ELOBAY YÂSUUMAAY YATA JESUS KRISTU YA
JOŊ
AŊIICUM
Hurimahu hata Emitay
1
Noo di hûcukumahu bala etaamay êwweni, Hurimahu hoo too ban di Emitay kata kaŋ niŋanu, ban hoo hugam Emitay. 2 Malhegen noo di hûcukumahu, Hurima'uhu hoo too ban di Emitay. 3 Mata hoo ha Emitay êwwenummi wahaw peh. Bajut wah wa Emitay êwwemmi, wâwuwentumim Hurima'uhu. 4 Hurima'uhu hohakiim wahaw peh di uroŋ, mata hoo hugam ehikitenumay yata ejamaatay. 5 Ehikitenuma'uyu di ehikiten emuucenay, di ehaat emuucenay.
6 Malhegen âynaaw a Emitay ebollom aaneyim Joŋ; 7 âynaaw umu, âkayil bi añaaŋen bukanaku mata ehikitenuma'uyu, ma keeli bi kujamool di kûynen. 8 Be oo agawut ehikitenum, be âkayil ma añaaŋen bukanaku mata ehikitenuma'uyu. 9 Hurima'uhu, hoo hugam ehikitenumay yalhegenumaayay, yakaylom be ube di etaamay bi ehikiten bukanaku peh kândom. 10 Hurima'uhu hêemiyaaliye di etaamay, mata hoo ha Emitay êwwenunyom. Be ejamaatay kammi di etaamay kûmirut ho. 11 Mata na hukaylom di êsukay yata yo, bukanaku kata dô di kulat ho. 12 Be bukanaku peh kaanoom aawo, ban di kûynenool, nawuliil buruŋ ma kuga kuŋilaku kata Emitay. 13 Be ntuwa yoo ebajiim non ma ajamaat abajem an, ban ntuwa poop di hunongoor ajamaat, be Emitay egawiim ma kuga kuñool yo.
14 Hurima'uhu hoo hulammi huga ajamaataw, ma akin ta oomaam. Ma ujukaal majaaŋaamu matawool, maamom mata Aŋilaw anoraw ata Emitay. Ban naan huc kañankiitaku kata Emitay, di poop malhegenumaayamu.
Joŋ Batista nalob mata Jesus
15 Mata Joŋ Batista moo naloom mata Jesus ma âŋaaŋulo âanul: “Anaw oome a iñaaŋenuum matawool, a eenuum mbi asoolhellom ahaŋommi sembe. Mata bala înje een ibaji, oo bâamiyaaliye to ban kata kaŋ niŋanu.” 16 Ulaal kaŋ peh matawool nubajumaam hûpiiraahu haatumbi hubawurer. 17 Mata kûboñaku kata Emitay, di Moyses kukaymulom; be Kañankiitaku, di malhegenumaayamu, di Jesus Kristu mukayumulom. 18 An ajukorut Emitay, be nujukaale Añool yo anoraw ammi tanor di yo, omagawolaam ûmiraa'yo.
19 Mata na yahaanay yata jûdewwi kata Jerusaleŋ kubommi bumaaŋenaabu bata Emitay, di bukanaku kata di êbajoorumay yata Levi ma nki kurink Joŋ Batista, di kûriiŋ di keenool: “Kama aw aymoom?” 20 Joŋ Batista âñooroortiil, be nasallheniil ma aaniil: “Înje ntuwa Kristu.” 21 Di keenool: “Kama aw aymoom? Aw pîya Êliyas?” Be Joŋ Batista naaniil: “Iyiy! Înje ntuwa Êliyas!” Di keenool joon: “Kama aw pîya añaaŋenaaw ata kûboñaku kata Emitay akobeyim d'oo?” Naaniil: “Iyiy, înje ntuwa oo!” 22 Ña di keenool: “Kama ûñaaŋenoli anaw a aw ugam, ma nki ooli uñaaŋen bukanaku kâbollolim baabu d'aw.” 23 Ña Joŋ Batista naaniil:
“Înje hurimahu hâŋaaŋuluwem di ekinkay:
‘Jilheben buruŋabu be bata Ata Emit,’ ”
non ma añaaŋenaaw aaneyim Isayiyas aloom.
24 Bukana'uku kabollim be baabu Joŋ Batista kata di kaasaaku kata phârisewwi, 25 ña di keenool: “Kama ga jaa non aw ntuwa Kristu, ugawut Êliyas, ugawut poop añaaŋenaaw ata kûboñaku kata Emitay, moo mata wa ma ubatiisumem di bukanaku?” 26 Ña naaniil: “Malhegen înje ya îbatiisum mumelamu, be aahu omu utu di miwuul a jîmirutum, 27 a mbi asoolhellom, ban înje igawut anaw ajoone ma ihelh uneewaw wata sikatabasu satawool.”
