Kyat ta rkawasa po agama Yahudi né rfasogaro si bo rpuné keé Yesusé
26
Yesusé nfasodoto si rewóré ndimé, tabóngo nécegé ni motemote nesté faje, 2 “Mewé re funé to, etlé be ngané luwé le, kyat Yahudi bo tpe rir ngénngan Paska né, bo tfatélolmo ta Jou Lahatala n'gali se nfabebasé keé rir délut tatubé lima ta kyat Mesiré né rpeé keé riri béyak si né.a Se po ngénngan ta néi, nase reni kyat ta bo rpo keé Kyaté Ntu ta Ya I yama Jou Lahatala ni, bo rcalibé keé Ya.”3 Po waktu ta néi, imam ta pélóyé né, si re kyat tut Yahudi né rfajólo si po imam Kayafése ni kadatongé lo. 4 Néli bóngo rfasogaro si rgó Yesusé bo rpuné keé I, mayta répiné si le. 5 Bóngo rfalécego faje, “Ma tgó I po ngénngan ta pélóy na, ma sogado kyat ta rdélé I né rcawané ga it re si tfakotale.”
Mépin isó ta renó sélsól félé njé népo Yesus re yégét ta pépu mnó
6 Waktu ta Yesusé I po pnuw Betania né, ntilé po Simoné ni umé lo, Simoné njé tatubé lima npado. 7 Se ta Yesusé ntoléné némnómé né, télél be reni mépin isó ncung néminé, nfauto yégét ta pépu mnó botol pusób ta ni mulo né tadélé pélóyé. Bóngo mépiné njé népo yégété né nóp po Yesusé nibéboko lo né.
8 Pocé, Yesusé ni motemote nesté rémnaw ta néi, bóngo rcawané se réceg faje, “É, ga nfalubiru keé yégét ta papu mnó né! 9 Yégét ta néi bo twagé, ni mulo né tadélé pélóyé, bo ni pipisé né tfanténo keé kyaté-kyat ta reriri reróri pa né.”
10 Mayta Yesusé nuné keé wlori né, se nécegé si faje, “Mépiné nje re npe ta fié po Ya ni, ga fsawan i né! 11 Kyat ta reriri reróri pa né, dorém re ngénngané mew re si, se bo fgali si po waktu sói le bisa. Mayta Ya nase kémnuw pa Ya re mew pote né. 12 Se ta mépiné njé népo Ya re yégété né, necé tadolo re nfasadia ta Ya bo kmóté sogado ga rput ya né. 13 Se fatélolmo mew fafié ta Ya kécegé nte. Kyaté-kyat ta rfawómo Habar ta Fié yama Jou Lahatala po dunia njé ni wlólo nte né, mépiné njé ni féyfié ta npe po Ya ni né ma nase réféténé nóté bo kyaté né rlolém i.”
Yudasé bo nwagé Yesusé
14 Yesusé ni motemote yófésó re séluwé nesté, reni isó ngósno Yudas Iskariot. Nfan po imam-imam ta rpélóyé nesté ni. 15 Néli bóngo nécegé si faje, “Iga ya kgali mewé fgó Yesusé, nase bo fdo ya sói?”
Tabóngo rpo pipis guraci yófétel po Yudas ni. 16 Ta néi óro, Yudasé néyówé yéféné bo npo Yesus néli po si ni.
Yesusé I re ni motemote nesté rémnóm be po meja pusó po riri ngénngan ta pélóyé né
17 Kyat Yahudi né riri ngénngan ta pélóyé né re nwómo i ro. Po ngénngan-ngénngan ta néi, si ró roti ta reni ragi pa né, rfatélolmo ta Jou Lahatala ncópné riri gele re gae ta po bótén Mesiré né. Pocé po riri ngénngan faiwóbno ta récegé Paska né, réwetésé riri domba né. Pocé fajé Yesusé ni motemote né rwómo I se rutné I, “Guru, bo téwetés domba né bo témnóm po sói lo? Mfaftulo amé bo kuné, bo kpe róré mnómé né pocé.”
18 Bóngo Yesusé nané si rfan néli po kota Yerusalemé, néli bo rfapdipén re kyat faisó, récegé i faje, “Mam Guru njé nané amé kpe lima nte, bo kécego awé, I ni ngénngané né rebo nwómo i ro. Se am re I bo kémnóm masaraya Paska né po nim umé lo.” 19 Pocé rlongé ta Yesusé nécegé né rewóré, tabóngo ni motemote nesté rfané se rpe ta dolo Yesusé nané si né, tabóngo rpe róri mnóm Paska né pocé.
