Hunongahu hata jabujaju jata Jesus
26
Na Jesus alhikitemmi bukanaku wahaw uwu, ban naan kurebooraaku katawool: 2 “Jîmire kaan ute be kukaku kugaba, kâlundaayaku kata Paaskuwa di kuga; naamom na mbi Añool Ajamaat awuli bukanaku ma kuriiŋool di êkrusay.”3 Ña yahaanay yata bumaaŋenaabu bata Emitay, di yahaanay yata êsukay, di kûmeboor di kâyyaku kata annahaanaw âmakaaw ata bumaaŋenaabu bata Emitay, aaneyim Kayphaas. 4 Ña di kujamoor ma kêenul mbi kusoh Jesus ma kubujool an bâmirut. 5 Be ban di kêenul jakut ma kuga mo di kukaku kata kâlundaayaku ka mbi bûgagaroorabu bûlhaalowul di êsukay.
Añakanaw nâyu Jesus muheeñamu di hûkuwahu
6 Ña na Jesus agam omu di êsukay yata Betaaniya, di eluupay yata Simoŋ a êtoogoonay esohemmi, 7 ña añakanaw aahu nâkayil bi âtookoo'dô oo ma asohulom jîrungaju jateepumim miñamu maaneyim alabastru, joo ma jemmi huc muheeñamu maseerum noon, ban nâyu yo di hûkuwahu hata Jesus. 8 Na kurebooraaku katawool kujuum wahaw uwu, di mulaañiil, ña di kêenul: “Kama mata wa nakajen yo? 9 Muheeña'umu meeliye munoomeeni bancaamabu bayejum ban di buwuli kûsukateenaku.” 10 Be Jesus nanamulen wahaw wa ya kuloom, ña naaniil: “Mata wa ma jîlaamenumem di añakanaw? Wahaw wa agawommi, ujake. 11 Mata kûsukateenaku mbi jilako di buko tanor kukaku peh, be înje ootubi ulakuwaal tanor kuk peh. 12 Moo, ma âyuwommi ume eheeña'uye, nâyuwom yo ban be huhokaku hûmbaam. 13 Ma iñaaŋenuul malhegen eenuul, tiŋ kaŋ peh di etaama'uye ta mbi elobay yâsuumaay elobi, mata añakanaw ume poop mbi muñaaŋeni ma awolhuwi.”
Judas naŋoon Jesus
14 Ña aahu ata di kurebooraaku katawool aamom ata di buku kunŋen di egabaay aaneyim Judas Iskariyotis, nakay ki kûjamoorul di yahaanay yata bumaaŋenaabu bata Emitay. 15 Âriiŋ naaniil: “Wa mbi jiwulom, înje bawuleruul Jesus?” Ña di kuwulool bampeesaabu anabawo di kunŋen bata praata. 16 Ña Judas ya apaam maama mbi aga ma awuliiwool.
Huriyahu hata kâlundaayaku kata Paaskuwa
17 Na hukahu hûtiyaarahu hûrimmi hata Kâlundaayaku kata Kûmburuwaaku kaakutum phermentu, kurebooraaku kata Jesus di kûhugool ma kurinkool keenool: “Ûtey ta ûkimmi ma mbi ubandoori huriyahu hata Paaskuwa?” 18 Ña Jesus naaniil: “Jikay be di hankahu, jîriiŋ di jeen âynaaw a mbi jijuk, alhikitenaaw naane hukahu hatawool huhuute kâriiŋ, be yanŋi mbi aga Kâlundaayaku kata Paaskuwa koo di kurebooraaku katawool.” 19 Ña di kuga non ma alobiim, ban di kubandoor dô huriyahu hata Paaskuwa.
20 Na jaley agam ma ajon, ña Jesus naleeho di emeesaay koo di kurebooraaku katawool kunŋen di egabaay. 21 Na kugam kokariyem, Jesus naaniil: “Ma ilobuul malhegen eenuul, an aahu ata di miwuul mbi aŋoonom.” 22 Ña buko kaŋ peh di kuga ñânkiiteni noon, ban ya kurinkool anor, anor ma ya kêenul: “Ata Emit, kama înje pîya?” 23 Be Jesus naaniil: “Anaw a ûli ommi ma ûjupem manor di karaataaku, oo ma mbi aŋoonom. 24 Malhegen Añool Ajamaat mbi agawi non ma demmi ma ŋiicim matawool, be buhiiraabu mbi busoh anaw umu a mbi aŋoonool. Be haŋ majak ma anaw umu aatuba abajeeni.” 25 Ña Judas aamom aŋoonoom narinkool aanool: “Alhikitenaawe, kama înje pîya?” Be Jesus naanool: “Aw uloomom.”
