re róri sélsól pa. Mayta nte Ya re kwóm po dunia nte se re kfébingé dodoto ta njé i, se ndadi i pana bo récegé si re róri sélsól pa né, sababta si re runé.
23 Se kyat pa i le ta ni lé Ya, necé ni lé nik Moke Jou Lahatala nóté. 24 Iga Ya kpe pa, mujizat-mujizat ta dolo kyat iglé rénpe pa né, necé nase nik Moke Jou Lahatala nfasólo si pa, masike ga riri lé Ya. Mayta nete, si re rémnaw mujizat ta Ya kpe né, mayta riri lé Ya le, bóngo riri lé nik Moke Jou Lahatala nóté. 25 Mayta wóré bo riri lé Ya óro, bo sói ta re rlefo po Jou Lahatala ni kitabé wlólo né, nase ndadi i. Ta rlefo né faje, ‘Ta riri lé Ya né, tuné pa ni mdio sói.’
26 Ya nase kané Jou ni Rohé njé nwómé bo n'gali mewé. Roh ta njéI ta bo nfébingé sói ta métegél yama Jou Lahatala ni, bo kyaté né runé ta Ya nte pai. 27 Se mewé ma mare ffabingé po kyaté-kyaté né sói ta re flongé re fémnaw ta Ya kpe né, sababta mewé fdéréré Ya né po faywóbno ta kfamdié nik yabé né sogado ngénngan pésénte.”