Yesusé ni fténo né rané I nfané bo ndéréré ngénngan ta pélóy po Yerusalemé
7
Yesusé nméitén re kyat ta félé né rewóré, tabóngo nfané se néjelé keé bótén ta po Galilea né. Wlo pa bo nfan po bótén Yudea, sababta agama Yahudi né riri kyat tut ta rpélóyé né réyówé I bo rpuné keé I. 2 Waktu ta néi, agama Yahudi né riri ngénngan ta pélóy ta réceg Pondok Daongéa né re rakén óro. riri ngéngan ta péloy tanéi, si rpe umé mnyaku-myaku po bétélo ta rpólo re aye wlu se rtólén pocé. Sababta rfatélolmo si po waktu ta si po géwgów esó ta sésé bóto i né, se rtolén po umé myaku-myaku lo né. 3 Se Yesusé ni fténo né récegé I faje, “Mfan Awé ro bo mfatoléné keé géwgów ta ntei. Ta fié né mfané bo mdéréré ngénngan ta pélóy po Yudea, bo kyat félé ta rfadéréré Awé né ma bisa rémnaw mujizat ta Awé mpe né. 4 Sababta, iga kyat ta bo ndadi kyat ta lebe npélóy po férimé kyaté, bisa népiné pa, sói ta i bo npe né. Se mpe mujizat óro po kyat ta félé nte usnori lo, bo kyat ta po dunia wlólo nte rémnaw ta Awé mpe né.” 5 Yesusé ni fténo né réceg fajé né, sababta si le ma rdélé I pa.6 Se Yesusé nécegé si faje, “Nwómo ni waktu pafule ta Ya bo kpe néli né, mayta iga mewé, re nimi waktu félé bo fpe néli né. 7 Sababta, kyaté-kyaté né rdélé Ya pa, si ta néi riri lé mew pa, mayta riri lé Ya, sababta Ya kfébingé sói ta si rpe né lé ndimé. 8 Se mewé ro fpe néli bo fdéréré ngénngan ta pélóy po Yerusalemé né. Ya nase kpe néli pa, sababta nwómo ni waktu pafule.” 9 Méitén ta néi óro ta Yesusé nécego ni fténo nesté né, Yesusé ga ntolén po bótén Galilea ni ngané fis néli lesu.
Ta Yesusé nfasodoto kyat po Yerusalemé né waktu ta agama Yahudi né riri ngénngan ta pélóyé
10 Waktu ta Yesusé ni fténo nesté re rfané rdéréré ngénngan ta pélóy po Yerusalemé né, Yesusé ma npe néya nóté, mayta I nfané né néisémé bo kyaté né ma runé I na. 11 Pocé po ngénngan ta pélóyé né, agama Yahudi né riri kyat tut ta rpélóyé né réyówé Yesusé se rutné néli re lima po kyaté-kyat ta pocé né, “Kyaté njé, I pua?”
12 Mayta kyat félé ta rfagéyaso né, se reni iglé réceg faje, “I ta njéi kyat faifio I.”
Reni nóté ta récegé, “Tisé, I ta njéi ta nénlólé kyaté né.”
13 Mayta reni kyat isó pa ta bisa néfétén Yesusé ni ta fié po kyat ta félé né usnori lo, sababta rémtat agama Yahudi né riri kyat ta rpélóyé nesté.
14 Kyat Yahudi né rpe riri ngénngan ta pélóyé né, ni mnuo minggu nuéncó, se sogado re ngané luw telé, ga tagare Yesusé ncung po Um Sambayang ta npélóyé njé ni kintalé lo, se nfasodoto kyat ta pocé né. 15 Se agama Yahudi né riri kyat ta rpélóyé nesté rémnawé né tadélé rherané, bóngo rfalécego faje, “Kyat ta njéi nuné fié, aturan-aturan ta po Musa ni kitab abén limé né. Momongo kyat ta njéi, nuéncó pafule bo nfasodoto tadolo ité tfasodoto kyaté né.”
16 Bóngo Yesusé nécegé si faje, “Ta Ya kfasodoto nte, Ya nik dodoto le pa, mayta lima Jou Lahatala ta nané Ya kwóm yama bo kpe ni yabé njé. 17 Se maduga kyat ta wlori bo rpe ta Jou Lahatala mgo wlo né le, ta bisa runé Ya nik dodoto nte lima Jou Lahatala ni, pari maduga lima Ya ni óro. 18 Kyat pai le, ta nfasodoto kyaté ga ndéréré be i ni wlo njé le, kyat ta njéi maduga bo néyówé [be] ta kyaté né rcuba re rtail be i ni diri le. Mayta kyat pai ga wlo bo kyaté né rcuba re rtail be Jou Lahatala ta nané i njé, ta kyaté njé nécegé né fatuwé, tadélé nlól pa. 19 Nabi Musa re npo aturan-aturan ta po ni kitab abén limé né, bo mewé fdéréré. Mayta po mew ni né, reni kyat isó pa ta fatuw-fatuwé ndéréré aturan ta néi. Sababta iga fatuw ta fdéréré aturan ta néi, pe sói se féyówé Ya bo fpuné keé Ya?”