26 Na kugam kokariyem, Jesus nasoh hûmburuwaahu ma asal Emitay, ban natii'ho awul kurebooraaku katawool, ban naaniil: “Aayuwaal jiri, ûde eniilay yûmbaam.” 27 Ban nasoh poop jikoopaaju ma asal Emitay, ban nawuliil ma aaniil: “Aayuwaal jisiben miwuul peh. 28 Mata ûde hûsimahu hûmbaam hata yaŋaayay yunkulaya hâhipim be bata japasaju jata kûbajumiñaku kata bukan kameeŋe. 29 Moo, ma ilobuul eenuul, mowme be kayooŋ eetunki ijakenurer bunukabu bata ûuba be na mbi ujakenaal baabu bunkulabu di Kâyyaku kata Ampoom.” 30 Ña di kuyeeŋ uñaaŋaw ma kusal Emitay, ban di kûcaalh ma kukay be di hurimbiliŋahu haaneyim Oliveyra.
Jesus nañaaŋen Pedru kaan mbi alatool
31 Ban Jesus naan kurebooraaku katawool: “Jaat hukare miwuul peh mbi jiteyom, mata dôdu ma ŋiicim kaan: ‘Mbi ibuj âtekenaaw ma sîgaraniinaasu sata hûtekenahu siwaasoor.’ 32 Be na mbi îlhaalowul di kuketaaku, mbi iyabuul kayooŋ be Gâlileeya.”
33 Ña Pedru naanool: “Palimo bukanaku peh kulati, be înje eetubi ilati.” 34 Be Jesus naanool: “Ma iñaaŋeni malhegen eeni hukare, bala kalhitaaku kulhit, mbi ulatom ñeemo ñâhaaji.” 35 Be Pedru naanool: “Palimo ma uketa tanor, be înje eetubi ilatureri.” Ña kurebooraaku kaaku poop katawool di kuloo'mo.
Jesus nalhaw Emitay Jetsemaani
36 Ban Jesus nakay di kurebooraaku katawool be tiŋatu taaneyim Jetsemaani kûriiŋ naaniil: “Jileeho ute ma înje ikay unta ki ilhaw Emitay.” 37 Be nammi akay, naŋarnen Pedru, di kuñool Jebedew egabaay. Ña bûyegetabu batawool di bûgun, ña di gawool ñânkiiteni noon. 38 Ña naaniil: “Bûyegetabu bûmbaam bobu ma bûgunum noon, poopii înje umu mammi iket, moo jilako ute d'înje ma upooyaal.”
39 Ban narees deh, ña nîtiigen ma aya buulabu di etaam ma alhaw Emitay âanul: “Ampoom, ooli jaa numelhenom di jikoopaa'uje jata hûlaamahu, be ntuwa non ma înje îkimmi, be non ma aw ûkimmi.”
40 Ban nâlaañul be ta kurebooraaku katawool kemmi, âriiŋ natookiil ma kuŋotum. Ña naan Pedru: “Kama jeeliit jimunten ma upooyaal palimo ewooraay yanor? 41 Jipooy ma jilhaw Emitay ka mbi jilo di kabuntenaku. Malhegen di ûyegetaw watawuul jîkine jiga mo, be siniilasu satawuul sibajut sembe.”
42 Ban nalaañ joon ki alhaw Emitay ma âanul: “Ampoom, ga jaa noon jikoopaa'uje jata hûlaamahu jeeliit jîragiyeni ma etukasiben jo, ña kama nuga non ma ûkimmi.” 43 Ban na alallom, natookiil joon koo ma kuŋotum, mata kûkilaku katayiil ma kûnaatum. 44 Ña nawalhii'to joon ma akay ki alhaw Emitay hûhaajutahu, âriiŋ nalob elobay yanoray. 45 Ban nalaañ joon ki atoo'to kurebooraaku katawool âriiŋ naaniil: “Kama jiroŋ ma jiŋotum? Jijaa, tîriiŋe ma Añool Ajamaat mbi awaleni di uŋenaw wata ejamaatay. 46 Jilhaalo ma ukaayaal! Mata anaw a mbi aŋoonom nahuutulo ban.”
Jesus di kusohool
47 Be oo baroŋ ma alobem, ña Judas ata di kurebooraaku katawool kaamom kunŋen di egabaay, nâriiŋul di buyooŋabu bata bukanaku, koo ma kusohulom ujaasiyaaw, di sijanasu, di kûgolaku ka bumaaŋenaabu bata Emitay, di yahaanay yata êsukay kubollom. 48 Be aahu aŋoonum Jesus oo ma aaniim ban: “Anaw a nki îpoon, oo ma mbi jisoh.” 49 Ña nakay ki âhug Jesus ban naanool: “Alhikitenaawe, nisaapi.” Ban nâpoonool.
50 Ña Jesus naanool: “Apaalom, bata wa nukaylom?” Ña di kûkayil bi kusoh Jesus, ban di kugenkool. 51 Aahu ata di kurebooraaku kata Jesus, nâlhiimulul kajaasiyaaku ma alhib agorooraaw ata annahaanaw ata bumaaŋenaabu bata Emitay, ma atij kâjaŋayaku. 52 Ña Jesus naanool: “Ulhiimen kajaasiyaaku katayi, mata bukanaku kâseekumem ujaasiyaaw, di ujaasiyaaw poop mbi kûketum. 53 Kama gawi noon eeliit ilhaw Ampoom, ma abollom mowme buyooŋabu bata kumalaakaku kârimmi sînjunnaasu bukanaku êhaaji di kunŋen di egaba (72.000)? 54 Be iga mo jaa, bu mbi ga ma ga non ma Baŋiicerabu Bâñoyyaabu buloom kaan wahaw uwu mbi uga?”
