Bûyababu bagawim Kanaaŋ
2
Ban nagam kukaku kûhaaji, bûyababu di bugawi di jîsukaju jata Kanaaŋ di bantaabu bata Gâlileeya. Iñaaw Jesus oo too. 2 Jesus poop koo di kurebooraaku katawool kûwooliwoolim be bûyaba'ubu. 3 Be na bunukabu bugam bubawe, iñaaw Jesus naanool: “Jijaa bunukabu batayiil bubawe ban!” 4 Be Jesus naanool: “Âwo, kama aw mbi ulobom wahaw wa mbi iga? Tûmbaam tîriiŋorut” 5 Be Iñaawool naan kugorooraaku: “Mbi jiga non ma mbi alobuul.”6 Too di bûyaba'ubu, kûwulenumaku koo too hutok di hanor kata kuwaaliisaku dâ jûdewwi kugawem mumelamu mata heenaayahu hata jâbuyooraju di Emitay. Be kûwulenuma'uku keeli kubaj simpaasasu hutok di sîhaaji, be mante simpaasasu kunŋen di sigaba. 7 Ña Jesus naan bugorooraabu: “Jimeeŋen kûwulenuma'uku mumelamu!” Ña di kumeeŋen ko huc mumelamu. 8 Ban naaniil Joon: “Jibaj rewoor di kûwulenuma'uku ki jiwul annahaanaw ata bugorooraabu.” Ña di kuga mo. 9 Be na annahaanaw umu acombum mumela'umu malaañenim bunukabu, ña nâwoolul ata bûyababu. Be âmirut baaba bunuka'ubu bûcaalhumulom, ma bugorooraa'ubu keb kûmiim, mata buko kumojulomom. 10 Na âwolloom ban, naanool: “An peh ya aga, wahaw non uwe, nasing âŋarul para bunukabu bâsuumaabu, ma mbi êsukay ega eyejene, inkit nâŋarul baabu bâsuumutaabu. Be aw nuñak para baabu bâsuumaabu be inkit mowme?”
11 Ña nownu, no na Jesus âcukum ma aga miñamu mata sembaasu sata Emitay, di jîsuka'uju jata Kanaaŋ di bantaabu bata Gâlileeya, ma âyis sembaasu satawool sata hatiya di emitay. Ña kurebooraaku katawool di kûynenool. 12 Be nagam bûyababu bubawe Jesus koo di kurebooraaku katawool, di iñaawool, di kukay be di êsukay yata Kâpharnawuŋ ki kulako bo kuk.
Jesus nakay be di eluupay yata Emitay
13 Ban nagam kâlundaayaku kata Paaskuwa kata jûdewwi kuhuute, ña Jesus nakay be Jerusaleŋ. 14 Be na ârimmi di Eluupay yata Emitay, najuk êsukay koo dôo ma kunoomem di sibaasu, di sîgaraniinaasu, di sîpaakiitasu; buwecekaabu poop bata bancaamabu ma kûleehodom di simeesaasu ma ya kuwecek. 15 Ña Jesus nacookoor hukaruwaasaahu hata uneewaw, ban nacah di êsukay peh; nacah poop di sibaasu, di sîgaraniinaasu, ban na atah simeesaasu sata buwecekaabu bata bancaamabu, ma awiis bancaamabu batayiil. 16 Ban naan bunoomaabu bata sîpaakiitasu: “Jîcaalhen ûde wahaw peh wa jinoomem di wo! Aatuba jiga eluupay yata Ampawom husiilaayahu!”
17 Ña kurebooraaku katawool di kuwolho maama ŋiicim di elobay yata Emitay kaan: “Mata ma îkimmi eluupay yatayi, ña ya hâahom mata yo.”
18 Ña yahaanay kata jûdewwi di kurink Jesus keenool: “Ûysoli êmanjumay ya mbi êyis kaan nubaje sembe ma uga ume.” 19 Ña Jesus naaniil: “Jîwap jaa Eluupa'uye yata Emitay, înje mbi iteep yo kukaku kûhaaji.” 20 Ña di keenool: “Eluupa'uye yateepim ujaañaw bukanaku egaba di hutok di kanor (46), aw mbi ooli uteep yo kukaku kûhaaji?” 21 Be Jesus, Eluupay yata Emitay ya aloom mata yo, eniilay yatawool. 22 Momakiimom na Jesus alhaalowulom di kuketaaku, kurebooraaku katawool di kuwolho maama alobeeniim. Ña di kûynen di baŋiicerabu bâñoyyaabu, di poop elobay ya Jesus alobiim.