Jesus oo Betaaniya
12
Na ŋañunom kukaku hutok di hanor ma Paaskuwa êriiŋ, Jesus nakay be Betaaniya baamom ba Laasaru awoom a alhaalellom di kuketaaku. 2 Na ârimbom, di kûlewool sisonna. Be Marta oo ma ya agabiim, ma Laasaru kuri koo di Jesus. 3 Ña Mariya naŋar karaahaaku kata muheeñamu yata nardu yalhegenumaayay, yaputum sûum, ban di eseer noon, âyu di ûkandumaw wata Jesus, ban nâbeesum wo walaw watawool. Ña eluupay pooyo, di eput sûum. 4 Be aahu ata di kurebooraaku katawool aaneyim Judas Iskariyotis, agam ban naŋoon Jesus, narink âanul: 5 “Kama mata wa ma eheeña'uye enoomutumim sîteemeerasu sîhaaji sata praata bi uwulaal kûsukateenaku?” 6 Be Judas ma âlobumom, ntuwa mata ma añankiitum kûsukateenaku, be mata ma agam âkuutaaw, ban oo asohem jimbootaaju jata bancaamabu, ya âkuut baaba kûgawedom. 7 Ña Jesus nâanul: “Jiwalhoo'bo; mata nañake eheeña'uye be nata hulhiimenahu hûmbaam. 8 Mata mbi jilako tanor di kûsukateenaku be nanoonan, be înje ootubi ulakuwaal tanor be nanoonan.” 9 Ña na jûdewwi kameeŋe kûmiim kaan Jesus omu dô, ña di kûkayil be to, be ntuwa keb mata Jesus, be poop mata jajukaju jata Laasaru a alhaalellom di kuketaaku. 10 Ña yahaanay yata bumaaŋenaabu bata Emitay, di kunuur mata jabujaju jata Laasaru; 11 mata ma jûdewwi kameeŋe kûynemmi Jesus matawool, ma kuwalhii'bo.
Jesus nanebej Jerusaleŋ
12 Na jaley atitijemmi, buyooŋabu bata bukanaku kakaylom Paaskuwa di kujam kaan Jesus ômakayeyuum be kâlundaayaku Jerusaleŋ. 13 Ña di kuŋar ugasaw wata sibekelasu ma kûcaalh ki kupam d'oo, ban ya kûŋaaŋulo ma ya kêenul: “Osaana! Usalaal âyyaw ata Israyel akaylom di kañaaŋaku kata Ata Emit!”
14 Ña najuk jimbaamaju, nageelo jo non ma demmi ma eŋiici kaan:
15 “Êsukay yata Siyoŋ, aatuba jîkoli,
mata âyyaw atawuul oome ma ageelowulom jimbaamaju!”
16 Be nownu kurebooraaku katawool kunamulent wahaw uwu, be na Jesus âyyenim, ña nkit di kuwolho kaan maama kugawoom, moomu kaŋ ma muŋiicim matawool.
17 Bukanaku kalakotonom na Jesus alhaalellom Laasaru di kuketaaku ma agawool âcaalhul di êluŋay, di kuyeeŋen mo di êsukay kaan Jesus alhaalellom Laasaru di kuketaaku. 18 Momakiimom na kujammi kaan mo ma Jesus agam miñamu mata sembaasu sata Emitay, ña buyooŋabu bata bukanaku di kûcaalhul ki kupam d'oo. 19 Ña phârisewwi di kêenul: “Jijuke, mowme ooliitaa'ban ugawaal makeel, mata êsukay peh kukaye ban kujeeŋandawool.”
Bukan kaaku kagam greegu di kûkin kujuk Jesus
20 Be di bukana'uku kakayum ki kûbinken Emitay di huka'uhu hata kâlundaayaku, bukanaku kaaku kugawut jûdewwi. 21 Ña di kukay ma nki kujukoor di Philiipi,a ata di êsukay yata Betsayda yata bantaabu bata Gâlileeya, kûriiŋ di kulhawool ma keenool: “Annahaanaw, ûli nûkine ujuk Jesus.” 22 Ña Philiipi nakay ki aloo'mo Andre, ña buko egabaay di kukay ki kuloo'mo Jesus. 23 Ña Jesus naaniil: “Malhegen tîriiŋe ma Añool Ajamaat âyyeni. 24 Ma isalhenuul eenuul, husepeyahu hata emaanaay hulo jaa di etaam, ban hûpumbuloot, di hulako to diyonho, be hûpumbuu'jaa, mbi huwolh sututut. 25 Anaw âkimmi eroŋay yatawool, mbi âbuu'yo, be anaw alatum eroŋay yatawool ute di etaama'uye, mbi abaj eroŋ yâbaworiit. 26 Anaw âkimmi agoroorom, nasoolhellom, mata ta înje mbi ilako, agorooraaw umu poop ûmbaam, mbi alako to. Moo, anaw agoroorommi, Ampawom mbi asalool.
