Nikodeemus nakay ki kûjukoorul di Jesus
3
Ban phârisew aahu aaneyim Nikodeemus agam annahaanaw aahu ata jûdewwi, 2 nakay busonnaaru be baabu Jesus âriiŋ naanool: “Alhikitenaawe, malhegen ûli nûmire kaan Emitay ebollim bi ûlhikitenoli elobay yata yo, mata an aaliit aga sîmanjumasu sa ugawem, Emitay balee'd'oo.” 3 Ña Jesus naanool: “Ma iñaaŋeni malhegen eeni, anaw abajulakentim joon, aatubi ajuk kâyyaku kata Emitay.” 4 Ña Nikodeemus narinkool aanool: “Kama anaw ahallemmi ban, naaliye abajulankeni joon? Soŋo pîya iñaawool mbi âkulhoorool joon, ma mbi abajulankenool joon?” 5 Jesus naanool: “Ma iñaaŋeni malhegen eeni, anaw abajutumim di mumel, di poop Buynumabu bata Emitay, aaliit anebej di kâyyaku kata Emitay. 6 Mata anaw abajim di kubajawool, ya abaji di ebaj ajamaat, be aahu abajumim di Buynum Bunapaabu, oo ata Buynum Bunapaabu. 7 Be aatuba ujaahali mata ma eenim jake noon ma jibajulankeni joon. 8 Mata ehentelaay ya êtekumul ba êkimmi, nujam yo, be ôotubi ûmir ba êcaalhumulom, ban poop ôotubi ûmir ba ereesem be. Moomu poop kaŋ ma bukanaku peh kabajumim Buynum Bunapaabu kugam.”9 Ña Nikodeemus narinkool aanool: “Wahaw uwu wa uloom umu, bu mbi uga?” 10 Jesus naanool: “Inja aw alhikitenaaw ata ûde Israyel, moo unamulent wahaw uwe? 11 Jijaa, ma iñaaŋeni malhegen eeni, ûli ya ulob wahaw wa ûmiim nûyis poop wahaw wa ujuum, be miwuul jîynenenoriit hurimahu hâtooli. 12 Ma ilobewuum mata wahaw wata ube di etaamay jîynent, benkiteemo bi ilobuul mata wata hatiya di emitay, mbi jîynen? 13 Mata an alet aŋoolum be hatiya di emitay, be Añool Ajamaat keb âcaalhumulodom.
14 “Mata non ma Moyses ajuumemmi elunay yata muhaañaayamu di ekinkay, moomu poop kaŋ ma mbi Añool Ajamaat agawi. 15 Ma mbi ânoowan âynenoom, mbi abaj eroŋ yâbaworiit. 16 Mata Emitay êkinkin ajamaat peh ammi di etaamay, poopii di ewuliil Añool yo anoraw, ma mbi an peh âynenoom, aatubi anep be mbi abaj eroŋ yâbaworiit. 17 Mata Emitay ebolloot Añool yo be ube di etaamay bi aga ejamaatay batalenabu, be ebollool bi apakeniil.
18 “Moo anaw âynenoom, aatubi agawi batalenabu. Be anaw âynentoom, mbi ugawi batalenabu, mata âynent Aŋilaw anoraw ata Emitay. 19 Mata batalenabu boo beemom ube: Ehikitenumay yoo ekaylom be ube di etaamay, be bukanaku kata dô, kuhaŋ mâkin emuucenay mata ma kugawem wahaw wajakutaaw. 20 Mata bukanaku peh kâgawikoorem, kûkinoriit majaaŋa, ya kulat mo, mata kûkint ma wahaw wa kugawem ujuki. 21 Be bukanaku kagawem wahaw walhegenumaayaw, ya kuga wo di majaaŋaamu ma mbi bukanaku kujuk bagawerabu batayiil, mata ya kuga bo non ma Emitay êkimmi.”
Jesus koo di Joŋ Batista
22 Ban Jesus koo di kurebooraaku katawool, di kukay be di bantaabu bata Jûdeya, kûriiŋ bo di kulako bo ma ya âbatis bukanaku. 23 Joŋ poop nalako Enoŋ ñata di jîsukaju jata Saliŋ, ma ya âbatis bukanaku, mata mumelamu moo boo huc. Ña bukanaku ya kûkayil be to ma nki âbatisiil. 24 Be noo, Joŋ oo basohoruti ki akullhi.
25 Ña kurebooraaku kaaku kata Joŋ, di kuñoosoor di jûdew aahu mata jâbuyooraju di Emitay. 26 Ña di kukay ki keen Joŋ: “Alhikitenaawe, âynaaw a jilakom kareb kaaku kata kaalaku kata Jordoŋ, omu ma âbatisem, be bukanaku peh koku ma kukayem be baabu d'oo.”
27 Joŋ naaniil: “An aaliit abaj wah, Emitay bawulutoo'wo. 28 Miwuul too jilakom na iñaaŋenuum eenuul, înje ntuwa Kristu, be ibolli ma iyabulool kayooŋ. 29 Mata âbutuwaaw aaraaw, âbutuwaaw îinaaw akiloom, be apaal âbutuwaaw îinaaw antom d'oo ya ajam di âbutuwaaw umu îinaaw, mata ya sûumool ajam hurimahu hatawool. Momakiimom ma êsuumaay êemummi di înje. 30 Mata haŋ majak ma matawool muhaŋ majamo, ma mûmbaam muŋaso.”
31 Mata anaw âcaalhumulom hatiya, nahaŋe bukanaku peh. Ata ube di etaamay, ya alob wahaw wata ube di etaam, mata ube di etaamay nawoom. Be aahu âcaalhumulom hatiya di emitay, nahaŋe bukanaku peh, 32 mata ya alob wahaw wa ajuum, di waawu wa ajammi; be bukanaku kûynenoriit hurimahu hatawool. 33 Be anaw âynemmi elobay yatawool, ya asallhen kaan Emitay yoo anaw alhegenumaayaw. 34 Mata anaw a Emitay ebollom, ya alob elobay yata yo, mata ya ewulool Buynum Bunapaabu baliikut. 35 Emitay êkinkin Añool yo, momakiimom ma êwalenummi wahaw peh di uŋenaw watawool. 36 Moo anaw âynemmi Añool Emit, mbi abaj eroŋ yâbaworiit; be anaw âynentoom, aatuba abaj eroŋ yâbaworiit, ban mbi Emitay egawool ma hûlaamahu hata yo hulako d'oo be nanoonan.