20 Ta re dorémé né, tabóngo Yesusé I re ni motemote yófésó re séluwé nesté rtoléné se rémnómé. 21 Pocé rémnómé lesu, bóngo Yesusé nécegé si faje, “Fatélolmo mew fafié ta Ya kécegé nte. Mew ta ftoléné nte, reni isó pote faje ta nase bo nwagé keé Ya.”
22 Rlongé ta néi, wlori né ta délé kangelangé. Bóngo isó-isó rutné Yesusé, “Guru, solo maga ya?”
23 Yesusé ncónglo si, “Kyat ta Ya re I ksubuk be cawan pusó njé, i ta bo nwagé keé Ya. 24 Mayta fajé óro. Sababta Jou Lahatala re néceg po ni Buké wlólo ta Kyaté Ntu ta Ya I yama Jou Lahatala ni nase kmóté. Mayta sen i, kyat ta nwagé Ya njé. I nó sélsólé né ta délé pélóyé. Se ta fié né, kyat ta njéi ma ntub po dunia wlólo na.”
25 Bóngo Yudas ta bo nwagé Yesusé njé nutné I, “Guru, nihalé ya é?”
Yesusé ncónglo i, “Né ta dolo re mécegé né.”
Yesusé I re ni motemote né rémnómé
(Mrk. 14:22-26; Luk. 22:14-20; 1Kor. 11:23-25)
26 Waktu Yesusé I re ni motemote nesté rémnómé lesu, Yesusé nyó roti né bóngo néceg syukur po Jou Lahatala ni. Rewóré ga nfakpekté roti né, se nfanténo ni motemote nesté bóngo néceg faje, “Roti ta ntei, Ya nik wóngété, se fyó bo fó.”
27 Rewóré ta néi, nyó anggur njé lima, bóngo néceg syukur po Jou Lahatala ni nóté, bóngo npo angguré né néli po ni motemote nesté ni, se nécegé si faje, “Mew férimé finém anggur ta po cawané nje ni ro. 28 Sababta nete, Ya nik léló. Waktu ta kmóté né, nik léló ta néi nase tapówésé, bo nfatuo Jou Lahatala ni jaji po ni kyaté né, ta nase nféyangésé keé kyat félé róri sélsólé. 29 Bóngo flongé fafié ta Ya kécego mewé nte, Ya nase kiném anggur ta nte po ngénngan pésénte le. Mayta pote se néli, nase Ya re mewé tinémé nóté, iga nik Moke Jou Lahatala re ndadi Kolano se nkawasa po ni kyaté-kyaté né.”
Yesusé nfébingé ntubé ta Petrusé nase nécegé nféyal Yesus pa né
30 Rewóré ta néi, Yesusé I re ni motemote nesté rnyanyi rfapélóy Jou Lahatala ngósno, rewóré tabóngo rfan si néli po métét Zaituné.
31 Néli, bóngo Yesusé nécegé ni motemote nesté faje, “Nte fdéréré Ya, mayta mnuw pana nase bo fówésé ffatopo keé Ya, sababta Jou Lahatala re néceg tatubé lima po ni Buké wlólo né fanfaje,
‘Ya nase kpuné keé domba né riri wlóné njé, se ni domba né nai ta rfan si.’c
32 Necé i ni ngale né, Ya nase kmóté, mayta iga re kpangéné nmulé, Ya nase ktubé ntéli po bótén Galilea, bo tfapdipén pocé.”
33 Pocé bóngo Petrusé nécegé Yesus faje, “Moke, masike nik délé né rówés si ndimé se rfatoléné keé Awé, mayta ya nase kówés pa.”
34 Bóngo Yesusé nécegé Petrus faje, “Mlóngé fafié ta Ya kécego awé nte. Dorém pésénte, mané né rékuku pafule, awé re mécegé mféyal Ya pa né re nuén telé ro.”
35 Mayta Petrusé nécegé Yesus faje, “Tisé, Guru. Masike ya ma kmót re Awé, mayta ya nase kéceg ta dolo fajé pa.” Yesusé ni motemote ta iglé né ma réceg ta dolo Petrusé nécegé né nóté.
Yesusé nméiténé ndé Jou Lahatala po bét Getsemani
36 Rewóré ta néi, Yesusé I re ni motemote nesté rfan po géwgów isó ta ngósno Getsemani. Rwóm néli, bóngo Yesusé nécegé ni motemote nesté faje, “Mewé féntolén pote su é. Ya bo kfan po téli, bo kméiténé kdé Jou Lahatala.” 37 Mayta Yesusé nfan néli né, nut Petrusé, i re Zebedeusé ni ntu Yakobusé i re Yohanesé. Waktu ta rfan néli né, Yesusé wlo njé re nkangelangé, sogado nwawewé. 38 Se nécegé si dórén telé nesté faje, “Wlegé nje tadélé nkangelangé, kbósémé né dolo bo kmóté. Se Ya re mew pote su, ma fyénéf na.”
