Yesusé nméitén re mépin Samaria isó
4
Kyaté-kyat Yahudi ta rdéréré dodoto Farisi nesté rlongé ta kyat félé re rdéréré Yesusé né, bóngo cogo re nbaptisé kyaté né lebe félé po kyat ta Yohanes nbaptis si ni. 2 Masike rlongé fajé ma, necé Yesus pa ta nbaptis si né, mayta ni motemote nesté. 3 Waktu Yesusé nuné kyaté-kyat ta rdéréré dodoto Farisi né re rlongé ta néi, tabóngo nfatoléné keé si po bótén Yudea se npólén I nmulé po bótén Galilea.4 Waktu ta Yesusé bo nfan po bótén Galilea né, mare nwetco po bótén Samaria. 5 Pocé ga nfan sogado nwóm po kota isó po bótén Samaria, ta ni ngósno kota Sikhar. Kota ta njéi nérakén bétbét ta tatubé lima Yakubé re npo ni ntu Yusufé né. 6 Pocé reni sumu isó ta kyaté né réceg sumu Yakobé. Yesusé nfané né tadélé lówé sogado re némgaé re gli mangé, se néntolén I po sumu lapo lo né. Waktu ta néi, ngénngané, nihalé tok nuén yófésó re nuén luwé, 7-8 tabóngo Yesusé ni motemote nesté rfan po kota bo rgoné róri mnómé. Pocé télél be reni mépin Samaria isó nwómé bo ntab wóé po sumu njé ni, pocé bóngo Yesusé néroro i wóé bo ninémé.
9 Bóngo, mépin Samaria njé nécegé Yesus faje, “Moke, Awé nte kyat Yahudi Awé to? Nuén fisé kyat Yahudi Awé ga méror wóe po ya ni né, sababta ya nte kyat Samaria ya!” (Sogado mépiné njé néceg fajé né, sababta kyat Yahudi né bisa rfaljilé rdé kyat Samaria né pa, sababta kyat Yahudi né récegé cogo kyat Samaria né rnajisé.)
10 Pocé bóngo Yesusé nécegé mépin Samaria njé faje, “Iga awé muné Jou Lahatala ni féyfié ta I bo npo awé nte, re iga aw muné pai ta néror wóé po aw ni, awé ta nase bo méroro Ya wóé nmulé, se Ya nase kdo aw wóé bo bisa mduk ta fié sogado fajé néli le.”
11 Pocé bóngo mépiné njé nécegé nóté, “Moke, sumu njé tadélé namlóméné, ga re nam tiba pa. Se nase bo mduk wóé fawa lima bo kyaté né bisa rduk ta fié sogado faje néli né? 12 Sababta sumu ta njéi mam délut tatubé lima, Yakobé ta ndo mam i. Se i re ni ntu né, re riri haiwan ta rpiara né ma re riném sumu nje ni wóé né. Néga pe sói se nte mécegé cogo Awé ta lebe mpélóy po mam moke Yakub ni né?”
13 Tabóngo Yesusé nécegé i faje, “Kyat pai le ga niném sumu nje ni wóé né, nase gli mangé nmulé. 14 Mayta pai ta niném wóé ta Ya bo kdo i né, nase gli mang pana sogado fajé néli le. Sababta wóé ta néi, nase bo ndadi tadolo wóé mtó ta nbabibél sogado wóé njé nbébelés po ni hidupé wlólo ta reni tabtébno pa né, bóngo nase nhidup re Jou Lahatala sogado fajé néli le.”
15 Pocé bóngo mépiné njé nécego Yesusé nóté, “Moke, pana fajé mdo ya wóé ta néi su, bo ma gligé mangé le na, bo ma ktab wóé pote sumu njé ni le na.”
16 Mayta Yesusé nécegé i faje, “Mfané mkakémé nim légaé, bo mew dórén luwé fwóm lima.”
17 Mépiné njé ga ncónglo I, “Ya re nik légaé pa.”
Bóngo Yesusé nécegé i faje, “Fatuwé ta mécegé re nim légaé pa né, 18 sababta awé re mafsów nuén limé, se món ta aw re i faltolné mewé njé, nim légaé i pa. Tamulo ga mécegé re nim légaé pa né fatuwé ro.”
