Eketay yata Laasaru
11
Be âynaaw aahu nâjuut aaneyim Laasaru ata di jîsukaju jata Betaaniya.a Baamom ba Mariya, koo di Marta, kaamom kûliinool kukimmi. 2 Mariya umu, oo abiim bi asaas Jesus muheeñamu di ulehetaw, ban nâbeesum wo walaw watawool. 3 Ña kûliinool buku egabaay, di kuboñ ki keen Jesus: “Ata Emit, apaali Laasaru a uboolaatum âjuut.”4 Be na kuloomom Jesus, ña nâanul: “Kâjuuta'uku untuwa kata eket, be kata ma mbi Emitay esali, Añool Emit poop, nasalumi to.” 5 Malhegen Jesus naboolaatboolaat Marta, di atiyool, di poop Laasaru. 6 Be na ajammi kaan Laasaru âjuut, nalako bo para kukaku kugaba. 7 Ban naan kurebooraaku katawool: “Ulaañaal joon be Jûdeya.” 8 Kurebooraaku katawool di keenool: “Alhikitenaawe, inja piyowut na jûdewwi kûkimmi kumabuli kuwaaliisaku, nki nulaañ joon be bo?” 9 Be Jesus narinkiil aaniil: “Kama hukahu hubajut siwooraasu kunŋen di sigaba? Anaw areesum tutulaaru mumulet bi âpungulho, mata omajukem majaaŋaamu. 10 Be anaw areesum busonnaaru, mbi âpungulho mata jaaŋut.” 11 Ban naan kurebooraaku katawool: “Apaalolaal Laasaru, omu ma aŋotum, ukaayaal ma nki itonkool.” 12 Be Kurebooraaku katawool di keenool: “Ata Emit ga jaa non omu ma aŋotum, kama mbi âju.” 13 Na Jesus ya aloom umu, oo ma alobem mata eketay yata Laasaru, be kurebooraaku katawool di gawiil non omu ma alobem mata kaŋotŋot. 14 Ña Jesus nasallheniil jak ma aaniil: “Laasaru nakete ban, 15 be nîririgene mata ma ilakowututom ma mbi jeeli jîynen; moo ukaayaal be bo!” 16 Ña Tome aaneyim poop Magabaamu, naan kupaalool: “Ukaayaal poop ma nki uketaal tanor d'oo.”
Jesus nalob mata jalhaalaaju jata di kuketaaku
17 Na Jesus ârimmi di jîsuka'uju jata Betaaniya, najam kaan Laasaru nagawe ban kukaku kubakiir di êluŋay. 18 Ban ebankay yata Betaaniya di Jerusaleŋ, yeeli êriiŋ sikilometrasu sîhaaji. 19 Ña jûdewwi kameeŋe, di kukay be bo ki kûlobul di ñikulañu ñata Marta koo di Mariya. 20 Na Marta ajammi kaan Jesus ômareesewuum, ña nâkayil ki kupam. 21 Âriiŋ naanool: “Ata Emit, non awumuyeen ute, âliinom aatubi aketeen. 22 Be palimo magam ume, nîmire kaan wahaw peh wa mbi ulhaw Emitay, mbi ewuli wo.”
23 Ña Jesus naanool: “Âliini mbi âlhaalowul di kuketaaku.”
24 Be Marta naanool: “Înje nîmire kaan mbi âlhaalowul di kuketaaku di hukahu hûbanumahu.”
25 Ña Jesus naanool: “Înje alhaalenaaw ata kuketaaku, înje igawem an aroŋ. Anaw âynenommi, palimo oo akeem, mbi aroŋ. 26 An peh arommi, ban nâynenom, aatubi aketurer. Nûynene?”
27 Ña Marta naanool: “Ata Emit, nîynene! Nîynene kaan aw Kristu, aamom Añool Emitay a mbi âkayil be ube di etaamay.”
Jesus nakaaw Laasaru
28 Na aloom umu, ban nakay ki âwoolul atiyool Mariya âriiŋ di kulob diyooniil ma aanool: “Alhikitenaaw omu ute, ômawoolem d'aw.”
29 Na Mariya ajammi ma aloboom umu, ña nañaah cab ma akay ki atoo'bo Jesus. 30 Be Jesus oo banebejorut di hankahu, oo baroŋ ta kupammi di Marta. 31 Ña jûdewwi kalakotom di Mariya di eluupay ma ya kûtikenool, na kujukoom ma alhaalom cab ma âcaalh, ña di kusoolhenool ma kêenul mante omakayem ma nki akaaw di êluŋay.
32 Be na Mariya ârimmi ta Jesus ammi ajukool, ña nalo to di ûkandumaw watawool, ban naanool: “Ata Emit, non ute nulakuwemmi, âliinom aatubi aketeen.”
