Yohanesé
Habar ta Fié ta Yohanesé nlefo
Yesusé njé Jou Lahatala ni Méitén ta ndadi kyat I
1
Tatubé lima, ta Jou Lahatala ntulada dunia nje pafule né, Jou Lahatala ni Méiténé njé re i pocé. Jou Lahatala ni Méiténé njé, Yesus óro. I re Jou Lahatala, se I ro Jou Lahatala né. 2 Tatubé lima né, Jou Lahatala ni Méiténé njé, bóngo Jou Lahatala ma re I pocé.3 Jou Lahatala npake Ni Méiténé njé sogado bisa npe férimé ta po dunia nje ni wlólo nte né. Iga Jou Lahatala npake Ni Méiténé njé pa, nase reni esó pa ta ndadi i. 4 Jou Lahatala Ni Méiténé njé nfahidup férimé ta po dinya wlólo nté, se Jou Ni Méitén ta njéi tadolo manano ta nfaménano kyaté né wlori né. 5 Ménano ta njéi ta nfaménano po dérorémé wlólo njé, se dérorémé njé bisa nfaket ménano njé pa.
6 Nuéncó, reni kyat isó njé Jou Lahatala nané i nwómé. Ngósno Yohanesé. 7 I nwómé né, bo nfaftulo kyaté né bo runé re rféyal ménano ta nwóm yama Jou Lahatala ni njé, bo férimé kyaté né rdélé I ndimé. 8 Ménano njé Yohanes pa, sababta Yohanesé njé maduga kyat isó ta nwómé bo nfébingé be ménano njé po kyaté-kyaté le.
9 Ménano ta fatuwé njé, I ro ta nwóm yama po dunia njé ni bo nfaménano férimé kyaté né wlori. 10 Ta fatuwé né tatubé lima lesu, Ménano njé re I po dunia nje ni wlólo nte. Se Jou Lahatala npake I se npe dunia nje. Mayta kyat ta po dunia nje ni wlólo nte rféyal I pa, ta I njé Mésiasé né. 11 I nwóm po ni kyaté-kyat Yahudi ta si re I bangsa be esó né, mayta rtarima I pa. 12 Mayta masike fajé ma, reni kyat iglé né rtarima re rdélé I, bóngo npo si kawasa bo rdadi Jou Lahatala ni Ntu si. 13 Iga bo tdadi Jou Lahatala ni Ntu ité, necé bukan ta ttub po rir déluté nesté ni pa, tadolo món re mépin ta réfsówé se re nturi né, mayta Jou Lahatala óro ta npe sogado bo tdadi ni Ntu ité né.
14 Jou Lahatala ni Méiténé njé re ndadi kyat I, se re ntolén po ité rir fapéluné. Ité re témnawé ni kawasa tadélé pélóyé né, kawasa ta néi lima ni Moke Jou Lahatala ni, sababta I ta njéi Jou Lahatala ni Ntu I. Jou Lahatala ni Ntu né maduga isó ta njéi le, I ta npe sogado ité bisa tuné Jou Lahatala ta fatuwé, re ni mésié ta pélóy po it ni né.
15 Nuéncó, Yohanes ta nénbaptisé kyaté njé nfébingé Jou ni Méiténé njé po kyaté-kyaté né nfakwat i, se néceg faje, “Kyat ta kécegé bo nwómé njé, I re nwómé. Ya re kécegé ni kawasa né tadélé lebe pélóy po ya ni, sababta ta ya kwóm po dunia nje pafule né, I re nwómé ntubé.”
16 Ta réceg Jou Ni Méiténé nje, I re nfaftulo ni mésié po it ni, tadélé mwetés pa, sogado ga ni féyfié né ma tadélé pélóy po férimé ité. 17 Tatubé lima né, ité re tuné Jou Lahatala ni aturan ta po nabi Musa ni kitab abén limé né, mayta po Yesus Kristus ni ité bisa tuné Jou ni féyfié re dodoto ta fatuwé né. 18 Reni kyat isó pa ta re némnaw Jou Lahatala, mayta Jou Lahatala ni Ntu ta maduga isó njé, I be po Jou Lahatala ni lapo lo né, se I ta njéi óro ta nfaftulo ité rir Moke Jou Lahatala bo tuné ta pai Jou Lahatala njé.
Yohanes ta nénbaptisé kyaté njé nfébingé bo kyaté né runé ta i njé pai
19 Nuéncó, Yohanes ta nénbaptisé kyaté njé nfébingo kyaté-kyaté né lesu, pai ta Jou Lahatala nané I nwómé bo nfasalamat si né. Pocé fajé, agama Yahudi né riri kyat tut ta rkawasa né rané imam séfis néli, si re kyat ta si lima suku Lewi ta ranleleyan po Um Sambayang ta npélóyé njé ni né, rané si rfan po Yohanes ni bo rutné i, “Awé nte pai?”
