Yohanes 8

Kyaté né rgó mépin isó nyó sólé

Yesusé nfan po métét Zaituné. 2 Ni tamamóné né, Yesusé nfané nmulé po Um Sambayang ta npélóyé njé ni kintalé lo. Pocé kyat ta félé né rwóm po Yesus ni, tabóngo Yesusé ntoléné se nfasodoto si pocé.

3 Waktu ta Yesusé nfasodoto kyaté lesu, néga agama Yahudi né riri kyat tut ta rpélóyé né rwóm po Yesus ni. Si ta néi, guru-guru agama ta runé fié Musa ni kitab abén limé né, re kyaté-kyat ta rdéréré dodoto Farisi né. Rut mépin isó po Yesus ni, sababta rdótlé mépiné njé nyó sólé. Néli se rané i nosél po kyat ta félé né riri fapéluné, 4 ga récegé Yesus faje, “Guru, mépin ta njéi amé kgó i nyól sól re món isó njé, ta i ni légaé i pa. 5 Se bo tdéréré aturan ta po Musa ni kitab abén limé né, iga reni mépin tadolo faje, mare ttéo nó lóy sogado tfamót i. Se iga Awé fanfawa?” 6 Si rutné fajé né maduga bo rtofén be Yesusé le, bo iga ncóngélé né ga sólé^a, necé re rduk yéfén ta bo rfasól I né. Mayta Yesusé maduga nliké se nlefo re kakolo po bétbété lo.

7 Pocé rutné Yesusé né rtébné pa, tabóngo nosélé se nécegé si faje, “Pocé po mew ni né, pai ga re nó sélsól pa, kyat ta njé ta ntéo mépiné njé nó lóyé ntubé.” 8 Rewóré ta néi, Yesusé nlik nópé nmulé se nlefo po bétbété lo né.

9 Se kyat ta pocé fajé rlongé ta Yesusé nécegé né, tabóngo nai ta rfan si. Kyat ta lebe rténlóy pocé né rfan si rtubé, sogado rfatoléné keé Yesusé se I re mépiné njé rkumél si. 10 Pocé ga Yesusé nosél néya se nutné mépiné njé, “Neke, férimé kyat ta bo rhukum awé né re si pua?”

11 Mépiné njé ncónglo I, “Re rfan si Moke.”

Bóngo Yesusé nécegé mépiné njé faje, “Rhukum aw pa to? Ya le ma khukum aw pa. Se mfané ro, bo nete óro ma mpe sélsólé le na é!”]

Yesusé njé manano I po dunia nte

12 Yesusé nécegé nóté po kyat félé ta si pocé lesu né, tadolo faje, “Ya nte manano ta po dunia nje ni wlólo nte, ta fkaménano kyaté né wlori. Se kyat pai le ta ndéréré Ya, kyat ta njéi nase nhidup po dérorémé lo pana, mayta nase nhidup po manano ta npe sogado nhidup re Jou Lahatala sogado fajé néli le.”

13 Pocé ga kyaté-kyat Yahudi ta rdéréré dodoto Farisi nesté récegé Yesus faje, “Moke, ta mécegé né amé kdélé pa, mare reni kyat faisó nóté néféténé ga amé bisa kdélé ta Anim kawasa né yama Jou Lahatala ni.”

14 Bóngo Yesusé nécegé si faje, “Masike Ya ta kéféténé nik diri óro, mayta ta Ya kfébingo mewé né fatuwé, sababta Ya kuné, ta kwóm re kfan fawa néli né. Mayta mewé funé pa, ta Ya kwóm fawa lima, re kfan fawa néli né. 15 Mewé wlomi ncuka ffasólo kyaté fdéréré be kyat dunia né wlori, mayta Ya, wleg pa bo kfasólo kyaté. 16 Mayta iga Ya bo ffasólo kyaté, kfasólo si ta fatuwé, sababta Ya kumél pa ta kfasólo si né, mayta Ya re nik Moke ta nané Ya kwómé kpe ni yabé né. 17 Nimi aturan-aturan ta po Musa ni kitab abén limé né, reni ta rlefo faje: iga fdadi saksi po masala faesó mare reni kyat faséluwé bo réfétén ta rémnawé né bo ité tdélé ta rémnawé né fatuwé. 18 Fajé nóté re Ya: Ya kéfétén ta Ya nte pai, re Ya nik Moke ma néfétén Ya nte pai po mew ni. I ro ta nané Ya kpe ni yabé njé né.”

