Yohanes 10

Adeade tuang ta nfié njé i re ni domba-domba né

Yesusé nméiténé né npake adeade isó, ta ni glio né faje, “Ffatélolmo mew fafié ta Ya kécegé nte. Kyat pai ta ncung po domba né riri kandangé wlólo ga ndélo ngówén pa, mayta npaké ndé pagaré, kyat ta njéi nmafélewésé re nmafépuné. 2 Mayta kyat pai ta ncung po kandangé ni wlólo ga ndélo ngówéné, kyat ta njé i óro ta dorém re ngénngané néjaga ni domba né fafié. Kyat ta njéi ta récegé domba né riri wlón i. 3 Iga domba né riri wlóné njé bo ncung po ni domba né riri kandangé njé ni wlólo, kyat ta néjaga ngówéné njé nase népilo i ngówéné. Iga domba né riri wlóné njé nkakémé ni domba-domba né, ndéréré isó-isó ngósnori, bo ncópné si po kandangé lo né se. Domba-domba né nase rdéréré riri wlóné njé, sababta rféyalé ni gli njé. 4 Iga ni domba né férimé re rcópéné ga i nfané ntubé, ni domba-domba né nase rtaptubo po too lo sababta rféyalé ni gli njé. 5 Mayta iga kyat ta si riri wlón i pa ga nwómé, nase rdéréré i pa se rówés si, sababta rféyalé ni gli njé pa.”

6 Adeade ta njéi ta Yesusé néceg po kyat Yahudi ta rdéréré dodoto Farisi nesté ni, mayta rcae pa Yesusé ni maksut ta néceg fajé né.

7 Se, Yesusé néceg nuéncó nóté, “Ffatélolmo mew fafié, ta Ya kécegé nte. Ya óro ta bisa kfatailo dolo ngówén ta po domba né riri kandangé lo né. 8 Bóngo iga Ya kwóm pafule, ga férimé kyat ta rwómé rtubé né récegé cogo domba né riri wlón si, si ta néi tfatailo tadolo kyat ta rmalewésé né, re wlori ncuka rpun be kyaté. Mayta niké kyat ta rdélé Ya né, rlongé si pa, ta dolo domba-domba ta rlongé kyat ta rmalewésé né pa. 9 Ya nte ngówén Ya. Se kyat pai ta ndéréré Ya, i ta njé i nase nsalamaté. I bisa tfatailo dolo domba ta rcung re rcópén po riri kandangé lo né bo rduké róri mnómé. 10 Ta rmalewésé né ga rwómé né maduga bo rfalewésé, re bo rpuné kyaté bo rfakangélang keé riri hidupé né. Mayta Ya kwómé né bo kyaté né rduké riri hidup ta fié re birahi ta reni téptébno pa né.

11 Ya nte bisa tfatailo dolo domba né riri wlón ta nfié, se néjaga ni domba né fafié njé. Domba né riri wlón ta nfié njé masike ga nmóté, asal ta ni domba-domba né rsalamaté. 12 Mayta kyat ta domba né riri wlón i pa njé, i nase nduké nó pélpólésé bo néjaga domba-domba né. Domba-domba ta néi, i ni pa. Se iga yaw banga faisó nwómé bo nó domba-domba né, kyat ta néjaga si njé nase némtaté se nówésé nfatoléné keé domba-domba né se nai ta rfan si. 13 Kyaté njé nówésé, sababta npe yabé né maduga néyówé be pipisé le. Se re npeé si sói pa na domba-domba né.

14 Ya óro domba-domba né riri wlón ta kfié, se kéjaga nik domba né fié. Ya kféyalé nik domba né fié, se si ma rféyal Ya fié nóté. 15 Necé tadolo nik Moke njé nféyal Ya, se Ya ma kféyal I nóté. Se kfasadia Ya bo kmóté, asal ta nik domba-domba né bisa rsalamaté. 16 Mayta po Ya ni ma reni domba-domba ta nésé nóté, ta po kandangé njé ni wlólo né pa. Domba-domba ta néi, mare kut si nóté bo rlongé Ya niké gligé njé. Si ta néi, nase bo rdadi esó nóté re Ya nik domba-domba ta po kandangé njé ni wlólo né, se férimé domba né riri wlón maduga Ya le.

17 Ya nik Moke njé nmésié Ya, sababta Ya re kfasadia Ya bo kmóté, mayta nase kpangéné nmulé. 18 Reni kyat isó pa ta bisa nyó keé Ya nik hidupé njé, mayta Ya bo kpo nik hidupé nje kdéréré Ya wlegé njé. Ya renik kawasa ta kpo nik hidupé bo kmóté, re Ya ma renik kawasa nóté bo kyó nmulé. Sababta férimé parenta ta néi, Ya re ktarima po nik Moke njé ni.”

19 Kyaté-kyat agama Yahudi né rlongé ta Yesusé néceg fajé né, tabóngo si re si rfakotale. Riri dél ta félé né ga réceg faje, 20 “Fpe sói se flongé I? I ta njéi setané ncung I, se re nbabowé.”