20 Bóngo Yohanesé nécego si ta fatuwé, “Ya nte Mesias pa, Kolano ta Jou Lahatala néjaji bo nfasalamaté kyaté njé.”
21 Pocé bóngo rutné i nóté, “Pana fajé, awé nte pai? Solo maga awé nte nabi Elia tatubé lima njé se re mwómé nmulé?”
Tabóngo Yohanesé ncónglo si, “Tisé! Ya pa.”
Bóngo rutné i nóté, “Awé nte nabi tatubé lima ta Jou Lahatala néjaji nwómé bo nfawómo Jou Lahatala ni faftóté njé to?”
Bóngo re ncónglo si nóté, “Tisé! Ya pa.”
22 Pocé tabóngo rutné i nóté, “Pana fajé, awé nte pai? Coba mfébingo amé, bo amé bisa kfébingo kyat ta rané amé né. Se ta awé mécegé né, awé nte pai?”
23 Tabóngo Yohanesé nfébingo si faje, “Ya óro, kyat ta Jou Lahatala néceg po nabi Yesaya ni po waktu ta nfawómo Jou Lahatala ni faftóté né tadolo faje,
‘Nase reni kyat isó nméiténé né nfakwat i, se néceg faje: Famówé yéféné bo faftón Jou!’ ”
24 Kyat Yahudi ta rané si rfan po Yohanes ni bo rutné i né, po si ni né reni kyat séfis néli ta rdéréré dodoto Farisi né. 25 Pocé bóngo rutné Yohanesé, “Iga awé nte Mesias re nabi Elia pa, re nabi ta Jou Lahatala néjaji bo nwómé njé pa, pe sói sogado mbaptisé kyaté né?”
26 Tabóngo Yohanesé ncónglo si, “Ya kbaptisé kyaté né re wóé, mayta reni kyat isó po nimi fapéluné nte ta mewé fféyal I pafule. 27 I ta njéi, ya re kwómé ntubé ga tagare I nwómé. I ni kawasa né lebe pélóy po ya ni, sogado bo nané ya késólé ni sandalé ni wólé né ma pantas pa.”
28 Yohanesé néceg férimé ta néi né po pnuw Betania, wóé Yordané ni féspal po ngancóo, géwgów ta Yohanesé nénbaptisé kyaté lo né.
Yesusé njé tadolo domba ni ntu ta kyaté né rpeé riri sadaka po Jou Lahatala ni bo nféyangésé keé róri sélsólé né
29 Ni tamémóné né, Yohanesé némnaw Yesusé nwóm po i ni. Se Yohanesé nécegé kyat ta pocé né, “Coba fémnawé, Kyat ta nwóm lima njé Jou Lahatala bo npeé I sadaka, tadolo domba ni ntu ta ité kyat Israelé ténpe rir sadaka bo nfayangésé keé rór sélsólé né. 30 Se ta ya re kécegé né, nik maksut I ta njé óro, ‘Ya re kwómé ktube, mayta reni kyat isó nóté ta bo nwómé. I ni kawasa né lebe pélóy pa ya ni, sababta ta ya kwóm pafule né, I re I pocé.’ 31 Tatubé lima né, ya le ma kuné I pa ta bo nwómé njé. Mayta nete, ya re kféyal I. Ya kwóm po dunia njé ni wlólo nte bo kbaptisé kyaté né re wóé, bo kyat Israelé né bisa runé ta I Mesias óro, Kolano ta Jou Lahatala néjaji nwómé bo nfasalamaté kyaté njé.”
32 Tabóngo Yohanesé nfébingo si sói ta re ndadi i po Yesus ni né, se néceg faje, “Ya re kémnaw Jou Lahatala ni Rohé njé ntebé yama langété né, tadolo mané pombo i, se néting po Yesusé ni jejólo ló. 33 Waktu ta néi, ya le ma kuné pafule ta I Mesiasé, Kolano ta Jou Lahatala néjaji nwómé bo nfasalamaté kyaté njé. Mayta Jou Lahatala ta nané ya kbaptisé kyaté né re wóé, I re nécego ya faje, ‘Iga mémnaw Ya nik Rohé njé ntebé yama langété ga nétingo kyat faisó, kyat ta njé I ro ta nase nbaptisé kyaté né re Ya nik Rohé njé né.’ 34 Sababta ya re kémnaw I, se re kfébingo kyaté-kyaté né ta fatuwé, I ta njéi Jou Lahatala ni Ntu I.”
