9
Ban Naaniil joon: “Malhegen neenuul, bukan kaaku kammi ute ketubi kuket koo bajukut na mbi kâyyaku kata Emitay kûriiŋul di sembaasu.”Haanaahu hata Jesus di hutiinoor
2 Na kukaku kârimmi hutok di hanor kugam kubawe, Jesus naŋar keb Pedru, di Tiyaagu, di Joŋ ma kukay be hatiya di hurimbiliŋahu. Na kugam koku dô, di kujuk haanaahu hata Jesus ma hutiinoorum; 3 bulhiimaabu batawool di bulaañ bûtumpaay peretet poopii ya buga wuj wuj, palimo ute di etaamay, bajut akullhena ata wañ aalim akullhen mo wañ. 4 Ña Êliyas di Moyses di kûgawuu'to weh, ban ya kûcuuk di Jesus. 5 Ña Pedru naan Jesus: “Alhikitenaawe, jake noon ma ulakuwaal ute! Ma ucookooraal ûguŋaw ûhaaji: Kaaku katayi, kaaku kata Moyses, kaaku kata Êliyas.” 6 Malhegen Pedru anamulent maama mbi alob, mata buko poopiil kuwolowolonom noon.
7 Ña kawiiñaku di kûkayil ki kugaayeniil. Di kawiiña'uku hurimahu di hûcaalhumuu'dô hêenul: “Ume añoolom a iboolaatum, jijam d'oo.” 8 Kurebooraaku katawool di kujegoor, di kujuu'to keb Jesus.
9 Na kugam koo kâwaluwewuum di hurimbiliŋa'uhu, Jesus naaniil aatuba nki kuloo'mo an miñamu ma kujukulom ii be na mbi Añool Ajamaat âlhaalowul di kuketaaku. 10 Ña di kuyab hurima'uhu, be ya kurinkoor mata miñamu ma alobiim maamom jalhaaluwaaju jata di kuketaaku. 11 Ña di kurink Jesus keenool: “Kama mata wa ma bulhikitenaabu bata kûboñaku kata Emitay, keenem Êliyas oo mbi asing âkayil para.” 12 Ña Jesus nalaañeniil aaniil: “Malhegen Êliyas mbi asing âkayil bi acookoor para. Kama mata wa ma Baŋiicerabu Bâñoyyaabu bata Emitay bemmi Añool Ajamaat mbi âlaam noon, ban mbi kulatool? 13 Be eenuul, Êliyas nakaylo ban, be bukanaku di kûgaykoorool non ma kûkimmi, ma meeli muga non ma elobay yata Emitay eloom matawool.”
Jesus nabuunen aŋilaw a amalaw âjupom
14 Na kugam kuhuute ta kurebooraaku kaaku katawool kemmi, ña di kujuk buyooŋabu bata bukanaku ma buŋoomeniim, bulhikitenaabu bata kûboñaku kata Emitay koo ma kuñoosoorem di buko. 15 Be na buyooŋa'ubu bata bukanaku kujuum Jesus, buko poopiil di kujaahali, ña di kûteyil ki kujaalhenool. 16 Be Jesus narink kurebooraaku katawool aaniil: “Kama waywoom wa jemmi ma jiñoosoorem di buko?” 17 Âynaaw aahu âlakodom di buyooŋa'ubu nallool: “Alhikitenaawe, înje iŋallim añoolom a amalaw ammi ma âjupom ma agawool âloboriit. 18 Tiŋ kaŋ peh ta amalaw umu alhaalawloom, natahool di etaam ma agawool ya acumpet, ya arum ûŋiiŋaw. Ban hukoohuk eniilay yatawool, ya ebawo. Moo, kurebooraaku katayi nemmi kûcaalhenom amalaw umu, be kuyetoorut.”
19 Be Jesus naaniil: “Miwuul bukanaku kabajutum kâynen! Kama mbi ilako ute di miwuul be ûney? Mbi imunten di miwuul be ûney? Jiŋallommool be ute.” 20 Na kugam kukaye d'oo, amalaw najuk Jesus, ña nâlhalhangen ajaajuwaw umu di sembe, nalo di etaam ban yâkikiloor ma ya acumpet. 21 Jesus narink ampawool aanool: “Kama ûney na añooli agam ume?” Ampaw aŋilaw umu naanool: “Nagam ume oo baroŋ di aŋil. 22 Niŋ nameeŋe, amalaw umu ya âkin abujool ma ya atahool di sambunasu, di poop mumelamu. Be ooli jaa, uñankiitoli ma ôonenoli!” 23 Jesus naanool: “Noone eeli jaa neeneni? Miñ kaŋ peh meeliye mugayi be bata anaw âynemmi Emitay.” 24 Ña ampaw ajaajuwaw umu nâŋaaŋulo âanul: “Nîynene! Be oonenom ma kâynenaku kûmbaam kuhaŋ to.”
