Jesus koo di Zakeew
19
Na Jesus anebeem Jeriko ma ahulh. 2 Di baj âynaaw asaanumom aaneyim Zakeew, oo annahaanaw ata buyabaabu bata buyuupabu. 3 Ya apaam maama mbi ga ma âmir anaw aaneyim Jesus, be ma êsukay ememmi, ban oo narog, mumulet ajukool. 4 Ña natey be kayooŋ, aŋool di buyaajabu baaneyim phigeera ma mbi aali ajukool, mata to ta mbi ahulhum. 5 Mo ma Jesus agam nâriiŋ to, nalhag hatiya najukool, naanool: “Zakeew, ûwalowul cab, mata jaat nîkine iwalen yanŋi.”6 Nâwalowul kaŋ cab, ban nakay kayañuwool di hûririgenahu. 7 Bukanaku poopiil kalakotom di kûŋuŋunoor ma ya kêenul, Jesus akayum kawalen baabu di anaw âlhapitaaw. 8 Zakeew nalhaalo, ma aanool: “Ata Emit, mbi iwul kûsukateenaku tutaru tata husaanumahu hûmbaam. Be ga jaa non niboteene an wah wakeel mbi igatu'wo ñeemo ñabakiir.”
9 Jesus naanool: “Jaat Emitay ehikule yanŋi, mata aw poop nûynene Emitay non Abrawoŋ. 10 Mata Añool Ajamaat mo ma akaymulom bi apaam anaw anepum ma ahikulool.”
Kaliikumaku kata bancaamabu
11 Na Jesus agam nahuute Jerusaleŋ, êsukay ma etalhenem d'oo, di gawiil non kâyyaku kata Emitay mbi kuraŋ no, ña naga kaliikumaku, 12 ma aaniil: “Baje âynaaw asaanumom nakay be êsuk yâraagim ma nki kûyyenllool, ban nâlaañul. 13 Na ammi akay nâgiiter bugorooraabu kunŋen katawool anoowan bancaamabu bayejum, ban naaniil: ‘Jikay ki jîgoroorum bo, be na mbi îlaañul.’
14 “Be bukanaku kata êsukay yatawool kûkintool, ña di kuboñ bukaaku kujeeŋandawool ma nki keeniil kûkint ma âynaaw umu aga âyyaw atayiil. 15 Be di kûyyenllool ban nâlaañul, na ârillom naboñ ma âwoolul bugorooraabu batawool ka añohum bancaamabu ma aali âmir anoowan butum bu na abaam di hulañoorahu ha kugam. 16 Agorooraaw âtiyaaraw nâkayil, aanool: ‘Ây, bancaamabu batayi ba uwulommi boobe. Be hulañoorahu ha igam di bo, nibaje baabu bahammi baabu ba uwulommi be ñeemo kunŋen.’ 17 Naanool: ‘Aw nûwosiye noon bugoroor. Ma ugam wahaw uwe winŋetaaw jak, mbi uga annahaanaw ata kankaku kunŋen.’
18 “Aahu agabutaw nâkayil, aanool: ‘Ây, bancaamabu batayi ba uwulommi boobe. Maama ibaam, be hulanñoorahu ha igam di bo, nibaje baabu bahammi baabu ba uwulommi be ñeemo hutok.’ 19 Âyyaw naanool: ‘Aw poop mbi uga annahaanaw ata kankaku hutok.’
20 “Aahu âhaajutaw naanool: ‘Ây, bancaamabu batayi boobe. Ma îtukubom di eleesaay, 21 nîkoliye kâgoroorum bo mata bûyegetabu batayi bujakut, ya uŋar wahaw wa ugoroorutum, ban ya uŋar muriyaayamu ma ugiitentum.’ 22 Âyyaw naanool: ‘Aw agorooraaw âlhapitaaw! Mbi igawi batalenabu mata wahaw wa uloom. Ma ûmiim kaan înje anaw a êsigiray ejakutum, ya iŋar wah wa igoroorutum, ban poop ya iŋar muriyaayamu ma igiitentum. 23 Mata wa ma ucaasentummi bancaamabu bûmbaam bukan kaaku ma kûgoroorum bo? Non ma ilallom ume nîyabeenuu'bo boo ma buhantom.’