19 Se si rutné I faje, “Guru, nim Moke njé I pua se?”

Yesusé ncónglo, “Se mewé fféyal Ya pa, nik Moke njé ma fféyal I pa nóté. Iga re fféyal Ya, nik Moke njé ma nase fféyal I nóté.”

20 Méitén ta néi, Yesusé néceg po waktu ta nfasodoto kyat po Um Sambayang ta npélóyé njé ni kintalé lo né, po géwgów ta rénénpeo i kébya ta sadaka góo i. Mayta reni kyat isó pa ta bisa ngó I, sababta nwómo ni waktu pafule.

Yesusé nwóm yama soroga re bo npólén I néya nmulé

21 Ta Yesusé I po Um Sambayang ta npélóyé njé ni kintalé lo né, I néceg faje, “Bo kfan Ya po géwgów nésé. Pocé mewé nase féyówé Ya, mayta nase fduk Ya pa. Po géwgów ta Ya bo kfano lo né, mewé nase bisa fsung pocé pa, sababta nómi sélsólé né nféketé keé mew re Jou.”

22 Pocé, agama Yahudi né riri kyat tut ta rpélóyé nesté rlongé ta Yesusé néceg fajé né, tabóngo rfalécego, “Nihalé bo npuné ni diri? Sababta I nécegé cogo po géwgów ta I nfano lo né, ité bisa tfan pocé pa.”

23 Bóngo Yesusé nécegé si faje, “Mew ta ntei maduga funé be ta fhidup po dunia wlólo né, mayta Ya kwóm yama soroga. Se mewé maduga funé be ta dunia ni né, mayta Ya kuné pa dunia ni né. 24 Se péséw ta kécegé mewé nase bo fmóté né, sababta nómi sélsólé né nféketé keé mew re Jou. Sababta mewé fdélé pa ta Ya nte I ro ta Jou néjaji bo nwómé njé, se nómi sélsólé né nase pocé sogado fajé néli le.”

25 Pocé bóngo récegé Yesus faje, “Se Awé nte pai?”

Yesusé ncónglo si, “Ya nte tadolo tatubé lima se re kfébingo mewé né. 26 Reni félé lesu ta Ya mare kécego mewé, bóngo félé ta bo kfasólé mewé né. Mayta, Ya maduga kécego mew be sói ta Ya re klongé po I ta nané Ya kwóm yama kpe ni yabé né. Ta I nécegé né fatuwé, se ta néi óro ta Ya re kfébingo kyaté-kyat ta po dunia nje ni wlólo nte né.”

27 Kyaté-kyat ta rlongé Yesusé né rcae pa, ta Yesusé nécego si, ni Moke ta I po soroga njé né. 28 Se Yesusé nécegé si faje, “Waktu rut Kyaté Ntu ta I yama soroga njé bo rcalib I se rfawóslé I néya né, pocé ga mewé nase funé fié, ta Ya nte I ro ta Jou Lahatala néjaji bo nwómé njé. Mayta iga kkumélé bisa kpe gélesó pa bo kdéréré be Ya wlegé nje né, sababta Ya maduga kéfétén be ta nik Moke nfaftulo Ya né. 29 Se I ta nané Ya kwóm yama kpe ni yabé njé, se I ro ta ndéréré Ya né. Nuéncó pafule bo nfatoléné kée Ya, sababta Ya maduga kpe be ta mgo wlo né le.”

