Yesusé nfafié kyat isó ta nkafé njé
2
Ngané fis néli ta télapésé né, Yesusé npólén I nmulé po kota Kapernaumé. Pocé kyaté né rlongé ta re I po umé lo né. 2 Bóngo rwóm lima ndimé, sogado umé njé ma némoté. Po tó néliké ma reni géwgów pana ta kyaté né bo rtolno. Pocé bóngo Yesusé nfasodoto si Jou Lahatala ni méiténé. 3 Fajé-fajé kyat si dórén fóté rwómé, rlewté kyat isó nkafé, bo rut i po Yesus ni. 4 Mayta, bo rcungé i némin Yesus ni ma ndadi i pa, moté ndimé se. Se rpaké kyaté njé néya po um pépo lo né, se rédoké umé njé cuci, ga rtebo kyat ta nkafé njé re ni musala nuéncó le nóp po Yesus ni. 5 Pocé Yesusé némnaw si né, nuné ta fatuwé si rdélé I. Bóngo Yesusé nécegé kyat ta nkafé njé faje, “Téno, nete anam sélsólé né Ya re kfayangésé keé.”6 Mayta pocé fajé ma reni guru agama séfis néli ta runé fié Musa ni kitab abén limé né. Se ta Yesusé néceg fajé né, si rénuta po wlori wlólo, 7 “Ndél pa bo néceg faje. Ga npe ni diri dolo Jou Lahatala né, sababta reni isó pa ta bisa nféyangésé kyaté né róri sélsólé, maduga Jou Lahatala le.”
8 Mayta Yesusé re nuné keé wlori wlólo né, se nécegé si faje, “Fpe sói se mewé fécegé cogo Ya kfalélé Jou Lahatala ngósno né? 9 Ya kfafié i pari kfayangésé keé nó sélsólé né pari, férimé ndé lima Jou Lahatala ni. Mayta iga kféyangés i nó sélsólé né, fémnaw pa se fdélé pa. Mayta bo kfafié i, fémnawé se fdélé. 10 Se nte, Ya bo kfafié keé i bo funé, ta po dunia wlólo nte, Kyaté Ntu ta I yama Jou Lahatala ni njé, reni kawasa ta bo nfayangésé keé kyaté-kyaté róri sélsólé né.” Tabóngo Yesusé nécegé kyat ta nkafé njé faje, 11 “Ya kécego awé, mpangéné, mélilé keé nim musala njé, bo méléy po nim umé lo.”
12 Pocé kyaté njé npangén néya, nélilé ni musala njé bóngo nfan i. Kyat ta si pocé rémnaw ta néi né, rtélélé ndimé, se réceg faje, “Tabeu, nuéncó pafule bo témnaw ta dolo faje né.” Tabóngo rfapélóy Jou Lahatala ngósno né.
Yesusé nkakém Lewi bo ndéréré I
13 Rewóré ta né, Yesusé nfané nóté po Talaga Galilea ni lapo lo. Pocé kyat félé rfajólo si néli po Yesus ni nóté, bóngo nfasodoto si.
14 Nfasodoto si rewóré, nfan néli ga némnaw kyat isó ngósno Lewi, Alfeusé ni ntu i. Néntolén i po géwgów ta rénpólés pajaké lo né. Bóngo Yesusé nkakém i, “Lima, bo mdéréré Ya.” Pocé tabóngo Lewi nosél néya se ndéréré Yesusé.
15 Yesus I re ni motemote né rfan néli se rémnóm po Lewi ni umé lo. Pocé ma reni kyat félé ta rfajólo pajak né re kyat iglé ta kyaté né récegé cogo re róri sélsólé félé né. Si ma rémnómé rdé Yesusé I re ni motemote nesté pocé, sababta kyat félé ta re rdéréré I né. 16 Waktu ta néi ma, reni guru agama ta rdéréré dodoto Farisi né rémnaw Yesusé némnómé ndé kyaté nesté, bóngo récegé ni motemote né faje, “Pe sói se Yesusé ga némnómé ndé kyat ta rfajólo pajak re kyat iglé ta róri sélsólé félé né?”
