ELOBAY YÂSUUMAAY YATA JESUS KRISTU YA
JOŊ
AŊIICUM
Hûcukumahu hata êliibra'uye
Êliibra'uye amakaaw ata Jesus agam ambaalaaw aaneyim Joŋ a Jesus âkimmi noon, aŋiicuyom, oo ma ahallemmi ban, deeli ga na ujaañaw ûrimmi bukanaku ebakiir di kunŋen (90), Kristu oo ma abajim ban. Kaytaku kata Matews, di kata Markus, di kata Lukas uhaŋ ma naamoor, be kata Joŋ kûbutiye di wo. Di kapitulu yagasom hutok di yanor (6), di êyis maama Jesus âgiiterum wahaw wata huriyahu be bata bukanaku lhay, di poop maama areesum di mumelamu, wahaw uwe keb wowaŋiicim di uytaw uwu ubakiiraw. Miñ maamu mata sembaasu sata Emitay ma Jesus agam maŋiicim ûde, mulet di uyit waawu. Di êliibra'uye, Joŋ nahaŋ mañaaŋen mata wahaw wa Jesus aloom, haŋ waawu wa agam. Nañaaŋen poop lâh mata Jesus, nâyis kaan oo Hûmburuwaahu haroŋenem ajamaat, naga Anaw akiim mumelamu maroŋenem, naga ehikitenumay yata etaamay peh, naga âtekenaaw ajakum, naga buyaajabu baaneyim ûuba, naga Buruŋabu, di malhegenumaayamu, di poop jalhaalaaju jata di kuketaaku, aamom ammi: “Înje Igam Anaw a Igam” (Joŋ 8:58). Joŋ nañaaŋenolaal poop di kapitulu 20:31 di kaan, oo aŋiicum wahaw uwe ma mbi ooliyaal ûynenaal kaan Jesus oo agam Mesiyas, aamom Añool Emitay, ma mbi ûynenaalool nubajaal eroŋay mata kañaaŋaku katawool.