Jesus naboñ kurebooraaku katawool kunŋen di egabaay
9
Nâmeb kurebooraaku katawool kaamom kunŋen di egabaay ban nawuliil sembaasu sahammi sata kumalaku di poop sata jabuunenaju jata ûjuutaw. 2 Naboñiil ki kuñaaŋen bukanaku di kaan Emitay êkine egawiil di kâyyaku kata yo, di kubuunen poop bukanaku kâjuutum. 3 Naaniil: “Na mbi jeen jikay, aatuba jiŋarnen wah wakeel: Aatuba jisoh huginkum, aatuba jiŋar humboota, palimo wah wata huri, palimo bancaam, palimo poop ûjupa ugaba. 4 Di eluupay da mbi jiwalen, di jilako dô be na mbi hukahu hûriiŋ ha mbi jîcaalh di hanka'uhu. 5 Be hânkijahu da mbi jinebej, kulatuul jaa, di jipey uŋenaw watawuul ma ga êmanjumay kaan ko kulatum.”6 Ña kurebooraaku katawool di kukay, ma ya kureesoor bâsukabu poobo, ma ya kuñaaŋen elobay yâsuumaay ya kubuunen bukanaku poop tiŋ peh.
Erodis koo di Joŋ Batista
7 Mata miñamu ma Jesus ya kugam koo di kurebooraaku katawool, bukanaku di kêenul Joŋ alhaalowulom di kuketaaku. Erodis najam, ña di lakuwool kôji. 8 Be bukaaku di kêenul Êliyas alallom, bukaaku poop di kêenul añaaŋenaaw ata elobay yata Emitay ata napiyaanu alhaalowulom di kuketaaku. 9 Erodis nâanul: “Înje ibommi ma kutij hûkowahu hata Joŋ, kama ûde aymoom a ijammi ma mulobeyiim di mo matawool?” Ña Erodis ya apaam maama mbi aga ma ajukool.
Jesus Nawul Buyooŋabu Kuri
10 Nagam kumakaaku kata Jesus kulaañulo, di kuñaaŋen peh ma kugalom. Ban, naŋariil ma âcaalh di buko be tiŋatu ta kuwaynoorum koo diyooniil takotum hânkijahu hata Betsayda. 11 Be êsukay di êmir, di esolhenool. Jesus nayaañuwiil, ban nañaaŋeniil di kaan Emitay êkine egawiil di kâyyaku kata yo. Nabuunen poop bukaaku kâkimmi kubuunen.
12 Na jaley areenemmi, kumakaaku katawool kunŋen di egaba, di kukay ki kûhugool ma keenool: “Oon êsukay ewaasoor be di kankaku di siluupasu sareekemmi ma nki kuwalen dô, ma keeli kubaj wahaw wata huri, mata ute ta oomaam ume tiwaynoore.” 13 Ña naaniil: “Miwuul jiwuliil kuri.” Be di keenool: “Ubajut wah wa mbi uwuliil. Kûmburuwaaku hutok di poop muwolamu mugaba keb nubaam. Mante pîya ukaayaal ki unoomulaal wahaw wata huri be batayiil?” 14 Mata yîinaay kalakotom keemom sînjunnaasu hutok. Ña naan kurebooraaku katawool: “Jigawiil kûmeboor, ma kuleeho taatu bukanaku egaba di kunŋen, utu poop bukanaku egaba di kunŋen.”
15 Mooma kugam poopiil ma kuleeho. 16 Jesus nasoh kûmburuwaa'uku hutokay, di muwolamu poop mugabaamu. Nalhag hatiya, ban naan Emitay jêrejep. Natii'ko, ban nawuu'ko kurebooraaku katawool ma nki kuwul êsukay. 17 Di kuri poopii di kupooñ, mata ma Jesus agakom kuga hucucuc. Ban kutijaku kata ko kaŋañunom di buko, di kumeeŋen sîkutasu kunŋen di sigaba.
Jesus Alimenta 5.000
Pedru nâyis mata Jesus
18 Huk haahu Jesus oo ma alhawem oo diyoonool, kurebooraaku katawool di kulako to d'oo. Narinkiil, ma aaniil: “Na mbi êsukay elob mûmbaam, ya kêenul înje aymoom?”
19 Di keenool: “Bukaaku ya kêenul aw Joŋ Batista alhaalowulom di kuketaaku, bukaaku ya kêenul aw Êliyas alallom, bukaaku ya kêenul poop aw ata di buñaaŋenaabu bata kûboñaku kata Emitay, kata napiyaanu alhaalowulom di kuketaaku.”
