Añakanaw a kusoom bata kakumenaku
8
Ban Jesus nakay be di hurimbiliŋahu hata Oliveyra. 2 Bûjomaru bîb, nâlaañul be di Eluupay yata Emitay. Ña êsukay peh di kûkayil be baabu d'oo, ña naleeho ma ya alhikiteniil. 3 Ña bulhikitenaabu bata kûboñaku kata Emitay, di phârisewwi, di kûkayil di añakanaw a kusoom bata kâmooraaku, kûriiŋul di kujuumenool tutaru tatayiil, 4 ban di keen Jesus: “Alhikitenaawe, añakanaw ume oo asohulim bata kâmooraaku. 5 Be di kûboñaku kâtooli, Moyses naane anñaakanaw agam non ume, mbi amabi kuwaaliisaku ma abuji. Moo, aw bu nuloom?” 6 Be ma kûlobummom mata ma kûkimmi kûhopool ma mbi keeli kûsohumoo'to. Be Jesus nâsik ma ya aŋiicum husinkahu di etaam.7 Be mata ma ya kûŋiinooroom ma ya kurinkool, ña nalhaalo ma ajuum, ban naaniil: “Di miwuul jammi ute, nokoor jaa non anaw omu ute abajutum hûbajumiñ, nasing amabool huwaaliisahu.” 8 Ban nalaañ joon âsik ma ya aŋiicum husinkahu di etaam. 9 Be na kujammi ma alobiim umu, ña di kuga anor anor ma kuwaasoor. Be karaheem kusingum kukay, ma Jesus kulako to keb di añakanaw umu. 10 Be na Jesus alhaallom ma ajuum, ajukutiil ma ajuu'to keb añakanaw umu. Ña narinkool aanool: “Añakanaye, kama bukanaku kammi kâmooraaku nukayum bûkookey? An aanuti mbi kubuji?” 11 Be naanool: “An alobutom mo.” Jesus naanool: “Palimo poop înje, eetubi eeni mbi ubuji. Be aatuba mbi uga joon kûbajumiñ.”
Jesus ehikitenumay yata etaamay
12 Ban Jesus nalaañ joon alob di êsukay ma aaniil: “Înje ehikitenumay yata etaamay; anaw asoolhenom jaa, aatubi arees di emuucen; mata mbi abaj ehikitenumay yagawem an aroŋ.” 13 Ña phârisewwi di keenool: “Aw ya ulob matayi, momakiimom elobay ya ulobem di yo, ebajut sembe.”
14 Be Jesus naaniil: “Palimo înje ilobe mûmbaam, elobay ya ilobem, elhegenumaayay, ban yoyu ma ebaam sembe, mata înje nîmire ba îcaalhumulom, ban poop nîmire ba ikayem be. Be miwuul jîmirut ba îcaalhumulom, jîmirut poop ba ikayem be. 15 Mata miwuul ya jiga batalenabu non ma ejamaatay egawem, be înje îgaworiit an batalen. 16 Be palimo înje igawe an batalen, mbi buga batalenabu balhegenumaayabu, mata îgaworiit batalen an înje diyoonom, be ya iga bo ûli di Ampowom abollommi. 17 Mata dôdu ma ŋiicim di kûboñaku katawuul kaan, bukan egaba kulob jaa wahaw wanoraw, nûmir kaan wahaw uwu wa kuloom walhegenumaayaw. 18 Înje ya ilob mûmbaam, Ampawom poop abollommi, ya alob mûmbaam.”
19 Ña di kurinkool keenool: “Kama ampayi omu ûtay?” Jesus naaniil: “Ma miwuul jîmirutommi, bu mbi jîmir Ampawom? Mata jîmirom jaa, mbi jîmir poop Ampawom.”
20 Na Jesus ya aloom eloba'uyu, oo di Eluupay yata Emitay ma alhikitenem di êsukay ñata ta ekeesay yata opherta yemmi. Be an asohutoo'no mata hukahu hatawool hoo bâriiŋorut.
Jesus aymoom?
21 Ban Jesus naaniil joon: “Înje mbi ikay, mbi jipaamom, be mbi jiket di kûbajumiñaku katawuul mata binabu ba ikayem be, jeetubi jeeli jikay be bo.” 22 Ña yahaanay yata jûdewwi, ya kurinkoor ma kêenul: “Kama ma aanem di mo, binabu ba akayem be, ulaal mumulet bi ukaayaal be bo, soŋo pîya ma mbi abujooro?” 23 Be naaniil joon: “Miwuul jata ute di etaam, be înje jata hatiya. Miwuul di etaamay jiwoom, be înje iwolhut ute. 24 Momakiimom ma eenumuum mbi jiket di kûbajumiñaku katawuul. Malhegen mbi jiket di kûbajumiñaku katawuul, mata jîynent kaan înje igam înje.” 25 Ña di kurinkool keenool: “Kama aw ay?” Be Jesus naaniil: “Kama bu nilobuum kâtiyaar mata înje? 26 Malhegen nibaje wah wameeŋe wa îkimmi ilobuul matawuul, di poop waawu wameeŋe wa mbi igawuul batalenabu; mata anaw abollommi, oo anaw alhegenumaayaw. Moo, wahaw wa ijamem d'oo woowu keb wa ilobem âmbasuk peh.”
27 Be buko kunamulent kaan omalobem di buko mata Emitay, yaamom Ampawool. 28 Ña naaniil: “Na mbi jilhaalen Añool Ajamaat, mbi jîmir kaan înje igam înje, ban îgaworiit wah wakeel di hunongahu hûmbaam, be ya ilob non ma Ampawom alhikitenommi. 29 Mata anaw abollommi, omu d'înje. Moo âwalhoriitom bo diyoonom, mata ma igawem wahaw wâsuumewoom.”