30 Waktu Yesusé néceg férimé ta néi, ga kyat ta félé né rdélé I.

Dodoto ta fatuwé né nféyangésé keé rór sélsólé né

31 Pocé, tabóngo Yesusé nécegé kyat Yahudi ta re rdélé I né faje, “Iga mewé fdéréré be maduga Ya nik dodoto né le, necé fatuw-fatuw ta Ya nik motemote mewé. 32 Bóngo mewé nase funé Jou Lahatala ni dodoto ta fatuwé né se fdéréré, Jou nase nféyangésé keé nómi sélsólé né, necé tfatailo dolo tuang ta nfabebasé keé ni béyaké njé né.”

33 Pocé ga récegé Yesus faje, “Amé nte Abrahamé ni ntu re gbu amé, se nuéncó pafule bo kdadi kyat yabé dolo tuangé njé npe ni kyat yabé njé dolo ni béyak i né. Néga fanfawa se Awé mécegé cogo Jou ni dodoto né bo nfabebasé keé amé né?”

34 Bóngo Yesusé nécegé si faje, “Fatélolmo mew fafié é, ta Ya kécegé nte. Kyat pai le ta npe sélsólé, nó sélsól ta néi tfatailo dolo kyat ta npe yabé ndadi ni tuangé njé ni béyak i né. 35 Tfatailo dolo ade-ade nje: iga kyat faisó npe yabé po ni tuangé njé ni umé lo, i nase némnuw pa ntolén po ni tuangé njé ni umé lo né. Mayta iga tuangé ni ntu i, yomya ta njéi nase ngénngan néya i be pocé. 36 Se iga Jou Lahatala ni Ntu njé re nféyangésé keé nómi sélsólé né, necé fatuw-fatuw ta re fbebas óro, se re nómi sélsól pa na.

37 Sababta Ya kuné, mew ta ntei Abrahamé ni ntu re gbu mewé, mayta masike fajé ma, mewé féyówé yéféné bo fpuné keé Ya, sababta mewé wlomi pa bo ftarima Ya nik dodoto né. 38 Ya maduga kfasodoto mew be sói ta Ya re kduk po nik Moke njé ni né, ta Ya re I né, mayta mewé ga maduga funé be ta nimi moke nfasodoto mewé né le.”

39 Si ga récegé Yesus faje, “Amam moke njé maduga Abrahamé le.”

Yesusé ga nécegé si, “Iga fatuw ta mewé nte Abrahamé ni ntu re gbu mewé, mewé nase re fpe tadolo Abrahamé npe né. 40 Mayta sói ta mewé fpe né nfalcól re ta Abrahamé npe né, mewé ga féyówé yéféné bo fpuné keé Ya. Mayta Ya re kécego mew dodoto ta fatuwé né, ta Ya klongé po Jou Lahatala ni né. Mayta sói ta mewé fpe né, fdéréré pa ta Abrahame npe né. 41 Mayta ta mewé fpe né, fdéréré keé ta nimi moke npe né.”

Si ga rcónglo, “Ee, amé nte mam moke maduga isó le, I ta njéi, Jou Lahatala, reni ta nésé pa.”

42 Bóngo Yesusé nécego si nóté, “Iga Jou Lahatala njé mewé nimi Moke I, mewé nase fmésié Ya, sababta Ya nte kwóm yama Jou Lahatala ni, se nte Ya i pote. Ya kwómé nte kdéréré Ya wlegé nje pa, mayta Jou Lahatala ta nané Ya kwóm yama bo kpe ni yabé né. 43 Mayta mewé nte fdélé pa ta Ya re kécegé nte, sababta mewé wlomi pa bo ftarima Ya nik dodoto né. 44 Sababta mewé nimi moke njé, setané né riri kolano njé, se mewé wlomi ncuka fdéréré be nimi moke ta njei ni wlo njé. Setané né riri kolano ta njéi, tatubé lima lesu sogado nete né, nmafépuné. I nuné pa npe ta métegélé né, sababta ta po wlo wlólo né reni ta métegél pa. Waktu ta nmalólé né, ta i nécegé né ncópén yama ni wlo wlólo, sababta i ta njéi nmalólé, se i ta njéi ta rmalólé né riri moke i. 45 Mayta Ya nte kénfasodoto be ta métegélé né, mayta fdélé Ya pa. 46 Se po mew ni né, pai ta bisa nécegé Ya kénpe sélsól? Reni pa to? Iga Ya kéceg ta métegélé, pe sói se fdélé Ya pa? 47 Kyat pai ga ndéréré Jou Lahatala, mare nlongé fafié Jou ni dodoto né. Mayta mewé wlomi pa bo flongé Jou ni dodoto né, sababta mew ta néi, mew yama Jou Lahatala ni pa.”