20 Narinkiil aaniil: “Miwuul ya jêenul, înje aymoom?” Pedru naanool: “Aw Kristu, Anaw a Emitay Yemmi mbi êboñul.”
21 Be nâlhusiil ma aaniil: “Aatuba mbi jiloburee'mo an akeel.”
Jesus nalob mata hûlaamahu di mata eketay yatawool
22 Naaniil: “Joone ma Añool Ajamaat, mbi âlaam meeŋ, yahaanay yata êsukay, di yahaanay yata bumaaŋenaabu bata Emitay, di bulhikitenaabu bata kûboñaku kata Emitay mbi kurembeelool, ban êsukay mbi kubujool, be di hukahu hûhaajutahu Emitay mbi elhaalellool di kuketaaku.”
Pedro Declara que Jesus é o Cristo
23 Ban naan êsukay: “An âkin jaa aga arebooraaw ûmbaam, mbi alatooro para, hukoohuk naraaj êkrusay yatawool ban nasoollhelom hukoohuk, yaamom ma aatuba aga wahaw wa âkimmi, ma amunten palimo poop ma aket, ban naga non înje. 24 Ma ilobuumom umu, anaw âanul jaa alatom ma aali ahikulooro, to ta aatuba mbi âbajum eroŋay yâbaworiit. Be non an âbuunooro jaa mata eroŋay yatawool hurim înje, ña oo mbi ahikuli, mbi abaj eroŋay yâbaworiit. 25 Ña kâsuumaay bu an aalim abaj, oo bapaamer husaanumahu pooho hata etaama'uye, ban abajut eroŋ yâbaworiit di Emitay? 26 Be an apuñuwom jaa, di elobay yûmbaam, Añool Ajamaat poop mbi puñuwool na mbi âriiŋul di majakaamu di majaaŋaamu matawool be di mata ampawool Emitay, be di mata kumalaakaku kata yo. 27 Malhegenumaayamu ma iñaaŋenuul: Baje ute d'ulaal bukanaku kaatumbi kuketurer be na mbi kujuk Emitay ega bukanaku di kâyyaku kata yo.”
Jesus nâyis majaaŋaamu matawool
28 Na aloom umu, deen di ga hîyaay hanor, naŋar Pedru koo di Joŋ di Tiyaagu, maaŋool di buko be di hurimbiliŋahu ma nki kulhaw. 29 Nagam oma alhawem di Emitay, haanaahu hata buulabu batawool di hutiinoor, wañaw watawool di ulaañ ûtumpaay peretet, poopii di uga wajwaj. 30 Kûynaaku egaba di kûgawuu'to belh, kaamom Moyses koo di Êliyas, ma ya kûcuuk di Jesus. 31 Di kûkayil di majaaŋaamu mata hatiya di emitay, ma ya kûcuuk mata eketay yatawool, ya mbi aket Jerusaleŋ ma aga non ma Emitay eboñumulloom. 32 Pedru koo di kupaalool koo ma kuŋotum. Na kutonkom, di kujuk majaaŋaamu matawool di kûynaa'uku egabaay kalakotom d'oo. 33 Kûynaa'uku na kugam ko kakayem, Pedru naan Jesus: “Alhikitenaawe, jake noon ma ulakowaal ute ma ucookooraal ûguŋaw ûhaaji: Kaaku katayi, kaaku be bata Moyses, kaaku be bata Êliyas.” Be anamulent maama alobem di mo.
34 Oo baroŋ ma alobem, kawiiñaku di kûnaageniil, na kugam kugaayeniil, ña di kûkoli. 35 Emitay di êlobumul di kawiiña'uku: “Ume aŋilaw ûmbaam a ijotum, jijam d'oo.” 36 Nagam hurima'uhu hupatuwe, di kujuk Jesus oo to diyoonool. Ña di kuka'uku di kupato, kulobut mo an akeel wahaw wa kujuunom.
A Transfiguração
Jabuunenaju jata aŋilaw a amalaw ya âlaamemmi
37 Hata kajom, di kûwalowul di hurimbiliŋahu. Ña buyooŋabu bata bukanaku di kukay ki kupam di Jesus. 38 Âynaaw to di buyooŋa'ubu, nâŋaŋuluwool ma aanool: “Alhikitenaawe, ubonket, oonenom di añoolom, mata omu kaŋ keb a ibaam. 39 Amalaw omu ma agawoom ya alo kagekaku, ma ya âruuren napawoor, ya acumpet, ban ya acokool. Amalaw umu ya âlaamenool meeŋ, ban âkinoriit awalhenool. 40 Kurebooraaku katayi niwaasiyenoorum ma kûcaalheneenool, be kuyetoorut.”