39 Nécegé né rewóré, tabóngo nfan néli cuci, se ntiki buku sogado usno né nétit nóp po bétbété lo, bóngo nméiténé ndé Jou Lahatala, se néceg faje, “Ya nik Moke ta Awé, iga wlemé, mélówé keé kangelang ta Ya bo kduké nte. Bo ta ndadi i né, ma mdéréré Ya wlegé nje na, mayta mdéréré be Awé wlemé njé le!”
40 Nméiténé ndé Jou Lahatala rewóré, néléy néli ni motemote sételé nesté ni ga néngóto, re ryénéf si ndimé. Bóngo nfépangén si se nécegé Petrusé faje, “Ceh mewé nte, féfen pa bo féjaga re Ya fatok nuéncó pote né? 41 Fpe mew fafié, re féror néya po Jou Lahatala ni bo setané njé ma nfarwae mew na, bo tadélé fdéréré Ya né ma ftébné na. Sababta mewé nte bo fdéréré be Ya, mayta dolo bo féfen pa.”
42 Pocé Yesusé nfan néli nuéncó nóté, se nméiténé ndé Jou Lahatala né, néceg faje, “Ya nik Moke ta Awé, iga kangelang ta njéi, mélówé keé i pa, se bo ndadi i po Ya ni le, fajé bo ndadi i ro. Ya nase kdéréré ta Awé re mfaréné né.”
43 Rewóré ta néi, Yesusé npólén I néli po ni motemote nesté ni né, némnawé mtóri né météwé se re ryénéf si nóté. 44 Mayta Yesusé nfamól si se nfan néli nméiténé ndé Jou Lahatala nóté se re nuén telé ro, néceg be ta dolo péséwé né le.
45 Rewóré ta néi, néléy néli po ni motemote sételé nesté ni. Se nfépangén si, bóngo nécegé si faje, “É, ga fyénéfé mewé lesu né? Coba fémnawé, nte re nwómo ni waktu óro. Kyaté Ntu ta I yama soroga njé bo rpo keé I po kyat léo nesté ni. 46 Se wóré fpangéné bo tfané ro. Sababta kyat ta bo nwagé Ya njé re nérakéné.”
Kyaté né re rgó Yesusé
47 Pocé Yesusé nméiténé ndé si lesu, télél be ni motemote isó ta ngósno Yudasé njé nwómé. Kyat félé ta rdéréré i né, rfauto riri yété re ay wómo, bo rgó Yesusé. Ta rané rgó Yesusé né, imam ta rpélóyé né, re kyat tut kyat tut Yahudi né. 48 Se ta rfan pafule né, Yudas ta bo nwagé Yesusé njé nécego si, “Kyat ta ya bo kfótén I njé, ta njé i óro, se fgó I.”
49 Pocé re rwómé, tabóngo Yudasé nfalów néli po Yesus ni, se nécegé I faje, “Guru, nim tabea!” Tabóngo nfótén Yesusé.
50 Mayta Yesusé nécegé Yudas faje, “Nik dél ta awé, re mfano Ya lima se ta bo mpe né, mpe óro pa?”
Bóngo kyaté né ryóg néli se rgó Yesusé. 51 Pocé Yesusé ni motemote isó némnaw ta rgó I né, tabóngo natóbé ni yété njé ga ntipél imamé né riri kapala njé ni béyak isó ni tatango féspalé né se mwetés i.
52 Mayta Yesusé nécegé ni motemote njé faje, “Mésungé nim yété njé nmulé po ni sarungé lo. Sababta pai le ta namongé yété, i nase nmót re yété nóté. 53 Sogado mpe fajé né, macogo ma nase nik Moke n'gali Ya pa? Bo kéror po I ni, nete óro nase nfénaté ni nénan yama soroga reni calénéd bo rfasalamat Ya. 54 Mayta, bo Jou ni nénan ta yama soroga rgali Ya tadolo faje né, nase ta réfétén po Jou ni Buké wlólo, ta Mesiasé njé mare nduk kangelang félé né, nase ndadi i pa.”
55 Pocé Yesusé nécegé kyat ta félé né, “Fgó Ya se fut yété re ay wómo né. Mewé fécogoma Kyat léo Ya? Ngénngan néya, kfasodoto po Um Sambayang ta npélóyé njé ni. Pe sói se fgó Ya pocé pa? 56 Mayta, fajé óro ta fgó Ya nte. Fajé bo ta nabi né re rlefo po Jou Lahatala ni Buké lo né ndadi i.” Rewóré ta néi, Yesusé ni motemote nesté rfatoléné keé I se rówés si ndimé.
