Kutiy Jesus kûynentool
7
Ban Jesus ya areesoor dô keb Gâlileeya, ma alaañut joon be Jûdeya, mata ma jûdewwi kambom kûkimmi kubujool. 2 Be noo, kâlundaayaku kata jûdewwi kaaneyim Kâlundaayaku kata Ûngungaw,a koo ma kuhuutum. 3 Ña kutiy Jesus di keenool: “Ûcaalh ute, ma ukay be Jûdeya ma nki kurebooraaku katayi kujuk wahaw wa ugawem, 4 mata anaw âkimmi ma bukanaku kûmirool, âñoororiit wahaw wa agawem. Moo, magam mo ma ugawem, ukay ma nki êsukay peh kujuki.” 5 Be wahaw wakiim kutiyool di kûlobumool umu, mata ma kûynentoom.6 Ña Jesus naaniil: “Înje hukahu hûmbaam hûriiŋorut, be di miwuul huk kaŋ peh hujake. 7 Ban miwuul bukanaku kammi di etaamay kûbirikoriit di miwuul non înje, mata ma ilobeyiim wahaw wajakutum wa kugawem. 8 Moo, miwuul jikay be kâlundaaya'uku, înje eetut bo, mata hukahu hûmbaam hûriiŋorut.” 9 Na alobiim umu ban, ña nalako dô Gâlileeya.
Jesus nakay be kâlundaayaku kata Ûngungaw
10 Na kutiy Jesus kugam kukaye be kâlundaaya'uku, ban Jesus poop nakay be bo, be agawut ma êsukay kûmii'mo. 11 Be nagam kâlundaayaku koku dô, jûdewwi ya kupaamool, ban ya kurinkoorool ma kêenul: “Kama âynaaw umu omu ûtey?”
12 Be di buyooŋa'ubu balakotom, bukan kameeŋe ya kûŋuŋunoor noon matawool, ma kaaku ya kêenul: “Âynaaw umu oo an jake bûyeget.” Be kaaku di kêenul: “Âynaaw umu ya abunten bukan.” 13 Be palimo ma bukanaku ya kuloom umu matawool, be an asoken aloo'mo way, mata ma kûkolim yahaanay yata jûdewwi.
14 Be na kâlundaayaku kugam kurewe tutaru, Jesus nanebej di Eluupay yata Emitay ma nki alhikiten êsukay. 15 Ña jûdewwi di kujaahali mata balhikitenerabu batawool, ña ya kêenul: “Kama âynaaw ume, bu nagawe ma âmir ume eloba'uye an balhikitentoo'yo?”
16 Be Jesus naaniil: “Balhikitenerabu ba ilhikitenem di bo bukanaku, ntuwa bûmbaam, be bata anaw abollommi. 17 Mata anaw âkimmi aga non ma Emitay êkimmi, mbi anamulen mante balhikitenera'ube bata Emitay, mante bûmbaam humuumom. 18 Mata anaw âkinem ma bukanaku kusalool, ya alob matawool, be aahu âkinem ma bukanaku kusal anaw abolloom, anaw umu oo anaw alhegenumaayaw, ban agawut an agugujoore. 19 Kama Moyses awulutuul kûboñaku kata Emitay? Be miwuul kaŋ peh jîgaworiit non ma kûboña'uku kuloom! Kama mata wa ma jîkimmi jibujom?”
20 Ña buyooŋa'ubu bata bukanaku di keenool: “Âynaaye, aw amalaw omu ma âjupuwim! Kama ay ammi mbi abuji?” 21 Ña Jesus naaniil: “Miñamu mata sembaasu sata Emitay nigam, miwuul peh di jijaahali. 22 Inja miwuul ya jisoollhen kûboñaku ka Moyses awuluum, ma ya jiga balaabu huhaanaahu hata yîinaay di hukahu hata hîyyaayahu hatawuul, ban ntuwa Moyses âcukuhom, be simpawool sihaan. 23 Jiga jaa balaabu huhaanaahu hata yîinaay di hukahu hata hîyyaayahu hatawuul, ma jisoollhen kûboñaku ka Moyses awuluum, moo mata wa di jibirik d'înje mata ma ibuunemmi anaw di hukahu hata hîyyaayahu hatawuul? 24 Aatuba mbi ya jiga batalenabu, di jiga ejuu'di buul, be mbi ya jiga bo jak.”
Kama Jesus agam Kristu?
25 Ña bukan kaaku kata Jerusaleŋ di kurink ma kêenul: “Kama ntuwa âynaaw ume oo ma kupaamem d'oo ma mbi kubujool? 26 Inja omalobem di ume ta êsukay yemmi, ban an alobutool makeel? Kama soŋo pîya yahaanay yata êsukay keene ban aawo di malhegen oo agam Kristu? 27 Ban âynaaw ume ûli nûmire ba awoom! Inja Kristu na mbi âkayil, an aatubi âmir baaba mbi âcaalhumul.”
