Jesus âtekenaaw alhegenumaayaw
10
Ban Jesus naaniil joon: “Ma isalhenuul eenuul, anaw anebejutum di êtingaay yata bubababu bata hûtekenahu hata sîgaraniinaasu, ma âyuurumul tiŋ taatu, oo âkuutaaw, ban oo âlhapitaaw. 2 Be anaw anebeem di êtingaay, oo agam âtekenaaw ata sîgaraniinaasu. 3 Apooyaaw ata êtingaay nâbabul âtekenaaw, sîgaraniinaasu di sijam hurimahu hatawool, di simanj ho. Ban nâwoo'so yanooyan di kañaaŋaku kata yo, ma âcaalhul di so be tîyaŋ. 4 Na mbi âcaalhul di so tîyaŋ, nayaa'so kayooŋ; soo di sisoolhenool, mata ya simanj hurimahu hatawool. 5 Be setubi sisoolhenurer anaw a sîmirutum, mata mbi ya siteyool ma sîmirutum hurimahu hatawool.” 6 Be palimo ma Jesus añaaŋemmi phârisewwi kaliikuma'uku, be kunamulent wahaw wa âkimmi alobiil.7 Ban Jesus naaniil joon: “Ma isalhenuul eenuul, înje igam êtingaay yata bubababu bata hûtekenahu hata sîgaraniinaasu. 8 Be kaaku peh kasingulommi kûkayil, buko peh bûkuutaabu, ban buko poop bûlhapitaabu, sîgaraniinaasu sîtallhenoriitiil. 9 Înje igam êtingaay, anaw anebeem d'înje, mbi apak. Mbi aga non êgaraniinaay ya mbi ênebejul, ban êcaalh, di ebaj mûheniinaayamu lhay ehen. 10 Mata âkuutaaw ya âkayil keb bi âkuut, nabuj, nakajen. Be înje, înje ikaylom bi iga bukanaku kuroŋ, ma kuroŋ be nanoonan.”
11 Ban naaniil joon: “Înje âtekenaaw âsuumaaw; mata âtekenaaw âsuumaaw ya âketum mata sîgaraniinaasu satawool. 12 Be anaw agoroorem keb mata bancaamabu agawutum âtekana, sîgaraniinaasu sîmiroriitool mata akiit so. Na mbi eŋiiriŋay êkayil bata so, natey ma abee'so ma esoo'so, di siwaasoor. 13 Malhegen anaw ammi ma agoroorem keb mata bancaamabu, mbi atey. Mata leetubi laañool mata sîgaraniinaasu. 14-15 Înje âtekenaaw âsuumaaw. Non ma Ampawom âmirommi, mo ma înje poop kaŋ îmiroom. Nîmir poop sîgaraniinaasu sûmbaam, soo poop di sîmirom. Moo, îkoliit kaket mata so. 16 Be sîgaraniinaasu saasu sosu bo saleem ûde di hûtekena'uhe. Moo, jake ma ibom so tanor, ma iga so di hûteken hanor, di sibaj poop âtekenaaw anoraw, ma mbi ya sijam hurimahu hûmbaam.
17 “Momakiimom ma Ampawom âkinumommi, mata îkoliit kaket, ban nilaañ joon îroŋul. 18 Înje an aaliit abujom, be înje îkimmi ma mbi kubujom. Mata nibaje sembe ma îkin ma kubujom, nibaje poop sembe ma ilaañ joon îroŋul; mata mo ma Ampawom aboñumulommi bi ga.”
19 Na jûdewwi kujammi ma aloom umu, ña di kuga to bûñoosoorabu. 20 Ña bukan kameeŋe ya kêenul: “Ume kumalaku koku d'oo, omu ma awuutom. Mata wa ma jitallhenumem d'oo?” 21 Ña bukan kaaku di kêenul: “Balobera'ube bunaamoorut di bata an a kumalaku kemmi d'oo. Kama amal, naaliye aga an âpuume ma ajuk?”
Êsukay di kulat Jesus
22 Di êsukay yata Jerusaleŋ kâlundaayaku kata buyintenabu bata Eluupay yata Emitay,a di kuga no. Be nownu nata kûwaagenaku. 23 Ña Jesus ya areesoor dô di Eluupay yata Emitay di buhandabu bata Salomoŋ. 24 Ña jûdewwi di kuŋoomenool ma kurinkool keenool: “Ûney mbi ûloboli salh ma ûmir mante aw kaŋ Kristu, ma aatuba umantiir?”
25 Be Jesus naaniil: “Înje niñaaŋenuu'ban, be jîynent. Be wahaw wa igawem di kañaaŋaku kata Ampawom, ûyisem mûmbaam, 26 be miwuul jîynent mata jigawut sîgaraniinaasu sûmbaam. 27 Mata sîgaraniinaasu sûmbaam, înje nîmii'so, ya sijam hurimahu hûmbaam, ban ya sisoolhenom. 28 Înje mbi iga so siroŋ be nanoonan, ban setunki sinepurer, mata an aaliit abot so di uŋenaw wûmbaam. 29 Mata Ampawom awulonsom, sembaasu satawool, sihaŋe sembe peh; momakiimom an aaliit abot so di uŋenaw watawool. 30 Mata ûli di Ampawom, anaw anoraw.”
31 Ña di kûŋarul joon kuwaaliisaku ma kûkin kumaboo'ko. 32 Be Jesus naaniil: “Kuk kameeŋe, ya iga wahaw wajakaaw ta jemmi wa Ampawom abollommi bi ga. Moo, wah bu wata di wo wajakutum wakiim wa mbi jimabumom kuwaaliisaku?” 33 Ña di keenool: “Ntuwa mata wahaw uwu wajakaaw, wo wa mbi umabumi kuwaaliisaku, be mata ma ûgelikoorem di Emitay. Mata aw jagam ajamaataw, ma oonem di mo, aw Emitay.”
34 Be Jesus naaniil: “Kama lee'ma ŋiicim di kûboñaku katawuul di kaan, Emitay yeene, miwuul simitasu? 35 Kama Emitay êwoo'jaa ejamaatay ka yoo ebollom elobay yata yo, ma yêenul buko simitasu, ban nûmiraale kaan elobay yata Emitay malhegen; 36 benkiteemo înje ja Ampawom agawommi anaw anapaaw, ban nabollom be ube di etaamay, di jêenul nîgelikoore Emitay mata ma emmi înje Añool yo? 37 Gaween jaa non igawut bugoroorabu ba Ampawom abollommi bi ga, ña aatuba jîyneneenom. 38 Be magam înje magawem di bo, palimo ma jîynentommi, be di jîyneneen bugoroora'ubu, ma mbi jinamulen, di jîynen kaan Ampawom omu d'înje, înje poop, înje omu d'oo.”
39 Ña nki di kûkin joon kusohool, be namellh di buko. 40 Ban Jesus nalaañ joon be kareb kaaku kata kaalaku kata Jordoŋ ba Joŋ ya âbatisum bukanaku kâtiyaar, âriiŋ nalako bo. 41 Be bukan kameeŋe ya kukay ki kutookoo'bo, ban ya kêenul: “Malhegen Joŋ, agawut êmanjum yakeel. Be wahaw peh wa aloom mata âynaaw ume, malhegen.” 42 Ña bukan kameeŋe kakayum be bo, di kûynenool.