Yesusé nfafié kyat isó ta nébyafé njé
9
Waktu ta Yesusé nénfané lesu, néga némnawé kyat isó njé nébyafé né nfatubo. 2 Se, Yesusé ni motemote nesté rutné I, “Guru, pe sói se kyat ta njéi ntubé né re nébyafé? I nébyafé né sababta nó sélsólé ro pari, ni déluté né ta róri sélsólé?”3 Bóngo Yesusé ncónglo si, “I nébyafé né, bukan ta bo i nó sélsólé né pa, pari ni déluté nesté róri sélsólé né pa, mayta fajé bo kyaté-kyaté né bisa runé ta Jou Lahatala ni kawasa ta ndadi i po ni hidupé wlólo né. 4 Jou Lahatala ta nané Ya kwómé njé, npo it yabé ta mare ité bo tpe né. Se ité mare tpe i ro yabé ta njéi, sababta nase reni waktu nóté ta kyaté né bisa rpe yabé pana. Necé bisa tfatailo dolo iga ngénngané lesu, kyaté né bisa rpe yabé lesu, mayta iga re dorémé, kyaté né bisa rpe yabé pana. 5 Se ta Ya I po dunia njé ni wlólo lesu né, Ya óro ta kfamanano kyaté né wlori po dunia wlólo nte né.”
6 Yesusé néceg fajé rewóré, tabóngo nitéf nóp po bétbété lo né, se ncapu keé re bétbét cuci sogado re ndadi gagétésé. Rewóré ta néi, ga nélulo gagétésé né po kyat ta nébyafé njé ni mtó lo né. 7 Bóngo nécegé i faje, “Mfané ro, bo mfalaef aw po wóé Siloamé njé ni.” (Siloamé né ni ngale, ‘Kyaté nané i nfané npe ni yabé.’) Kyaté njé nlongé ta Yesusé néceg fajé né, tabóngo nfané ga nfalaef i po wóé Siloamé njé ni. Se waktu ta bo néléy po ni umé lo né, re bisa némnawé.
8 Pocé tabóngo kyaté-kyat ta si po riri um lapo, re kyat ta runé i nanérór pipis po yéfén lapo né, rfalécego faje, “Kyat ta njéi pari ó ta ngénngan néya néror pipis po yéfén lapo lo né?”
9 Pocé reni kyat iglé ta réceg faje, “Fatuwé! Kyat ta njé i ro!”
Bóngo re ni kyat iglé nóté ta récegé, “Ta njé i pa. Nejé kyat nésé ta ni usno dolo i nóté.”
Mayta kyat ta nébyafé se re némnawé njé néceg faje, “Ta fémnaw i njé, ya óro.”
10 Pocé bóngo rutné i, “Fanfawa sogado mtamé né re bisa mémnawé?”
11 Kyaté njé ncónglo si, “Kyat ta ngósno Yesusé njé, nitéf po bétbété lo se ncapu re bétbété rewóré, ga nélulo po mtagé lo nte. Rewóré ga nané ya kfan po wóé Siloamé bo kfalaef ya pocé. Se kfané néli, kfalaef ya rewóré, tabóngo re bisa kémnawé.”
12 Pocé bóngo rutné i, “Se nte I pua kyaté njé?”
Kyaté njé ga ncónglo, “Ayo é, ya ma re kuné I pana.”
Kyaté-kyaté né rfakotale ta Yesusé nfafié kyat po ngénngan Sabaté né
13 Se kyaté né ruté keé kyat ta nébyafé se re némnawé njé néli po kyat Yahudi ta rdéréré dodoto Farisi né. 14 Waktu Yesusé nfafié kyat ta nébyafé njé né, mgo po ngénngan Sabaté, ngénngan ta kyat agama Yahudi né bisa rpe yabé pa. 15 Se kyaté-kyat ta rdéréré dodoto Farisi né rutné kyat ta re nfié njé faje, “Fanfawa sogado mtamé né re bisa mémnawé?”
Tabóngo i ncónglo si, “Reni kyat ta rélulo gégétés po mtagé lo. Rewóré ta néi, ga kfalaef ya, tamulo ga re bisa kémnawé né.”
16 Se kyat ta rdéréré dodoto Farisi né reni iglé réceg faje, “Kyat ta nfafié kyaté njé né, dolo bo kdélé pa Jou Lahatala ta nané I né, sababta I ndéréré pa agama ni aturan ta po ngénngan Sabaté né.”
Mayta kyat iglé né réceg faje, “Iga I kyat ta renó sélsólé félé, nase ncung akal pa bo npe mujizat ta dolo fajé né.” Pocé tabóngo si re si óro ta rfakotale né, tadélé rtébné pa.
17 Se rutné i nmulé kyat ta nébyafé se re nfié njé, “Aw ta ntéi ro to, ta kyaté njé re nfafié mtamé né? Se ta aw muné né, Kyat ta njé pai?”
Bóngo i ncónglo si, “I ta njéi, nabi ta nénfawómo Jou Lahatala ni faftóté po kyaté-kyaté njé.”
18 Mayta kyaté né tadélé rdélé pa le, ta kyat ta nébyafé njé re némnawé né. Se rkakémé ni moke re neke nesté, 19 bóngo rutné si, “Neje mewé ntumi i to? Mewé fécegé cogo ntub nétó né re nébyafé, mayta fanfawa sogado nete re bisa némnawé?”
