Markus
Habar ta fié
ta Markus nlefo
Yesusé nwóm pafule, Yohanes ta nénbaptisé kyaté njé re nwómé ntubé
1
Nte bo kéfétén Habar ta Fié, Yesus Kristusé njé Jou Lahatala ni Ntu I. 2 Tatubé lima lesu, Habar ta Fié ta néi nabi Yesaya re néféténé, ta ni glio né faje,Ya ktebo Aw po dunia pafule, Ya nase kané kyat isó nwómé ntubé.
Kyat ta njé bo nané kyaté né rngali si bo rlongé Awé, necé kfatailo dolo nfamówé yéfén ta Awé bo mdé lo i njé.
3 Po géwgów isó ta nélówé pnuwé, I bo nécego kyat ta rfajól pocé né re gli ta pélóyé, néceg faje,
“Re mnuw pana, Jou bo nwómé! Se ffamówé yéfén ta I bo ndélo i njé.”
4 Mnuw be néli, télél be ga kyaté njé nwómé, né Yohanes ta nénbaptisé kyaté njé. I nfan po géwgów ta nélówé pnuwé njé, se nbaptisé kyaté né. Pocé nécegé kyaté-kyaté né faje, “Fngali mewé ro, bo fpóléné mew po Jou Lahatala ni, bóngo fpo fié bo ya kbaptisé keé mewé, pocé ga Jou Lahatala nase nfayangésé keé nómi sélsólé né.”
5 Pocé bóngo kyat ta félé rfan néli po Yohanes ni. Kyat ta néi si lima kota Yerusalemé, re po férimé pnuw ta po bótén Yudea né. Néli, récegé róri sélsólé né tabóngo Yohanesé nbaptisé keé si po Wóé Yordané. 6 Yohanesé ni juba njé haiwan unta ni liko i, sno ni pétpiténé njé ma haiwan liko i nóté. I nó mnómé né maduga kakaso re madu ta po banga lo né. 7 Yohanesé nfasodoto kyaté né faje, “Ya ta kwómé ktubé, mayta mnuw pana kyat isó nóté bo nwómé. Kyat ta njé bo kgali késólé ni sandalé ni wólé le ma pantas pa, sababta I ni kawasa né lebe pélóy po ya ni. 8 Ya kbaptisé mewé né re wóé, mayta I nase nbaptisé mewé né re Jou Lahatala ni Rohé njé.”
Yohanesé nbaptis Yesusé
9 Waktu ta Yohanesé nbaptisé kyat po wóé Yordané né, pocé Yesusé ma nwóm lima pnuw Nazaret ta po bótén Galilea né, tabóngo Yohanesé nbaptisé keé I pocé nóté. 10 Nbaptis I rewóré, Yesusé npusél yama wóé lo se nékngól néya ga némnawé langété njé ntapówé, bóngo Jou Lahatala ni Rohé ntebé nóp po I ni né, tadolo mané pombo i. 11 Télél be rlongé Jou Lahatala nméitén yama soroga, néceg faje, “Awé nte Ya ntig Awé, Ya ta délé kmésié Awé. Sababta Awé ro ta mfamégo re Ya wlegé nje né.”
Setané né riri kolano njé néyówé yéféné bo ntofén Yesusé
12 Rewóré ta néi, Jou Lahatala ni Rohé njé nut Yesus néli po géwgów esó ta nélówé pnuwé. 13 Se Yesusé ntolén I pocé ni mnuo ngané yóféfóté, pocé setané né riri kolano njé néyówé yéféné bo ntofén I. Po géwgów ta néi ma reni haiwan ta masésró félé, mayta Jou Lahatala ntebo ni nénan ta si yama soroga né se rleleyan Yesusé.
Yesusé nfamdié ni yabé né néfétén Habar ta Fié
14 Rfasung Yohanes po bui lo rewóré, ga Yesusé nfan po pnuw re pnuw ta po bótén Galilea né, se néfétén Habar ta Fié lima Jou Lahatala ni. 15 I néfétén faje, “Waktu ta Jou Lahatala re néjaji ité né, re nwómo i ro. Mnuw pana Jou Lahatala bo nkawasa tadolo Kolano I po ni kyaté-kyat ta rdélé I né. Se fngali mewé ro bo fdélé Habar ta fié ta lima Jou Lahatala ni né.”
Yesusé nkakémé ni motemote ta faiwóbno né
16 Nuéncó, Yesusé nfané ndé po Talaga Galilea lapo. Pocé némnaw món faftén si dórén luwé, Simon i re Andreasé. Rénpawlo lóbéné, sababta riri yabé né réyówé be iné. 17 Pocé Yesusé nécegé si faje, “Mew lima bo fdéréré Ya! Nimi yabé né maduga féyówé be iné le. Mayta bo fdéréré Ya, nase kfasodoto mewé féyówé kyat bo rdéréré Ya.” 18 Pocé bóngo Simoné i re Andreasé rfatoléné keé riri lóbéné né, se rdéréré Yesusé.
19 Rfan néli cuci, Yesusé némnaw món faftén séluwé nóté, isó ngósno Yakobusé, isó ngósno Yohanesé, Zebedeusé ni ntu si, rfamétegélé riri lóbén po yelé lo. 20 Pocé Yesusé nkakém si bo rdéréré I nóté, tabóngo si ma rdéréré I, rfatoléné keé riri moke njé i re kyat yabé ta si po yelé lo né.
