Joŋ 4

Añakanaw ata Samariya

Ña phârisewwi di kujam kaan Jesus omu ma agawem di bukanaku ma kuga burebooraabu batawool, ban nâbatis bukanaku kahammi ka Joŋ âbatisum. 2 Be di malhegen, ntuwa Jesus ya âbatisum, be kurebooraaku katawool ko ka ya kâbatiisum bukanaku. 3 Na Jesus ajammom, ña nâcaa'dô Jûdeya, ma alaañ be Gâlileeya. 4 Be na mbi aan akay, mbi ayab Samariya.

5 Na ârindom, nakay be di êsukay yaaneyim Sikaar, yammi ñata hankahu ha Jako awuum añoolool Jose. 6 Be dôo di hanka'uhu, enkoloŋay dôo ya Jako awokum. Be mata ma Jesus areesulom nagay, ña naleeho to ñata di enkoloŋa'uyu. Nownu, jaley ma arem kajuum.

7 Ña añakanaw ata êsuka'uyu yata Samariya, nâkayuu'to kamojaku, ña Jesus naanool: “Atu uwulom mumel isiben?” 8 Be nownu, kurebooraaku katawool koo ma kukayum be di hânkijahu hata dô, ma nki kûnoomul wahaw wata huriyahu. 9 Ña añakanaw umu naan Jesus: “Aw jagam jûdew, nuga bu ma ulhawom mumel usiben înje jagam samaritaanu?” Ma âlobummom, mata jûdewwi kujamoorut di samaritaanuyi. 10 Ña Jesus naanool: “Ûmiremmi wahaw wa Emitay ewulem, di poop anaw aanen d'aw uwulool mumel asiben, mbi ulhaweenool, ma oo awuli mumelamu magawem an aroŋ.” 11 Be añakanaw umu naanool: “Ma aw ookutum ebaag yata kamoj, ban enkoloŋay yoyu ma êlahum, ûtey ta mbi ûbajumul mumela'umu magawem an aroŋ? 12 Kama aw nurahere âmpawoli Jako âwalholim enkoloŋa'uye? Ban koo di kuñoolool dôo kusibemmi, di poop uncaamaw watawool?” 13 Jesus naanool: “Anaw asiben jaa mumela'umu, mbi basibenabu buga ban di busohool joon; 14 be anaw asiben jaa mumelamu ma mbi iwulool, basibenabu beetunki busohurerool; mata mumela'umu ma mbi iwulool, mbi muga êbulumay d'oo ya mbi egawool aroŋ be nanoonan.” 15 Ña añakanaw umu naanool: “Uwulom mumela'umu isiben, ma basiben beetunki busohurerom, ma eetunki îlaañul joon be ute kamoj.” 16 Be Jesus naanool: “Ukay ki ûwoolul apañoori, ban nûlaañul be ute.” 17 Be añakanaw umu naan Jesus: “Înje eekut ânniine.” Jesus naanool: “Ma uloom umu, nukooŋe, 18 mata nusoñuweene ban di yîinaay hutok, be aahu a ookum maame, ntuwa apañoori; moo nulobe malhegen.”

19 Ña naan Jesus: “Ata Emit, nîynene kaan aw añaaŋenaaw ata kûboñaku kata Emitay. 20 Mata sîmpawoli, ute di hurimbiliŋa'uhe ya kûbinkemmi Emitay, be miwuul jûdewwi di jêenul Jerusaleŋ keb boo ba mbi bukanaku kûbinken yo.” 21 Be Jesus naanool: “Añakanaye, jake ma ûynen kaan, hukahu mbi hûriiŋ na an aatubi âbinken Ampawom ute di hurimbiliŋa'uhe, palimo poop Jerusaleŋ. 22 Mata miwuul ya jîbinken anaw a jîmirutum, be ûli ya ûbinken anaw a ûmiim, mata kapakaku di bukanaku kagam jûdewwi kûcaalhumulom. 23 Be hukahu hôhareesewuum, ban hûrillo ban, ha bukanaku kâbinkenem Ampawom, mbi kûbinkenool di buynumabu, di malhegenumaayamu; mata bukana'uku koo ka Ampawom apaamem di buko ma mbi kuga bûbinkenaabu batawool. 24 Mata Emitay yoo Buynumabu, moo bukanaku ka mbi kûbinken yo, jake ma kûbinken yo di buynumabu, di malhegenumaayamu.” 25 Ña añakanaw umu naanool: “Înje nîmire kaan Apakenaaw aamom Kristu, mbi âkayil, be na mbi âkayil, mbi âñaaŋenoli wahaw poowo.” 26 Be Jesus naanool: “Înje ume jalobem di ume d'aw.”