21 Bóngo ta iglé né réceg faje, “Necé kyat ta setané ncung si né riri méitén pa, sababta iga setané ncung I, npe sói se npe sogado kyat ta rébyafé né bisa rémnawé?”

Agama Yahudi né riri kyat tut ta rpélóyé né rtarima Yesus pa

22 Re mnuw pa na, kyaté-kyat agama Yahudi né bo rpe riri ngénngan ta pélóyé bo rfatélolmo si po waktu ta rtabisé riri um Sambayang ta Npélóyé njé po Yerusalemé né. Waktu ta néi, musim babóbélé. 23 Se Yesusé nénfan po Um Sambayang ta npélóyé njé ni kintalé lo, po ni mabe esó ta kyaté né réceg Mabe Salomo. 24 Tabóngo, agama Yahudi né riri kyat tut ta rpélóyé né rfajól po Yesus ni, se réceg faje, “Guru, tadélé re mnuwé amé kéftóné Awé bo mfébingo amé, Awé nte pai. Iga fatuw ta Awé nte Mesiasé, Kolano ta Jou Lahatala néjaji bo nfasalamaté kyaté njé, mfébingo amé ro, ma mépiné le na.”

25 Se Yesusé nécegé si faje, “Ya re kfébingo mewé, mayta fdélé pa. Se Ya re kpe mujizat félé kpake nik Moke ni kawasa, necé óro ta re kfébingo mewé Ya nte pai. 26 Mayta mewé fdélé pa, sababta Ya niké kyaté mew pa, tadolo domba ta riri wlóné si pa né. 27 Sababta, Ya niké kyaté né iga rlongé gligé njé né rfayal Ya, se rdéréré Ya, tadolo domba ta rdéréré riri wlóné njé né. 28 Se Ya bo kpe sogado rhidup re Jou Lahatala sogado fajé néli le, se nase rmót si fajé le pa, bóngo reni kyat isó pa ta bisa nai si po faogé lo. 29 Ya nik Moke re npo kyaté-kyat ta néi po Ya ni, bo rdadi Ya niké kyat si. Nik Moke ni kawasa né lebe pélóy po kyat pai le. Se nase reni kyat isó pa ta bisa nyó si po nik Moke ni fao wlólo. 30 Ya re nik Moke njé esó le.”

31 Rlongé ta Yesusé néceg fajé né, kyaté-kyat Yahudi né ryó lóyé bo rtéo Yesusé nó bo rfamóté keé I. 32 Mayta Yesusé nécegé si faje, “Mewé re fémnaw mujizat félé ta Ya re kpe po mew ni, ta nik Moke njé nané Ya né. Se mujizat tai puai ta kpe né, sogado bo ftéo nak lóyé né?”

33 Tabóngo si rcónglo I, “Sogado amé bo kté Awé né bukan ta mpe ta fié né pa, mayta ta mfalélé Jou Lahatala ngósno né. Sababta Awé nte maduga kyat biasa Awé le, mayta mpe nim diri dolo Jou Lahatala.”

34 Tabóngo Yesusé nécego si nóté, “Ta po Musa ni kitab abén limé né, kitab ta mewé fdéréré né, pocé rlefo hakim-hakim rpe yabé né fafié sogado Jou Lahatala nécegé si faje, ‘Ya kécego mewé, mewé nte tadolo Jou óro’. 35 Amé ma kuné sói ta rléfo po Musa ni kitab abén limé né mare tdéréré, ndél pa bo tdéréré pa. Se iga fatuwé kyaté-kyat ta faiwobno ta rduk Jou Lahatala ni Méiténé né, Jou nécegé si né ma ‘lahatala’, 36 néga pe sói se masolo kéceg be Ya nte Jou Lahatala ni Ntu Ya ga ffasolo ya? Sababta, Jou Lahatala óro ta npili re nané Ya bo kwóm po dunia nte kpe ni yabé né. 37 Se iga ta nik Moke nané Ya né ga kpe pa, ma fdélé Ya na. 38 Mayta Ya nte kénpe be sói ta nik Moke nané Ya né. Se masike fdélé Ya pa ma, mare fdélé mujizat-mujizat ta Ya re kpe né. Iga fanfajé, mewé nase fsae ta fatuwé, ta Ya re nik Moke njé re kdadi esó né.”

39 Yesusé néceg fajé rewóré, tabóngo bo rgó Yesusé nóté, mayta bisa rgó I pa.

40 Tabóngo Yesusé nfan I po wóé Yordané ni féspalé nóté, po géwgów ta tatubé lima Yohanesé nénbaptisé kyaté lo né se ntolén I pocé. 41 Pocé reni kyat félé rwóm po Yesus ni, se rfalécego faje, “Yohanesé njé nuéncó pafule bo npe mujizaté, mayta ta néfétén Yesusé Mesias ta bo nwómé njé, fatuwé ta njé I ro.” 42 Tabóngo kyat félé ta si pocé né rdélé Yesusé.