Jesus nabuunen âynaaw âwum di bâpuumerabu
9
Na Jesus agam oo ma areesem ma akay, najuk âynaaw âwum di bâpuumerabu. 2 Ña kurebooraaku katawool di kurinkool keenool: “Alhikitenaawe, kama âynaaw ume oo abaam hûbajumiñahu be mante kubajawool, makiim ma âwuwummi di bâpuumerabu?” 3 Be Jesus naaniil: “Ntuwa mata hûbajumiñahu hatawool, ntuwa poop mata hata kubajawool, be âwu mo ma mbi Emitay êyis sembaasu sata yo d'oo. 4 Moo, jake ma ugawaal bugoroorabu bata anaw abollommi mata tiroŋ di tititijen, mata tôtareesewuum ma mbi tijon na an aatubi aali agoroor. 5 Be magam niroŋe ute di etaamay, înje igam ehikitenumay yata yo.”6 Na aloom umu, ban nacuh di etaam ban nasiiw ko ma aga jikapaju, ban naŋaa'jo asaas di kûkilaku kata âynaaw umu. 7 Ban naanool: “Ukay ma nki ûbuuhul di humojahu hata Silowe” (daamom wahaw wabollim). Ña âynaaw umu nakay ki âbuuhul di humoja'uhu, ña nâlaañumuu'bo oo ma âjum ban.
8 Ña bukinooraabu batawool, di bukan kaaku kajukewoom bata kalhawaku kata esarahay di kêenul: “Kama ntuwa âynaaw ume oo ma aleehuwem ma ya alhaw esarahay?” 9 Kaaku di kêenul: “Oomu kaŋ.” Be kaaku di kêenul: “Ntuwa oo, âynaaw ume kunaamoor d'oo.” Be âynaaw umu naaniil: “Înje kaŋ.” 10 Ña di kurinkool keenool: “Kama bu nugawe ma kûkilaku katayi kûju?” 11 Naaniil: “Âynaaw a keenem Jesus oo ma asiiwum jikapaju, ban nasaasom jo di kûkilaku, ban naanom ikay ki îbuuhul di humojahu hata Silowe. Ña nîbuuhul, nîju.” 12 Di kurinkool joon keenool: “Âynaaw umu omu ûtey?” Naaniil: “Înje îmirut ba ammi.”
Phârisewwi di kurink âynaaw âpuumemmi
13 Ña di kuŋar âynaaw umu âpuumemmi be baabu phârisewwi. 14 Mata di hukahu hata hîyyaayahu hata jûdewwi no na Jesus agam jikapaju, ma âbuunenum jo kûkilaku kata âynaaw umu. 15 Ña phârisewwi poop di kurinkool maama agam ma kûkilaku katawool kûju. Naaniil: “Oo asiiwum jikapaju, ban naŋaa'jo asaas di kûkilaku kûmbaam, ña nîbuuhul nîju.”
16 Ña phârisewwi kaaku di keenool: “Âynaaw umu ntuwa an ata Emit, mata nahuusule hukahu hata hîyyaayahu hatoolaal.” Be bukaaku di kêenul: “Kama ajamaat agawem kûbajumiñ, naaliye aga miñamu mata sembaasu sata Emitay non ma âynaaw umu agam? Ña di gîitoor dô ma kuga waasaaw.” 17 Ban di kurik joon âynaaw umu âpuumemmi ma keenool: “Aw bu nunongum mata âynaaw umu agawim ujuk?” Naaniil: “Âynaaw umu añaaŋenaaw ata kûboñaku kata Emitay.”
18 Be yahaanay yata jûdewwi di kêenul, mumulet bi kûynen kaan âynaaw umu nâpuumenpuumemmi, buko bâwolloot kubajawool. 19 Na kûwollim di kurinkiil keeniil: “Âynaaw ume añooluul a kemmi di bâpuumerabu nabajim? Moo, bu nagawe ma ajuk?” 20 Ña kubajawool di keeniil: “Malhegen ume âñoololi, di bâpuumerabu nubajoom, 21 be ûli ûmirut maama agam ma ajuk, ga jaa non anaw agawoomom, ûli ûmirut. Be magam oo annahaanaw, jirinkool ma mbi añaaŋenuul.” 22 Be wahaw wakiim kubajawool di kûlobum umu, mata ma kûkolim yahaanay yatayiil, mata buko baanee'ban anaw a mbi âanul Jesus agam Kristu, mbi kucah d'oo di eluupay yata kâmebooraku katayiil. 23 Momakiimom ma kubajawool kêenumiim magam oo annahaanaw nagam kurinkool.
24 Ña phârisewwi di kurink joon âynaaw umu âpuumemmi ma keenool: “Ulob malhegen kayooŋ di Emitay. Jijaa, ûli nûmire kaan âynaaw umu anaw agawem kûbajumiñ.” 25 Be âynaaw umu naaniil: “Ga jaa non âynaaw umu ya aga kûbajumiñ, înje îmirut. Be miñamu ma inja îmiim, înje nîpuumempuumemmi, be jaat nijuke.” 26 Di kurinkool joon keenool: “Kama bu nagawe ma agawi ma ûju?” 27 Naaniil: “Inja niñaaŋenuu'ban, jîynent. Mata wa ma jîkimmi iñaaŋenuul joon? Kama miwuul pîya jîkine jiga kurebooraaku katawool?” 28 Na alobiim umu, ña di kugelool ma keenool: “Aw kaŋ ugam arebooraaw atawool. Ûli kurebooraaku kata Moyses. 29 Mata ûli nûmire kaan Emitay elooloom di Moyses, be âynaaw umu, ûli ûmirut ba awoom.” 30 Ña âynaaw umu naaniil: “Bee, mûpuñuneniye! Jeene jîmirut baaba awoom? Be oo agawommi ijuk. 31 Mata ulaal nûmiraale kaan Emitay êjaamoriit bukanaku kagawem kôji, be ya ejam kaaku kajamem di yo, ban di kuga non ma yoo êkimmi. 32 Ban kata kaŋ niŋanu na etaamay ecookoorim be jaat, ujamorutaal an agawe an abajim di bâpuumerabu ajuk. 33 Moo, âynaaw umu agawent jaa anaw ata Emitay, aatubi aaliyeen agaween makeel.” 34 Ña di keenool: “Aw jabajim di kûbajumiñaku, aw mbi ûlhikitenoli?” Ña di kucah d'oo ma âcaalh di eluupay yata kâmebooraku katayiil.
Bukanaku kahammi mâpuum
35 Ban Jesus najam kaan phârisewwi kucahe di âynaaw umu. Be na kupammi d'oo, narinkool aanool: “Aw nûynene Añool Ajamaat?” 36 Âynaaw umu naanool: “Annahaanaw, anaw umu ôomey, ma îynenool?” 37 Ña Jesus naanool: “Nujukoo'ban, oo ma jilobem di ume!” 38 Ña âynaaw umu naanool: “Ata Emit, nîyneni.” Ban nâtiigen ma âbinkenool.
39 Ña Jesus naanool: “Înje, înje ikaylom be ube di etaamay bi iga bukanaku batalenabu, ma kaaku kâpuumum kujuk, kaaku kajuum, di kûpuum.” 40 Be na phârisewwi kalakotom kujammi ma Jesus aloom umu, ña di keenool: “Soŋo kama ûli poop, ûli umu ma ûpuumum?” 41 Naaniil: “Miwuul jîpuumen jaa, jeetubi jibajeen kûbajumiñ, be ma jemmi miwumu ma jijukem, ña mbi jilako to di kûbajumiñaku katawuul.”