Yesusé nfafié kyat po ngénngan Sabaté
3
Rewóré ta néi, Yesusé ncungé nóté po agama Yahudi né riri um sambayangé lo. Pocé reni kyat isó ta ni fao féspalé né nmóte. 2 Pocé ma reni kyat Yahudi ta rdéréré dodoto Farisi né. Si rfaléngóté Yesusé, bo sogado nfafié kyaté njé po ngénngan Sabaté, bo rfasólé keé I, sababta po ngénngan ta néi si bisa rpe yabé pa. 3 Pocé bóngo Yesusé nécego kyat ta ni fao féspalé nmóté njé faje, “Aw lima, mosél po kyat ta félé né usnori lo nte.”4 Pocé bóngo Yesusé nutné kyat ta si pocé né, “Bo kutné mew su. Iga bo tdéréré aturan ta po Musa ni kitab abén lima lo né, sói ta ité bo tpe po ngénngan Sabaté? Bo tpe ta fié pari tpe ta lé? Bo tfafié kyat pari bo tpuné kyaté?” Si rlongé ta néi, rfaténténgén si le.
5 Pocé Yesusé néngóto si né ncawané, bóngo wlo njé nkangelangé, sababta wlori né métué. Bóngo Yesusé nécegé kyat ta fao nmóté njé faje, “Mayété faomé né lima.” Bóngo kyaté njé nayété fao né néli, ta nfié i. 6 Se waktu ta néi óro, kyat Yahudi ta rdéréré dodoto Farisi né rcópéné se rfan néli po kolano Herodesé ni kyaté né. Néli rfajólo si ga réyówé yéféné bo rpuné keé Yesusé.
Yesusé nfasodoto re nfafié kyat félé
7 Yesusé I re ni motemote né rlué si po talaga Galilea lapo. Mayta kyat Galilea né ma félé ta rdé si né. Reni nóté ta si lima bótén Yudea, 8 ta yama kota Yerusalemé, po bótén Idumea, re bótén ta po Wóé Yordané ni faspalé, re yama pnuwé-pnuw ta rfakrakén Tirus re Sidoné né. Si férimé sogado rdéréré Yesusé né, sababta re rlongé férimé ta Yesusé re npe né. 9 Kyat ta rwómé né rfélé, se Yesusé nané ni motemote né rérué yel esó nélawé bo ncaplo, ma sogado kyaté né rfasésisén re I na. 10 Sababta I re nfafié kyat félé, se kyat félé nóté ta rpisé né rwómé, masike rfasésiséné ma, réyówé yéféné bo rétané Yesus facuci. 11 Iga kyat ta setané ntolno si ga rémnaw I, rémtaté se rtikibuku nópé ga rcuba I, bóngo rgélayé, “Adu, Aw ta nte, Jou Lahatala ni Ntu Awé!”
12 Mayta Yesusé nécegé setané né faje, “Ndél pa bo féfétén po kyaté, ta Ya nte pai.”
Yesusé nané ni motemote né bo rfafané ni yabé né
13 Rewóré ta néi, Yesusé négafét néya métété isó ni, bóngo nkakémé kyaté-kyat ta wlo mgo si né, bóngo rwóm néli I ni. 14 Pocé I npili kyat yófésó re séluwé né bo ngénngan néya rdéréré I, re bo nané si rfané réfétén Habar ta Fié yama Jou Lahatala ni. 15 I ma npo si kawasa bo rféungé setan-setané.
16 Kyat si dórén yófésó re séluw ta Yesusé nkakém si nesté ngósnori né faje: Simon (ta Yesusé nfangósno i Petrusé njé), 17 Yakobusé i re ni fténo Yohanesé (Zebedeusé ni ntu si). Yesusé nfangósno si ‘Boanerges’, (ta ni ngale né gliri pélóy dolo rub ta téploré né), 18 Andreasé, Filipusé, Bartolomeusé, Matiusé, Tomasé, Yakobusé (Alfeusé ni ntu i), Tadeusé, Simon (ta bo nfaungé keé kyat Roma ta rkawasa po riri bótén Israelé né), 19 re Yudas Iskariot (ta nase bo nwagé Yesusé njé).
Kyaté né récegé cogo Yesusé setané ntolno I
20 Rewóré ta néi, Yesusé ncung po um isó ni. Pocé reni kyat félé ta rfajól néli po I ni nóté, sogado I re ni motemote né bo rémnómé ma ndadi i pa. 21 Yesusé ni neke re ni fténo né rlongé I nwómé, se rfan néli bo ryó I, sababta rlongé kyaté né récegé cogo wlo njé re nmétegél pana.
22 Pocé guru agama Yahudi ta runé fié Musa ni kitab abén limé né rwóm yama Yerusalemé, se réceg faje, “Yesusé njé, setané né riri kolano ta ngósno Beelzebulé njé re ntolno I, se npo I kawasa bo nféungé setané né.”
23 Yesusé nlongé ta réceg fajé né, tabóngo nkakém kyat ta pocé né lima, bóngo npo si adeade, néceg faje, “Nuén fisé setané né riri kolano njé bo nféungé ni dél setané né? 24 Adeade po bótén isó ga ni kyaté né rfakotale, nase nai ta rfan si. 25 Re iga po um faisó ga ni kyaté né rfakotale, si ma nase nai ta rfan si. 26 Fajé nóté, bo setané né riri kolano njé nféungé ni dél setané né, nase nai ta rfan si, bóngo setané né riri kolano njé nase reni kawasa pana.
27 Flongé adeade isó nje nóté bo fsae. Iga reni kyat isó ta nkuat dolo setané né riri kolano njé, isó pa ta néfené ncung po ni umé lo bo nayé ni gina né. Mare kyat ta lebe nkuaté npitén i su, ga bisa nyó ni gina né.a 555
28 Se flongé fafié é! Farimé sélsól ta kyaté rpe né, Jou Lahatala bisa nfayangésé lesu róri sélsólé ta néi, fajé nóté re ta rfakcegé kyaté né. 29 Mayta pai ta nfakcegé Jou Lahatala ni Rohé njé, nó sélsólé né Jou nase nfayangés pa, se i nase ncól sogado fajé néli le.” 30 Yesusé néceg fajé né, ncawané kyat ta récegé cogo setané ntolno I né.
Kyat pai le ga npe ta Jou wlo ncuka né, necé Jou ni kyat si
31 Waktu ta Yesusé nfasodoto si lesu né, ni neke i re Yesusé ni fténo nesté rwómé rosél be po tó, se rané kyaté né rkakém I. 32 Pocé po umé wlólo né, i ni kyaté né tadélé félé ta rtoléné rfaljelé Yesusé né, bóngo kyat ta rané si né rfabingo I, “Moke, nim neke i re fténomé nesté ta nesté tó, cogo bo rfapdipéné rdé Awé.”
33 Mayta Yesusé ncónglo si, “Ya nik neke re fténogé né pai se?”