Yesusé nfaungé setan ta rcung po kyat isó ni
21 Yesusé I re ni motemote nesté rfan néli po pnuw Kapérnaumé. Po ngénngan Sabat ta kyat Yahudi né bisa rpe yabé pa, Yesusé nfan po agama Yahudi né riri um sambayangé lo. Pocé nfasodoto kyat Yahudi ta si pocé né. 22 Kyaté né rtélélé rlongé ni dodoto né, sababta I nfasodoto né reni kawasa, dolo riri guru agama né pa!
23 Pocé fajé reni kyat isó ta setan ntolno i. Se némnaw Yesusé, bóngo n'gélay faje, 24 “Ee, Yesus kyat Nazaret ta Awé. Amé kféyal Awé. Awé ta mwóm yama Jou Lahatala ni. Mwómé nte bo mpe am fanfawa? Bo mfamót am ó?”
25 Bóngo Yesusé nécegé si faje, “Eh! Ffaténténgéné mewé. Fsópén pocé po kyat ta njé ni!”
26 Pocé bóngo setané nesté rfakéyowén kyaté njé né, rgélay sogado gliri né ma sésnaré ndimé, bóngo setané né ma rcópéné. 27 Kyat ta pocé né rtélélé se rfalécego faje, “Tabeu, I nané setané nesté rcópéné, tabóngo rcópén si ndimé né! Tagare I nfasodoto né, reni kawasa! Dodoto ta néi dolo nuéncó pafule, ta ité nte tlongé!”
28 Pocé, tabóngo réféténé keé néli re lima sogado kyat ta po pnuw re pnuw ta po bótén Galilea né ma rlongé ndimé.
Yesusé nfafié Petrusé ni kmo mépiné njé re kyat iglé nóté
29 Yesusé ncópén tóma agama Yahudi né riri um sambayangé lo, bóngo I re Yakobus re Yohanesé rfan néli po Simoné i re Andreasé riri umé lo. 30 Si rwóm po umé lo, tabóngo kyaté né rfébingo Yesus ta Simoné ni kmo mépiné njé nlélété se nénbóy i le. 31 Pocé Yesusé ncung néminé, nétané pégelé njé ni fao né se nfépangén i néya. Tabóngo waktu ta néi óro, pégelé njé re nfié i se nléléyan si.
32 Ta ngénngané njé re ncep nópé né, kyaté né ruté kyat félé néli po Yesus ni, ta rpisé re ta setané ntolno si né. 33 Férimé kyat po pnuw ta njéi rfajólo si lima po Simoné ni um nétóo né. 34 Pocé Yesusé nfafié si ndimé: kyat ta rpisé, ta rlélété, re kyat félé ta setané ntolno si né. Setané né runé ta Yesusé njé Jou Lahatala ni Ntu I, mayta Yesusé wlo pafule bo kyaté né runé I. Se Yesusé npo fié pa bo setané né rfébingo kyaté né ta Yesusé njé Jou Lahatala ni Ntu I.
Yesusé nméiténé ndé Jou Lahatala
35 Ta rebo mélówé né, Yesusé npangéné se ncópén pocé po umé lo né, ga nfan I po géwgów esó ta nbéklingéné. Re nwóm pocé, ga nméiténé ndé Jou Lahatala. 36 Waktu ta néi, Simoné i re ni délé né rémnaw Yesusé re tiso I, tabóngo rfané se réyówé I. 37 Re rduk I bóngo rfabingo I, “Guru, kyat félé réyówé Awé, ga Aw pote-ó?”
38 Bóngo Yesusé nécegé si faje, “Lima bo tfan po kota iglé ta nérakén pote né su, bo kfasodoto si Habar ta Fié nóté. Necé ta mulo sogado Ya kwóm po dunia nte né.”
39 Pocé bóngo Yesusé I re ni motemote né rfané se réjel farimé géwgów ta po bótén Galilea né. I ncung po agama Yahudi riri um sambayangé lo né, bo nfasodoto kyaté né re nfaungé setan ta rtolno kyaté né.
Yesusé nfafié kyat isó npado
40 Nuéncó, kyat isó npado nwóm po Yesus ni bóngo ntikibuku se ncuba I, ga néceg faje, “Guru, bo wlemé né, mfafié ya su pa? Sababta ya kuné Awé renim kawasa ta bisa mfafié ya.”
41 Yesusé nlongé ta néceg fajé né, nmésia i. Pocé tabóngo nétewlé fao né néya po kyaté njé ni ga nécegé i faje, “Ya wlegé, se nte mfié óro.” 42 Tabóngo po waktu ta néi óro, kyat ta npado njé nfié i.
43 Rewóré ta néi, Yesusé nané i nfané, mayta nfaftóto i faje, 44 “Mfan awé ro, mayta ma méfétén na, ta Ya re kfafié awé nte. Mfalów aw néli po imamé njé ni, bo mfaftulo i ta awé re mfié né. Rewóré ga mpo nim sadaka haiwan faisó bo imamé njé ntapén i tadolo tatubé lima se nabi Musa nané mewé fpe né. Mpo sadaka ta necé, bo kyaté né runé ta awé re mfié.”
45 Pocé bóngo kyaté njé nfané, mayta nfaténténgén i pa. Néféténé keé néli re lima, sogado Yesusé bo nfan po kota lo né ma re bisa pana, sababta kyaté né rfasésisén lima. Se Yesusé nfané ntolén I po géwgów ta béklingén ta reni kyat pa né, pocé ma kyaté né rfaféjalé I le.