Joŋ 5

Jesus nabuunen âynaaw agam hubapuwooraahu

Nagam ban, kâlundaayaku kata jûdewwi di kûriiŋ, ña Jesus nakay be Jerusaleŋ ma nki âami di kâlundaaya'uku. 2 Dôo Jerusaleŋ, humojahu di hulako dô ñata ta êtingaay yata sîgaraniinaasu yemmi, haaneyim Betesda di baloberabu bata êbrewwi, habaam uhandaw hutok. 3 Be bukanaku lhay kâjuutum: bûpuumaabu, di kata uyakasaw, di poop kubapuwooraaku, koo too ma kuleehom di uhandaw uwu, ma kukob be na mbi mumelamu mugoroor. 4 Mata ya ga ii, amalaakaw nâwalowul ma aga mumela'umu mugoroor. Ña anaw âjuutum a mbi asing âwalo dô, kâjuutaku kaakoom di kûju. 5 Be âynaaw too agam ujaañaw anabawo di kunŋen di hutok di ûhaaji di kâjuutaku. 6 Na Jesus ajuum âynaaw umu ma akumemmi, nâmir kaan napiyuwe di kâjuutaku, ña narinkool aanool: “Nûkine ma ûju?” 7 Ña âynaaw umu naanool: “Ata Emit înje ibajut an a mbi aanenom ma iwalo di humojahu na mumelamu mugogoroorem, mata na mbi een iwalo dô, aahu nasingom.” 8 Ña Jesus naanool: “Ulhaalo ma uŋar kapenkaku katayi ma oot.” 9 Ña âynaaw umu nâju to kaŋ cab, ña nalhaalo ma aŋar kapenkaku katawool ma arees. Be huka'uhu, hukahu hata hîyyaayahu hata jûdewwi.

10 Ña yahaanay kata jûdewwi, di keen âynaaw umu abuunenim: “Jaat hîyyaayahu hatoolaal, moo ñônñoy ma upeeno wah non uwu!” 11 Be âynaaw umu naaniil: “Âynaaw abuunenommi aanommi, iralh kapenkaku kûmbaam ma irees.” 12 Di keenool: “Aymoom aanim uralh kapenkaku katayi ma urees?” 13 Be âynaaw umu amanjut anaw abuunenoom, mata ma êsukay yalakotom ememmi noon.

14 Kûriiŋ huk haahu, Jesus di kupam koo di âynaaw umu di Eluupay yata Emitay, ña naanool: “Jijaa! Nibuuneni ban, ootunki uga kûbajumiñ joon, ka mbi wah wakeel wahammi mâkoji ugawi joon.” 15 Ña âynaaw umu nakay ki aloo'mo yahaanay yata jûdewwi aaniil kama Jesus oo ma abuunenoom. 16 Ña yahaanay yata jûdewwi ya kuŋomoor Jesus mata ma abuunemmi âynaaw umu di hîyyaayahu hatayiil. 17 Be Jesus naaniil: “Ampawom omagoroorem be jaat, înje poop mbi igoroor.”

18 Ña mata ma Jesus aloom umu, ña yahaanay yata jûdewwi, di kuhaŋ ma ga sembe ma mbi kubujool; mata ntuwa mata ma ahuusuum keb hîyyaayahu hatayiil, be poop mata ma ammi Emitay egam ampawool; ma agawooro non kurewe di yo.

Sembaasu sata Añool Emit

19 Ña Jesus naan jûdewwi: “Ma isalhenuul eenuul, mumulet bi Aŋilaw aga wah oo bajukut Ampawool naga wo. Mata wah kaŋ peh wa Ampawool agam, Añoolool poop naga wo. 20 Mata Ampawool nâkinkin Añoolool, momakiimom nâysool wahaw peh wa agawem. Ban mbi âyisool wah waawu wahammi we, wa mbi ugawuul jijaahali. 21 Mata non ma Ampawool alhaalenem bukanaku di kuketaaku ma agawiil kuroŋ, moomu poop kaŋ ma Añoolool agawem bukanaku ka âkimmi kuroŋ. 22 Ampawool âgaworiit an batalen, be Añoolool nawuum sembaasu ma aga batalenabu. 23 Ma bukanaku peh mbi kujam di Añoolool non ma kujamem di Ampawool. Mata anaw ajamutum di Añoolool, alee'poop ma ajammi Ampawool abolloom.

