Yesusé npe wóé né se ndadi angguré
2
Ni epluw fajé, reni kyaté rpe rameang fafsów po pnuw Kana po bótén Galilea. Yesusé ni neke ma i pocé po rameangé lo né. 2 Yesusé I re ni motemote nesté ma rkakém si bo rdéréré rameang fafsówé njé nóté. 3 Waktu ta rameang fafsówé njé nfané lesu, róri angguré né re nbung pana, se Yesusé ni neke nécegé Yesus faje, “Róri angguré né re nbung pana.”4 Tabóngo Yesusé nécegé ni neke faje, “Neke, ma mané Ya kpe tadolo fajé su na. Sababta nwómo ni waktu pafule ta Ya bo kfaftulo nik kawasa né.”
5 Mayta Yesusé ni neke nécegé ni kyaté-kyat yabé né, “Mewé fpe le sói ta I nané mewé né.”
6 Pocé reni tampayang pawoném ta rpe lima lóyé lo. Tampayang ta néi, iga téfrao re wóé, tampayang pusó ni wlólo né nihalé liter witéncó. Wóé ta po tampayangé wlólo né rfépel pocé bo kyat ta rwómé né rfaberési faori rdéréré agama Yahudi né riri aturané bo cogo ma rcól po Jou ni na. 7 Pocé tabóngo Yesusé nécegé kyat yabé nesté faje, “Tampayangé né féfrao wóé óro sogado nbaké.” Pocé tabóngo réfrao wóé sogado nbaké. 8 Rewóré ta néi, Yesusé nécegé si faje, “Wóré fékaén wóé né facuci po galasé lo bo fpo kyat ta nférén rameangé njé.”
Pocé tabóngo rékaén wóé né po galasé lo se rut po kyat ta nférén rameangé njé ni. 9 Néli faje, kyat ta nférén rameangé njé nbósém wóé ta re ndadi angguré né mayta nuné pa anggur ta néi rduk fawa lima. Maduga kyat yabé né le ta runé. Tabóngo kyat ta nférén rameangé njé nkakém manóyé njé, 10 se nécegé i faje, “Iga kyaté rpe rameang tadolo faje, necé rcópné anggur tadélé mnó né ntubé. Bo riném sogado nbung si, ga rcópné anggur ta mnó pa né. Mayta ta awé mpe nte nésé. Nómésta re riném anggur ta mnó pa né rewóré, ga tagare msópné anggur ta tadélé mnó né.”
11 Mujizat ta Yesusé npe po Kana po bótén Galilea né, necé ndadi Yesusé ni mujizat ta faiwóbno. Se mujizat ta néi, Yesusé re nfaftulo I ni kawasa ta pélóyé né, sogado ni motemote nesté rdélé I né.
12 Pocé rameang fafsówé njé rewóré i, tabóngo Yesusé I re ni neke rfan po kota Kapernaumé, ni fténo re ni motemote nesté ma rdé si nóté. Se rtoléné ntéli riri ngané fis néli.
Yesusé nfaungé keé kyat ta rfalwagé po Um Sambayang ta npélóyé njé ni kintalé lo né
13 Waktu ta néi, agama Yahudi né riri ngénngan ta pélóyé ta ni ngósno Paska né re rakén óro. Po ngénngan tapélóyé ta néi, si rfatélolmo ta Jou Lahatala re nfabebasé keé riri délut tatubé lima ta kyat Mesiré né rpeé keé riri béyak si po riri bóténé lo né. Se Yesusé nfan po Yerusalemé. 14 Ntéli po Um Sambayang ta npélóyé njé ni kintalé lo né, Yesusé némnawé reni kyaté-kyat ta rfalwagé sapi, domba, re mané pombo bo kyaté rgoné bo rpe riri sadaka po Jou ni, pocé reni nóté kyaté-kyat ta riri yabé né rfalélalo pipisé bo kyat wamwóm ta rwómé né bisa rlalé bo rpo riri sadaka po Jou Lahatala ni. 15 Tabóngo Yesusé nyó wólé se npe séswaké, bo nfaungé keé férimé kyat ta pocé né re riri sapi re domba né. Pocé tabóngo nfalalolté keé kyaté-kyat ta rfalalo pipisé né róri meja né sogado riri pipisé né ma terfasyapé. 16 Bóngo nécegé kyaté-kyat ta rwagé mané pombo né faje, “Férimé ta pote né futé bo fsópné nétó ndimé. Ma fpe nik Moke ni Umé nje dolo nimi falwagé góo i na!”
17 Waktu Yesusé ni motemote nesté rémnaw ta nfaungé si né, tabóngo rfatélolmo si ta rlefo po kitab Mazmur ta ni glio faje, “Ya kmésié Jou Lahatala ni Umé njé, tamulo wlegé métmóto bo kéjaga i né.”
18 Pocé, agama Yahudi né riri kyaté-kyat ta rpélóyé né rémnaw ta Yesusé nfaungé kyaté-kyat po Um Sambayang ta npélóyé njé ni né, bóngo rfano I néli se récegé I faje, “Moke, iga fatuw ta re nim kawasa bo mpe faje, coba mpe mujizat faisó bo amé kuné!”
19 Bóngo Yesusé ncónglo si, “Ya nase kpe mujizat pa, mayta nte Ya bo kpe bo funé ta Ya re nik kawasa: coba ffamopé keé Um Sambayangé ta npélóyé nje. Nase ngané telé le, Ya re kfawoslé keé i nmulé.”
20 Pocé ga agama Yahudi né riri kyat ta rpélóyé nesté réceg po Yesus ni nóté, “Sói? Kyaté rfawosélé Um Sambayang ta npélóyé nje né ni mnuo taun nuén yóféfót re nuén wonémé, ga Awé mécegé cogo maduga ngané telé le re mfawoslé i nmulé né?”
21 Mayta Yesusé néceg fajé né ni maksut Um Sambayang ta npélóyé njé pa, mayta I ni diri óro. 22 Ta I nmóté se npangéné nmulé né, bóngo ni motemote nesté rfatélolmo si ta re nécegé né, I nase nmóté mayta npangéné nmulé, tabóngo rdélé keé ta rlefo po Jou ni Buké wlólo né.
Yesusé nuné kyaté né wlori
23 Po Yerusalemé né, Yesusé ndéréré agama Yahudi né riri ngénngan ta pélóy ta réceg Paska né lesu. Pocé reni kyat félé ta rémnaw I npe mujizaté né se rdélé I né. 24 Mayta Yesusé le ma ndélé si pa, sababta I nuné farimé kyaté né wlori. 25 Se masike isó ta nfébingo I pa ma, I re nuné férimé kyaté né wlori wlólo.