24 “Naan kaaku kajuntom: ‘Jiyab bancaama'ubu jiñoh aahu abaam baabu bahammi baabu ba iwuloom.’ 25 Di keenool: ‘Ây, inja oo nabaje bancaamabu baabu bayejum.’ 26 Naaniil: ‘Ma iñaaŋenuul kaan anaw abaam, mbi abaŋeni, be anaw abajutum, palimo baabu ba abaam, mbi buboti bo. 27 Bûsuumutaabu bûmbaam poop kâkintum ma igaween ây, jiŋalliil be ute, ma jibujiil.’ ”
Jesus najaŋen be Jerusaleŋ
28 Na Jesus aloom umu, ban na ya kayooŋ ma ajaŋen be Jerusaleŋ. 29 Na ahuutum mûsukamu maaneyim Betphaje be di Betaaniya, makotum hurimbiliŋahu haaneyim Oliveyra, naboñ egaba kata di kurebooraaku katawool, 30 aaniil: “Jikay be jîsukaju jammi kayooŋ. Na mbi jiga jinebeje mbi jijuk jimbaamaju ma jikokim ja an ageeluwortum, di jîhelhuu'jo ma jîŋaru'jo. 31 An akeel arinkuul jaa mata wa ma jîhelhumjom, di jeenool: Ata Emit acaasenjom.”
32 Buku ka abommi di kukay kûriiŋ, di kujuk non ma alobiim. 33 Koo ma kûhelhewuum di jo, kata jo di kurinkiil, keeniil: “Mata wa ma jihelhumen di jimbaamaju?” 34 Di keeniil: “Ata Emit acaasenjom.” 35 Di kuŋar jimbaama'uju be baabu Jesus, ban di kulaken dô wañaw watayiil ban di kugawool ageelo jo. 36 Nagam oo ma areesem, bukanaku di kutal wañaw watayiil di buruŋabu.
37 Na kuhuutum bukihikihabu bata hurimbiliŋahu hata Oliveyra, buyooŋabu bata kurebooraaku katawool di kûririgen ma ya kuyeeŋ lhînŋa ma ya kusal Emitay mata miñamu mata sembaasu sata yo ma kujuum. 38 Ma ya kêenul:
“Joone ma usalaal âyyaw a Emitay ebollom!
Kâsuumaayaku kubaje hatiya di emitay. Usalaal Emitay yammi tiŋatu tahammi hatiya.”
39 Kaaku kata di kaasaaku kata phârisewwi kalakotom di buyooŋa'ubu, di keenool: “Alhikitenaawe, ooniil kupato.” 40 Nalaañeniil, aaniil: “Ma iñaaŋenuul, eeniil jaa kupato, siwaalisasu mbi sîŋaaŋulowul.”
41 Na Jesus ahuutum Jerusaleŋ, aŋanden yo keb, ña nañankiit, nakaaw 42 ma âanul: “Awo Jerusaleŋ, aw ûmiremmi jaa wahaw wammi uwuleeni kâsuumaayaku! Be mowme, ooliit unamulen wo, mata ûñooruwi ban. 43 Kukaku kôkareesewuum na mbi kûsuumutaaku katayi kuŋoomeni di wañaw, mbi kumindeni ma kulitenoori tiŋatu pooto, 44 mbi ûbuyo di kuñooli peh, mbi kuwapi kaŋ miririr, keetubi kuwaa'bo hukal hulaken di hupaaho, mata ma umanjutum hukahu ha Emitay ekaylom bi ehikuli.”
45 Na Jesus ârimmi Jerusaleŋ, nakay ki aleeŋo di eluupay yata Emitay, ña nâcuk ma acah di bunoomaabu 46 ma ya aaniil: “Momu ma muŋiicim kaan Emitay yeene: Eluupay yûmbaam, yata kalhawaku, be miwuul di jiga yo tiŋatu ta bûkuutaabu bûñooruwem.”