28 Be na Jesus ya alhikitemmi bukanaku di Eluupay yata Emitay, ña nâŋaaŋulo ma âanul: “Malhegen jîmirom, ban jîmire poop ba îcaalhumulom. Be înje ikayorowuloot, be anaw abollommi oo anaw alhegenumaayaw a miwuul jîmirutum. 29 Be înje nîmirool mata d'oo nîcaalhumulom, oo abollommi.”
30 Ña di kûkin ma kusohool, be kubajut kugawool mata ma hukahu hatawool hûriiŋutum. 31 Be bukan kameeŋe kata di buyooŋa'ubu di kûynenool, ban di kêenul: “Soŋo pîya na mbi Kristu âriiŋul, mbi ahaŋ ma ga âynaaw ume miñamu mata sembaasu sata Emitay?”
Bupooyaabu di kuboñi ma nki kûsohul Jesus
32 Be na phârisewwi kujammi ma êsukay ya kuloom mata Jesus, ña di kubom di bumaaŋenaabu bata Emitay ma kuboñ bupooyaabu bata Eluupay yata Emitay ma nki kusohulool. 33 Be Jesus naaniil: “Jijaa înje mbi ilako ute di miwuul haahe, ban nkit nikay be baabu di anaw abollommi. 34 Be mbi jipaamom jeetubi jijukom, mata ba mbi ikay be, miwuul jeeliit jikay bo.” 35 Ña jûdewwi ya kurinkoor ma kêenul: “Kama ûbey pîya mbi akay be, ba ulaal ootubi ujukumaalool? Soŋo pîye mbi akay ki atoo'bo kutiyolaal kammi ma kuwaasoorum di bâsukabu bata bukanaku kagawtum jûdewwi ma nki alhikitenii'bo? 36 Kama mata wa pîya ma aanumem di mo, mbi upaamaalool ootubi ujukaalool, nâanul poop ba areesem be, ulaal ooliitaal ukaayaal be bo?”
Jesus nâanul oo agam mumelamu magawem an aroŋ
37 Be di hukahu hûbanumahu hagam hukahu hâmakaahu hata kâlundaaya'uku, ña Jesus najuum ma alob lhînŋa ma âanul: “Anaw a basibenabu busoom, nâkayil be baabu d'înje ma asiben. 38 Anaw âynenommi non ma Baŋiicerabu buloom, uyelenooraaw wata mumelamu magawem an aroŋ, mbi ûcaalhumul dâada d'oo ma ya utey.”
39 Be Jesus oo ma alobem mata Buynum Bunapaabu ba bukanaku peh kâynenoom mbi kuyab. Mata noo Buynum Bunapaabu, boo bayaboruti, mata Jesus oo bâyyenoruti.b
Êsukay di kuga waasaaw
40 Na êsukay kujammi ma aloom umu, ña bukan kameeŋe kata di buko di kêenul: “Malhegen âynaaw ume añaaŋenaaw ata kûboñaku kata Emitay.” 41 Kaaku di kêenul: “Âynaaw ume Kristu.” Be kaaku di kurink ma ya kêenul: “Kama Kristu mbi âcaalhumul Gâlileeya? 42 Kama baŋiicerabu beenut Kristu mbi abaji di êbajoorumay yata David, di jîsukaju jata Beleŋ, baamom ba David awoom?” 43 Ña êsukay di kûgiitoor mata Jesus, 44 ña kaaku di kûkin ma kusohool, be an asohutool.
Yahaanay sûumutiil di Jesus
45 Na bupooyaabu bata Eluupay yata Emitay kulallom, ña yahaanay yata kûboñaku kata Emitay, di phârisewwi di kurinkiil keeniil: “Kama mata wa ma jiŋallootum âynaaw umu?” 46 Di keeniil: “Âynaaw umu an alet âwoosiye elob non oo!” 47 Ña yahaanay di keeniil: “Kama miwuul poop di jiwalhoo'bo ma abuntenuul? 48 Soŋo jijuke pîya an d'ûli jagam yahaanay âynenoom? 49 Be êsuka'uye ma kûmirutum kûboñaku kata Emitay, Emitay egawii'ban kupaawo.” 50 Be aahu ata di buko aaneyim Nikodeemus, abiim bi akay ki kujukoor di Jesus, naaniil: 51 “Kama kûboñaku katoolaal mo ma kuloom kaan nooliye oon an nabaje hûbajumiñ aw barinkutool ma ûmir wahaw wa agam?” 52 Ña di keenool: “Kama aw poop jata Gâlileeya? Upisen ma Baŋiicerabu Bañoyaabu, mante mbi ujuk takeel ta bemmi añaaŋenaaw ata kûboñaku kata Emitay nâcaalhello Gâlileeya?” 53 Na kuloom umu ban, ña di kuwaasoor ma keet.