Yesusé négbono Imamé né riri kapala njé
57 Pocé kyat ta félé né rgó Yesusé rewóré, bóngo rut I néli po imam ta npélóy ta ngósno Kayafasé njé ni kadatongé lo. Pocé po kadatongé lo né, imam-imam ta rpélóyé, re guru-guru agama re férimé kyat tut Yahudi né re rfajólo si. 58 Petrusé ma ndéréré si nóté, mayta nfaisém i. I ma ncung po min imam Kayafasé ni kadatongé njé ni kintalé lo né, se ntoléné ndé tentara ta si pocé né, bo i ma nfamélongé ta rutné Yesusé né bo nuné. 59 Pocé imam ta rpélóyé, re férimé agama Yahudi né riri kyat tuté né rfajólo si bo réyówé kyat ta bo réceg Yesusé nó ta lé po Kayafas ni, bo masike Yesusé re nó sélsól gélesó pa ma, rpuné keé I. 60 Mayta masike kyat félé réceg Yesusé nó ta lé ma, rduké nó sélsól gélesó pa.
Pocé ga télél be kyat séluwé rfan néli, se 61 réceg faje, “Kyat ta nje i, I nécegé bo négéné keé Jou Lahatala ni Um Sambayang ta npélóyé njé ga ni ngané telé né cogo bo nfawoslé i nmulé.”
62 Bóngo imamé né riri kapala njé nosél néya, se nécegé Yesus faje, “Kyaté nesté rkélak Awé, ga msóngél si pa né?” 63 Mayta Yesusé nfaténgténgén I le.
Pocé imam ta npélóyé njé nutné Yesusé nóté, “Dolo Jou! Mécego amé! Fatuwé, Awé nte Mesias ta bo mwómé mfasalamat amé njé? Se Awé ro, Jou Lahatala ni ntu Awé?”
64 Tabóngo Yesusé ncónglo i, “Awé ro ta méceg fajé. Mayta Ya kécego mewé nte, pote se néli nase fémnawé Kyaté Ntu ta Ya I yama soroga njé, ktolén po Jou Lahatala ni faspal wónéyé, kwómé né ktebé kdé mét yama langété lo!”
65 Imam Kayafasé nlongé ta Yesusé néceg fajé né, tadélé ncawané, se négewésé keé ni juba njé, bóngo néceg faje, “Cee, Kyat ta njéi ga npe ni diri dolo Jou Lahatala né. Mewé nte re flongé ta I nfaméymóy Jou Lahatala ngósno né! Se nte re tduké nó sélsólé né, se ma téyówé kyat nésé le na, ta bo réféténé nó sélsólé né. 66 Se kutné mewé, Kyaté njé bo tpe I fawa?”
Kyat ta félé né rcónglo i, “I ncól pélóyé, se tpuné keé I ro!” 67 Pocé tabóngo ritfo Yesus néli po usno lo re rfakngité I. Iglé né ga rfaspaklé I, 68 bóngo rutné I, “Iga fatuw-fatuw ta Awé nte Mesiasé, coba mfébingo amé, pai ta néspakél Awé njé!”
Petrusé nécegé nféyal Yesus pa
69 Waktu ta néi, Petrusé néntolén po imam Kayafasé ni kadatongé ni kintalé lo né. Pocé reni mépin yabé isó nfano Petrus néli, se nécegé i faje, “Aw ta nte i nóté to, ta manfadéréré re Yesus kyat Galilea njé né?”
70 Mayta pocé po kyat ta félé né usnori lo né, Petrusé nécegé cogo nféyal Yesus pa, se néceg faje, “Tisé! Ya dolo bo ksae pa, nim maksut sói se méceg fajé né!”
71 Bóngo Petrusé ncópén nétó po pagaré ni ngówéné njé ni. Pocé ma reni mépin yabé isó nóté némnaw Petrusé se nécegé kyat ta pocé né, “Kyat ta njé i ma nandéréré Yesus kyat Nazareté njé.”
72 Mayta Petrusé nécegé nféyal Yesus pa, sogado ncasi se néceg faje, “Dolo Jou! Ya kféyal I pa kyat ta njé I.”
73 Mnuw pa, kyat iglé ta rénosél pocé né rfano Petrus lima se rutné i, “Re sól pana méceg fajé né, Yesusé ni motemote né ta isó awé nóté to? Kfayal be nim méitén ta ma Yunani né, dolo kyat Galilea awé.”
74 Pocé ga Petrusé ncasi, “Dolo Jou! Ya kféyal I pa, Kyat ta njé I!”
Néceg fajé rewóré, bóngo mané né rékuku.
75 Petrusé nlongé ta mané né rékuku né, bóngo nfatélolmo ta Yesusé re nécego i né, “Petrusé, nase mané re rékuku pafule, awé re mécegé mféyal Ya pa né nuén telé ro.” Bóngo Petrusé ncópén i nétó, tadélé ntangésé né sogado ga nsasewlé.