19 Mépiné njé nécego Yesusé nóté, “O, nete ya re kuné óro, Awé nte nabi ta nénfawómo Jou Lahatala ni faftóté njé. 20 Pana fajé, ya bo kutné su: amé kyat Samaria mam délut tatubé lima nesté, iga rénpe sambayang po Jou Lahatala ni né mare po métét ta njei ni, mayta pe sói se mewé kyat Yahudi né ga fécegé cogo géwgów ta kyaté rénpe sambayangé né mare po Yerusalemé?”
21 Bóngo Yesusé nécegé i faje, “Neke, mdélé óro sói ta Ya kécegé nte. Pote se néli, nase reni waktu nóté, iga kyaté bo rcambayang po rir Moke Jou Lahatala ni né, bukan ta po métét ta njéi le pa, re bukan ta maduga po Yerusalemé le pa. 22 Fatuwé, mewé kyat Samaria né fancambayang po Jou Lahatala ni, mayta funé pa, Jou njé pai. Amé kyat Yahudi né, kancambayang po Jou Lahatala ni se kuné I fié, sababta Mesias ta Jou Lahatala néjaji bo nwómé njé, amé kyat Yahudi né ntumam re gbumam I nóté. 23 Nase reni waktu nóté, mayta nete re nwómo i ro, bo kyat ta fatuw-fatuwé rancambahang po Jou Lahatala ni, Jou ni Rohé njé nase nkawasa keé si, bóngo nase rdéréré dodoto ta fatuw lima Jou Lahatala ni né, sababta Jou Lahatala néyówé kyat ta rancambayang po I ni tadolo fajé né. 24 Sababta Jou Lahatala njé Roh I, se kyat ta bo rcambahang po I ni né, mare Jou ni Rohé njé nkawasa keé si, re kyat ta néi mare rdéréré be dodoto ta fatuw lima Jou Lahatala ni né.”
25 Bóngo mépiné njé nécegé Yesus faje, “Ya kuné, Mesias ta récegé Kristusé njé nase bo nwómé, I ta njéi Kolano ta Jou Lahatala néjaji nwómé bo nfasalamaté kyaté njé. Se iga nwómé, nase nfasodoto férimé ta néi po it ni bo tuné ndimé.”
26 Pocé bóngo Yesusé nécegé i faje, “Ya óro ta kméitén re awé nte, Ya nte, I ro.”
27 Waktu Yesusé néceg fajé lesu, télél be ni motemote nesté rpólén si lima kota, se rherané rémnaw ta Yesusé nméiténé ndé mépiné njé né. Mayta ni motemote nesté rémtaté, se isó pa ta bo nutné mépiné njé, “Pe sói se mméiténé mdé i?” Bóngo isó pa ta nutné Yesusé, “Bo méceg sói po i ni?”
28 Se mépiné njé nfatoléné keé nó tampayangé njé pocé, bóngo nfan po kota njé ni, se nfébingo kyaté-kyat ta pocé né, 29 “Hei mew lima su, tfané bo témnawé reni kyat isó ntéli nuné ndimé sói ta ya kpe né. Solo maga I Mesias óro, Kolano ta Jou Lahatala néjaji nwómé bo nfasalamaté kyaté njé.” 30 Pocé tabóngo kyat ta po kota njé ni wlólo né rcópéné se rfan po Yesus ni.
31 Waktu ta mépiné njé nfan po kota né, Yesusé ni motemote nesté récegé I faje, “Guru, mémnómé ro.”
32 Mayta Yesusé ncónglo si, “Po Ya ni nte reni mnómé, ta mewé funé pa.”
33 Bóngo ni motemote nesté rfatuténé, “Pai ta ndo I mnómé?”
34 Pocé Yesusé nécegé si, “Ya naké mnómé né, kpe be sói ta Jou Lahatala mgo wlo né. Jou Lahatala njé ta nané Ya kwómé, se Ya mare kfawóré keé ni yabé ta nané Ya kpe né. 35 Kyat pote récegé, ‘Iga re tésyapé géyé, téftón sogado ni mnuo sni safóté, ga tfalingété.’ Mayta Ya kécego mewé, fangóto fafié, fpe néli bo fémnawé kyat Samaria ta ré rwóm lima né. Si rwómé nte réyówé Ya sogado bo rdélé Ya. Se si ta néi, tfatailo dolo téntóném ta re ncimo i se bo tfélingété né. 36 Kyat ta rfélingété nte, nase bo rduké róri pélpólés óro. Kyat ta rfélingété né, si tadolo réyówé kyaté bo rdélé Jou se tadélé nase rduk ta fié sogado fajé néli le. Se kyat ta résyapé géyé né re kyat ta rfalingété né, si nase rfangsengo si, sababta kyat félé ta rdélé Jou. 37 Se fatuwé ro ta mewé fécegé né, ‘Reni kyat ta riri yabé né résyapé géyé, reni ta rfélingété.’ 38 Ya kané mewé félingét po géwgów ta fésyapé géy pa né. Sababta kyat iglé re résyapé géyé né, se mewé ta fwómé ffalingét sogado fduké ni hasilé.”