Yesusé nkakémé ni motemote ta faiwóbno né
35 Ni tamémóné né, Yohanes ta nénbaptisé kyaté njé i re ni motemote séluwé rosél pocé nóté. 36 Pocé Yohanesé némnaw Yesusé ndélo yéfén ta njéi, tabóngo néceg faje, “Coba fémnawé Kyaté ta njé! I ta njéi, ta Jou Lahatala npe ni sadaka I bo nféyangésé keé kyaté róri sélsólé né, tadolo domba ni ntu ta kyat Israelé né bo rpe rir sadaka bo rféyangésé keé rór sélsólé né.”
37 Waktu Yohanesé ni motemote séluwé nesté rlongé ta Yohanesé néceg fajé né, tabóngo rfané se rtaptubo Yesusé. 38 Pocé Yesusé nélolét I némin too lo se némnaw ta si dórén luwé rtaptubo I né. Tabóngo nutné si, “Mewé nte bo féyówé sói?”
Si rcónglo I, “Guru, Awé nte mtolén po sói lo?”
39 Bóngo Yesusé nécegé si faje, “Mew lima bo fémnawé.”
Pocé bóngo si ma rdéréré Yesus néli se rémnaw géwgów ta Yesusé ntolno né. Waktu ta néi, nihalé re tok nuén fót mérimé, se si re Yesus pocé po mérim ta néi.
40 Po kyat séluw ta rlongé Yohanesé néceg fajé se rdéréré Yesusé né, isó ngósno Andreasé. Andreasé njé Simon Petrusé ni fténo i. 41 Si re Yesus po ni géwgów ta ntolno lo né rewóré, tabóngo Andreasé nbablé nfan po ni fténo Simon ni, se nécegé i faje, “Simoné, amé re kfapdipén re I, Mesias ta tatéftón I njé, I ta njéi Kolano ta Jou Lahatala néjaji nwómé bo nfasalamaté kyaté njé.”
42 Tabóngo Andreasé nut Simon néli po Yesus ni. Pocé Yesusé némnaw Simon fafié, bóngo nécegé i faje, “Awé nte Simoné, Yohanesé ni ntu móné. Mayta pote se néli, awé nase ngósnom Kefasé.” (Kefas re Petrusé ni ngale né esó le, kuat tadolo lóyé).
Yesusé nkakém Filipusé i re Natanaelé bo rdéréré I
43 Ni tamémóné né, Yesusé wlo bo nfan po bótén Galilea. Pocé nfapdipén re Filipusé se nécegé i faje, “Filipusé, aw lima bo mdéréré Ya!”
44 Filipusé njé i lima kota Betsaida, se i re Andreas re Petrusé si lima kota be isó le. 45 Yesusé nkakém Filipusé bo ndéréré I, bóngo Filipusé nfané néyówé ni dél Natanaelé, se nécegé i faje, “Natanaelé, amé re kfapdipén re I, tatubé lima ta Jou Lahatala re néjaji bo nwómé njé! I ta njéi ta nabi Musa, re nabi-nabi ta iglé né re récegé nóté. Ngósno Yesusé, Yusufé ni ntu I. I ta njéi kyat Nazaret I.”
46 Pocé bóngo Natanaelé nécegé Filipus faje, “Sói? Nazareté? Dolo bo ncung akal pa Jou ni kyat féyfio ta njéi ga I lima pnuw Nazareté né!”
Bóngo Filipusé ncónglo i, “Iya, aw lima bo mémnawé se!”
47 Tabóngo si dórén luwé né rfan po Yesus ni. Néli Yesusé némnaw ta Natanaelé nwóm po I ni né, tabóngo néceg faje, “Coba fémnawé, kyat ta nwóm lima nje fatuw-fatuwé kyat Israel i, kyat ta njéi kyat féyfio i, nmalól pa.”
48 Pocé bóngo Natanaelé nécegé Yesus faje, “Moke, awé muné ya né fawa lima?”
Yesusé ncónglo i, “Ta Filipusé nkakém aw pafule né, Ya re kémnaw aw po ay ara njé ni pópo lo né.”
49 Natanaelé nlongé ta Yesusé néceg fajé né télél i, bóngo néceg faje, “Guru, nete óro ya re kdélé ta Awé nte Jou Lahatala ni Ntu Awé, kyat Israelé né riri Kolano Awé!”
50 Bóngo Yesusé ncónglo i, “Natanaelé, sogado mdélé Ya né, sababta péséwé Ya kécegé kémnaw aw po ay ara njé ni pópo lo né? Necé tagare cuci le. Mayta nase bo mémnawé nóté sói néli ta lebe pélóy po ngénngan pésénte.”
51 Bóngo Yesusé nécegé nóté, “Ffatélolmo mew fafié ta Ya bo kécego mewé nte, pote se néli nase fémnaw langété njé ntépówé, bóngo Jou Lahatala ni nénan ta si yama soroga wlólo né rpak re rtebé bo rfan po Ya ni, Kyat ta Ya I yama soroga wlólo né.”