20 Pocé bóngo kyat ta félé né récegé Yesus faje, “Awé nte nihalé setané ncung Awé! Pai ta néyówé Awé bo npuné keé Awé se?”
21 Tabóngo Yesusé nécegé si faje, “Ya kfafié kyat po ngénngan sabaté né tagare nuéncó, necé le ma fémnawé né re fherané. 22 Momongo, mewé ma fpe yabé po ngénngan Sabaté nóté, sababta fsunaté kyaté né mgó po ngénngan Sabaté, tadolo nabi Musa nané mewé né. (Momongo, sunat ta néi nabi Musa ni aturan pa, mayta fdéréré keé ité rir délut tatubé lima ta Abrahamé, Ishaké, re Yakobé, riri aturané né.) 23 Se iga fsunaté kyat po ngénngan Sabaté bo fdéréré be nabi Musa ni aturan ta néi, néga pe sói se fsawan Ya waktu ta kfafié kyat isó po ngénngan Sabaté né? 24 Ndél pa bo fémnawé kyat faisó tabóngo ffasólo keé i, mayta mare futné i fafié su, ta npe né ncól pari tisé, iga ncólé ga ffasólo i.”
Kyaté né rfakotale Yesusé njé fatuw ta Mesias pari I pa
25 Reni kyat séfis néli po kota Yerusalemé, rlongé sói ta Yesusé nécegé né, bóngo réceg faje, “I ta nje I, nihalé kyat ta ité rir kyat tut ta rpélóyé nesté réyówé I bo rpuné keé I njé? 26 Coba fémnawé, I ro ta nméitén po kyat ta félé né usnóri lo né, mayta reni kyat isó pa ta ncawan I, bóngo rgó I pa nóté. Nihalé rir kyat tut ta rpélóyé nesté re runé ta fatuwé I ta njé I Mesiasé, Kolano ta Jou Lahatala néjaji bo nfasalamaté kyaté njé? 27 Mayta dolo bo ncung akal pa, iga kyat ta njé I ga Mesiasé né, sababta I kyat Nazareté I. Iga Kolano ta Jou Lahatala re néjaji bo nfasalamaté kyaté njé ga re nwómé, nase reni kyat isó pa ta nuné, Mesiasé njé nwóm fawa lima.”
28 Waktu Yesusé nfasodoto lesu po Um Sambayang ta npélóyé njé ni kintalé lo né, nméiténé né nfakwat I se néceg faje, “Mew ta ntéi re fféyal Ya, bóngo re funé ta Ya nte kwóm fawa lima. Ya kwómé nte kdéréré Ya wlegé nje pa, mayta Ya kwómé nte Jou Lahatala ta nané Ya. I ro ta nmétegél, ta mewé féyal I pa njé. 29 Mayta Ya kféyal I, sababta Ya kwóm lima I ni, se I ta nané Ya kwóm yama bo kpe ni yabé pote.”
30 Kyat séfis néli ta si pocé né, rlongé ta Yesusé néceg fajé né, tabóngo réyówé yéféné bo rgó I, mayta reni kyat isó pa ta bisa ngó I, sababta waktu ta Jou Lahatala re nfaréné né nwómo i pafule. 31 Mayta po kyat ta félé né, reni félé ta re rdélé Yesusé, se réceg faje, “Neje nihalé Mesias óro, Kolano ta Jou Lahatala néjaji bo nfasalamaté kyaté njé. Sababta reni kyat isó pa ta bisa npe mujizat lebe félé po ta I re npe né.”
32 Pocé, kyat Yahudi ta rdéréré dodoto Farisi nesté, rlongé kyat félé rfagayaso se réfétén Yesusé né, bóngo si re imam ta rpélóyé nesté rané kyat ta réjaga po Um Sambayang ta npélóyé njé ni né bo rgó Yesusé.
33 Waktu ta néi, Yesusé nécegé kyat ta félé né faje, “Ya nik waktu re mewé nte góli be cuci le. Rewóré ta néi, bo kpólén Ya nmulé po nik Moke ta nané Ya njé ni. 34 Mewé ga bo féyówé Ya, mayta nase fduk Ya pa, sababta mewé bisa ffan po géwgów ta Ya bo kfano lo né pa, sababta fdélé Ya pa.”