24 “Moo, ma isalhenuul eenuul, anaw ajammi hurimahu hûmbaam, ban nâynen anaw abollommi, mbi abaj eroŋ yâbaworiit, mata aatubi agawi batalenabu; mata nâtipe ban di eketay be di eroŋay. 25 Ma isalhenuul joon eenuul, mbi hukahu hûriiŋ, ban hûriiŋe ban na mbi bukanaku kakeem kujam hurimahu hata Añool Emit; be bukanaku kajanhom, mbi kuroŋ. 26 Mata non ma ampawaayaw aakum eroŋay, moomu poop kaŋ ma Añoolool aakuyom. 27 Ban nawulool sembaasu sata ma aga atalenaaw ata bukanaku, mata oo agam Añool Ajamaat. 28 Be aatuba jijaahali, mata hukahu mbi hûriiŋ na mbi bukanaku peh kammi di sîluŋasu kujam hurimahu hatawool, di kûlhaalowul, 29 ma kaaku kagam jak, mbi kûlhaalowul di kuketaaku be eroŋay, be kaaku kagam kôji, di kûlhaalowul di kuketaaku be di hûjimenahu hata Emitay.

30 “Be înje humuumahu hûmbaam eeliit iga makeel, mata maama ijammi, moo ma mbi iga batalenabu. Moo batalenabu ba igawem bobu ma bulhebum, mata îgaworiit non ma înje îkimmi, be ya iga non ma Ampawom abollommi âkimmi. 31 Be ga jaa non înje ya ilobooro mûmbaam, non kama wahaw wa ilobewuum, ntuwa malhegen. 32 Mata aahu, omu to aloben mûmbaam, be înje nîmire kaan wahaw wa alobem mata înje, malhegen. 33 Mata na jibommi bukanaku be baabu Joŋ, nalobulobuum malhegen. 34 Be ntuwa kaan înje îkimmi ma an alob mûmbaam, be ilobuul umu ma mbi jeeli jipak. 35 Mata Joŋ oo agam poop non ehikitenumay yayabenim ma jaaŋ, be miwuul di jîkin ma jîririgen jinŋet di majaaŋaamu mata yo. 36 Be ma malobim mata înje, muhaŋe mata Joŋ; mata bugoroorabu ba Ampawom awulommi bi iga, boo ba igawem di bo, ma yîs kaan oo abollommi. 37 Înje Ampawom abollommi, oo aloom mata înje, be miwuul jijamorut nakeel hurimahu hatawool, ban poop jîmirut haanaahu hatawool. 38 Ban poop hurimahu hatawool hulee'di miwuul, mata jîynent anaw abolloom. 39 Ban ya jisaaho ma jipisen Baŋiicerabu Bañoyaabu, mata ma jinongum kaan mbi bugawuul jiroŋ be nanoonan, mata mata înje buloom. 40 Be miwuul jîkint jîkayil be baabu d'înje ma mbi jibaj eroŋay.

41 “Înje îpaamoriit ma bukanaku kusalom, 42 be nîmiruul jak mata jîkint Emitay. 43 Înje îkayumul mata Ampawom, be jîkintom; be ga jaa non anaw aahu akayoorowulom, mbi jiyabeenool. 44 Kama bu mbi jeeli jîynen, ban miwuul ya jîkin keb jisaloorowaaju, ma jiwaa'bo kasalaku ka Emitay yanoray esalem an? 45 Be aatuba jêenul înje mbi eenuul kayooŋ Ampawom jibabje batilaabu, be anaw a mbi alobuu'mo, Moyses aamom a miwuul jîynemmi. 46 Mata gaween jaa non di malhegen jîyneneene elobay yata Moyses, mbi jîyneneenom poop, mata, mata mûmbaam nâŋiicunyom. 47 Be jîynent jaa maama aŋiicum, bu mbi jîynen elobay ya ilobem di miwuul?”