41 Jesus nâanul: “Miwuul bukanaku kâlhapitaaku kabajutum kâynen, mbi ilako di miwuul, ma imunten di miwuul be ûney? Uŋallom añooli be ute.” 42 Nagam nahuutool, amalaw natahool ma ya apawoor. Be Jesus nâlhus amalaw umu ma âcaalh, nabuunen aŋilaw umu ban nawulool ampawool. 43 Ña buko kaŋ poopiil kalakotom, di gawiil jamalaŋ mata sembaasu sata Emitay.
Mata ma buko poopiil kujaahalim mata wahaw wa Jesus ya agam, oo naan kurebooraaku katawool:
Jesus Cura Menino Possuído por Espírito Mau
44 “Jiga hurima'uhe di sîsigirasu satawuul, mata Añool Ajamaat mbi alo di uŋenaw wata bukanaku.” 45 Be kunamulent maama âkimmi alobiil, mata hurima'uhu hûhunenoore di buko. Ña di kûkoli karink Jesus maama âkimmi alobiil.
Ay mbi âgawum annahaanaw?
46 Kurebooraaku kata Jesus di kûcuk ma ya kuñoosoor mata anaw ata di buko a mbi âgawum annahaanaw atayiil. 47 Be Jesus nanamulen maama kunongoorem di mo, naŋar aŋilaw ajuumen to. 48 Ban naaniil: “Anaw ajeg jaa aŋila'ume mata kañaaŋaku kûmbaam, înje najegum. Anaw ajegommi, najege anaw abollommi. Moomu poop ma anaw âgawooruworiitum di miwuul, mbi aga annahaanaw atawuul.”
Anaw âmiyoorolaam
49 Joŋ naanool: “Alhikitenaawe, ûli nujuke âynaaw a ya âcaalhemmi kumalaku di bukanaku di kañaaŋaku katayi, be noonool aatuba aga mo, mata oo ntuwa ata di kaasaaku katoolaal.” 50 Be Jesus naaniil: “Aatuba jêenul see, mata anaw alatutuum di jîmir kaan omu ma âmiyoruum.”
Bukanaku kata Samariya kuyaañowut Jesus
51 Nagam Jesus nahuute ma akay be hatiya di emitay, ña nâtiken buynumabu batawool ma akay be Jerusaleŋ. 52 Naboñ kaaku ma kuyabool kayooŋ. Na kukayum, di kunebej di jîsukaju jata bantaabu bata Samariya ma kucookoorool tiŋatu tata jahepulenaju. 53 Be bukanaku kata jîsuka'uju kuyaañowtool, mata ma kûmiim kaan oo ma areesem be Jerusaleŋ. 54 Na kurebooraaku katawool Tiyaagu koo di Joŋ kujuum bagawera'ubu di kurinkool: “Ata Emit, nûkine ma ûli ûgawul sambunasu sata hatiya ma sîkayil bi sireemeniil, non ma añaaŋenaaw Êliyas agam?”
55 Be Jesus nâtiiwowul ma ajikeriil ban nâlhusiil [ma aaniil: Kama miwuul jîmirut buynumabu bammi di miwuul?] 56 [Mata Añool Ajamaat akayloot bi âbuy ejamaatay, be âkayil bi agawiil kuroŋ.] Ña ban di kukay be di jîsuk jaaju.
Hûlaamahu hata jarebooraju jata di Jesus
57 Ko ma kureesem di buruŋabu, âynaaw nakay aanool: “Ata Emit, tiŋootiŋ ta ureesem be, înje mbi isollheni.” 58 Jesus naanool: “Sîtimbaanasu sibaje usunaw wata so, basuwaabu bubaje wûulumaw wata bo, be Añool Ajamaat abajut tiŋ ta mbi aŋot ma ahepulen.”
59 Naan âynaaw aahu: “Ûkayil ma ukaya.” Be oo naanool: “Ata Emit, uwalhom bo para, ma ikay be na mbi ihok ampawom.” 60 Jesus naanool: “Uwaa'bo bukanaku kakeem ma kuhok bukaniil kakeem. Be aw ukay ki uñaaŋen di kaan Emitay êkine egawuul di kâyyaku kata yo.”