Jesus nawul êsukay kuri
6
Ban Jesus nâtip hulhuwahu hata Gâlileeya, haaneyim poop Tiberiyadis. 2 Be buyooŋabu bata bukanaku di busoolhenool, mata ma kujuum ma ya agam miñamu mata sembaasu sata Emitay, ma ya abuunen bukanaku kâjuutum. 3 Ña Jesus di kuŋool di hurimbiliŋahu koo di kurebooraaku katawool ki kuleeho dô. 4 Nownu kâlundaayaku kata jûdewwi, kaaneyim Paaskuwa koo ma kuhuutum. 5 Be na Jesus agam lhâar, najuk buyooŋabu bata bukanaku ma kûkayewuum be baabu d'oo, ña naan Philiipi: “Ûtey mbi unoomulaal kûmburuwaaku bi bukana'uke kuri?” 6 Be ma aloboom umu, oo âkimmi alasuwool, mata oo bâmiree'ban maama mbi aga. 7 Ña Philiipi naanool: “Palimo bancaamabu bârimmi sîteemeerasu sigaba bata praata, ma bunoomumi kûmburuwaaku, keetubi kutook ma ânoowan abaj jitij.” 8 Ña aahu ata di kurebooraaku katawool aaneyim Andre agam atii Simoŋ Pedru, naanool: 9 “Ampa oome ute abaam kûmburuwaaku hutok kata sebada, di poop muwolamu mugaba; be bu keelim kugawi di buyooŋa'ube?”10 Be ma tiŋa'utu tigam mahosamu lhay, ña Jesus naaniil kuga êsukay peh ma eleeho. Ña yîinaay di kuleeho kaalim kûriiŋ sînjunnaasu hutok. 11 Ña Jesus naŋar kûmburuwaa'uku ma asal Emitay, ban nâgiiter ko bukanaku peh kalakotom. Ban naga mo poop muwola'umu. Ña êsukay peh, ânoowan nari non ma âkimmi. 12 Na kugam kupooñe, ña Jesus naan kurebooraaku katawool: “Jikay ki jîjoobenul bâmonkabu bata kûmburuwaaku baŋañunom ma beetuba bukaaño.” 13 Ña di kûjoobenuu'bô, di kumeeŋen sîkutasu kunŋen di sigaba sata bâmonkabu bata kûmburuwaa'uku hutokay kata sebada ka kurim di kuŋañen.
14 Ña na êsukay kujuum êmanjumay ya Jesus agam, ña di kêenul: “Âynaaw ume, malhegen oo añaaŋenaaw ata kûboñaku kata Emitay a mbi âkayil be di etaamay.” 15 Be ma Jesus âmiim kaan êsukay kûkine ma kusohool ma kûyyenool, ña nâcaa'to ma akay diyoonool be di hurimbiliŋahu.
Jesus narees di hulhuwahu
16 Na tigam ma tijon, kurebooraaku kata Jesus di kuriiŋen be di hulhuwahu. 17 Na kûrimmi, di kûjupo di busaanaabu ma kûtip be Kâpharnawuŋ. Ña nownu too ma tigam kîin, be Jesus oo bakayoloot bi atookii'to. 18 Ehentelaay di êtekul di sembe, ña hulhuwahu di hugor. 19 Be na kugam kuweene kûriiŋ sikilometrasu hutok, be mante hutok di yanor, di kujuk Jesus reeken oo ma âreesewuum di mumelamu, ña di kuwollo. 20 Ña Jesus naaniil: “Jeetuba jîkoli, înje.” 21 Ña di kuyaañuwool di êsuumaay; ña di kûriiŋ ta kureesem be.
Jesus hûmburuwaahu hagawem an aroŋ
22 Na titijemmi, buyooŋa'ubu bata bukanaku kalakonom kajim kaaku kata hulhuwa'uhu, di kûmir kaan busaanaabu banor bulakotom kareba'uku, ban Jesus âjupowut dô, ma kurebooraaku katawool keb kôkajupodom. 23 Ña usaanaaw waawu wâcaalhumulom Tiberiyadis, di ûriiŋul di uya ñata ta buyooŋa'ubu bata bukanaku kemmi katokommi kûmburuwaaku na Jesus asalum Emitay. 24 Be na kûmiim kaan Jesus koo di kurebooraaku katawool kulee'to, ña di kûjupo di wo ma kukay ki kupaamool Kâpharnawuŋ.