20 Bóngo ni moke re neke nesté rcónglo si, “Fatuwé, neje amé ntumam i. Ta ntub nétó né re nébyafé. 21 Mayta fanfawa sogado nete re némnawé né, necé amé ma kuné pa, pai ta npe sogado re bisa némnawé né. Ta fié né, mew ta futné i ro, re npélóyé se bisa ncóngélé nkumélé.” 22 Ni déluté nesté réceg fajé né, sababta rémtat agama Yahudi né riri kyat tut ta rpélóyé nesté. Sababta, si re rfaréné ndimé, iga kyat pai ta nécegé fatuwé Yesusé njé Mesiasé, Kolano ta Jou Lahatala néjaji bo nfasalamaté kyaté njé, kyat ta njéi rpo i fié pa bo ncung po agama Yahudi né riri um sambayangé lo. 23 Se necé tamulo ga kyat ta nébyafé njé ni déluté nesté récegé, “Yomya njé re npélóyé, se mewé ta futné i ro.”
24 Bóngo rkakém i nmulé, kyat ta nébyafé mayta re nfié njé se récegé i faje, “Ee! Awé mare msasi po Jou Lahatala usno lo, ta awé bo mécegé nte fatuwé. Sababta, amé kuné Yesusé njé kyat ta renó sélsólé.”
25 Bóngo kyaté njé ncónglo si faje, “Kyat ta njéi renó sélsól pari tisé né, Ya kuné pa. Mayta ta ya kuné né, nganésó ya kébyafé, mayta nte re bisa kémnawé.”
26 Pocé rutné i nóté, “I npe aw fawa se sogado re bisa mémnawé né?”
27 Kyaté nje ncóngélé nóté, “Péséwé né, ya re kécegé, mayta mewé fdélé pa le. Pe sói se bo flongé nmulé? Nihalé mewé ma wlomi bo fdadi ni motemote mewé?”
28 Pocé ga rfakcegé i se réceg faje, “Ee, aw ta néi ta mdadi kyat ta njéi ni motemote awé, mayta amé nte kdadi Musa ni motemote amé. 29 Amé kuné, Jou Lahatala re nméitén po nabi Musa ni, sogado tduké ni kitab abén limé né po i ni, mayta iga Kyat ta njéi, amé kuné pa nwóm fawa lima.”
30 Bóngo kyat ta re nfié njé ncónglo si, “Dolo bo ksae mew pa. Ncung akal pa bo fécegé cogo funé pa né ta I nwóm fawa lima né, momongo I re nfafié keé mtagé nte, sogado re bisa kémnawé. 31 Ité re tuné, iga reni kyat ta lénglongo po Jou ni pa, bo kyat ta njéi masike nméiténé ndé Jou, Jou ma nase nlongé i pa. Sababta Jou maduga nlongé be kyat ta lénglongori fié po I ni, ta npe be Jou mgo wlo né. 32 Po faiwóbno né, Jou Lahatala ntulada dunia nje sogado ga nte, nuéncó pafule bo tlongé reni kyat ta rfafié kyat ta rtub nétó re rébyaf tadolo ya nte né. 33 Se iga Kyat ta nfafié ya njé ga I lima Jou Lahatala ni pa, kyat ta njé nase bisa npe gélesó pa!”
34 Bóngo kyaté né récegé kyat ta re nfié njé faje, “Ee, ga aw ta ntei, mtub nétó né re nam sélsólé ro, ga bo mfasodoto amé né?” Pocé tabóngo po waktu ta néi óro, wlori pa bo kyat ta nébyafé se re némnawé nje ncung po agama Yahudi né riri um sambayangé lo.
Yesusé nmésié kyat félé ta runé riri gélesó pa né
35 Yesusé nlongé ta kyat tut Yahudi né wlori pa, bo kyat ta nébyafé se re némnawé njé ncung po agama Yahudi né riri um sambayangé lo né. Bóngo Yesusé nfané nfapdipéné ndé i, se nécegé i faje, “Awé mdélé Kyaté Ntu ta I yama soroga njé?”
36 Kyat ta re némnawé njé ga nutné Yesusé nmulé, “Moke, I ta njé pai se? Coba mfébingo ya, bo ya bisa kdélé I.”
37 Bóngo Yesusé nécegé i faje, “Awé nte bukan ta bo maduga mémnaw I le pa, mayta nete ta re mméiténé mdé I nóté. Kyaté Ntu ta I yama soroga njé, Ya óro.”
38 Kyaté njé ga nécegé Yesusé nóté, “Jou, ya kdélé.” Tabóngo ntiki buku nópé se ncuba Yesusé.
39 Se Yesusé nécegé i faje, “Ya kwóm po dunia nte né, bo kfaftulo pai ta ndéréré Jou, re pai ta ndéréré Jou pa. Iga kyat ta rdéréré Jou pafule né, Ya bo kfaftulo si fafié bo rdéréré ta fatuwé né, kfatailo si né tadolo kyat ta rébyafé se rémnawé né. Mayta kyat ta récegé cogo re rdéréré Jou fié se re runé ndimé né, kfatailo si tadolo ta rémnaw fié mayta rdadi rébyafé.”
40 Pocé, reni kyat Yahudi ta rdéréré dodoto Farisi né séfis néli rlongé ta Yesusé néceg fajé né, bóngo récegé I faje, “Se iga bo Awé, amé nte ma kébyafé nóté?”
41 Yesusé ncónglo si, “Iga fécegé mewé ma fébyafé, necé nihalé funé pa fpe re fdéréré ta fatuwé né, se Jou Lahatala nfasólo mew pa. Mayta iga mewé fécegé cogo fpe re fdéréré ta fatuwé né ndimé, momongo fpe tadolo faje pa, se kfatailo né dolo fébyafé se Jou nase nhukumé mewé.”