28 Be wahaw uwu di êsukay yata Betaaniya ugawim di kareb kaaku kata kaalaku kata Jordoŋ, baamom ba Joŋ Batista ya âbatisum bukanaku.
29 Kûriiŋ hata kajom, Joŋ Batista nâjukul Jesus oo ma âreesewuum be baabu d'oo, ña naan êsukay: “Jijaa, êgaraniinaay yooye yata Emitay yapasem kûbajumiñaku kata bukanaku kammi di etaamay. 30 Âynaaw oome a ilobuum matawool eenuul, ômasoolhenewuum d'înje âamiyaalitom kata kaŋ niŋanu, mata bala înje een îwu, oo too ban. 31 Înje îmirentool, be înje îkayil bi îbatiis bukanaku di mumelamu, ma mbi êsukay yata Israyel keeli kûmirool.” 32 Ban naaniil joon: “Nijuke Buynum Bunapaabu ma buwalowulom banaamoorum non êpaakiit ki bulen d'oo. 33 Malhegen înje îmirentool, be Emitay ebollommi ma îbatiis bukanaku di mumelamu, ban di yeenom: Anaw a mbi ujuk a Buynum Bunapaabu bulemmi d'oo, noon oo ma mbi âbatis bukanaku di Buynum Bunapaabu. 34 Momakiimom na ijukoom, nîmir kaan oo ma agam Añool Emitay.”
Kumakaaku kûtiyaaraku kata Jesus
35 Ban kûriiŋ hata kajom, Joŋ Batista nalaañ be ta alakuwemmi koo di kurebooraaku kaaku katawool egaba, 36 be na ajuum Jesus oo ma ahulhem, nâanul: “Jijaa, Êgaraniinaay yooye yata Emitay!” 37 Be na kurebooraaku katawool egabaay kujammi ma aloom umu, ña di kusoolhen Jesus. 38 Be na Jesus agalom lhis, najuk kurebooraa'uku kata Joŋ Batista ma kûsoolhenewuum d'oo, ña narinkiil aaniil: “Kama aymoom a jipaamem d'oo?” Di keenool: “Rabia” daamom alhikitenaaw, “kama ûtay nommi?” 39 Jesus naaniil: “Jîkayil ma ukaayaal ma nki jîmir ta emmi!” Ña di kukay ki kûmii'to. Be na kûrimbom, jaley oo ma ahepum ban; ña di kulako to huka'uhu be na tijommi.
40 Di kûynaa'uku egabaay kajammi ma Joŋ aloom di kusoolhen Jesus, aahu naaneyim Andre aamom atii Simoŋ Pedru. 41 Be na agam nalallo, nasing akay ki añaaŋen atiyool Simoŋ, âriiŋ naanool: “Simoŋ ûli nujuke jaat Mesiyas,” daamom Kristu. 42 Ban naŋar atiyool Simoŋ be baabu Jesus, âriiŋ Jesus najikerool, ban naanool: “Aw ugam Simoŋ, jaamom añool Joŋ; mbi ôomi maame Sephas,” daamom Pedru.
Jesus nâwool Philiipi koo di Natanayel ma kuga kurebooraaku katawool
43 Ban nagam jaley natitijene Jesus nakay be Gâlileeya, ña najuk âynaaw aaneyim Philiipi naanool: “Philiipi bila ma ukaya!” 44 Be Philiipi oo ata di êsukay yata Betsayda baamom ba Andre, koo di Pedru kuwoom. 45 Ña Philiipi najuk Natanayel, nakay ki aanool: “Natanayel, ûli nujuke anaw a Moyses aŋiicum di kaytaku kata kûboñaku kata Emitay matawool; buñaaŋenaabu bata kûboñaku kata Emitay, di kuŋiic poop matawool, aamom Jesus ata Nasare, añool Jose.” 46 Ña Natanayel narinkool aanool: “Kama wah wajake pîya weeliye ûcaalhumul Nasare?” Be Philiipi naanool: “Bila ma nki ujuk.”
47 Na Jesus ajuum Natanayel oo ma âreesewuum, naanool: “Âynaaw oome ata Israyel alhegenumaayaw âhooloruworiitum.” 48 Natanayel narinkool aanool: “Kama ûtey nûmirommi?” Be Jesus naanool: “Bala Philiipi âwooluli, înje bajukeri ban ta uleehom di phigeera.” 49 Ña Natanayel naanool: “Rabi, aw Añool Emitay! Aw âyyaw ata Israyel!” 50 Ña Jesus naanool: “Nkit nûynene mata ma eenim nijuki ta uleehom di phigeera? Ukob, mbi ujuk wah waawu wahammi uwe!” 51 Ban naaniil: “Ma iñaaŋenuul malhegen eenuul, mbi jijuk hatiya di emitay ma bâbulom ma kumalaakaku kata Emitay ya kûwalowul, di kuŋool hatiya di Añool Ajamaat.”