Kaliikumaku kata ûjuraw
25
Ban Jesus naaniil joon: “Kâyyaku kata hatiya di emitay, koo kugam poop non ûjuraw kunŋen kâmirorutum ânniine, kaŋaam sihikitenumasu satayiil ma kukay ki kupam di âbutuwaaw. 2 Be di ûjuraw uwu, hutok di kujaalho, hutok poop di kûnuuto. 3 Buku kânuutuwaaku, na kukayum di sihikitenumasu satayiil kuŋarnent êduuliinaya yakeel joon. 4 Be bukaaku kajaalhuwaaku, di kukay di sihikitenumasu satayiil, ban di kuŋarnen êduuliin yaayu di uraahaaw. 5 Be ma âbutuwaaw apiyowulom, ña di kûŋalab poopii di kuŋot. 6 Be na hukahu hugam hurewe, ña di kûjamul ma lhokulom lôo, ma ya kêenul: ‘Âbutuwaaw ômareesewuum! Jiga ma ukaayaal ma nki upamulaal d'oo!’ 7 Ña ûjuraw uwu kunŋenay, di kutonko ma kubandoor sihikitenumasu satayiil. 8 Ña bukaaku kânuutuwaaku di keen bukaaku kajaalhuwaaku: ‘Jîwuloli di êduuliinay yatawuul, mata sihikitenumasu sâtooli sosaŋ sihoko.’ 9 Be buku kajaalhuwaaku di keeniil: ‘Êduuliina'uye yeetubi etookolaal, moo jikay ma nki jînoomul.’ 10 Ña di kukay ki kûnoomul. Be na kugam kukaye, âbutuwaaw nâriiŋul. Ña ûjuraw uwu kajaalhuwaaku di kunebej di âbutuwaaw umu be kâlundaaya'uku, ban êtingaay di ababi. 11 Piyo maa, buku kânuutuwaaku di kûriiŋul, ña ya kêenul: ‘Annahaanaw, annahaanaw, ûbabuloli!’ 12 Be naaniil: ‘Ma ilobuul malhegen eenuul, înje îmirutuul.’ 13 Ban Jesus naaniil: Aatuba jînanno, mata jîmirut hukahu, palimo poop ewooraay.”Kaliikumaku kata bugorooraabu êhaaji
14 Ban naaniil joon: “Kâyyaku kata hatiya di emitay, koo kugam poop non âynaaw ammi akay êsuk, nâwoolul kugorooraaku katawool ma awuliil wahaw watawool peh wa abaam kusohool. 15 Ma agawiil anoowan nawulool asoh maama aalim âgoroorum. Âtiyaaraw nawulool bampeesaabu bata ûuru bârimmi sîteemeerasu hutok (500), agabutaw nawulool sîteemeer sigaba (200), âhaajutaw nawulool êteemeer yanor (100). Ban nakay. 16 Ña aahu ayaabom sîteemeerasu hutok (500), nakay cab ki alanñoor, nabaj joon baabu bârimmom. 17 Aahu ayaabom sîteemeer sigaba (200) naga mo, nabaj poop baabu bârimmom. 18 Be aahu ayaabom êteemeer yanor (100), nakay ki awok busunabu, ban nañak bo dô. 19 Nagam piyuwe, annahaanaw atayiil nâlaañul ba akayum. Ña di kuleeho di kugorooraaku katawool ma arinkiil mata bancaama'ubu ba awuliim. 20 Ña aahu ata bata sîteemeerasu hutok (500), nâŋarul batawool, âriiŋul naanool: ‘Annahaanaw, aw bampeesaabu bârimmi sîteemeerasu hutok (500) nuwulommi, be baabu boobe bârimmom, ba ilañoorum nibaj.’ 21 Ña annahaanaw umu naanool: ‘Nugawe jak, aw agorooraaw âynenaayaw ajaalhuwaaw. Mata nugawe anaw âynenaayaw di wahaw wiŋetaaw wa iwulim. Moo, mbi iwuli waawu wahammi usoh. Bila ma nki uleehuwa tanor ma ûririgena.’ 22 Ña aahu ayaabom sîteemeerasu sigaba (200), nâkayil âriiŋul naan annahaanaw: ‘Annahaanaw, înje bampeesaabu bârimmi sîteemeerasu sigaba (200) nuwulommi. Be baabu boobe bârimmom, ba ilañoorum nibaj.’ 23 Ña annahaanaw umu naanool: ‘Nugawe jak, aw agorooraaw âynenaayaw ajaalhuwaaw. Mata nugawe anaw âynenaayaw di wahaw wiŋetaaw wa iwulim. Moo, mbi iwuli waawu wahammi usoh. Bila ma nki uleehuwa tanor ma ûririgena.’