25 Na kûrimbom di kujukool, ña di keenool: “Alhikitenaawe, too bu nûrillom ube?” 26 Be Jesus naaniil: “Ma isalhenuul eenuul, ma jipaamumem d'înje, ntuwa mata ma jijuum sîmanjumasu sa igam, be mata ma jirilom kûmburuwaaku ii di jipooñ. 27 Jeetuba jiroomiñ mata muriyaay akaañuwem, be jiroomiñ be bata maama mbi mulako to be eroŋay yâbaworiitaay, ya mbi Añool Ajamaat awuluul, mata Emitay yaamom ampawool, yoyu ma egawoom êmanjumay.” 28 Ña di kurink Jesus keenool: “Buroomiñ bu, ba Emitay êkimmi ûli uga?” 29 Ña Jesus naaniil: “Wahaw wa Emitay êkimmi jiga, jîynen anaw a yoo ebollom.” 30 Di kurinkool joon keenool: “Êmanjum bu mbi uga, ma ûli mbi ujuk, nûyneni? Wa nugawem? 31 Mata sîmpawoli kapiyaaku manaaa kurim di ekinkay, non ma elobay yata Emitay eloom kaan, yoo ewuliim hûmburuwaahu hâcaalhumulom hatiya di emitay.” 32 Be Jesus naaniil: “Ma isalhenuul eenuul, ntuwa Moyses awuluum hûmburuwaahu hâcaalhumulom hatiya di emitay; moo haahu halhegenumaayahu hata hatiya di emitay, Ampawom mbi awuluu'ho. 33 Mata hûmburuwaahu hata Emitay, hoo hugam anaw âcaalhumulom hatiya di emitay, a mbi aga âmbasuk peh aroŋ.” 34 Ña di keenool: “Ata Emit, mbi ûwuloli di hûmburuwaa'uhu nanoonan.”
35 Be Jesus naaniil: “Înje igam hûmburuwaahu hagawem an aroŋ, anaw âkayil jaa be baabu d'înje, aatubi acaareturer; anaw poop âynenommi, basiben betuubi busohurerool. 36 Mata înje niñaaŋenuu'ban, be palimo ma jijukem d'înje, be jîynentom. 37 Mata anaw a Ampawom awulommi, mbi âkayil be baabu d'înje. Ban anaw a mbi âkayil be baabu d'înje, malhegen eetubi ilaturerool. 38 Mata înje îcaalhumuloot hatiya di emitay, bi iga non ma îkimmi, be îkayil bi iga non ma anaw abollommi âkimmi. 39 Mata Ampawom abollommi, wahaw wa âkimmi, ma bukanaku peh ka awulommi keetubi kunep, ma mbi ilhaalelliil di kuketaaku di hukahu hûbanumahu. 40 Malhegen Ampawom, wahaw wa âkimmi, ma an peh ajuum Añoolool, ban nâynenool, mbi abaj eroŋ yâbaworiit; ban di hukahu hûbanumahu, mbi ilhaalellool di kuketaaku.”
41 Ña jûdewwi, ya kûŋuŋunoor mata ma Jesus ammi oo hûmburuwaahu hâcaalhumulom hatiya di emitay. 42 Ban ya kêenul: “Kama ume ntuwa Jesus aamom añool Jose? Kama ûmirutaal ampawool, di iñaawool? Moo, mata wa ma aanumem di mo, oo hatiya di emitay nâcaalhumulom?”
43 Be Jesus naaniil: “Jeetuba jîŋuŋunoor. 44 Mata an mumulet bi âkayil be baabu d'înje, Ampawom abollommi baŋallootool; ma mbi ilhaalellool di kuketaaku di hukahu hûbanumahu. 45 Mata dôdu ma ŋiicim di uytaw wata buñaaŋenaabu bata kûboñaku kata Emitay kaan, Emitay mbi elhikiten an peh. Momakiimom an peh atallhemmi Ampawom, ban nanamulen, mbi âkayil be baabu d'înje. 46 Mata an akeel ajukeenorut Ampawom; be anaw âcaalhumulom di Emitay keb, ajukoom. 47 Ma isalhenuul eenuul: Anaw âynenommi, mbi abaj eroŋ yâbaworiit. 48 Mata înje igam hûmburuwaahu hagawem an aroŋ. 49 Mata simpawuul, manaa kurim di ekinkay, be ban di kuket. 50 Be hûmburuwaahu hâcaalhumulom hatiya di emitay, an peh atokonhom, aatubi aketurer. 51 Mata înje igam hûmburuwaa'uhu haroŋaahu hâcaalhumulom hatiya di emitay, moo anaw atokonhom, aatubi aketurer be nanoonan. Mata hûmburuwaa'uhu ha mbi iwul âmbasuk peh ma kuroŋ, eluway yûmbaam.”