39 Po kota ta njé i, reni kyat Samaria félé ta rdélé Yesusé, sababta mépiné njé ta nfébingo si faje, “I nfébingo ya, férimé ta ya re kpe né.”
40 Pocé kyat Samaria né re rwóm po Yesus ni, bóngo récego I, “Lima, bo mtolno am su.” Se Yesusé ntolno si pocé ni mnuo ngané luwé.
41 Pocé Yesusé nfasodoto kyaté né félé, sogado kyaté né nbóng ta lebe félé nóté ta rdélé I né. 42 Bóngo kyat ta rwómé né récegé mépiné njé faje, “Ta amé kdélé nte bukan ta klongé awé mécegé né pa, mayta amé re klongé ta Yesusé nécegé né, se amé kuné, fatuwé kyat ta njéi óro Kolano ta bo nfasalamaté kyaté njé.”
Yesusé nfafié kyat ta npe yabé po kadatongé njé ni ntu isó
43 Yesusé ntolén po kota Sikharé né ni mnuo ngané luwé, ga néléy po bótén Galilea. 44 I ma re nfébingé nóté, “Iga nabi faisó néléy po ni pnuwé lo, kyat fapnuwé né rlongé i pa.” 45 Mayta waktu ta Yesusé nwóm po bótén Galilea né, kyaté-kyat ta pocé né rtarima I fafié. Sababta, waktu rdéréré agama Yahudi né riri ngénngan ta pélóy po kota Yerusalemé né, si re rémnaw férimé ta Yesusé npe pocé né.
46 Rewóré ta néi, Yesusé npólén I nmulé po pnuw Kana, ta po bótén Galilea né. Nuéncó Yesus npe mujizat wóé ta ndadi agguré né pocé po pnuw Kana. Reni pnuw isó nóté ta nérakén Kana, ngósno kota Kapernaumé. Po kota ta njéi, reni kyat isó ta npe yabé po kadatongé njé ni, se ni ntu móné njé npisé. 47 Pocé, nlongé ta Yesusé I lima bótén Yudea se re nwóm po bótén Galilea po pnuw Kana, bóngo nfan po Yesus ni se néroré bo Yesusé nfan po kota Kapernaumé bo nfafié ni ntu ta npisé njé, sababta ni ntu njé re bo nmóté.
48 Pocé bóngo Yesusé nécegé i faje, “Iga fémnaw Ya kpe mujizat re kfaftulo nik kawasa né, pocé ga nase fdélé. Mayta bo tisé, nase fdélé pa.”
49 Tabóngo kyat yabé njé nécegé Yesus faje, “Moke, lima bo mdé ya néli ro, ma sogado ntigé njé nmót na.”
50 Pocé bóngo Yesusé nécegé i, “Méléyé ro, ntimé njé re nfié.”
kyat yabéénjé ndélé ta Yesusé nécegé né, tabóngo néléyé. 51 Waktu ta kyat yabé njé i po Kana se bo néléy po Kapernaumé né, ni kyat yabé né rdipén i po yéféné lo se rfébingo i ta ni ntu njé re nfié né.
52 Pocé nlongé ta rfébingo i né, tabóngo nutné si, “Tok nuén fisé ta ntigé njé re nfié né.”
Si rcónglo i, “Pep ta tok nuéncó né.”
53 Pocé tabóngo kyat yabé njé nfatélolmo ta tok nuéncó ngénngané né Yesusé nécego i, “Ntimé njé re nfié.” Bóngo po ngénngan ta néi óro, i re férimé kyat ta po ni umé wlólo né rdélé Yesusé.
54 Ta Yesusé nfafié yomya njé né, necé I npe mujizat taga nuén luo re ta néi, po bótén Galilea né. Re wóré ta néi, Bóngo Yesusé npólén I lima bótén Yudea.