30 Ña na aloom umu, bukan kameeŋe di kûynenool.
Bukanaku kagam emiikeelay
31 Ban Jesus naan jûdewwi kâynenoom: “Jenken jaa ma jisoh elobay yûmbaam, mbi jiga burebooraabu bûmbaam balhegenumaayabu; 32 ban jîmir jaa malhegenumaayamu, malhegenumaaya'umu di mumelhenuul.” 33 Be di keenool: “Ûli jata di êbajoorumay yata Abrawoŋ, ûli ugawurerut emiikeel yata an. Moo, mata wa ma oonumem d'ûli, malhegenumaayamu mbi mûmelhenoli?” 34 Be Jesus naaniil: “Ma isalhenuul eenuul, anaw abajem kûbajumiñ, oo amiikeelaw ata kûbajumiñaku. 35 Mata amiikeel, âlakuworiit di eluupay yata anaw akiloom be nanoonan. Be aŋilaw awoom di eluupay, ya alako dô be nanoonan. 36 Moo, Aŋilaw amellhenuu'jaa, mbi jimellh di malhegenumaayamu. 37 Înje nîmire kaŋ jak kaan, miwuul jata di êbajoorumay yata Abrawoŋ. Be palimo moo, miwuul mapaamem ma mbi jibujom, mata elobay ya ilobewuum jîgaworiit yo di uynumaw watawuul. 38 Mata înje ya ilob wahaw wa ijukulom baabu di Ampawom, be miwuul ya jiga waawa jijuum di ampawuul.” 39 Ña di keenool: “Ûli âmpawoli, Abrawoŋ.” Be Jesus naaniil: “Nokoor jaa non miwuul kuñool Abrawoŋ, mbi ya jigaween non ma oo agawem. 40 Ban jîkine ma jibujom înje jalobuum malhegenumaayamu ma ijamulom di Emitay. Kama Abrawoŋ mo ma agawem? 41 Miwuul ya jiga non ma ampawuul agawem.” Ña di keenool: “Ûli ampawaayaw anor nubaam, aamom Emitay. Ugawut bukan kaakutum ampawaay.”
42 Jesus naaniil: “Nokoor jaa non miwuul kuñool Emitay di malhegen, mbi jîkineenom, mata înje di Emitay nîcaalhumulom, momakiimom ma êemummi ute; ban ikaymuloot mata înje, mata yoo ebollommi. 43 Kama mata wa ma jînamulentummi wahaw wa ilobuum? Jinamulent, mata jîkint jijam wahaw wa ilobewuum. 44 Miwuul ampawuul diyaabu mo ma jîkinummi jiga wahaw wa yoo êkimmi. Mata yoo abujaaw kata kaŋ niŋanu, ban êloboriit malhegen, mata malhegenumaayamu mulee'di yo. Momakiimom na mbi elako di ecal, di elob non ma yoo yeenom, mata yoo agugujooraaw, ban poop yoo ampaw mûcalamu. 45 Be mata ma înje ilobewuum malhegen, momakiimom ma jîynentumommi. 46 Aymoom ata di miwuul aalim aanom nibaje hûbajumiñ? Moo, ilobuul jaa malhegen, mata wa ma jîynentumommi? 47 Mata anaw agam ata Emitay, ya atallhen elobay yata yo, be miwuul jîkint jitallhenom mata jigawut bukanaku kata yo.”
Jesus nahaŋe Abrawoŋ
48 Be jûdewwi di keenool: “Momakiimom ûli nukooŋe ma oonumim, aw Samariya nuwoom, ban amalaw omu d'aw.” 49 Be Jesus naaniil: “Înje eekut amal. Înje ya ijam di Ampawom, be miwuul ya jirembeelom. 50 Înje îpaamoriit ma kusalom, be anaw omu to agawem ma kusalom, ban oo agawem batalenabu be bata înje. 51 Ma isalhenuul eenuul anaw asoom elobay yûmbaam, aatubi aketurer.” 52 Ña jûdewwi buku di keenool: “Mowme nkit nûmire kaan kumalaku koku d'aw. Mata Abrawoŋ, di poop buñaaŋenaabu bata kûboñaku kata Emitay, kukeekeem; be aw noone anaw asoom elobay yatayi aatubi aketurer. 53 Kama aw nuhaŋe âmpawoli Abrawoŋ akeem? Nuhaŋe poop buñaaŋenaabu bata kûboñaku kata Emitay kakeem? Kama noone aw an bu?” 54 Be Jesus naaniil: “Nokoor jaa non înje ya isalooro, kasala'uku kujakut. Be înje Ampawom asalewommi, aamom a jeenem oo agam Emitay yatawuul. 55 Ban jîmirutool, be înje nîmirool. Mata eenuu'jaa îmirutool, non mbi igugujoor non miwuul. Mata ma îmiroom, ya iga non ma alobewommi. 56 Mata Abrawoŋ aamom ampawuul, sûmosuumoom noon na ajuum hukahu ha mbi îkayumul. Mata na ajuuhom, nâririgen noon.” 57 Ña di kurinkool keenool: “Ma aw ugaworutum ujaañaw kîyyaku kugaba di kunŋen, nuga bu ma ujuk Abrawoŋ?” 58 Be Jesus naaniil: “Malhegen neenuul, bala Abrawoŋ abaji, înje ma igam înje.”
59 Ña di kûkin kumabool kuwaaliisaku, be Jesus nâñooro dô di Eluupay yata Emitay, ban nâcaalh ma akay.