Jesus nalob mata eketay yatawool
27 “Mowme bûyegetabu bûmbaam bulee'ma bûsummi kaŋ kuur. Ña mbi êenu'bu? Mbi êenuu'pîya Ampawom amellhenom di hûlaama'uhe? Iyiy. Mata mo ma ikaymulom be di etaama'uye. 28 Ampoom, uga kañaaŋaku katayi ma kusali.” Ña hurimahu di hûcaalhumul hatiya di emitay hammi: “Nîyyenoo'ban, mbi îyyiylankenool joon.”
29 Ña buyooŋabu bata bukanaku kalakotom kajammi hurima'uhu, di kêenul kararanjuunaku. Be kaaku di kêenul amalaakaw omalobulom d'oo. 30 Be Jesus naaniil: “Hurima'uhe ha jijammi, hukaymuloot mata înje, be matawuul hukaayumulom. 31 Mowme hukahu hata batalenabu bata etaama'uye hûriiŋe; moo âyyaw ata etaama'uyeb nare ban kacahi d'oo. 32 Mata na mbi ilhaalenlli di etaam, mbi îñakul bukanaku peh be baabu d'înje.” 33 Jesus ma aloom umu, oo âyisem di êsukay maama mbi aket.
34 Ña buyooŋa'ubu bata bukanaku di keenool: “Ûli nujame kaan kûboñaku kâtooli keene, Kristu mbi alako to be nanoonan; moo mata wa nôonul Añool Ajamaat, mbi alhaaleni? Kama aymoom agam Añool Ajamaat?” 35 Ña Jesus naaniil: “Majaaŋaamu muroŋ ute di miwuul kuka'uke; moo jirees di majaaŋaamu ka mbi emuucenay esohuul, mata anaw areesem di emuucenay, âmiroriit ba areesem be. 36 Moo ma jirommi di jibaj majaaŋaamu, jîynen mo, ma mbi jeeli jiga bukanaku kata mo.” Na Jesus aloom umu, ban nakay ki âñooruwiil.
Jûdewwi kûynent Jesus
37 Be Palimo ma Jesus agam miñamu mata sembaasu sata Emitay lhay ma kujuk, be kûynentool poop; 38 ma meeli muga non ma añaaŋenaaw ata kûboñaku kata Emitay aamom Isayiyas aloom âanul:
Ata Emit, aymoom âynemmi elobay yatoolaal?
Aymoom poop amanjum sembaasu satayi?
39 Momakiimom ma kêeliitummi kûynen, mata Isayiyas moo naloom joon âanul:
40 “Yoo egawiim kûpuum,
di elhook poop uynumaw watayiil;
ma aatuba mbi kujuk, keetukanamulen poop, ma aatuba mbi kuwatatenooro,
di ebuuneniil.”
41 Isayiyas ma aloom umu, mata ma ajuum jâyyenaju jata Jesus, mo ma âlobummi matawool.
42 Be palimo moo, yahaanay yata jûdewwi kameeŋe di kûynen Jesus, be di kûkoli kaga ma bukanaku kûmii'mo, ka mbi phârisewwi kucah di buko di eluupay yata kâmebooraku katayiil. 43 Mata ma kuhammi mâkin kasalaku kata ejamaatay ma kuwaa'bo kata Emitay.
Jesus ehikitenumay yata etaamay
44 Ban Jesus nâŋaaŋulo ma âanul: “Anaw âynenommi, untuwa înje nâynemmi, be anaw abollommi nâynemmi. 45 Anaw ajukommi, najuke anaw abollommi. 46 Înje majaaŋaamu makaylom be ube di etaamay, ma an peh âynenommi, aatubi alako di emuucenay. 47 Be anaw ajammi elobay yûmbaam, ban agawut non ma eloom, eetubi igawool batalen, mata akayloot bi iga êsukay batalen, be îkayil bi ipakeniil. 48 Moo, anaw alatommi ma ayabut elobay yûmbaam, anaw omu to ban a mbi agawool batalenabu; elobay ya iloom yo ya mbi egawool batalenabu di hukahu hûbanumahu. 49 Mata elobay ya iloom, ekayumuloot d'înje, be Ampawom abollommi omawulewommi wahaw wa mbi ilob, di poop waawu wa mbi ilhikiten bukanaku. 50 Ban nîmire kaan, elobay yatawool ya ega an abaj eroŋay yâbaworiit. Mata wah kaŋ peh wa ilobem, wo wa Ampawom añaaŋenewommi ma ilob.”