Yesusé nméiténé ndé Nikodemusé
3
Pocé reni kyat isó ngósno Nikodemusé. Kyat ta njéi kyat Yahudi isó ta ndéréré dodoto Farisi, i ma kyat tut isó po kyat Yahudi ta pocé né. 2 Waktu nuéncó, i nwóm po Yesus ni né re dorémé, bóngo nécegé Yesus faje, “Guru, amé kuné, Aw ta ntei ta Jou Lahatala nané mwómé bo mfasodoto amé né. Sababta, reni kyat isó pa ta bisa npe mujizat ta dolo Awé mpe nte, iga Jou Lahatala ta npo i kawasa pa né.”3 Tabóngo Yesusé nécegé i faje, “Mfatélolmo fafié ta Ya bo kécegé nte, maduga kyaté-kyat ta rtubé nmulé né ta bisa rdadi Jou Lahatala ni kyat si, bo Jou nkawasa po riri hidupé wlólo né.”
4 Tabóngo Nikodemusé nécegé Yesus faje, “Pai ta nécegé re kyat tut ité ga bo ttubé nmulé né? Ncung akal pané ga, bo rir neke nfantun ité nmulé né.”
5 Pocé Yesusé nécegé i faje, “Mfatélolmo fafié ta Ya bo kécegé nte: iga kyat pai le ta wlo bo ndadi Jou Lahatala ni kyat i, mare ntubé nmulé po wóé re Jou ni Rohé njé. Iga npe tadolo fajé, Jou Lahatala nase nkawasa dolo Kolano po ni hidupé wlólo. 6 Sababta kyat ité nte ttub lima rir neke njé ni, mayta maduga Jou ni Rohé njé le ta bisa niwén ité bo tdadi Jou Lahatala ni kyat ité né. 7 Se ma ftélél na ta kécegé né, ‘Mewé mare ftubé nmulé.’ 8 Sababta faje: bo moré nuf po sói lo le, necé tlongé be ni gli le, mayta tuné pa nuf fawa lima re nuf fawa néli. Fajé nóté re kyat ta rtub re Jou ni Rohé njé né, ité tuné pa Jou ni Rohé njé npe yabé po kyaté njé ni wlo wlólo né.”
9 Pocé tabóngo Nikodemusé nutné Yesusé, “Fanfawa se bisa ndadi fanfajé né?”
10 Tabóngo Yesusé ncónglo i, “Ee, awé nte kyat Israelé né riri guru agama awé to? Necé ga msae pa né ta tagare kéceg péséwé né? 11 Mfatélolmo aw fafié ta bo kécegé nte, Ya re kyat ta rdéréré Ya né, amé re klongé re kémnawé Jou ni kawasa né se kéfétén po kyaté-kyaté né, mayta mewé ga fdélé pa. 12 Ta Ya kéfétén Jou Lahatala ni Rohé njé ta re npe ni yabé po it ni po dunia wlólo nte ma fdélé pa, né ga bo kfébingo mew sói ta re ndadi i po soroga né, nase tadélé fdélé pa nóté! 13 Reni kyat isó pafule ta re nawét po soroga, maduga Kyaté Ntu ta nwóm yama soroga njé le ta bisa nfébingé sói ta re ndadi i po soroga né.
14 Tatubé lima, waktu ité kyat Israelé né rir délut ta guwé néngangés si po géwgów ta sésé bóto i njé né, nabi Musa npe guw tambaga isó se npaké i néya po ayé lo, bo kyat pai le ga guwé néngangés i, ga néngóto guw tambaga njé, i nase nmót pa. Fajé nóté re Kyaté Ntu ta I yama soroga njé, nase bo rpaké I néya po Salibé njé ni. 15 Bo kyat pai le ga ndélé Kyaté Ntu njé, i ma nase nsalamaté se nduk ta fié sogado fajé néli le.
16 Sababta Jou Lahatala ni mésié né tadélé pélóy po férimé kyat ta po dunia wlólo nte né, sogado ga npo keé ni Ntu ta maduga isó njé le, bo kyat pai le ta ndélé I, nase nmót pa sogado fajé néli, mayta nhidup re Jou Lahatala sogado fajé néli le. 17 Sababta, Jou Lahatala nané Ni Ntu njé nwóm po dunia nje ni né, necé bukan ta bo nfasólo kyat ta po dunia njé ni wlólo nte pa, mayta bo nfasalamaté keé si óro. 18 Se kyat pai le ta ndélé Jou Lahatala ni Ntu njé, kyat ta njéi Jou nase nfasólo i pa. Mayta kyat pai le ta ndélé I pa njé, Jou Lahatala nase nfasólo i, sababta ndélé I pa Jou Lahatala ni Ntu ta maduga isó nkumélé njé. 19 Jou Lahatala bo nhukumé né tadolo faje: Ni Ntu njé nwóm po dunia nte bo nfaménano kyaté-kyat ta wlori dérorémé né, mayta kyaté né wlori ncuka be ta dérorémé né, sababta wlori né lé. 20 Kyat pai ta wlo ncuka npe be ta lé, nase wlo ncuka manano njé pa, se nase nwóm néli po manano njé ni pa, sababta nase kyaté né runé keé ta lé ta i re npe né. 21 Mayta kyat pai le ta npe be ta métegélé, nase nwóm néli po manano njé ni, bo kyaté né bisa rémnaw fafié ta Jou Lahatala n'gali i, sogado sói ta i npe né nfamgo re ta Jou Lahatala mgo wlo né.”