25 Na Jesus ajuum êsukay ma êkayewuum eŋoomenool, ña nâlhus amalaw umu ma aanool: “Amalaye aw jagawoom âjamoriit, âloboriit poop, înje eenem d'aw ûcaalh d'oo, ban aatuba mbi ûjupureruwool joon.” 26 Ña amalaw umu nâŋaaŋulo, ban nâlhalhangen ajaajuwaw umu ban nâcaalh, ña ajaajuwaw umu naga non omu ma akeem. Bukan kameeŋe di kêenul nakete. 27 Be Jesus nasoh kaŋenaku katawool ma aanenool alhaalo.
28 Na kugam kunebeje di eluupay, kurebooraaku kata Jesus di kurinkool buko diyooniil keenool: “Kama mata wa ma ûli ôoliitummi ûcaalhen amalaw di ajaajuwaw umu?” 29 Be Jesus naaniil: “Amal agam non ume, ya âcaalhenumi keb di kalhawaku kata Emitay [di bawoorabu].”
Jesus nalob joon mata eketay yatawool
Mat 17:22-23; Luk 9:43b-45
30 Ban Jesus koo di kurebooraaku katawool di kûcaa'to. Koo ma kukayem, di kuyab di êsukay yata Gâlileeya, be âkint an âmii'mo. 31 Mata oo ma alhikitenem di kurebooraaku katawool ma ya aaniil: “Añool Ajamaat, mbi kuŋarool kuwul bukanaku ma kubujool; be na mbi ga kukaku kûhaaji, mbi âlhaalowul di kuketaaku.” 32 Be buko kunamulent miñamu ma Jesus ya alobiim, be di kûkoli karinkool.
Ay mbi ga Annahaanaw
33 Ña Jesus di kurebooraaku katawool di kûriiŋ Kâpharnawuŋ. Na kugam koku di eluupay, Jesus narinkiil aaniil: “Kama waywoom wa ya jiñoosorlom di buruŋabu?” 34 Be buko poopiil di kupato, mata na kugam koo ma kukayem ya kûñoosor mata anaw di buko a mbi âgawum annahaanaw. 35 Na Jesus agam naleehuwe, nâwooliil ban naaniil: “Anaw âkimmi aga annahaanaw ata kupaalool, mbi alaañ para aga anaw âyoolim di êsukay peh, ban naga agorooraaw atayiil.”
36 Ban Jesus naŋar aŋilaw aga tutaru tatayiil, ban nalhomool, ban naaniil: 37 “Anaw agam arebooraaw ûmbaam ban nacookoor aŋil non ume mata înje, înje nacookoorum. Anaw acookoorommi, ntuwa înje nacookoorum, be anaw abollommi nacookoorum.”
Anaw alatutolaam, omu d'ulaal
38 Ban Joŋ naan Jesus: “Alhikitenaawe, ûli nujuke âynaaw aahu a ya âcaalhemmi kumalaku kâjupom bukanaku di kañaaŋaku katayi, be noonool aatuba aga mo, mata agawut an ata di kaasaaku katoolaal.” 39 Be Jesus naaniil: “Aatuba jeenool see, mata mumulet bi an aga miñ mata sembaasu sata Emitay di kañaaŋaku kûmbaam, ban nalaañ âlobikoorom. 40 Moo, an alatutolaam, omu d'ulaal. 41 Malhegen an awuluul jaa jikoopa jata mumel, mata ma jigam bukanaku kûmbaam, malhegen mumulet bayabut bugalabu batawool.”
Jakut ma an alo di hûbajumiñ
42 Ban Jesus naaniil joon: “An akeel aga jaa buke kagam kinŋet kâynemmi ma kulo di kûbajumiñ, haŋ majak ma anaw umu akoki huwaaliisahu hâamak di elhekejay ban na abeti di hulhuwahu. 43-44 Mata ga jaa non kaŋenaku katayi mbi kugawi ulo di hûbajumiñ, utii'ko. Mata haŋ majak ma ubaj eroŋ yâbaworiitaay di kaŋen kanor, ka mbi uraaci di sambun sâbaworiit aw tuumayi. 45-46 Ga jaa poop non, kâkandumaku katayi mbi kugawi ulo di hûbajumiñ, utii'ko. Mata haŋ majak ma ubaj eroŋ yâbaworiit di kâkandum kanor, ka mbi uraaci di sambun sâbaworiit aw tuumayi. 47 Be ga jaa poop non ñîkilañu ñatayi mbi ñigawi ulo di hûbajumiñ, ûkooluu'ño. Mata haŋ majak ma ubaj eroŋ yâbaworiit di êkil yanor, ka mbi uraaci di sambun sâbaworiit aw tuumayi, 48 dô ûmiim kaan balhaabu bata dô bûketeriit, sambunasu poop sîhokuweriit. 49 Mata anoowan, mbi asisumi sambunasu. 50 Malhegen musis najake, be mulaañ jaa muga balalal, an naaliye aga mo mulaañ muhir? Musisamu momu di miwuul, moo jake ma jibaj kâsuumaay di kupaaluul.”