Abrahamé ntub pafule Yesusé re I pocé

48 Agama Yahudi né riri kyat tut ta rpélóyé né, rfalélé keé Yesusé se réceg faje, “Ee Moke, ga fatuwé ta amé kécegé né, Awé nte kyat Israel Aw pa, mayta kyat Samaria ta setané re ncung Awé né.”

49 Bóngo Yesusé ncónglo si, “Ya nte setané ncung Ya pa. Ya khoromaté nik Moke njé, mayta mewé ga ffalélé keé Ya. 50 Ya kéyówé pa ta kyaté né bo rcuba re rtailé be Ya nik diri né. Mayta reni Esó nóté, Jou Lahatala bo nfapélóy re ntail Ya né, I ta njéi óro ta bo nadili keé kyat pai ta ncólé re kyat pai ta nmétegélé. 51 Se fatélolmo mew fafié ta Ya kécego mewé nte. Kyat pai le ta ndéréré Ya nik dodoto nte, kyat ta njéi nase nmót pana sogado fajé néli le.”

52 Pocé bóngo agama Yahudi né riri kyat tut ta rpélóyé nesté récegé Yesus faje, “Nete re fatuwé ro, Awé nte setané ncung Awé. Sababta Abrahamé i re nabi ta iglé né re rmóté ndimé, ga Awé mécegé cogo kyat pai ta ndéréré Anim dodoto né, kyat ta njéi nase nmót pa sogado fajé néli le. 53 Mfikir Awé nim kawasa né lebe pélóy po mam kyat tut tatubé lima se Abrahamé né? Sababta Abrahamé njé re nmóté, nabi ta iglé né ma re rmóté ndimé. Se Awé pai, sogado méceg fajé né?”

54 Yesusé ga ncónglo si faje, “Iga Ya bo kéyówé ta kyaté né rcuba re rtail i Ya, necé reni ngale gélesó pa. Mayta nik Moke ta ncuba re ntail Ya. Se I ta njéi óro ta mewé fécegé cogo fsuba I njé. 55 Mayta mewé dolo bo fféyal I pa, maduga Ya ta kféyal I. Iga Ya kécegé kféyal I pa, ni ngale né Ya kmalól tadolo mewé nóté. Mayta Ya ta kféyal I fié, bóngo re Ya kdéréré ndimé sói ta I nécegé né. 56 Mewé nimi kyat tut tatubé lima se Abrahamé njé, tadélé séngséngé bóto i, sababta nuné Jou Lahatala ni jaji ta nase bo némnaw ta Ya kwómé né. Se ta i nmót pafule né, i re némnaw ta Ya kwómé né, se tadélé séngséngé bóto i.”

57 Pocé, agama Yahudi né riri kyat tut ta rpélóyé nesté rlongé ta Yesusé néceg faje né, bóngo récegé I faje, “Moke, Awé nim umuré né nwómo i taun yófélim pafule. Pe sói se mécegé cogo re mémnaw Abrahamé?”

58 Yesusé ncónglo si, “Flongé fafié ta Ya kécego mewé nte. Waktu ta Abrahamé ntub pafule né, Ya ta ntei re Ya I pocé.”

59 Agama Yahudi né riri kyat tut ta rpélóyé nesté rlongé ta Yesusé néceg fajé né, tabóngo ryó lóyé se bo rté I, mayta si runé pa ta Yesusé re ncópén po Um Sambayang ta npélóyé njé ni se nfan I po géwgów nésé né.