Adeade géy ta résyapé po géwgów abén fóté
4
Nuéncó nóté, Yesusé nfasodoto kyat po talaga Galilea lapo lo. Waktu ta néi, kyaté né tadélé félé ta rwómé se rfajól po Yesus ni né, bóngo Yesusé ncapél I po yel esó ta rtapu né ga ntolén nópé, se nfasodoto kyat ta si po talaga lapo lo né. 2 Pocé I nfasodoto si félé, mayta npake be adeade le. Ta I nfasodoto si né faje, 3 “Flongé nte su. Nuéncó, reni kyat isó nfan po nó bété lo, nésyapé géyé. 4 Géy ta nésyapé né, reni ta mnap nóp po yéféné lo, bóngo mané ta rénopé né rwóm lima ga rétiréyé róri ndimé. 5 Iglé né mnap i po bétbét ta reni lóy félé, ta ni bétbété né cuci le. Se géyé né mlale ntubé, sababta ni bétbété né ménifésé. 6 Mayta mgo ngénngané bóngo mlay i se némang i, sababta ni wówo né ncung nóp lów pa. 7 Iglé né mnap po bétbét ta reni gémuné gémgaméné né. Se ntubé nfadéréré néya re gémuné gémgaméné né, tabóngo nfabkabé keé se népyon pa. 8 Iglé né ga mnap po bétbét ta fié lo, se ntub néya né, békboké sogado pyono fié. Géy ta néi, ngai pusó le ni pyono né reni ta ndadi yófételé, yóféwonémé, re sogado ga witéncó nóté.” 9 Tabóngo Yesusé nécego si faje, “Flongé fafié ta kéféténé nte, bo fisén po wlomi wlólo.”10 Rewóré ta néi, Yesusé re nkumél I, bóngo ni motemote yófésó re séluwé né si re kyat séfis néli nóté ta rdéréré I né, rutné I, “Guru, adeade ta i péséwé njé ni ngale sói?”
11 Tabóngo Yesusé ncónglo si, “Jou Lahatala npo fié bo mewé funé fanfawa ta Jou Lahatala bo Nkawasa dolo Kolano po ni kyat ta rdéréré I né. Mayta po kyat iglé, kfasodoto si né kpe be adeade le. 12 Ta Ya kpe faje né, bo ta Jou Lahatala néceg tatubé lima né ndadi po si ni, ta ni glio né faje:
‘Masike si rémnaw sói le, runé ni ngale pa.
Masike rlongé le ma, rcae pa.
Si rémnaw re runé gélesó pa, se rpólén si po Jou Lahatala ni pa,
bóngo nase Jou Lahatala nfayangésé róri sélsólé né pa.’ ”
Yesusé ntebo adeade géyé njé ni ngale
13 Pocé bóngo Yesusé nutné si, “Se adeade ta i péséwé njé mewé funé ni ngale pa? Iga adeade ta i péséwé njé ma fsae i pa, né ga ta i iglé né nase bo fsae fawa? 14 Se faje: Géy ta kyaté njé nésyapé né, nejé Jou ni méiténé. 15 Géy ta mnap po yéfén pépolo né, necé tadolo kyat ta rlongé Jou ni méiténé né. Se rlongé rewóré, ga setané né riri kolano njé nwómé nyó keé. 16 Géy ta mnap po bétbét ta reni lóyé lo né, necé tadolo kyat ta rlongé Jou ni méiténé né, bóngo séngséngé bóto si. 17 Mayta, méiténé né risén fafié pa po wlori wlólo. Bóngo rdélé Jou Lahatala né maduga cuci le, se iga reni kyat ta rwóm lima rfarwaé re rfakangelang si, bo ma rdélé Jou ni méitén ta néi le na, bóngo rdélé pana. 18 Géy ta mnap po bétbét ta reni gamuné gémgaméné lo né, necé tadolo kyat ta rlongé Jou ni méiténé, 19 mayta wlori né nténgén pa. Se ngénngan néya maduga ranuta be riri hidupé, bóngo réyówé be haréta dunia, momongo haréta njé reni ngale pa, re wlori ncuka be hidup ta fié re birahi ndimé. Se Jou ni méitén ta re rlongé né rdéréré pana, se dolo géy ta re pyono pa né. 20 Gey ta mnap po bétbét ta fié lo né, necé tadolo kyat ta rlongé Jou ni méiténé né, bóngo risén po wlori wlólo. Se ngénngan néya, rpe be Jou ni méiténé né po riri hidupé wlólo, se kfatailo si né tadolo géy pusó ta ni pyono né sogado yófételé, iglé né yóféwonémé, re sogado witéncó nóté.”