27 Ña nownu, kurebooraaku kata Jesus di kûriiŋul. Be na kujuum ma Jesus ya aloom di añakanaw umu, ña di kujaahali noon. Be an arinkutool poop miñamu ma âkimmi di añakanaw umu, makiim ma âlobumem d'oo. 28 Ña añakanaw umu, nawaa'to elompay yatawool ma atey be di hankahu, âriiŋ naan êsukay: 29 “Jîkayil bi jijuk âynaaw alobommi wahaw peh wa igam. Oo pîya, ntuwa Kristu?” 30 Ña êsukay di êcaalhul be baabu Jesus.

Utondaaw yâyemmi

31 Ña na anñaakanaw umu agam nakaye, kurebooraaku katawool di keenool: “Alhikitenaawe, uri.” 32 Be naaniil: “Înje nibaje wahaw wa mbi iri wa miwuul jîmirutum.” 33 Ña di kurinkoor ma ya kêenul: “Mante pîya an nawulool wah wata huri?” 34 Be Jesus naaniil: “Huriyahu hûmbaam, hoo hugam jagawaju jata wahaw wa anaw abollommi âkimmi, ma iga bugoroorabu batawool. 35 Kama jêenoriit, kulheeŋaku kuroŋ bo kubakiir ma ejalay êriiŋ? Moo, neenuul jîlhaarulo ma jijiker utondaaw wâyemmi ban wa mbi ujali. 36 Anaw ajalum, mbi ayab bugalabu, ban nâmeb husaanumahu hatawool be eroŋ yâbaworiit ma ajalaaw, di aahu arokum, mbi kûririgen poopiil. 37 Mata jikooŋe hurimahu halobim kaan: An aahu mbi arok, aahu najal. 38 Moo, înje mbi iboñuul ma nki jijal di kalhaakaku ka jiroomiñutum. Mata kaaku kurokum ban, miwuul di jijal wahaw wa kugoroorum.”

39 Ña bukan kameeŋe kagam samaritaanuyi kata di êsuka'uyu, mata ma kujammi ma añakanaw umu aaniim Jesus aloboom wahaw peh wagam, ña di kûynen Jesus. 40 Ña di kulhaw Jesus ma keenool alako bo. Ña Jesus nalako bo kukaku kugaba. 41 Bukan kameeŋe poop di kûynen Jesus mata elobay ya alobiim. 42 Ña di keen añakanaw umu: “Mowme, ntuwa mata wahaw wa ulobolim nûynenummi, mata ûli kûmuumoli nujame ma aloom; moo, nunamulene kaan malhegen oo Apakenaaw ata âmbasuk peh.”

Jesus nabuunen aŋilaw ata agorooraaw ata âyyaw

43 Na Jesus agabom kukaku kugaba, ban nâcaa'bô ma akay be Gâlileeya. 44 Be oo balobereeban kaan añaaŋena ata kûboñaku kata Emitay, âynenoriiti di êsukay ta awoom. 45 Na ârimmi Gâlileeya, bukanaku kata dô di kuyaañuwool sûum, mata na kukayum kâlundaayaku kagawim Jerusaleŋ, di kûjukul wahaw wa agalobom.

46 Ban Jesus nakay joon be di jîsukaju jammi Kanaaŋ yata Gâlileeya, baamom ba abiim bi aŋar mumelamu âlaañenum bunukabu. Be âynaaw oo boo a añoolool âjuutum agam agorooraaw ata âyyaw ata êsukay yata Kâpharnawuŋ. 47 Na ajammi kaan Jesus nâcaalhumulo Jûdeya be dô Gâlileeya, ña nakay be baabu d'oo âriiŋ nakaawoorool ma aanool kukay be Kâpharnawuŋ ma nki abuunenool añoolool âjuutum, mata oo ma ma aket. 48 Be Jesus naanool: “Miwuul jijukut jaa êmanjum, di poop miñ mata sembaasu sata Emitay, jîynenoriit.” 49 Be âynaaw umu naanool: “Ata Emit, uñankiit ukaya cab ka mbi añoolom aket.” 50 Jesus naanool: “Oot be yanŋi, añooli mbi aroŋ.” Ña âynaaw umu nâynen hurima'uhu ha Jesus aloboom ma aat.

51 Be na agam omakayem, bugorooraabu batawool di kûkayil ki kupam, ma keenool añoolool nâjuwe ban. 52 Ña narinkiil too bu na âjum. Di keenool: “Huken na jaley âkilhom, nâju.” 53 Ña ampaw aŋilaw umu, nawolho kaan na jaley aretom huken noo na Jesus aanoom añoolool mbi aroŋ, ña buko peh di eluupay yatayiil di kûynen Jesus.

54 Miña'umu mata sembaasu sata Emitay ma Jesus agam, moo mugam mugabutamu ma agam na âcaalhumulom Jûdeya be Gâlileeya.