55 Ña nownu, Jesus naan buyooŋa'ubu: “Miwuul ma jikaylom ume di ujaasiyaaw, di kûgolaku bi jisohom non înje âkuuta nigawe? Inja ulaal ya ulakuwaam tanor kukaku peh di Eluupay yata Emitay ma ya ilhikitenuul elobay yata yo, jisohutom. 56 Be wahaw uwe peh uga mo, ma mbi meeli muga non ma Baŋiicerabu bata buñaaŋenaabu bata kûboñaku kata Emitay buloom.”
Ña kurebooraaku katawool peh di kutey ma kubetool.
Jesus naŋari be di Hulhanahu Hâmakaahu hata jûdewwi
57 Ban bukanaku kasoom Jesus, di kuŋarool be di eluupay yata annahaanaw âmakaaw ata bumaaŋenaabu bata Emitay aaneyim Kayphaas, dâ buŋiicaabu bata kûboñaku kata Emitay, di yahaanay yata jûdewwi kûmeboorum. 58 Ña Pedru nasoolhenool ma ya arees râagi be na kûrimmi di ekaakay yata eluupa'uyu yata annahaanaw âmakaaw ata bumaaŋenaabu bata Emitay. Ña naleeŋo dô ma aleeho ta bupooyaabu kemmi ma ya ajiker wahaw wa mbi uga.
59 Ña yahaanay yata bumaaŋenaabu bata Emitay, di poop bukanaku peh kata di Hulhanahu Hâmakaahu, ya kupaam maama mbi kusoosenool ma mbi kêenul nabaje hûbajumiñ, ma mbi kubujool. 60 Be palimo ma bukaaku ya kusoosenoom, be kujukut makeel d'oo. Ña bukaaku egaba, di kûlhaalowul 61 ma kêenul: “Âynaaw ume naane oo naaliye awap Eluupay yata Emitay, ban nateep yo di kukaku kûhaaji.”
62 Ña Annahaanaw ata bumaaŋenaabu bata Emitay, nalhaalo ma narink Jesus aanool: “Otukalaañeniil mata wahaw wa kulobem di wo matayi?” 63 Be Jesus napato gib. Annahaanaw umu ata bumaaŋenaabu bata Emitay, naanool joon: “Unuur ma be bata Emitay yaroŋaay, mante aw kaŋ Kristu, Añool Emitay?”
64 Be Jesus naanool: “Aw uloomom. Be ma iñaaŋenuul eenuul, ute be kayooŋ, mbi jijuk Añool Ajamaat ma aleehom di kaŋen kûrir kata Emitay Yata Sembaasu, oo ma âkayewuum hatiya di emitay di uwiiñaw.”
65 Ña annahaanaw umu ata bumaaŋenaabu bata Emitay naruusulooro bûjupaabu batawool ma âanul: “Nâgelikoore Emitay! Ay nki bi urinkaal joon? Inja miwuul peh jijame maama âgelikooruyom! 66 Ña bu jinongum?” Di keenool: “Mbi aket!”
67 Ña bukaaku di kucuhenool di buulabu, ban ya kumabool sînduukaasu, kaaku ya kumabool umiñaw di buulabu, ban ya keenool: 68 “Inja aw Kristu, ûñaaŋenoli ma anaw amabim.”
Pedru nalat Jesus
69 Ban na Pedru aleehom di ekaakay, âjuraw aahu agam agorooraaw nâkayil be to âriiŋul naanool: “Aw poop miwuul jireboorem di Jesus ata Gâlileeya.”
70 Ña Pedru nalat kayooŋ di êsukay ma âanul: “Înje îmirut wahaw wa ulobem di wo?” 71 Na âcallhom di êtingaay yata ekaakay, âjuraw aahu agam poop agorooraaw najukool, ña naan bukanaku kalakotom: “Ume poop koo kulakuwem tanor di Jesus ata Nasare.” 72 Be Pedru nalat joon ma anuur, ban nâanul: “Înje îmirut âynaaw umu.”
73 Piyowut, bukaaku kalakotom di kûhug Pedru ma keenool: “Malhegen aw poop ata di buko, mata baloberabu batayi bûmanjuneniye.” 74 Be Pedru nânuurikoor ma âanul: “Înje îmirut âynaaw ume.” Ña kalhitaaku di kulhit. 75 Ña Pedru nawolho non ma Jesus alobenoom aanool: “Bala kalhitaaku kulhit jaat, aw baanee'ban ûmirutom ñeemo ñâhaaji.” Ña nâcaalhul ma akaaw ma ya alhooŋooro.