Adeade logaloga ta rfarfura
21 Rewóré ta néi, Yesusé nécego si nóté, “Reni kyat isó pa, ta nésting logaloga ga nfarfura keé i re tampayangé, pari nfépelé keé i po róngét pópo lo. Mayta mare nfépel i néya po ni géwgów ta mógé lo né. 22 Necé ni ngale né, sói ta kyaté runé pafule né, Jou bo npe sogado runé. Sói ta kyaté né rcae pafule, nase bo rcae fié. 23 Se ffaméylongé fafié bo fsae ta kécegé nte.”
24 Bóngo Yesusé nécego si nóté, “Ffatélolmo mew fafié sói ta re flongé né: Bo fisén fafié po wlomi wlólo, Jou ma nase n'gali mewé bo fsae lebe félé nóté. 25 Sababta pai ta nlongé Ya nik méiténé ga nisén po ni wlo wlólo, Jou nase n'gali i se ta délé nuné lebe félé nóté. Mayta pai ta niséné nik méiténé né pa, cuci ta i nuné né ma Jou nase néyó keé.”
Jou bo nkawasa ni kyaté né tfatailo dolo géy ta ntubé né
26 Yesusé nécegé nóté, “Ta Jou Lahatala nkawasa dolo Kolano po ni kyat ta rdéréré I né, tfatailo dolo kyat isó nésyapé géy po nó bété lo né. 27 Iga re dorémé nyénéf i, re ngénngané ga npangéné se nfatélolmo pana géyé né, mayta géyé né ntubé le sogado pyono. 28 Sababta bétbété né ta nfatub i néya, npe wlu, npe wérwóro, ncoté, sogado népyoné. 29 Pyono né re ncimo i, bóngo ningété keé ndimé.”
Adeade géy ta nalus sogado ndadi ay ta pélóyé
30 Rewóré ta néi, Yesusé nécegé nóté, “Ta Jou Lahatala nkawasa dolo Kolano po ni kyaté né, bo tfatailo dolo sói? Bo kéfétno si adeade sói bo sogado rcae? 31 Jou Lahatala nkawasa dolo Kolano po ni kyaté né, po faiwóbno né maduga cuci le, néli-néli nbóng ta lebe félé nóté, necé tfatailo dolo géy pusó ta nalus po férimé géy ta po dunia wlólo nte. 32 Mayta bo ttóném i nóp bétbété lo, ntub néya né, ndadi ay isó ta npélóyé. Ni séngsóngé né ma félé se nruburubu fié. Se iga mané ta rénopé né réting pocé, bóngo rpe riri pup pocé nóté.”
33 Yesusé néfétno kyaté né adeade séfis néli nóté, ta féléo i né, ni ngale nópé né Jou Lahatala ni Méiténé le. I maduga néfétno si be ta bisa runé re rcae né le. 34 Mayta kyat ta félé né npo si be adeade le, nómésta I re ni motemote nesté re rkumélé, ga tagare ntebo adeade né ni ngale.
Yesusé nfatébén moré re méwruwé
35 Po mérim ta néi óro, Yesusé nécegé ni motemote nesté faje, “Mew lima ro, bo tpe néli po talaga njé ni féspalé.” 36 Pocé bóngo rfatoléné keé kyat ta félé né, se si re Yesusé rcapél si po yel esó ta Yesusé ntolno né, bóngo rcobél si néli po talaga njé ni féspalé. Kyat iglé né ma rdéréré si, mayta rcaplo riri yel nésé.
37 Ta rénap nélawé né, rduké róri moré re méwruwé se nfabébépsé si. Wóé né ma ncung néya yelé wlólo sogado bo rémdiré. 38 Waktu ta néi, Yesusé nyénéf I po fafémilé né. Béboko njé npóglé i nóp liléné lo. Pocé ni motemote nesté rémtaté se récegé I faje, “Guru, mpangéné. Mémnawé, ité nte nase bo tmóté!”
39 Pocé Yesusé npangéné se nosél néya, tabóngo nécegé moré re méwruwé né faje, “Ftébén óro!” Tabóngo moré re mawruwé né ntébéné, se talaga njé ma nméklóngéné.
40 Pocé Yesusé nécegé ni motemote nesté faje, “Fpe sói se fémtaté? Ga fdélé Ya pa né?”
41 Pocé bóngo rémtaté, se rfatutén isó re isó, “Bee, ga pai nje, sogado moré re méwruwé né ma rdéréré se ntébéné né?”