17 Yesusé nlongé ta réceg fajé né, tabóngo ncónglo si faje, “Kyat ta rpisé pa né, nase réyówé sousou pa, maduga kyat ta rpisé né ta réyówé sousou. Necé ni ngale né, Ya kwómé né bo kkakémé kyat ta róri sélsól félé né. Mayta kyat ta récegé cogo re rmétegélé né, kkakém si pa.”
Yesusé ni motemote né rpuasa pafule waktu ta I re si rfadéréré lesu né
18 Nuéncó, Yohanesé ni motemote né si re kyat Yahudi ta rdéréré dodoto Farisi né rpuasa. Pocé bóngo kyaté né rwómo Yesusé ga rutné I, “Yohanesé ni motemote né, si re kyat Yahudi ta rdéréré dodoto Farisi né rpuasa, se Anim motemote né? Pe sói se si rpuasa pa né?”
19 Bóngo Yesusé nécegé si faje, “Adeade po féfsówé lo, iga ménóyé njé néntoléné lesu, ga rané ni délé né rpuasa, pai ta bo npuasa? Sababta si rpe riri rameangé lesu! 20 Ya nte ma dolo ménóyé njé: Ya i pote lesu, ta mulo nik motemote nesté rpuasa pafule. Mayta pote se néli, nase ryó keé Ya po nik motemote nesté ni, pocé ga si bo rpuasa.”
21 Pocé Yesusé npe adeade isó nóté, “Reni kyat isó pa ta bo néring kabaya léo ta re némgawésé njé re ngalép ta nóbéné njé. Sababta iga ntotéf kabaya léo ta re némgawésé njé, ngalép ta nóbén ta néringo i néli njé nase nkolét i se ngalép ta nóbéné njé némgawésé né nbóng ta lebe npélóyé nóté. 22 Fajé nóté, bo haiwan liko ta re mnuwé se matué né, reni kyat isó pa ta bo nwóso i re angguré ta nóbéné, sababta nase nképoséné bóngo ntaporésé. Se angguré né re ni góo njé farimé nase nlé i. Mare géwgów ta nóbéné, tagare twóso anggur ta nóbéné nóté.a”
Yesus óro ta reni kawasa bo nfaftulo sói ta kyaté né bisa rpe po ngénngan Sabaté
23 Nuéncó, mgo po ngénngan Sabaté né, ngénngan ta kyat Yahudi né bisa rpe yabé pa, pocé Yesusé I re ni motemote nesté rfané né rwetco po bét gandum isó ni. Pocé ni motemote né ringété róri gandum cuci. 24 Pocé ma reni kyat Yahudi ta rdéréré dodoto Farisi né, récegé Yesus faje, “Bee, pe sói se nim motemote né ringét gandum po ngénngan Sabaté? Ngénngan ta nte nabi Musa nané ité ma tpe yabé na. Si ga rpe yabé né?”
25 Bóngo Yesusé ncónglo si, “Mewé nase re fbaca, ta rlefo po Jou Lahatala ni Kitabé wlólo né. Pocé réfétén tatubé lima ta kolano Daudé i re ni kyaté-kyat ta rdéréré i né rtalóté. 26 Tabóngo kolano Daudé ncung némin po Jou Lahatala ni Um ta rénpe Sambayangé lo né, ga nyó keé roti ta kyaté rfépel pocé né se nénó, bóngo ndo keé kyaté-kyat ta rdéréré i né se si ma ró róri nóté. Momongo roti ta néi, iga bo tdéréré ité rir agama ni aturané, maduga imam-imamé né le ta bisa ró.” Waktu ta néi, imam Abyataré ndadi imam ta pélóyé.