35 Agama Yahudi né riri kyat tut ta rpélóyé nesté rlongé ta Yesusé néceg fajé né, tabóngo rfalécego, “Ga bo nfan pua se, tamulo ga nase bisa tfapdipéné re I pa né? Ma sogado bo nfan po kyat Yahudi ta si po bótén nésé né, pocé ga nfasodoto kyat iglé ta kyat Yahudi si pa né. 36 Bóngo ni maksud sói, sogado ga nécegé cogo ité nase téyówé I mayta nase tduk I pa né? Bóngo nécegé nóté, géwgów ta I bo nfano lo né, ité nase bisa tpe néli pa. Necé ni maksud sói é?”
Jou ni Rohé njé tadolo wóé ta npe sogado kyaté né rduk ta fié sogado fajé néli le
37 Kyat Yahudi né riri ngénngan ta pélóy ta réceg Pondok Daungé né rpe minggu nuéncó wlólo. Pocé po ngénngan ta pélóy ta isémé né ga Yesusé nosél néya bóngo nécegé né nfakwat I, “Kyat pai le ta gli mangé, nwóm lima po Ya ni bo kfainmo i wóé. 38 Bóngo kyat pai le ga ndélé Ya, i ta njéi nase bo nduk sói ta re rlefo po Jou ni Buké wlólo ta ni glio faje, ‘Ta ncópén yama po wlo wlólo né, nase tadolo wóé ta babelésé, sogado nhidup re Jou Lahatala sogado fajé néli le.’ ” 39 (Ta Yesusé nécegé wóé né, I ni maksud Jou Lahatala ni Rohé njé. Se kyat ta rdélé Yesusé né nase bo rduk Jou ni Rohé njé. Mayta waktu ta Yesusé I po dunia wlólo lesu né, kyaté né rtarima Jou ni Rohé njé pafule, sababta Yesusé mare nmót sogado npangéné su ga tagare kyaté-kyaté né bo rduk Jou ni Rohé njé.)
40 Waktu kyat ta félé né rlongé ta Yesusé nécegé né, reni kyat iglé né réceg faje, “I ta njei óro, Nabi ta Jou Lahatala re néjaji bo nwómé njé.”
41 Reni kyat iglé nóté ta récegé, “I ta njei Mesias óro, Kolano ta Jou Lahatala re néjaji bo salamaté ité njé.”
Mayta kyat iglé récegé, “I pa. Tatubé ta Jou Lahatala néjaji né, Mesiasé njé nase nwóm lima bótén Yudea, bukan ta I lima Galilea pa. 42 Po Jou ni Buké wlólo né rlefo ta Mesiasé njé kolano Daudé ni ntu re gbu I, se I nase nwóm lima kota myaku isó ngósno Betlehem po bótén Yudea, kolano Daudé ni pnuwé.”
43 Pocé ga kyaté-kyaté né rfakotale, iglé rdé Yesusé, ta iglé né ga bo réyówé yéféné bo rfakotale rdé I. 44 Se reni kyat séfis néli né bo rgó Yesusé, mayta rémtaté se reni kyat isó pa ta bisa nétané Yesusé.
Agama Yahudi né riri kyat tut ta rpélóyé né wlori pa bo kyaté né rdéréré Yesusé
45 Kyat ta réjaga po Um Sambayang ta npélóyé njé ni né, rpólén si po imam ta rpélóyé né re kyat ta rdéréré dodoto Farisi ta rané si rgó Yesusé né, pocé bóngo rutné kyat ta réjaga nesté faje, “Fpe sói se fut Yesus lima pa?”
46 Bóngo si rcónglo, “Dolo nuéncó pafule bo reni kyat ta rméitén fié dolo kyat ta njéi né.”
47 Se kyat ta rdéréré dodoto Farisi né réngóto si bóngo réceg faje, “Ee, ga mewé ma nihalé re nlólé mewé nóté? 48 Coba fénuta fafié! Ité rir kyat ta tdéréré dodoto Farisi, re rir kyat tut ta iglé né, reni ta rdélé I pari tisé? Tisé to? 49 Mayta kyat ta félé ta runé gélesó pa né ga rdélé I, sababta si runé pa aturan ta po Musa ni kitab abén limé né. Si ta néi, Jou Lahatala re nhukumé keé si óro.”
50 Po kyat Yahudi ta rdéréré dodoto Farisi né, Nikodemusé ma i pocé nóté. I ta njéi nuéncó re nwóm po Yesus ni. Se nécegé si faje, 51 “Iga bo thukumé kyaté ga tdéréré ité rir aturan ta po Musa ni kitab abén limé né, ité mare tutné fafié su sói ta i npe né, iga ncólé ga taga tfasólo i.”
52 Pocé bóngo récegé Nikodemus faje, “Pe sói se mdé I? Awé nte kyat Galilea aw pa tó? Coba méflengén fafié su ta po Jou ni Buké wlólo né. Reni nabi ta rwóm lima Galilea pari tisé. Reni pa to!”
53 [Rewóré ta néi, férimé kyaté né nai ta réléy si po riri umé lo.