52 Ña jûdewwi, di kuga to bûñoosoorabu ma ya kurinkoor kêenul: “Bu mbi oo awulolaal eluway yatawool utokoñaal?”
53 Be Jesus naaniil: Ma isalhenuul eenuul: “Jitokoñut jaa eluway yata Añool Ajamaat, ban jisibent poop hûsimahu hatawool, jeetubi jiroŋ. 54 Mata anaw atokommi eluway yûmbaam, ban isiben hûsimahu hûmbaam, mbi abaj eroŋ yâbaworiit, ban mbi ilhaalellool di kuketaaku di hukahu hûbanumahu. 55 Mata eluway yûmbaam, yoo wahaw wata huriyahu walhegenumaayaw; hûsimahu hûmbaam poop, wahaw wata basibenabu walhegenumaayaw. 56 Moo, anaw atokommi eluway yûmbaam, ban nasiben hûsimahu hûmbaam, mbi âami d'înje, ban înje poop mbi êemi d'oo. 57 Mata non ma Ampawom abollommi ammi ma arommi, moomu poop kaŋ ma înje emmi ma irommi matawool. Momakiimom, anaw a mbi atokoñom, mbi aroŋ mata înje. 58 Moo ûde hûmburuwaahu hâcaalhumulom hatiya di emitay; hunaamoorut di manaa ya simpawuul kurim ban kukete ban. Be uhe, anaw atokonhom, mbi aroŋ be nanoonan.”
59 Na Jesus aloom umu oo ma alhikitenem di bukanaku di eluupay yata kâmebooraku yata Kâpharnawuŋ.
Kurebooraaku kameeŋe kata Jesus, di kuteyool
60 Ña burebooraabu kameeŋe kata Jesus, di kujam ma ya aloom umu, ña di kêenul: “Hurima'uhe hûsuumut kajam, mumulet bi an aali atallhenool.” 61 Be ma Jesus âmiim kaan kurebooraaku katawool koku ma kûŋuŋunoorem, ña narinkiil aaniil: “Kama jîkine jilaañ kujeeŋanda mata hurima'uhe ha ilobuum? 62 Kama nokoor jaa non miwuul jijukemmi Añool Ajamaat oo ma akayem be hatiya di emitay da âcaalhumulom, bu mbi jigaween? 63 Buynumabu bata Emitay bugawem an aroŋ. Mata ajamaataw di humuumahu hatawool keb, aaliit aga makeel. Moo elobay ya ilobuum, êkayumul di Buynum Bunapaabu, yawulem eroŋay. 64 Be bukan kaaku kata di miwuul, kulee'ma kûynenommi.” Mata Jesus nâmiraaliye bukanaku ka mbi kûynenool, di poop aahu a mbi aŋoonool. 65 Ban naaniil joon: “Momakiimom ma eenumuum, mumulet bi an âkayil be baabu d'înje, Ampawom baanentool ma âkayil.”
66 Ña burebooraabu katawool kameeŋe, di kulaañ kujeeŋanda, ma kulaañut joon kureboor d'oo. 67 Ña Jesus narink buku kagam kunŋen di egabaay ma aaniil: “Miwuul poop jîkine ma jiteyom?” 68 Be Simoŋ Pedru naanool: “Ata Emit, uteyi jaa, mbi ureboor d'ay? Ban aw ookum elobay yagawem an aroŋ be nanoonan. 69 Ûli nûynene, ban nûmire kaan aw anaw Anapaaw ata Emitay.” 70 Jesus narinkiil aaniil: “Kama ntuwa miwuul jeemom kunŋen di egaba ka ijotum? Be aahu ata di miwuul Esatanaay.” 71 Be oo malobem mata Judas Iskariyotis, aamom añool Simoŋ a mbi aŋoonool, agam ata di buku kunŋenay di egabaay.