Yesusé njé yéfén ta bo tfan po Jou Lahatala ni
14
Yesusé nécegé ni motemote nesté faje, “Mewé nte, ma ffawateré le na. Bo fdélé Jou Lahatala óro, bóngo fdélé Ya nóté. 2 Tabóngo re po nik Moke ni umé lo né reni géwgów félé, se Ya kfan néli né bo kfasadia góomi né ntéli. Iga tiso, Ya nase kfébingo mew pa. 3 Iga Ya re kpe néli se re kfasadia géwgów ta néi, Ya nase kwómé nmulé bo kuté mew néli pocé, bo po géwgów pua ta Ya I pocé, mewé ma mew pocé nóté. 4 Se géwgów ta Ya bo kfano lo né, mewé ma funé yéfén ta bo ffan pocé né.”5 Tabóngo, Tomasé nécegé Yesus faje, “Jou, amé kuné pa, Awé bo mfan pua. Néga amé bo kuné fanfawa yéfén ta bo kfan néli né?”
6 Pocé Yesusé nécegé i faje, “Ya óro yéfén ta bo tfan po Jou Lahatala ni né, bóngo Ya óro ta kfabingé ta fatuwé sogado bisa rféyal Jou Lahatala né, re Ya nóté ta bisa kpe sogado fhidup re Jou Lahatala sogado fajé néli né. Se, reni kyat isó pa ta bisa nfan po Jou Lahatala ni, iga ndéréré Ya pa né. 7 Iga fatuwé, mewé re fféyal Ya, nase re fféyalé nik Moke Jou Lahatala nóté. Se po nete óro, mewé re fféyal I, bóngo re fémnaw I nóté.”
8 Bóngo Filipusé nécegé Yesus faje, “Jou, mfaftulo nim Moke njé po am ni, bo masike amé kémnaw I le fié óro.”
9 Bóngo Yesusé nécegé i faje, “Filipusé, re mnuwé ta Ya re mewé tfadéréré né, ga mféyal Ya pafule né? Pai ta re némnaw Ya, necé tadolo re némnawé nik Moke Jou Lahatala nóté. Néga pe sói se mané Ya bo kfaftulo nik Moke Jou Lahatala njé po mew ni nóté? 10 Mare awé re muné ta Ya re nik Moke njé isó le né, se nik Moke I re Ya né isó le. Se, sói ta Ya kécego mewé né, necé Ya pa, mayta lima po nik Moke njé ni. Se sói le ta Ya kpe né, necé ro ta nik Moke npe né. 11 Se mdélé Ya ro, iga kéceg faje né: Ya re nik Moke njé isó le, se nik Moke I re Ya né isó le. Mayta dolo bo fdélé pafule ta Ya re nik Moke njé isó le né, se nete fdélé óro sababta re fémnaw férimé mujizat ta Ya re kpe né. 12 Fatélolmo mew fafié ta Ya bo kécego mewé nte. Kyat pai le ta ndélé Ya, kyat ta njéi fatuw-fatuwé bo npe sói ta Ya re kpe né. I ma bisa npe ta lebe pélóy po ta Ya re kpe né, sababta Ya kfan po nik Moke njé ni. 13 Se sói le ta féroré né nase kpe, sababta re fdéréré Ya. Ya niké kyaté mewé, Ya nase kpe sói le ta féroré né, bo sói ta Ya re kpe né, necé kyaté-kyaté né nase rtail re rhoromaté nik Moke Jou Lahatala njé. 14 Ya kécegé nóté, iga bo féror sói néli po Ya ni sababta mewé re fdadi Ya niké kyaté mewé, Ya bo kpo ta néi po mew ni.”