Yohanes ta nénbaptisé kyaté njé néfétén Jou Yesusé
22 Rewóré ta néi, Yesusé I re ni motemote nesté rfan po bótén Yudea. Se I re si rtoléné ntéli, bóngo Yesusé nbaptisé kyaté né pocé. 23 Waktu ta Yesusé I po bótén Yudea lesu né, Yohanes ta nénbaptisé kyaté njé ma nbaptisé kyaté nóté, mayta po pnuw Ainon ta nérakén kota Sélimé njé, sababta pocé reni wóé félé. Se kyat ta félé né rwóm pocé bo Yohanesé nbaptis si. 24 (Po waktu ta néi, rfasung Yohanes ta nénbaptisé kyaté njé po bui wlólo pafule.)
25 Po waktu nuéncó, Yohanes ta nénbaptisé kyaté njé ni motemote séfis néli rfakotale rdé kyat Yahudi isó, ni mdio be ta rdéréré riri adaté se rfaberési riri diri bo ma rcól po Jou ni na. 26 Pocé tabóngo Yohanesé ni motemote né rfan néli po Yohanes ni se rfébingo i faje, “Guru, mfatélolmo awé lesu. Kyat ta aw re I po wóé Yordané ni féspalé se méfétno amé né. I ma nbaptisé kyaté nóté, se kyaté né tadélé félé ta rfan néli po I ni né.”
27 Tabóngo Yohanesé ncónglo si, “Wóré, gélesó pa. Kyat ité né maduga tpe be sói ta Jou Lahatala nané ité né. 28 Mewé ma re flongé nganesó ta ya re kfébingo mewé né, ta Ya nte Mesias pa, Kolano ta Jou Lahatala néjaji nwómé bo nfasalamaté kyaté njé, mayta ya kwómé ntubé bo kfébingo kyaté né rfasadia si bo rtarima I.
29 Nete Mesiasé nje re I pocé, se ya tadélé kséngé. Ya nte kfatailo I né tadolo manóyé njé, ya nte ga tadolo ni dél món ta maduga ndé I le. Manóyé njé ta lebe npentingé, sababta malófé njé I ni pégelé i. Mayta manóyé njé ni dél món ta ndé i njé, dolo npenting pa, ya maduga kosél be po lapo lo né bo kfaméylongé I. Sababta ya wlegé ncuka klongé manóyé njé ni gli njé. Se ya ma tadélé kséngé, iga klongé kyat ta félé né rdéréré I né. 30 Sababta mare I ta lebe npélóy po ya ni, bo ya ga lebe kémya po I ni.”
Kyat ta nwóm yama soroga njé
31 Yesusé njé I yama soroga, se I lebe npélóy po férimé ta po dunia wlólo nte. Mayta kyat ta it po dunia nje ni wlólo nte né, maduga tafétén be sói ta ité témnaw po dunia nte né. Mayta Yesusé tadolo fajé pa, sababta I nwóm yama soroga se I lebe npélóy po farimé ta po dunia njé ni wlólo nte né. 32 I nfébingé sói ta I némnaw re nlongé né, mayta dolo bo kyat félé pa ta rdélé I né. 33 Mayta kyat pai ta ndélé sói ta I re nfébingé né, kyat ta njéi wlo mgo ta Jou Lahatala nécegé né fatuwé. 34 Sababta I ta njé ro, ta Jou Lahatala nané I njé, I ta njéi ta nfébingé Jou Lahatala ni faftóté né, sababta Jou Lahatala ta npo ni Rohé njé po I ni né reni taptébno pa. 35 Jou Lahatala nmésié Ni Ntu njé, se férimé né re npo Ni Ntu njé bo I ta nkawasa keé ndimé. 36 Se kyat pai ta ndélé ni Ntu njé, i nase nduk ta fié sogado fajé néli le, mayta kyat pai ta ndéréré ni Ntu njé pa, Jou Lahatala nase nfasólo i sogado fajé néli le.