24 “Ña aahu poop ayaabom bârimmi êteemeer (100), nâriiŋul naan annahaanaw umu: ‘Annahaanaw, înje nîmire kaan aw nûwulaatiwulaati an, mata ya ujaal ta uroomiñutum, nujollhen poop wahaw ta ûmiim kaan ugoroorut to. 25 Momakiimom nîkoli, ña niwok ma îñoor bo dô, moo boobe.’ 26 Ña annahaanaw umu naanool: ‘Agorooraaw âlhapitaaw, ban nâŋeki. Kama aw nûmire kaan, înje ya ijal tiŋatu ta iroomiñutum, nijollhen poop wahaw ta igoroorutum? 27 Moo, mata wa ma ûŋarutumbom uga di bank, ma mbi îlaañul niyabeen bo boo ma buhantom?’ 28 Ban naan bugorooraabu baabu: Jiyab bancaamabu bûmbaam ba aakum ma jiwuu'bo umu abaam bampeesaabu bârimmi ênjunni (1.000). 29 Mata anaw abaam, mbi abaŋeni ma ahaŋen to, be anaw abajutum, palimo wahaw wiŋet wa abaam, mbi uyabi. 30 Moo, jiraac agorooraaw umu ajakutaaw ubu tîyaŋ di emuucenay ma nki akaaw bo, narum bo kubil.”
Batalenabu bûbanumabu
31 Ban naani joon: “Na mbi Añool Ajamaat âkayil di majaaŋaamu matawool, di kumalaakaku katawool, mbi aleeho di hulhikahu hatiya di emitay. 32 Ma âmeb âmbasuk peh ta ammi, ban nâgiitiil non ma âtekena âgiitem sîgaraniinaasu di sijaameenasu. 33 Ban naga sîgaraniinaasu karebaku katawool kûriraku; sijaameenasu naga so karebaku kumayaku. 34 Ban mbi aan buku kammi karebaku kûriraku: ‘Jîkayil miwuul ja Ampoom awuum hûpiiraahu! Jîkayil ma jileeho di kâyyaku kâbandooraaliyim be bata miwuul kata kaŋ niŋanu na etaamay êwwenim. 35 Mata na bacaarabu busohommi, di jiwulom iri; basibenabu di busohom, di jiwulom isiben; na igam amaasooraaw, di jigawom iwalen saŋuul; 36 na ibajutum ikoko, di jiwulom ikoko; na îjuutum, di kukullhom, di jîkayil bi jiyuugenom.’
37 “Ña bukana'uku kalhegenumaayaku mbi keenool: ‘Ata Emit, kama ûney na ûli ujukim di bacaarabu, nuwuli uri? Nujuki poop basibenabu ma busohim, nuwuli usiben? 38 Ûney poop na ujukim aw ma ugam amaasooraaw, nuŋari be sâŋoli? Nujuki poop aw baakut ukoko, nuwuli ukoko? 39 Ûney poop na ûjuutum, nuyuugeni? Di kukullhi poop, nuyuugeni?’ 40 Ña âyyaw mbi aaniil: ‘Ma iñaaŋenuul malhegen eenuul, nanoonan na jigam wah wakeel be bata buke kahammi mâtiiti kagam kutiyom, înje jigamom.’
41 “Ban mbi aan buku kammi kaŋenool kumay: ‘Jîrangiyom miwuul jammi di kapaawaaku, jikay be di sambun sâbaworiit sabandoorim be bata diyaabu, di kumalaku kata yo. 42 Mata na bacaarabu busohommi, jiwulutom iri; basibenabu di busohom, jiwulutom isiben; 43 na igam amaasooraaw, jigawutom iwalen saŋuul; nilako to bakokowut, jiwulutom ikoko; nîjuut, di kukullhom, jiyuugentom.’
44 “Ña bukana'uku mbi kurinkool keenool: ‘Ata Emit, kama ûney na ûli ujukim aw di bacaarabu, usibenut, nuga amaasooraaw, nulako to bakokowut, nûjuut, di kukullhi, ukaayloot bi ooneni?’ 45 Ña âyyaw mbi aaniil: ‘Ma iñaaŋenuul malhegen eenuul, nanoonan na jigawutum wah wakeel be bata buke kahammi mâtiiti, înje jigawutumom.’
46 “Ban bukana'uku mbi kukay be di hûlaamahu hâbaworiitaahu, ma bukaaku kalhegenumaayaku kukay be di eroŋay yâbaworiit.”