Yesusé néjaji bo npo Jou ni Roh ta bo n'gali kyat ta rdélé I né
15 Yesusé nécegé nóté, “Iga mewé fmésié Ya, mewé nase fpe sói ta Ya kané mewé fpe né. 16 Se Ya bo kéror po nik Moke ni, bo npo Jou ni Rohé njé bo n'gali mewé, Roh ta njéi nase i re mew sogado fajé néli le. 17 Jou ni Roh ta njé i ta nase bo nfaftulo mew sói ta métegél po Jou Lahatala ni né. Mayta kyaté-kyat ta rdélé Jou Lahatala pa né, nase rduk pa Jou ni Roh ta njé i, sababta si rémnaw re rfayal I pa. Mayta mewé nte fféyal I, sababta I re mewé ffadéréré se nase ntolno mewé nóté.
18 Waktu ta Ya bo kfatoléné mewé né, mewé nase fkumél pa tadolo yomya ta re riri délut pa né. Sababta Ya bo kpólén Ya nmulé po mew ni. 19 Re mnuw pana kyaté-kyat ta rdélé Ya pa né, nase rémnaw Ya pana. Mayta mewé bo fémnaw Ya nóté, sababta Ya bo kpangéné nmulé, se kpe mewé bo fhidup re Jou Lahatala sogado fajé néli le. 20 Se waktu ta Ya re kpangéné nmulé né, mewé nase funé, Ya re nik Moke kdadi esó, Ya re mewé ma esó le, se mew re Ya né tdadi be esó le.
21 Se kyat pai le ta ntarima Ya nik parenta né ga npe, kyat ta njéi ta nmésié Ya né. Ya nik Moke njé ma nase nmésié kyat ta njéi nóté, se Ya ma nase kmésié i se bo kfaftulo Nik Diri po i ni.”
22 Se Yudas ta Yudas Iskariot i pa njé, nécegé Yesus faje, “Jou, pe sói se maduga po am ni le ta mfaftulo nim diri né, se kyat iglé ta po dunia wlólo nte ga tisé?”
23 Yesusé ncónglo i, “Iga kyat pai ta nmésié Ya, nase npe dodoto ta Ya kané i né. Nik Moke ma nase nmésié i, se Ya re nik Moke nase kwómé bo ktolno i. 24 Mayta pai le ta nmésié Ya pa, kyat ta njé i nase npe pa Ya nik dodoto né. Ya nik dodoto ta néi lima Ya ni pa, mayta lima nik Moke ta nané Ya njé ni.
25 Férimé ta Ya kécegé nte, necé re kéceg po waktu ta Ya re mewé tfadéréré lesu né. 26 Mayta iga Ya re kfan po nik Moke Jou Lahatala ni, I nase npo ni Rohé njé po mew ni bo n'gali mewé, necé tadolo I re niwén Ya. Rohé njé ni yabé né, bo nfasodoto férimé ta mewé mare funé né, bóngo bo nfatélolmo mew sói ta Ya re kfasodoto mewé né.
27 Nete Ya bo kfané ro, mayta wleg ta nténgéné nje Ya bo kpo mewé. Wleg ta nténgén ta kpo mewé nte, dunia bisa npo mew pa. Se ma wlomi mya re fémtat na. 28 Mewé re flongé ta Ya kécego mewé né ta dolo faje: Ya bo kfané, mayta nase bo kwómé nmulé po mew ni. Se iga mewé fmésié Ya, mewé wlomi né nase tadélé séngséngé bóto, sababta Ya bo kfan po nik Moke Jou Lahatala ni. Sababta, nik Moke njé lebe npélóy po Ya ni. 29 Ya re kfébingé ta néi po mew ni, waktu ta férimé né ndadi i pafule, bo sogado férimé ta néi re ndadi i, mewé nase re fdélé. 30 Ya re kméitén félé pa na po mew ni né, sababta, setané né riri kolano njé bo nwómé. Setan ta njé i nkawasa be po dunia wlólo nte, mayta i bisa nkawasa po Ya ni pa. 31 Mayta Ya bo kpe farimé ta Ya nik Moke Jou Lahatala nané Ya né, bo férimé kyat ta po dunia wlólo nte runé, ta Ya nte kmésié nik Moke.
Nete fosél óro, bo tfané tfatoléné keé géwgówé ntei.”