33 Na Jesus ajukoom ma akaawem, koo di jûdewwi ka kureboorlom, di mulaañool, ña nañankiit noon.
34 Ña narinkiil aaniil: “Kama ûtay jihokoom?” Di keenool: “Bila ki ujuk.”
35 Ña Jesus nakaaw.
36 Ña jûdewwi di kêenul: “Jijuke non ma âkinoom!”
37 Be bukaaku di kurik ma ya kêenul: “Inja oo agam âynaaw âpuumaaw ma ajuk, moo aaliit poop agaween Laasaru ma aatuba aket?”
Laasaru nâlhaalowul di kuketaaku
38 Ban Jesus nalaañ joon añankiit; ña nakay be di êluŋay. Be êluŋa'uyu yoyu ma ewokim non kâgoboŋ, ban di kuŋar huwaaliisahu hâamak kûbaahenum êtingaay yata yo. 39 Ña Jesus naaniil: “Jîcaalhen huwaaliisahu.” Be Marta âliin aketaaw naanool: “Ata Emit, ehuluŋaayay ekaañuwe ban, mata egawe ban kukaku kubakiir.”
40 Be Jesus narinkool aanool: “Kama eenuti ûynen jaa, mbi ujuk sembaasu sata Emitay?”
41 Na kûbaahuum êluŋay, ña Jesus nalhag be hatiya, ban nâanul: “Ampoom, nisali non ma ujamommi. 42 Nîmire kaan ya ujamom huk peh, be ilobi ume mata buyooŋa'ube bata bukanaku kammi ute, ma mbi keeli kûynen kaan aw ubollommi.”
43 Na aloom umu ban, ña nâŋaaŋulo ma âanul: “Laasaru, ûcaalhul be tîyaŋ.”
44 Ña aketaaw nâcaalhul, be uŋenaw di ûkandumaw watawool woo ma ubooñenim kukokaaku, buulabu batawool poop boo ma bubaahenim eleesaay. Ña Jesus naaniil: “Jihellool ma mbi aali arees.”
Jûdewwi di kûkin kubuj Jesus
45 Ña bukanaku kameeŋe kagam jûdewwi kakaylom ki kulob di Mariya, di kujuk wahaw wa Jesus agam, di kûynenool.
46 Be bukan kaaku kata di buko di kukay ki kuñaaŋen phârisewwi wahaw wa Jesus agam. 47 Ña yahaanay yata bumaaŋenaabu bata Emitay, di phârisewwi, di kûwool Hulhanahu Hâmakaahu, ban di kurinkoor ma ya kêenul: “Bu mbi ugawaal, ma âynaaw ume agawem di ume miñamu lhay mata sembaasu sata Emitay? 48 Uwalhaaloo'bo jaa, bukanaku peh mbi kûynenool, ban romanuyi mbi kuyab d'ulaal Eluupay yata Emitay, di poop etaamay yatoolaal.”
49 Ña aahu ata di buko aaneyim Kayphaas, aganom annahaanaw âmakaaw ata bumaaŋenaabu bata Emitay di kajaaña'uku, naaniil: “Miwuul jîmirut makeel! 50 Kama jinamulent kaan haŋ majak ma an anor aket mata êsukay, ma aatuba bi bukanaku peh kûbuyo.” 51 Malhegen Kayphaas, hurima'uhu ha aloom ntuwa hatawool, be mata ma aganom annahaanaw âmakaaw ata bumaaŋenaabu bata Emitay, mo ma Emitay êgawummi hurima'uhu di butumabu batawool, ma âanul Jesus mbi aket mata êsukay. 52 Be ntuwa keb mata êsukay, be ma mbi âmeb ejamaatay kammi ma kuwaasoorum tiŋ peh, ma agawiil an anoraw.
53 Ña di huka'uhu, ya kupaam ma mbi kuga ma kubujool. 54 Momakiimom ma Jesus âlaañutummi joon arees way ta jûdewwi kemmi, ma akay be di jîsukaju jaaneyim Ephrayiŋ, jata di bantaabu bagam ekinkay bantom reeken, ki kulako bo koo di kurebooraaku katawool. 55 Be kâlundaayaku kata jûdewwi kaaneyim Paaskuwa, koo ma kuhuutum ban. Ña bukan kameeŋe kata di bantaa'ubu, di kukay be Jerusaleŋ ki kûbuyoor di Emitay bala kâlundaaya'uku kûriiŋ. 56 Be ma ya kupammi Jesus, ña ya kurinkoor di Eluupay yata Emitay ma ya kêenul: “Bu jinongum? Soŋo pîya, mbi âkayil kâlundaaya'uke?” 57 Be yahaanay yata bumaaŋenaabu bata Emitay, di phârisewwi, koo ma kemmi ban, anaw a mbi âmir ta Jesus ammi, nañaaŋeniil ma mbi kusohool.