Jesus nalob mata kûbajumiñaku
17
Jesus naan kurebooraaku katawool: “Baje bukanaku ka mbi kuga aahu alo di hûbajumiñahu, be bukana'uku kûgunuwe. 2 Bukana'uku ka mbi kuga kaaku kâynemmi d'înje kulo di hûbajumiñahu, haŋ majak ma kukoki huwaaliisahu hâamak di silhekejasu ban di kubeti di hulhuwahu. 3 Jijaamo di kûkuwaku katawuul. Atiyi atilimben jaa d'aw, nûlhusool; awatatenooro jaa, nubonketool. 4 Be atilimben jaa d'aw hutok di ñagaba di hukahu hanorahu, ban nâkayil aani poop nawatatenooruwe, nubonketool.”
Desafortunados Aqueles que Fazem com que Outros Pequem
Jesus nalob mata kâynenaku
5 Kumakaaku katawool di keenool: “Ata Emit, ûgawoli ma kâynenaku kâtooli kuhaŋ mâtik.” 6 Naaniil: “Palimo kâynenaku ka jibaam, kuga jaa kinŋet non ekool yinŋet non yata mustarda, jeeliye jêenul buyaaja'ube: Uroocooro, ma ukay ugiit di hulhuwahu. Di buga mo kaŋ non ma jiloobom.”
Agorooraaw alhegenumaayaw
7 Jesus naaniil: “Aymoom ata di miwuul abaam amiikeelaw awañewoom, be mante acookoorewoom uncaamaw. Na mbi âatul butat, mbi aanool pîya: Uleeho ma uri? 8 Be mbi aanool: Ûlew, ban nulhimo, ban nugabulom ma iri, ban nuwulom ma isiben. Ña, ban nukay ki uri, ban nusiben. 9 Be mante mbi usal amiikeelaw umu atayi mata ma agoroorim? Nîynene di kaan, ootubi usalool! 10 Moomu poop kaŋ di miwuul na mbi jiga bugoroorabu poobo ba Emitay yeenuum jiga, di jêenul: Ûli kumiikeelaku kaatumbi kusali, mata ûli ma ugam keb wahaw wa êboñolim uga.”
Kûynaaku ka Jesus abuunemmi
11 Jesus ña najaŋen ma akay be Jerusaleŋ, nayab di bantaabu bata Samariya di poop bata Gâlileeya. 12 Nagam nanebeje di jîsukaju, yîinaay keemo kunŋen kâjuutum kâjuutaku kata êtoogoonay di kûkayil ki kupam d'oo, ña di kujuum râagi. 13 Ban di kûŋaaŋulo ma kêenul: “Jesus alhikitenaawe, uñankiitoli!”
14 Nagam najukiil, naaniil: “Jikay ki jîyis siniilasu satawuul bumaaŋenaabu bata Emitay.”
Na kugam kokareesem be bo, di kûju di buruŋabu. 15 Ña aahu ata di buko agam ata Samariya, na ajuum di kaan nâjuwe, nalaañ be baabu di Jesus, ma asal Emitay ma ya âŋaaŋulo lhînŋa. 16 Nâtiigen di ûkandumaw wata Jesus, ma aanool jêrejep.
17 Jesus naanool: “Yîinaay keemom kunŋen kabuunenim, kama hutok di ebakiiray kôokey? 18 Bajut akeel ata di buko alallom ma asal Emitay, ña ume agam amaasooraaw alallom keb?” 19 Naan âynaaw umu: “Ulhaalo ma ukay! Ma ûjum mata ma ûynemmi d'înje.”
Kâyyaku kata Emitay mbi kûkayil wûb
20 Haahu phârisewwi di kukay ki kurink Jesus ma keenool: “Be ûney na mbi kâyyaku kata Emitay kûriiŋul?” Jesus naaniil: “Kâyyaku kata Emitay keetubi kûkayil non wahaw wa jeelim jijuk. 21 Anaw aatubi âanul: Jijaa kooke, be mante konka! Mata kâyyaku kata Emitay koku utu di miwuul.” 22 Naan kurebooraaku katawool: “Hukahu mbi hûriiŋ na mbi jîkin non moo di jijuk Añool Ajamaat palimo hukahu hanor, be jeetubi jeeli jijukool. 23 Bukanaku mbi kêenul: ‘Oome’, be mante: ‘Omma.’ Aatuba jîyneniil, aatuba jireboor di buko poop. 24 Mata non ma kararanjuunaku kuhikitenem hatiya di emitay di jaaŋ kaŋ peh, moomu poop kaŋ ma mbi ga na mbi Añool Ajamaat âkayil. 25 Be kâtiyaar mbi âlaam lhînŋa, bukanaku kata maame mbi kulatool. 26 Non ma bukanaku kugam nownu nata kukaku kata Nowe, moomu poop ma mbi nokoor hukahu ha Añool Ajamaat mbi âlaañul. 27 Bukanaku ya kuri no, di kujaken, di kuyaboor be kaŋ hukahu ha Nowe aleeŋom di ebaarukay yâmakaay. Emitay di êlubul poopii, di ehoojen etaamay be kaŋ na bukanaku kaŋ poopiil kukeem, ma kuŋañuno keb kaaku kalakom di ebaarukay. 28 Moomu poop kaŋ manoramu ma bukanaku ya kuganom na âynaaw aaneyim Loo alakotom. Ya kuri no, di kujaken, ya kûnoomul, di kunoom, di kurok, di kuteep siluupasu, poopii di kûwagen. 29 Be kaŋ hukahu ha Loo âcaam di hânkijahu hata Sodooma da alakuwemmi. Emitay di êtahul sambunasu sata wahaw waaneyim ensoophri ma êbuyiil peh, be Loo koo di bukanool keb kumelhum. 30 Mooma mbi nokoor na mbi Añool Ajamaat âlaañul.
31 “Huka'uhu anaw ammi hatiya di eluupay ban nabaj wah wakeel dâada di eluupay, aatuba aan anebej ma âŋarul wo. Moomu poop kaŋ anaw ammi di butat, aatuba âlaañul be yanŋool. 32 Jiwolho maama apañoor Loo agam. 33 Anaw âkintum âbuunooro mata înje, mbi anep. Anaw âbuunoorom mata înje, mbi abaj eroŋ. 34 Ma ilobuul di kaan, di huka'uhu, mbi egaba kuŋot tanor di elalay, aahu naŋari, aahu nawali to. 35 Yaaraay egaba mbi kutamp, anor naŋari, aahu nawali to. [ 36 Yîinaay egaba butat, anor naŋari, aahu nawali to.]”
37 Kurebooraaku katawool di kurinkool: “Ata Emit, ûtey ta mbi bi ûgawum mo?” Naaniil: “Ta wahaw ukeem too ta kuringaaku kûmeboorem.”